Kolokol dahme Wekdeklahr
Pwehki Sises Krais, kitail alehier kakehlail en wiahda wekdekla poatopot. Ni atail pahn aktikitikla oh sohpeilahng Kauno, E pahn ketin kalaudehla atail koahiek en wekila.
Riei lih akan, udahn ehu songen kaperen ai patehng kumwail.
Na medewe aramas emen ah pahn kohla ni wasahn netinet ehu pwehn pwainda mehkot. Ma liho pwainehng tohn doadoahko uwe iou me laudsang pweinen dipwisouo, tohn doadoahko pahn kiheng luwen nah mwohnio.
Nahnmwarki Benjamin padahkiong nah aramas akan nan Amerika mahso uwen laud en kapai kan me kitail aledihsang rehn Sounkomour, Sises Krais. E ketin kapikada lahng, sampah oh soahng koaros me kaselel me kitail kin linglinganiki. 1 Pwehki Sapwellime Tomwo, E ketkihda ehu ahl pwehn doarekitail sang dihp oh mehla. 2 Ni atail kin kasalehiong atail kaping kalahngan ong Ih sang ni atail kin momourki Sapwellime kosonned akan, E kin ketin kapai kitailda, kitail eri kin wie momour nan Sapwellime kalahngan.
E ketkiong kitail soahng kei, me laudsang dahme kitail kak kapwurelahng Ih. Eri, dahme kitail kak kihong Ih, me ketin pwaindahr dipatail kan? Kitail kak kihong Ih mehn kaweliali Kitail kak kihong Ih atail mehn kaweliali E kakete wekdeklahn atail madamadau, wekdeklahn dahme kitail ahnlahr, de wekdeklahn wasa kitail kohkohlaie. Pwehn pwainehng Sapwellime kupwur sapan ong kitail, Kauno ketin kupwurkihte kitail en wekidehng atail mohngiong. Wekila me E ketin kupwurki sang kitail kaidehn ohng kamwahupen Ih ahpw ohng kamwahupatail. Eri, nin duwen eh sohte duwehte soun netineto ni markedo me pahn ale luwen mwohni me kitail kiheng, atail Sounkomour sapano kin kupwurki kitail en kolokol luwen mwohnio.
Mwurin arail rong mahsen sang Nahnmwarki Benjamin, sapwellime aramas akan sengiseng, kaskasalehda weklahn arail mohngiong kan ndinda, “Pwehki Ngehn en Kauno me karehda wekdekla laud wet mie loalat, … se solahr pahn wiahda dihp, ahpw se pahn wihwiahte me mwahu kohkohlahte.” 3 Iren pwuhk sarawi kan sohte masanih me irail mwadangete unsekla; ahpw, arail inengieng en wekila me karehda arail mwekid. Wekdeklahn arail mohngiong me karehda arail pwlikihdi pein irail oh nantihong pwe irail en duwehla Sises Krais.
Presiden Henry B. Eyring padahngki: “Wekdekla mehlel kin kohsang ni saledek en rapahki ni pwoson, kak koaros oh medekla. Eri Kauno kelehpw me kak ketkihdo … manaman en kamwakelehda oh wekidala.” 4 Kapatahieng atail kak oh Sapwellimen Kauno sawas en wekid kitaila, kitail kin wiahla aramas kapw kei.
Ansou me I pwulopwul, I medewe me I alialu wasahkis me ukada, inen kolahng nan ahl en mour soutuk me I koasoanehdi. Ansou koaros me I kin wia de nda mehkot sapwung, I kehn me I kirkirisdihsang pohn ahlo, ngehi eri pil pwurehng tapiada ahi seiloako. Duwehte ahmw doudahng pohn ahn serihkan mehn mwadong Chutes and Ladders me ke pahn kiris sang powe kowe pil purala wasa ke tepsangiehu. E kasapwurupwur! Ahpw ni ansou me I wehwehkihda dahme Nipahi koasoia me pid duwen padahk en Krais 5 oh iamwomwen ahi pahn doadoahngki nan ahi mour rahn koaros, I diar koapworopwor.
Sises Krais ketkiong kitail wiepen atail pahn kin wekwekla. E ketin lukeikitail en kin doadoahngki atail pwoson Ih, me pahn kihong kitail ineng en—“pwoson oh koluhla pahn wekidala atail mohngiong kan.” 6 Ni atail kin koluhla oh wekid atail mohngiong kan ong Ih, kitail kin inangiada laud en wiahda oh momourki inou sarawi kan. Kitail kin tengetengedi lel ni imwi ni atail kin poden momourki koasondi pwukat erein atail mour kan oh lukluke Kauno en wekid kitailla. Dadaurete lel imwi wehwehki wekiwekila lel ni imwio Met I esehier me I sohte pwurehng tepda sang soahng kan me I sohte pweida loale, ahpw ni ahi kin songosong wihwia dahme pahn wekidiehla.
