Koht Pahn Ketin Wia Mehkot Kopwuriamwei
Koht ketin kaunopdahr Sapwellimen seri kan oh Sapwellime Mwomwohdiso ong ansou apwal pwukat.
Mwurinte arail lehla ni Wahu en Salt Lake, Souleng en imwen rahn akan ahpw tapiada kawada arail tehnpas sarawi. Irail pehmada me re diarehr wasa me re kak kaudokiehng Koht ni meleilei oh sohte kalokepe.
Ahpw, ni ansouo me poahsoan en tehnpas o kereniengehr pahn nekla, pwihn en sounpei en United States pa samwadohr pwehn kihda emen kepina kapw.
Pwehki kaun en Mwomwodihso sohte wehwehki ahn pwihn en sounpeio arail koasoandi, Brigham Young ahpw ruwese Souleng ko ren kommoal doahdoahk oh saripidi poahsoan en tehnpaso.
Ele ekei irail tohn Mwomwodihso medewe laudki dahme karehda arail doahdoahk laud pwehn kawada Wein Koht kalapw sohte pweida.
Mwurin ansou kis, kapwalo ahpw meleileidi, irail eri sarepada oh dawihseli poahsoano. Eri ih ansou me irail soun wia ihmw ko ahpw diarada duwen ekei takai en pwukekeimw ko arail palpesengehr, karehda ahr sohte mwahu ong poahsoan.
Eri, Brigham pil ehu wiahda poahsoan o pwehn kak kolokol takai lap kan me wiahda1 mahs liken tehnpas lingan en Salt Lake o.2 Eri, ih ansou me Souleng ko kakehr koulki koul en “Poahsoan Tengeteng”3pwehki irail ese me arail tehnpas sarawi koukouhdar pohn poahsoan ehu me pahn kehlail erein dih tohto.
Soai wet kak padahkiheng kitail duwen Koht ah kin ketin doahdoahngki ansou apwal kan pwehn kapwaiada sapwellime kupwur.
Soumwahu Dou nan Sampah pwon
Ma soai wet mwomwen duwehte kapwal en nan atail mwei et, aki ih pil duwen atail mwei.
Ele koaros me wia rongorong de wadawadek ahi tungoal mahsen pwukat kenehr duwen kapwal en soumwahu wet.
Ong irail akan me mwahiei ki mehlahn tohn arail peneinei de kempoakepahrail kan, se poakepoakekumwaildahr. Se peki rehn Samatail Nanleng en ketin koaloaloamwahuih oh kakehlailikumwailla.
Lipw suwed en soumwahu wet me kaidehn ongete roson en pwaliwar. Peneinei tohto sohlar ale pweipwei, sohte kak pwain kenarail mwenge, re pwunod oh saloh. Se wauniki tohnmetei en irail akan me kin nantiheng kauhdi kohkohpeseng en soumwahuo. Se pil wauniki tohnmetei oh doahdoahk laud en irail akan me iang sewese, kakehlailih, oh utuhng me soumwahu kan. Aht tungoal mohngiong kan dihrekihlar kaping pwehki amwail kadek oh limpoak.
Se kapakap laudki Kauno Koht en ketin ritingadahng kumwail wenihmwtok en nanleng pwehn kamweredihong kumwail sapwellime kapai soutuk kan.
Kitail Wia Weren Tuhke Kei
Lel met mihete soahng kei pid soumwahu wet me kitail sohte wehwehki. Ahpw ehu me I udahn ese, iei soumwahu wet e sohte kopwuriamwei ih Samatail Nanleng. E sohte pil mwadangete ekerpene ekei pwihn en tohnleng oh mihtingki, de ale ekei pwihn en tohnleng me pwukaohki wiahda sampah pokon ahpw kiheng irail arail pwukoah kapw pwehki kapwal sohte kasikpe wet aphw pwarada.
Ahi tungoal pakair en rahnwet iei mehndahte ma kitail soht kasik de pereniki soumwahu wet, Koht ketin kaunopdahr Sapwellime seri kan oh Sapwellime Mwomwodihso ong ansou apwal wet.
