Mweidohng Kanengamah En Wia Ah Doadoahk Unseko, oh Perenkihda Apwal Koaros!
Ni atail kin doadoahngki kanengamah, atail pwoson kin laudla. Ansou me atail pwoson kin laudla, atail peren pil kin laudla.
Sounpar riau samwalahro, riei pwutak tikitik, Chad, sipelahng mour en palio. Ah sipellahng nan pali teio kansensuwedihla mehlel ai mwah, Stephanie; neira seri tikitik riemen, Braden oh Bella; iangaki aht peneinei pwon. Se diarada nsenamwahu sang ehu padahk en Elder Neil L. Andersen nan kapokon lap en wihk ehu mwohn Chad ah mehla, me mahsanih: “Nan doadoahk kamedek en kasongosong en sampah kan, ahneki kanengamah oh sokowei mwowe, oh sapwellimen Sounkomouro manaman en kamwahuo pahn wahdo marain, wehwe, meleilei, oh kopworopwor” (“Wounded,” Liahona, Nov. 2018, 85).
Se pwoson Sises Krais; se ese me se pahn pwurehng tuhwong Chad, ahpw aht sohlar kilang paliwere inenen kamedek! Dir me sohla kilang irail akan me re kin poakohng. E inenen apwal kitail en kanengamah oh awih ansou en pwurehng tuhwong irail.
Nan pahr mwurin ah mehlao, se ahneki pepehm en depwek rotorot karotongehla kiht. Se rapahki sawas sang ni onopiki pwuhk sarawi kan, kapakap ni ngidingid, oh sang ni aht kin kalapw kohkola nan tehnpas sarawi. Ire ehu nan neitail pwuhk en koul kin kawehwehdi aht pepehm en ansouo, mahsanih: “Marain en rahn pwarpwaredohr, sampah piridaier, depwek rotorot en pwohng wie sosohrala” (“The Day Dawn Is Breaking,” pwuhk en koul ni wai, nempe. 52).
Aht peneinei ahpw koasoanehdi me 2020 pahn wia pahr kapw ehu! Ehu ansou nan Nohpempe 2019 ni aht wie ononopiki nait pwuken Come, Follow Me nan pwuhk en Seims nan Kadehde Kapw ire kesempwal ehu ahpw kodohng kiht. Nan Seims iralaud 1 iretikitik 2 kosoia, “Riei ko! Kumwail perenkihda ma soangen apwal koaros kin lelohng kumwail” (Joseph Smith Translation, Seims 1:2 [nan Seims 1:2, footnote a]). Nin duwen aht iangi tepiada pahr kapw ehu, iei mwehi kapw ehu, ni peren, kiht eri koasoanehdi me nan 2020 se pahn nantiheng “perenkihda apwal koaros.” Uwen aht kesempwalki ire wet se ahpw Krismeskiheng riat akan seht kei me nda “Perenkihda Apwal Koaros” ni inting laud. Se kasik me pahr 2020 pahn wia pahr en peren oh kaping ehu.
Eri, iet kitail—2020 uhd wahdong sampah soumwahu dou COVID-19, uhpenehn aramas tohto, diren melimel oh epwelen mwohni wasa kei. Mwein Samatail Nanleng mweimweidohng kitail atail ansou mwahu en medewe laudki ia wehwehn kanengamah oh duwen atail kin kak pilada en ahneki peren.
Aht peneinei alehdi kaweid kapw kei sang nan pwuken Seims. Seims iralaud 1 iretikitik 3 oh 4 doulahte:
“Kumwail en ese, pwe kasongosong kin kalaudehla amwail kanengamah.
“Eri mweidohng kanengamah en wia ah doadoahk unseko, pwe pein kumwail en unsengkihla mehlel oh sohte pahn anahne mehkot.”
Pwehki aht kin nantiheng ahneki peren nan ansouhn kahpwal, Se uhd manokehla me iei kanengamah me kin mweidohng kitail en unsengkihla atail kahpwal kan.
Nahnmwarki Pensamin padahngkieng kitail en pwilikihdi ahnepen aramaso oh wiahla “souleng men sang ni tomw en Krais Kauno, oh duwehla seri men, me kin mweidala nsene, mpai, karakarahk, kanengamah, direkihla limpoak, inangih idawehn soahng koaros“ (Mosaia 3:19
Iralaud 6 nan Kalohki Ahi Rongamwahu padahngki dahme ahnepen Krais me kitail kak alasang: “Kanengamah wia kak en powehdi kediropw, kapwal, peliali, de kamedek a sohte lingeringer, weikek, de pwunodada. E kasalehda atail kak en a wia sapwellimen Koht doadoahk oh awiawi Sapwelime ansou. Ni ahmw kanengamah, ke kak kesihnente pahn katoutou oh kak sohpeiong kahpwal ni meleilei oh kopworopwor“ (Preach My Gospel: A Guide to Missionary Service2019], 126).
