Doadoahk en Misineri: Eukiheng Mehteikan Dahme Mihmi nan Amwail Mohngiong
Sohte lipilipil wasa kumwail mihmie pohn sampah, mie songen wiepe tohto me kumwail kak wia pwen ehukiheng mehteikan rohng kaselel en rongamwahu en Sises Krais.
Sounpwung nekiero soukohp Russell M. Nelson luke Pwihn en Ehk-riemeno en iang ih ohng ni kasarawihn Tehnpas Sarawi en Rome nan Italy. Ni aht seiseiloak kohla, I tamanda Wahnpoaren Paul oh seiloak kan me e wia. Nan sapwellime rahnoko, kohsang Serusalem kolahng Rome pahn kak lel rahn 40. Rahnwet, ehu sohnpihr me I kin keieu pwungki, sohte lel awa 3.
Irail me skuhlki Pwuhk Sarawi kan kamehlele me Paul mihmi Rome ansou me e intingiada ekei nah kisin likou kan, iei me wia kakehlepen tohn Mwomwohdiso ansouo leledo rahnwet.
Paul oh ekei tohn Mwomwohdisoh en kawahu, Souleng kan en Keilahn-aio udahn wewehkiher dahkot tohnmetei. Me tohtoh irail alehkihdi kalokolok laud, pil kin mehkihla.
Nan pahr 200 samwalahro, tohn Mwomwohdiso kan en Sises Krais me kopwurupwurdohr, Souleng en Imwin Rahn-akan pil iangehr kehn duwen kalokolok kan ni songen mwohmw kei. Ahpw mendahte songen kalokolok pwuko (oh ekei pak pwehki ihme karehda), Mwomwohdiso en Sises Krais en Souleng en Imwin Rahn-akan wie tohtohla oh met e kipehdier sampah.
Mie Soahng Tohtoh kak Wiawi
Me duwehte, mwohn atail kin wiahda keik, kosiki kapwat , oh kaping ohng pein kitail pwehki doadoahk pweida, kitail kin wiahda mwahu pwehn mih ni koasondi mwahu.
Aramas mwein meh isilik elep nan sampah, karasahieng ehk wenrar en toweh kan en Mwomwohdiso en Sises Krais en Souleng en Imwin Rahn-akan—udahn malaulau mehlel.1
Rahnpwukat, wen irail souleng kan me kin kamehlele ekei wasa nan sampah wie tikitikila.2
Pil duwehte nan Sapwellimen Kauno Mwomwohdiso kopwurupwurdoh—sang ni toweh kan ah wie tohtohla—me tohto sohte kin men rapahki kapai kan en iang Sarawi ansou koaros.
Me wewehki, sohte lipilipil wasa kumwail mihmie pohn sampah, mie songen wiepe tohto me kumwail kak wia pwehn ehukiheng mehteikan rohng kaselel pwukat3 en rongamwahu en Sises Krais rehn aramas akan me kumwail kin tuhweng, onopehng, oh mihmi reh, doadoahkehng, de kin ehuieng.
Pahr nekiero leledo met t, I pereniki ahi ansou mwahu me I iang patehng kemwekid kan en misineri en sampah pwon en Mwomwohdiso. I kin kalapw medemedewe oh kapakapki Sapwellimen Sounkomouro kehkehlik me E ketkiheng Sapwellime tohnpadahk kan—kitail, Sapwellime seri—en “kohwei oh padahk ohng sampah pwon, pepdais iraila ni mwaren Sahm, oh Nah, oh Ngehn Sarawi.”4
I kin medemedewe laudki iren peidek wet “Ia mwomwen kitail toweh kan oh tohnpadahk en Krais kan pahn kak, kapwaiada kehkehlik wet nan atail momour en ehu ehu rahn akan?”
Rahnwet I luke kumwail en iang medemedewe duwen peidek wet nan amwail mohngiong oh madamadau.5
Kisakis Ehu ong Doadoahk en Misineri
Lapalap akan en Mwomwohdiso kasaledahr duwen kesempwal en pwukoah ni sansal me “Toweh kan koaros wia misineri!” sang mahs kokohdo.6
Toweh kan en Mwomwohdiso en Sises Krais—me iangahki mehn mahsoko oh pil nan atail mweih wet—kin inengieng oh pereniki ehukiheng kempoakepahrail kan oh irail kan me irail kin tuhwong duwen rongamwahuo. Arail mongiong kan kin perenkihda kadehdehn Sises Krais, oh irail kin men mehteikan en iang kehn songen peren me irail diar nan rongamwahu en Soukomouro.