Ehi, kitail pahn powedi. Ahpw kaideken kitail pahn ngalispenehte tih karakar, kanengamah, oh awiawi iahd me soahng kaoros pahn pwuralahng koasondi mengei en mwowesang, soh. Kitail pahn wonowei mwowe, oh pahn kehlailkihda.
Ni karasape, kitail duwehte weren tuhke kei. Oh ma weren tuhke ehu pahn pweida mwahu, e anahne seridi mahs mwohn eh pahn kak ohspeseng. I kadehdehki me mehdahte ma ekei pak kitail mwomwen seridi pahn kapwal kan en mour wet de rotorot mwomwen kapilkitailpenehier, limpoak en Koht iangaki kapai kan en rongamwahu kopwurupwurdo en Sises Krais wet pahn kaohsada mehkot kopwuriamwei.
Kapai kin Kohsang Kapwal
Dih koaros lelehngehr ansouhn lokolok oh kapwal.
Enok oh sapwellime aramas akan wia momour nan ansouhn dipw, mahwin, oh kamaramas laud. “Ahpw Kauno ketdihdo pwehn ket rehn sapwellime aramas akan.” E kaunopadangirailehr mehkot kopwuriamwei. E ketin sewese irail en kawada Saion—pwihn en aramas kei me “ahneki mohngiong ehute oh madamadauteiu” me “direkihla pwung.”4
Soseph, Nein Seikop pwutak pwulopwul men, kesehdiongehr nan ehu pwoahr, netla pwehn wiahla lidu men, pengipengla, oh manokonokala.5 Mwein Sosep pil lemekihda me Koht likidmelielahr ih. Koht kaunopdangehr Soseph mehkot kopwuriamwei. E ketin doahdoahngki ansou apwal wet pwehn kakehlailih en Sosep ah lamalam oh ketkiheng ih nan irair ehu pwehn kapitala ah peneinei.6
I pil medewe Soukohp Sosep Smid ni e selidi nan imweteng en Liberty, duwen ah kin kapakapki sawasapen Souleng kan me wia lokolok. Ele e kin medewe laudki ia mwowen Siaon ah kak koukouhda nan soahngen irair apwalo. Ahpw Kauno ketin koaloalamwahuih, oh ketkiheng kaudiahl lingan ehu me pil koaloalamwahuih Souleng ko—oh lel met e pil kin koaloalamwahuih komwi oh ngehi.7
Nna soahng medewe pak depe ni ahn Mwomwodihso en Sises Krais en Souleng en Imwen-rahn akan ah tepin kokouda me Souleng ko lemeda me Koht likidmeliehirailla? Ahpw mendahte lokolok, kapwal de koasaipen arail pahn kamamala, Kauno Koht en Israel kaunopadahr koasoandi ehu ong sapwellime amaras akan. Koasoandi kopwuriamwei ehu.
Dahme kitail kak koledihsang karasaras wet—oh kidalap en karasaras teikan nan neitail pwuhk sarawi kan?
Keieu, me aramas mwahu sohte kak pitsang ansou apwal kan. Kitail koaros pahn weid nan irair apwal kei, pwe iei nan ansou apwal pwukat me kitail pahn esehla padahk kan me pahn kakehlailih atail lamalam oh karehieng kitail en kerenihla rehn Koht.
Keriau, Samatail Nanleng kin ketin mwahngih duwen atail kin lokolok, oh pwehki kitail wia sapwellime seri kan, E sohte pahn likidmeliehkitailla.8
Nna song medewe Ih me direkihla limpoak, iei Sounkomouro, ni E ketiket pohn sampah E kin kalapw papah me soumwahu, me pahtou, me saloh oh me selikihr. 9 Kumwail lemeleme me e sou kesemwpalikin kumwail duwehte irail?
Iengei kesempwal kan, riei ohl oh lih akan, Koht pahn ketin apwali oh kahluwa kumwail erein ansou apwal oh kamasepwehk pwukat. E ketin mwahngih ihs kumwail. E kin ketin karonge amwail kapakap akan. Ih me ketin loaloapwoat oh mehlel. E pahn ketin kapwaiada sapwellime inou kan.