Doahdoahk unsek en kanengamah pil kak sansal nan mour en emen sapwelimen Krais werek en mahso, Saimon mehn Kenan. Pwihnen Selod iei pwihn en Suhs ehu me kin uhwong mehlel mehn Rom me kaunda arail wehi. Pwihn en Selod kin men pehieng mehn Rohm akan, mehn Suhs akan me kin utuhng irail, oh pil Sadosi kan ni arail kin pirapada neirail dipwisou kan oh pil uhwong irail ni wiepe kei (tehk Encyclopedia Britannica,Zealot,” britannica.com/topic/Zealot). Saimon mehn Kenan wia emen Selod (tehk Luk 6:15 Na song medewe Saimon songosong en idingoahng Sounkomouro en iangal pwihno, kahluwa arail pwihn en sounpei, de wiahda kapingiping nan Serusalem. Sises padahngki:
“Meid pai irail akan me kin opampap: pwe re pahn sohso ki sampah. …
“Meid pai irail akan me kin mahk: pwe re pahn pil ale mahk. …
“Meid pai irail akan me kin soun kameleilei kan: pwe irail pahn kahdaneki seri en Koht” (Madiu 5:5, 7, 9).
Nin tapio Saimon alehda oh kin uhki ahn pwihn en Selod arail padahngkan ni eimah oh ineng kan, ahpw pwuhk sarawi kasalehda me sang ni kaweid oh karasaras en Sounkomouro, ah madamadau wekila. Ah wia tohnpadahk en Krias ahpw wiahla poahson en doadoahk oh mour unsek.
Ni atail wia oh kolokol inou kan ong Koht, Sounkomour o kak sewese kitail en “pwurehng ipwidi; ipwidiong Koht, wekila sang aramas sakanakan oh pwopwilahr kei, ong ni aramas mehlel kei, me pitilahr pwehki Koht, oh me wiahlahr sapwelime pwutak oh serepein kei”(Mosaia 27:25).
Nanpwungen mwekid tohto me wihwiawi nan pelian koapwoarment, mwomwodiso oh pid uhpenehn madamadau, kitail en mweidohng tohnpadahk en Sises Krais en wia atail pwukoah keieu kesempwal oh tengeteng. “Pwe wasa me amwail dipwisou kesempwal kan kin mi ie, ih wasa me amwail mohngiong kan kin uhla ie” (Madiu 6:21).” Kitail dehr pil manokehla me pil mwurin tohnpadahk mehlel kei arail “wiaier kupwuren Koht, ” irail “anahnet doahdoahngki kanengamah” (Ipru10:36
Duwehte songosong en atail pwosn ah kin kakerida kanengamah rehtail, eri ni atail kin doadoahngki kanengamah, atail pwoson pil kin laudla. Ansou me atail pwoson kin laudla, atail peren pil kin laudla.
Nan Mahs nekiero, nait serepein keriemeno, Emma, duwehte misineri tohto nan Mwomwohdiso, anahne kelepwla pwehki soumwahuo. Misineri tohto kapwurpwurlahng arail wasa. Misineri tohto wia awiawi ehu pwukoah kapw. Tohto me pil sohte alehdi neirail kapai en tehnpas sarawi kan mwohn arail kokohla nan arail misin. Kalahngan, elders oh sisters. Se poakohng kuwmail.
Emma oh iengeo nan Nederlands ekis lok nan tepen korentihno—re lokolok ahpw sengiseng pak kei. Pwehki arail sohte kak tuhwong aramas ihte nan delepwohn oh keinepwi en pidoi likin ihmw, an Emma ah kopworopworki Koht laudla. Se kin iang ih kapakap nan delepwohn oh kin idek reh ia mwomwen aht pahn kak sawas. E peki reht sehn mesatlang nah irail akan me e kin padahki pohn interned!