Ekei toweh kan en Mwomwohdiso kin ahniki songen kisakis wet. Irail kin pereniki wia weliepeh kan en rongamwahu wet. Irail ahniki kehlail oh ineng en papah oh kaweid doadoahk wet ni arail wia member misinerih kei.
Pil ni ansouohte, mie ekei kitail me kin ahniki namenek. Ni ansou me koasoiepen doadoahk en misineri kin wiawi nan mihting kan en Mwomwohdiso, aramas kin itiekdi lau sohla kak pwerda, meserail kan kin kilkilengdihengete nan pwuhk sarawih kan de kin wie madamadau loal pwe en dehr kilang mesen irail towe teikan.
Dahme karehda met? Mwein kitail sohte ahniki npepehm mwahu pwehki aitail sohte wia mehkot en ehukiheng mehteikan rongamwahuo. Mwein kitail sohte nohn ese ia mwomwen atail pahn wia. De mwein kitail masak wia mehkot me pahn kak kasonsuedihkitaila.
I wehwehki met.
Ahpw tamataman, me Kauno sohte anahne misineri me keieu loaloakong oh unsek. Ahpw, “ihme Kauno kupwurki ineng en mongiong oh madamadau.”7
Ma kumwail perenikiher wihwia pwukoah doadoahk en misineri, menlau wenla mwowe, oh wia mehn karasaras ong mehteikan. Kauno pahn ketin kapaiukada.
Ama kumwail pehm me kumwail wurwurahdekih nehmwail kan ansou en ehukihwei padahk en s rongamwahuo, I men kihda soahng limau wet pwe emen emen en kak wia pwehn patkiong oh sewese kehkehlik en sounkomouro kapwurepene mehn Isrehl kan?
Soahngen iren Sawas Mengei Limau
Keieu, kohdo karanih Kauno. Kosonned keieu laud iei poakoahng Koht.8 Iei kahrepe keieu me kitail mihmihki pohn sampah wet. Pein idek rehmwail, “Udahn I kamehlele Sahm Nanleng?”
“Udahn I poakoahng oh koapworopworki Ih?”
Ni amwail pahn karkaraniala Samatail Nanleng, Sapwellime marain oh popohl pahn kamarainiada loalomwail kan. Mehteikan pahn kak kilang me mie mehkot rehmwail me wekila oh mwahula. Oh re pahn peidek.
Keriau, audehkihda amwail mohngiong limpoak ohng mehteikan. Iei met me wia kosonned keriau en laud.9 Nantiheng kilang koaros me mihmi limwahmwail me irail seri en Koht. Papah irail—itar ma ederail kan sohte iang mih nan eden irail kan me kumwail pahn papah.
Iang irail kouruhr. Iang irail peren. Iang irail sengiseng. Wahunikin irail. Kamwauihala, utungada, oh kakehlailihrail.
Nantiheng idawehn limpoak en Krais oh kadekehng mehteikan—mehlel ong irail kan me sohte kin kadekehng uhk, me kin aklemeieng uhk oh kin mentehn karehieng uhk nan apwal. Poakoahng irail oh apwalih irail duwehte serih kan en Samatail Nanleng.
Kesiluh, nantiheng keid nan ahl en tohnpadahk Krais. Ni ansou me atail limpoak ong Koht oh Sapwellime serih kan kin laudla, a atail inou en idawehn Sises Krais kin pil laudla.
Kitail kin esehla duwen Sapwellime ahl akan sang ni atail kin momourki oh perepereniki Sapwellime mahsen akan oh peikiong oh doadoahngki padahk kan en soukohp oh wahnpoaren kan en rahnpwukat. Kitail kin keirda nan atail kin kamehlele oh sohpeikasalki atail idawehn Sapwellime ahl ni atail kin koasoaieng Samatail Nanleng ni ineng en men esehla, ni mohngiong karakarahk.
Kekeihd nan ahl en tohnpadahk en Krais anahne kaiahn— ehu ehu rahn, ekis ekis, “kaping kalahngan ong kaping kalahngan ,”10 “sang nan ehu dake ong ehu.”11 Ekei pak kahkala riau mwowe oh kahkidihla ehu mwuri.