Koht ketin kaunopadahr mehkot kopwuriamwei ong emen emen kumwail oh pil ong Mwomwodihso wet—doahk kopwuriamwei oh lingan ehu.
Se Kapingkiheng, Koht, Pwehki Soukohp
Rahn keieu kaselel kan mihmihte mwohtail, ah kaidehn mwuratail. Ihme Koht kin ketkidohki kaudiahl nan atail mwei! Ma sohte, eri kitail pahn duwehte sompihr ehu me wia pidpidahkihte wasahn sompihr, awiwaihte edied en sohrala pwe kitail en kak peidi ni sohte kapwalpe. Kupwur en Kauno ong emen emen kitail me inenen en laud sang mwo. Pwehki met iei Mwomwodihso en Krais ieias, oh pwehki Ih me kin ketin kaweidki sapwellime soukohp kan, kitail wia soksokala mwowe kohkohdahlang wasah kan me kitail saiknte lella ie, oh ia uwen lingan en wasahu kitail pil sohte kak medewe!
Ahpw, met sohte wehwehki me kitail sohte pahn lelehng ansouhn melimel nan atail seiloak en mour wet. E sohte pil wehwehki me weratail sompihr et pahn sohte ohla de sapwungala, de ang suwed sohte pahn lelehdo. Pwe ni mehlel, e kakete suwedla mwohn ah pahn mwahula.
Ni ei wia pwailet en sounpei oh kapden nan eirlain men, I esehla me I sohte kak pilada soangen kapwal dah me I pahn lelehng na sompihr, ahpw I kak kaunopida oh pilida dahme I pahn wiahieng. Ansouhn kapwal kin anahne kitail en meleileidi oh ahneki koapwoaropwoar.
Ia duwen atail kak wia met?
Kitail en pohnese dahme mehlel oh pwuralang tepen padahk kan en rongamwahuo, iei dahme keieu kesempwal. Kitail en kakehlaka atail mour en souleng—rasehng kapakap, onopki pwuhk sarawi kan oh kapwaiada sapwellimen Koht kosonned akan. Wiahda amwail pilipil kan nin duwen dahme kin pweida sangete mahso.
Nantiheng wia dahme kumwail kak ah ieremen pwunodiki soahng kan me kumwail sohte kak wia.
Kautihengada amwail pwoson. Oh karonge mahsen en kaweid me kin ket sang rehn Kauno oh sapwellime soukohp kan pwehn kahluwa kumwail.
Tamataman, met iei Mwomwodihso en Sises Krais—Ih me ketin kakaun.
Medewe duwen kaweid kamarain tohto me koheing kitail sangete sounpar eisek samwalahro lel met. I pahn sairte ekei:
-
Kaweid koheingkitailehr duwen kamadipw sarawi ah wia doahk keieu kesempwal nan atail kaudoak en rahn en Sabad.
-
Pwuhk en Come, Follow Me wiawihda pwehn wia men kakehlaka aramas oh peneinei kan me tep sang nan ihmw oh utungpe me kohsang rehn mwomwodihso.
-
Kitail pil alehdier kosoandi kapw pid doahdoahk en papah aramas koaros.
-
Tohn Mwomwodihso kan tepehr doahdoahngki interned pwehn wia doahdoahk en Kouno oh ehukiheng meteikan duwen rongamwahuo.
Ah pil tihpene lap wet pahn sohte kak pweida ma sohte dipwsou kaselel en interned.
Riei ohl oh lih ako, pwehki Krais me kakaun, soahng kaoros pahn sipelela mwahu e pahn lingan kopwuriamwei.
Doahdoahk en Kapilpene Mehn Israel kan Wia Kohkohda
Ni en soumwahu wet ah tepido e mwomwen pahn kerempwa doahdoahk en Kauno. Ni karasape, wiepen ehukieng meteikan duwen rongamwahu me kitail kin doahdoahki mwowehsang sohlar kak wiahwi. Ahpw pwehki soumwahu wet, wiepe kapw oh kaselel kei pa pwarada pwehn ehukieng irail akan me nan mohngiong karakarak. Doahdoahk en kapilpene mehn Israel kan wia lalaudla on kehlailla. Soai kid kei pil kasalehda met.
