Mwekmwekid Kohla Mwowe
Doadoahk en Kauno wie doudoulahte mwowe.
Riei ohl oh lih akan, ia uhwen kaperen en atail pil tapiadahr ke190 en Kapokon Lap en Mwomwohdiso en Sises Krais en Souleng en Imwin Rahn-akan. I pereniki atail kak patpene nan imwamwail kan de wasa teikan pwe kitail en karongepene padahk kan sang soukohp kan, ohl sarawi kan, sounkihda kaudiahl kan, oh sounkaweid teikan en Mwomwohdisoht.
I kaping kalahnganki dipwisoun doadoahk kaselel kan me kadokeikitail penehr nan kapokon en tohnpadahk kan en Sises Krais nan sampa. Uwen aramas me iang kilang kapokon lap en Epreil samwalahro tohtohsang mehlel mehn mwoweh kan, oh se kasik me met pil pahn pwurehng wiawi.
Nan irair en sounpwong en mwowe ko, soumwahu lusulus ehu, kisiniei laud oh kahpwal laud teikan pil kapingadahr sampa pwon. I iang kumwail eimwoluhki koaros me mie arail peneinei kapelsalehdalahr nan ansou wet. Oh I kapakapki koaros me patpato nan kahpwal nan ansou wet.
Ahpw, doadoahk en Kauno wie doudoulahte mwowe. Nan eilepen irairdi en kapokon kan, masuku kan, oh mihting nan inderned, kitail esedahr mwomwen atail kak wia atail doadoahk mwahu oh idipek. Ansou apwal kan kin kahrehdo wiepe kaselel kan.
Neitail misineri kan oh kaun en misin kan wialahr aramas koahiek, dingang, oh inenen mwahu kei. Tetehn misineri kan kin anahne diarada wiepen doadoahk me kapw, widingek pwehn kak wia arail pwukoah, misin tohto pakairki me irail wia kasukuhl laud sang mahs.
Se anahne ritingedi tehnpas sarawi kan ki ansou kis, oh ekei doadoahk lap akan pil kapwandala, ahpw met mehkoaros wie mwekmwekid kohla mwowe. Nan kalander en pahr 2020, kitail pahn katapiada doadoahk en tehnpas sarawi 20.
Doadoahk en poadoapoad en peneinei pil pweida laud mehlel. Tohto ward oh sdeik pil koukoudahr. Oh se pil pereniki aht repwohtki me Mwomwohdiso kidahr sawas ong doadoahk 895 nan wehi 150 me pid soumwahu lusuluso.
Kasukul en rongamwahuo me wiawi rehn peneinei tohto pil kakehlailiala kadehde kan oh ehupenehn peneinei kan. Emen nohno ntingi: “Se pepehm me se karaniala nait seri kan oh nein nait kan ni aht kin pokonpene pohn inderned rahn Sarawi koaros. Emen emen kin kasalehda ah lamalam kan me pid Come, Follow Me. En tohn peneinei arail kapakap kan pil wekila pwehki aht wehwehkihla dahme irail anahne.”
I kapakapki me kitail kin wie doadoahngki ansou mwahu kiset pwehn kakairada palingenitail. Kitail mihmi pohn sampa pwe kitail en ale kasongosong, pwehn kilang ma kitail pahn pilada idawehn Sises Krais, kin kolkoluhla, kasukuhlki oh keirda. Palingenitail kin kaskasik pwehn keirda. Oh kitail kin wiahda me keieu mwahu ni atail kin tengetengedi pohn ahl en inouo.
Ni imwilahn mehkoaros, Samatail me ketiket Nanleng oh Sapwellime Iehros Sises Krais, ketin poakohng kitail! Ira kin ketin nsenohki kitail! Ira oh Sapwellimara tohnleng kan kin sinsilei kitail. 1 I ese me mepwukat mehlel.
Ni atail pokonpene pwehn rong mahsen kan me Kauno ketin kamarainihkiher Sapwellime tohn doadoahk kan pahn kapwiledo, I lukei kumwail en medmedewe inou ehu me Kauno ketin wiadahr. E mahsaniher me “mehmen me pahn kolokol mahsen en Koht, me kin keng oh manaman, me kin kalewehdi oh kasohrehla loalokong koaros … oh widing kan en tepelo, oh kahlua [tohnpadahk] en Krais ong nan ahl me inen oh tehtik o.” 2
I kapakapki me kumwail pahn pilada en kolokol mahsen en Koht me pahn pwildohng kumwail nan kapokon lap wet. I kapakapki me kumwail pahn kehn limpoak unsek en Kauno ong kumwail, 3 ni mwaren Sises Krais, ahmen.