Mie ire kesempwal ehu nan en Serepein Pwulopwul kan oaralap me koasoia, “I kesempwalki kisakis en koluhla oh pahn nantihong keirda nan ehu ehu rahn.” 7 I kapakapki me kitail pahn kesempwalki kisakis kesempwal wet oh kitail pahn nantihong wekila. Ekei pak wekila me kitail anahne wia kin pidada dihp kosukloal kan. Ahpw me kalap wiawi,, kitail kin nantihong en kamwakelehda atail wiewiahkan pwehn kainene peinkitail ong wiewia en Sises Krais. Atail pilipil nan ehu ehu rahn kak sewese de kahpwalahla atail keirda Tikitik, ahpw tengeteng, wekwekdekla wawai kak seweseikitail en keirda. Kumwail dehr luwetala. Doadoahk en wekila pahn wihwiawi erein mour. I kapingki pwehki ni atail kin nannantiong en wekila, Kauno kin kanengamahieng kitail.
Pwehki Sises Krais, kitail alehier kakehlail en wiahda wekdekla poatopot. Ni atail pahn aktikitikla oh sohpeilahng Kauno, E pahn ketin kalaudehla atail koahiek en wekila.
Pwehn patehng Sapwellimen Sounkomouro manaman en Tomwo me kin wekid kitaila, Ngehn Sarawio pahn seweseikitail oh kahlwaikitail ni atail wia atail kak koaors. E kak ketin sewesehkin kitail soangen wekdekla dah me kitail anahne wia. Kitail pil kak ale sawas oh kakehlapatail sang ni kapai en prihsduhd, kapakap, kaisihsol, oh kohla nan tehnpas sarawi.
Duwehte tohn atail peneinei me kitail koapworopworki, sounkaweid kan, oh kempoakepahtail kan kak en seweseh kin kitail atail kak en wekila. Ni ansou me I sounpar waluh, riei pwutak laud, Lee, oh ngehi se kin patehng kempoakepaht akan kin mwadmwadong seli nan rahntuhkeh kan. Se kin pereniki ehuong kempoakepaht akan mwadmwadongseli pahn mwetehn tuhkeh kan. Ehu rahno Lee pwupwdisang nan tuhkehu oh kawehla pehu. Pwehki pehu ah ohla e kin apwal ong en pein douda nan tuhkehu. Ahpw mour me mihn nan tuhkeu e sohte duwehte ni ansou me kin mih mwohu. Eri, ekei kiht kin pwokada ah ekei kin waikada peh pali mwahuo—ekiste kisin sawas—Lee mihier nan tuhkehu. Peho ohla, ahpw e pil pwurehng patehng kempoakepaht akan lao ih mwahula.
I kin kalap tamanda dahme I esehla mwomwen aht kin mwadmwadong nan tuhkeh kan eh duwehte songen kemwekid kan en rongamwahu en Sises Krais. Pahn mwetehn rahntuhkehn rongamwahuo, kitail kin alehdi kapai tohto me kin sewese atail inou kan. Ekei kakete pwupwisang nan doarepen arail inou sarawihkan oh anahne atail sawas en pwurehng douda wasa re kak pitila ie nan rongamwahu wet. E kak apwal ong irail en pein pwurodo. Kitail kak uhdi mahs met oh kodahla mahs mwoh oh sewese oh kamwahuihraila isaniki arail perepereniki atail wia.
Ma kumwail ohkihla amwail pwupwidi, menlau mweidehng mehteikan en sewesei kumwail pwe kumwail en kak pwurehng amwail inou kan oh kapai peh kan. Kumwail kak mwahula, kumwail kak wekila, sang irail me poakong kumwail kan arail kin kapel kumwail pene.
Ekei pak I kin tuhong kempoakepahi kan me I kin sohla kilangkin irail sounpar kei. Ekei pak irail kin nda, “ke sohte wekila!” Ehu ehu ansou me I kin rong met, I kin komwotik, pwehki I koapworopworki me I wengkilahr erein sounpar kei. I koapworopworki me I wekilahr sang aio! I koapworopworki me I ekis mwahula, sohla kin kadeik, oh laudla ahi kadek. I koapworopworki me I mwadangehngala tehkada ahn mehteikan anahn akan, oh I koapworopworki me I ekiste kanengamahla.
I kin pereniki alu reirei kodahla pohn dohl akan karanih imweio. Ekei pak, takai kin kohlong nan ahi suhto ansou me I kin alialu. Oh, I kin uhdi oh kihsang takaio nan ahi suhto. Ahpw I pwuriamweiki uwen reirei en ahi kin alialu nan medek lau I uhdi oh kihsang dahme kamedekeieilahro.
Ni atail seiseiloak pohn ahl en inou, ekei pak kitail kin ale kisin takai kan nan atail suht kan me rasehng dihp kan, de mwekid suwed kan. Iawen mwadang en atail kihsang soahng pwukat nan atail mour, ih uwen laud en peren oh men nananti nan seiloak wet pahn pweida.
Wekwekila kin anahne mwekmwekid. I sohte kak medewe I en uhdi pohn ahlo oh kapwurehieng nan ahi suhto kisin takai me I ahpwtehn kihsango. I sohte men pwurehng wia soahngo sang ni ahi men duwehla lipahrourou men me kin pilada pwurala nan dewe.
I kadehdehki me pwehki Sises Krais kitail kak wekila. Kitail kak weliakapwi atail wiewiahkan, wekid atail madamadau kan, kamwahuiala atail wiewiahkan pwehn duwehla Ih. Oh sang ni Sapwellime sawas, kitail kak kolokol dahme wekdeklahr. Ni mwaren Sises Krais, amen.