Ihme keieu kesempwal kitail en dehr pwangada; kitail en nantiheng kapwungala. ekis ekis kitail pahn mwahula, ahnikihla peren laud, oh mehlel. Koasoiaiong mehteikan duwen atail pwoson pahn soanamwahu oh meleilei. Ni mehlel, rongamwahu wet pahn wia mehkot kesempwal oh kaselel nan atail mour e kakete wia pepehm sohte mwahu ma kitail sohtepahn ehukiheng mehteikan. Met kakete sohte wiawi ansouohte—ahpw e pahn wiawi erein mour. Ahpw e pahn wiawi.
Kapahieu, ehuki dahme mih nan ahmw mohngiongen. I sohte pekpeki rehmwail kumwail en kohla ni keilen ahl akan oh doadoahngki me koasoi kan oh weriwerkiseli ire tikitik kan en nan Pwuhk en Mormon. Dahme I pekpeki iei kumwail en ansou koaros rapahkihda ahnsou mwahu kan en kasalehda amwail pwoson ni mwohmw en sohpeikasal ni amwail kin kapehsehieng aramas akan—tuhwong irail pil duwehte nan indernet. I pekpeki kitail en “kesihnenkihda ni atail wia sounkadehde”12en manaman en rongamwahuo nan ansou koaros—oh ni ansou me konehng, doadoahngki mahsen akan.13
Pwehki “rongamwahu en Krais … iei me manaman en Koht ong komourla,” kitail en kak ahniki sohpeikasal, eimah, oh karkarahk ni ansou me kitail ehukiheng mehteikan.14 Sohpeikasal, eimah, oh karkarahk mwein kak wia koahiek kei me sohte pwung pene, ahpw soh. Irail kasalehda en Sounkomouro luhk en sohte ekihla kesempwal oh padahk kan en rongamwahuo pahn mwutumwut en dihpw ehu ahpw en kasalehda atail maraihn, pwe atail doadoahk mwahu kan en kak kalinganahla Samatail me ketket Nanleng.15
Mie songen wiepe tohto me kitail kak wia met, sang ni atail wiewiahn ehu ehu rahn en kasalehda kadek ong atail kedehde nan YouTube, Facebook, Instagram, de Twitter me pahn wia koasoakoasoipene mengei ong aramas akan me kitail kin tuhwong. Nan pahret kitail kaskaskuhl sang nan Kadehde Kapw nan imwatail kan oh ni rahn en Santi Skuhl. Met wia ansou mwahu ong kitail en luke kempoakepahtail kan oh mehn impetail kan ong sarawi oh ong ni imwatail kan en iang kitail esehla duwen Sounkomouro. Ehukiheng irail duwen Gospel Library app, wasa irail kak diar Come, Follow Me, mehn kaskuhl kapw en pahret. Ma kumwail ese me pwulopwul kan oh arail peneinei kan, kiheng irail kisin pwuhk en For the Strength of Youth oh luke irail en kohdo oh kilang ia mwomwen neitail me pwulopwul kan arail kin momourki iren padahk pwuko.
Ma mie me idek ia iren amwail wihkend, kumwail dehr periki koasoia dahme kumwail wia ni ihmw sarawio. Koasoia duwen kisin serih kan arail kin kesihnen mwohn poakono oh koul ni arail kin ahniki peren en arail kin nanantiheng en duwehla Sises. Koasoia duwen me pwulopwul kan me kin doadoahngki arail ahnsou en sewese me likeilapalahr kan ni arail wasahn kouson akan pwe en kihpene koasoiepen arail mour. Koasoia duwen wekdekla me mie nan mihting en Rahn Sarawi oh ia mwomwen ah kapaiada amwail peneinei. De koasoia dahme karehda kitail kin koasoiahki me iei met me wia Mwomwohdiso en Sises Krais oh kitail me wia Souleng en Imwin Rahn-akan,duwehte irail toweh kan en Mwomwohdiso en Kawahu arail pil kahdaniki Souleng kan
Ni sohte lipilipil songen wiepe dah me pahn mwahu ehng kumwail, ehukiheng aramas akan dahme karehda Sises Krais oh Sapwellime Mwomwohdiso kesemwpwalkiehng kumwail. Lukei irail en “kohdo oh kilang.”16 uhd lukei irail en kohdo papah. Mie soahng tohto me aramas akan kak sawaski nan atail kemwekid kan en Mwomwohdiso.
Kumwial deh kapakapkihte misineri ko en diar me pilipildahr kou. Kapakap rahn koaros sang ahmw mohngiong unsek pwe komwi en diar irail me pahn kohdo oh kilang, kohdo oh sawas oh kohdo oh mihmihla. Kin wehwehiehng misineri kan. Irail rasehngete tohlehng kei, oh re men sawas!