Emen emen aht peneinei tepda lokiahong ahn Emma nan soun rouporoupw kan nan Nederlands. Se luke iong irail en patehng aht peneinei laud ehu ehu wihk pwehn onopiki Come, Follow Me pohn interned. Floor, Laura, Renske, Freek, Benjamin, Stal oh Muhammad koaros wiahla kempoakepaht. Ekei kompokepaht kan sang Nederlands iangehr pidelong “nan kehla ineno” (3 Nihpai 14:13). Ah ekei wia esihesehlahte “uwen inen en ahlo, oh uwen tehtikitik en kehlo, me re pahn pidelong” (2 Nihpai 31:9). Irail wia riat pwutak oh serepein rehn Krais. Nan ehu ehu wihk se kin “perenkihda apwal koaros” ni aht kin doadoahkpene oh nantiheng sokola mwowe na elen inouo.
Kitail “mweidohng kanengamah en wia ah doadoahk unseko” Seims 1:4) ni atail pahn kanengamahieng atail irehdi sang kohpene nan atail ward de prans kan. Ahpw kitail perenkihda duwen pwoson en atail peneinei kan ah wia kekeirda sang ni atail kin wehwepene nan interned oh sang ni onopki Come, Follow Me pid Pwuhk en Mormon.
Presiden Russell M. Nelson inoukihda, “pwehki amwail kin nantiheng wia met—mehdahte ekei pak kumwail pahn sohte pweidal—a pahn wekadahla amwail mour, mour en amwail peneinei, oh sampah pwon” (“Go Forward in Faith,” Liahona, May 2020, 114).
Wasa me kitail kin wiahda inou sarawi ong Koht— iei tehnpas sarawi—ritidier ansou wet. Wasa me kitail kin kolokol inou kan ong Koht— iei ni ihmwatail kan—e ritidahr! Kitail ahneki ansou mwahu nan atail wasahn kouson kan en onopiki oh medewe duwen lingan en inou kan en nan tehnpas sarawi. Mendahte atail sohte kak pedolong nan wasa sarawio, “[atail] mohngiong kan … pahn pil iang perenikihda wahn kapai kan me pahn mweredihong kitail” (Doctrine and Covenants 110:9).
Tohto me sohla dodohk; ekei sohla arail kopworopwor. Aphw kitail iangih Presiden Nelson pereperen, me apwtehn kosoia: “Pein sapankihda sawas sang tohn mwomwodiso wet inenen keirda laud, pil duwehte sawas ong mwohni me kin sawas ong anahn en aramas en sampah. … Kitail koaros pahn kak kalowehdi ansou apwal wet. Kauno pahn kapai kumwailda ni amwail pahn wonoweite mwowe oh papah meteikan” (Ahn Russell M. Nelson’s Facebook page, post ehu sang Ahkos 16, 2020, facebook.com/russell.m.nelson).
“Ahneki koapworopwor” wia kosonned ehu sang rehn Kauno, kaidehn ahneki peikasal (Madiu 14:27).
Ekei pak se kin sohla kak kanengamah ni ansou me se kin medewe me se kin “wiewia sohng koaros pwung” oh se kin sohte kin alehdi kapai kan me se kin kasik. Enok idahwen Koht erein pahr 365 mwohn ih oh sapwelime aramas akan popouk dahla. Erein sounpar silipwiki weneisek limau re nantiheng wia soahng koaros pwung, oh e ahpw pweida! (Tehk Doctrine and Covenants 107:49
Melahn riei pwutak Chad wiawi sounpwong kei mwurin ahi kommoaldi sang pwukoahn Presiden en Misin nan Ogden, Utah. E inenen kapwuriamwei pwe ansou me se mihmi nan Saud Kalipohrnie, nanpwungen misin 417 me se kak kohla ie, nan 2015 se pilipilda pwen en kohla Utah. Ihmwat ihmw nan aht misin mimih minit te 30 sang ihmwen Chad. Ahn Chad ah kansero pwarada mwurin aht alehdi aht puwkoah. Mendahte se mihmi nan kahpwal en insensued, se ese me Samatail Nanleng wehweki oh e men sewese kiht en diar peren.
I kadehde duwen manaman en atail Sounkomour Sises Krais ah kin dore kitail, kasarawikitailla oh kiheng kitail aktikitik oh popohl. Ih kadehde me ansou me kitail kin kapakap ong Samatail Nanleng ni mwaren Sises, E pahn ketin sapeng. I kadehde me ni atail pahn kin rong, loaloale, oh kapwaiada mahsen en Kauno oh sapwellime soukohp ieias, Presiden Russell M. Nelson, kitail kak “mweidohng kanengamah en wia ah doadoahk unseko” oh “perenkihda apwal koaros.“ (D&C 14:7).Ni mwaren Sises Krais, amen.