Emen kompoakapai me kin mih Norwei intinglahng ngehi oh Harriet duwen tohtohlahn aramas me inangih iang pepdais. “Nan wasa kan me atail Mwomwodihso tikitikte,” eh dene, “sin lepen tuke kan pahn wiahla prans oh prans kan pahn wiahla ward kei!!”
Nan Ladpia, uwen lih emen me rongada duwen Mwomwodihso wet nan interned ah perenkida duwen eh kak esehla duwen rongamwahu en Sises Krais ih eri mwadangala ni mihting en tuhwong misineri kan awa ehu mwohn mihtingo pahn tep, oh mwohn misineri ko kanekehla arail padahk liho ahpw pekihda iahd me e kak pepdais.
Nan Palimesen Iurop, misineri ko koahlda emen lih ih eri sapeng nda “serepein oko, dahme kumwail pwand en koahlki? Pwe I wia awiawi!”
Tohtohn neitail misineri kan kin kedirepw sang mwoweo. Tohto pil wia padpadahkieng aramas ngeder sang mwoweo. Miniminpenehn misineri kan oh towe kan pil wia kekehlaila.
Mwoweo, kitail mwein kin nohn kedirepwki wiepen doahdoahk en misineri teiko ah soumwahuo ahpw kadaiala atail madamadau. E duwehte kitail wia koadoahdoahki paohsoan ehu me luwet ni ahn takai kehlail kei miehier, kitial ahpw sohte tekada. Pwehki irair kapw wet, kitail wia esihesehla duwen atail pahn doahdoahngki soangsoang en wiepe kei, iangaki interned, pwehn luke aramas—ni mwohmw ehu me mengei—pwe irail en kak kohdo kilang, kohdo sawas, oh kohdo patehng.
Sapwellime Doahdoahk, Nin Duwen Sapwellime Kupwur
Met iei sapwellimen Kauno doahdoahk. E kin ketin lukei kitail en diarada sapwellime wiepen doahdoahk, oh e kakete weksang dahme kitail ahnla kin wiewia.
Met wiawiong Saimon Peter oh tohnpadahk teikan me kohla laid ni Sehd en Daibirias.
“A nipwongo re sohte saikedi mehkot.
“A ni eh rahnpeseng, Sises ahpw ketiket ni oaroahro. …
“E ahpw mahsanihong irail, “Kumwail kadaridi uhken ni [palimaun] en waramwailen; a kumwail ahpw pahn diarada.”
Irail eri kadaridi uhko oh re “ahpw sohla kak apihada, pwehki eh direkihla mwahmw.”10
Koht ketin kapwarehdahr oh pahn kin ketin kapwareda lime sarawio. Ehu rahn kitail pahn medewe duwen ansou wet oh ese me erein ansou apwal wet, Koht kin sewese kitail diarada wiepe kapw kei—iei sapwellime wiepe— pwehn kawada sapwellime wehi pohn poahsoan kehlail ehu.
I pilikihdi pohmwail ahi tungoal kadehde duwen doahdoahk wet ah wia sapwellimen Koht doahdoahk, oh duwen E pahn ketin kapwarehda mehkot kopwuriamwei ong Sapwellime seri, iei Sapwellime aramas akan. Koht kin ketin kolokol kitail ni lime me direkihla limpoak oh mahk.
I kadedehki me Presiden Russell M. Nelson wia Sapwellimen Koht soukohp en rahn pwukat.
Nin duwen ahi wia emen sapwellimen Kauno Wahnpoaron, I pilikihdi pohmwail ahi tungoal luk oh kapai pwe kumwail en kak “wia uwen amwail kak koaros ni popohl; pwe mwuri kumwail ahpw kak kommoal oh likih ni unsek duwen Koht ah pahn ketin komourala sapwellime kan, oh duwen lime ah pahn sansalda.”11 Oh I pil inouki me Kauno pahn ketin kapwarehda mehkot kopwuriamwei sang ni amwail wiewia mwahu kan. Ni mwaren Sises Krais, amen.