Ni amwail pahn ehuki rongamwahu wet, rongamwahu en Sises Krais, wia ni limpoak oh kanengamah. Ma kitail tuhwong aramas akan me kasik me ansouohte irail pahn likou pwetepwetda oh idek iawasa me keieu keren en pepdais, eri e sapwung dahme kitail wihwia.
Ekei irail me kohdo oh kilang pahn wia, ahpw, kak sohte douluhl iangala Mwomwohdiso; ekei pahn kak mwurin ansou kis. Arail pilipil mwo. Ahpw e sohte pahn wekidala atail limpoak ehng irail. Oh e sohte pahn wekidala atail ineng en peusehla lukehieng emen emen oh peneinei kan en kohdo oh kilang, kohdo oh sawas, oh kohdo oh mihmi.
Kelimau, kamehlele Kauno en kasalehda Sapwellime manaman akan. Wewehki mwahu me kaidehn amwail pwukoah doadoahk en wekidala aramas akan. Met me wia pwukoahn Ngehn Sarawi. Ahmw pwukoah ken ehukiong mehteikan dahme mihmi nan ahmw mohngiong oh momourki dahme ke kamehlele kohkohlahte.
Eri, kumwail dehr insensuedkihla ma mie me sohte men alehda rongamwahuo ni ansouohte. E sohte wia en emen eh sohitar.
Met nan pwungen aramaso oh Samatail Nanleng.
Kumwail en poakoahng Koht oh mehn mpamwail kan Sapwellime seri kan.
Kamehlele, limpoak, oh wia.
Idawehn ahl wet, oh Koht pahn ketin kaselehda sapwellime manaman akan rehmmwail pwehn kapaiada Sapwellime serih kan.
Iren sawas limau pwukat pahn sewesei kumwail en wia dahme tohnpadahk en Sises Krais kan wiahier mahso. Sapwellime rongamwahu oh Mwomwohdiso wia mehkot kesemwpwal ehu nan amwail mour oh me kasalehda ihs kumwail oh dahme kumwail kin wia. Pwehki met, luke mehteikan en kohdo oh kilang oh kohdo oh papah, oh Koht pahn wia Sapwellime doadoahk, oh irail pahn kohdo oh mihmi.
Ahpw Ia duwen Ma E Apwal?
“Ahpw” kumwail mweihn pahn idek, “ia duwen ma I wia met oh aramas akan sohte men rong? Ia duwen ma irail udahn sohte pwungki duwen Mwomwohdiso? Ia duwen ma irail sohla men kempoakepahkinie?”
Ei, men kak wiawi. Sang nan mwein kawahu, tohnpadahk en Sises Krais kan kin kalapw alehdi lokolok.17 Wahnpoaren Pihter koasoaia, “Kepkepinga kohkohlahte ni [atail] kin ehukipene Sapwellimen Krais tohnmetei.”18 Irail Souleng en keilahn aio ahpw kepkepinga “me irail wadawadki arail warohng en tohnmeteikihla arail namenek pwehki mware.”19
Tamataman, Kauno kin ketin wia sapwellime doadoahk ni songen mwohmw kopwuriamwei kei. mweinte pwehki sang ni amw aktikitik emen me keptakailahr kakete pwungkihda.
Ni ai wia Wahnpoaren en Sises Krais, I kapai kumwailda en ahniki inengen momourki kadehde kesempwal en rongamwahuo, en ahniki eimahen kak ansou koaros en sansal amwail wia toweh en Mwomwohdiso en Sises Krais en Souleng en Imwin Rahn-akan, en ahniki karkarahken kak sawas nan Sapwellime doadoahk me pahn kasalehda amwail limpoak ong Samatail Nanleng oh Sapwellime serih kan.
Kempoakepahi kesempwalko, kumwail pahn ahniki peren ni amwail ese me kumwail iang patehng pwukoah doadoahk en kapokonepene Isrehl, kaunopadahng mwohn ketdohn Krais ni “manaman oh lingaling laud; iang tohnleng sarawi kan koaros.”20
Samatail Nanleng mwahngih ihs kowe. Kauno ketin poakohng kumwail. Koht pahn ketin kapai kumwailda. Doadoahk wet kosoandihsang Reh. Kumwail kak wia met. Kitail koaros kak wia met.
I kadehdehki ni mwaren Sises Krais, ahmen.