Kawada Kehl Kehlail en Pali Ngehn oh Mehn Perehre
Ma kitail pahn kin momourki rongamwahu en Sises Krais, ni atail pahn alesang Tohnmetei en Sounkomouro oh wenlahte mwowe ni pwoson, kitail pahn poadoandorlahsang imwintihtio.
Riei ohl oh lih ako, ni Kapokonlap wet eh pahn imwiseklahr, I men wia ahi kaping kalahngan ohng Samatail Nanleng pwehki padahk kan, oh me mehlel kan, oh kaudiahl kan me kohdahsangehr wasahn padahk wet nan erein rahn riahu wet. Kitail padahk sangehr Sapwellimen Koht soun papah kan me malipilipdahr en padahngki Sapwellime Kauno ketin katamankin kitail sang ni kokohp en imwin rahnpwukat me masanih , “Ma e kohsang ni pein ngilei de … sang ngilen nei ladu pwukat, e duwepenehte.”1
Ni ei kilkilengwohng kumwail Soulengkan, oh pil medewehla kumwail kan me wie kilkilang Kapokonlap wet sang wasa koaros nin Sampah, I tamankihda pokon me wiawi nan Pwuhk en Mormon ahnsou me Sises Krais pwarehng mehn Nihpai ko mwurin Eh iasadao. E ketin padahkiong irail rongamwahu oh koangoangehkin irail mahsanih, “Kumwail pwurowei ni ihmwomwail kan oh medemedewe mehkan me I kosoiahier, oh peki rehn Sahmo, ni mwarei, pwe kumwail en kak wehwehki.”2
“Pwurowei ni imwomwail kan, oh medemedewe” me kitail anahne uhd wia pwehn momourki mahsen kan en soukohp akan oh kaun akan en Mwomwohdiso me padahkehr nan wasa sarawi wet. Imwatail kan me kin poahsoankihda Krais kin wiahla kehl de wasahn poadoandoar ohng wein Koht pohn Sampah nan ahnsou, nin duwen e kokohpdahier, tepil “angiangidahr nan mohngiong en aramas akan, oh kalingeringereiraildahr ren pelian dahme mwahu.”3
Sangete mahs aramas kin kawada wasahn poadoandoar pwehn pereirailsang arail imwintihti kan. Pali laud en ansou, mie wasahn iroir me soun silasilkan—duwehte Soukohp kan—kin pakairki duwen aramas suwed kan me wie kohkohdo pwehn pei.
Tepin paionihr nan Utah, en ahi pahpa eh pahpa kahlap Thomas Rasband oh ah peneinei me iang tepin pwihn me Preseden Brigham Young kadaralahng Wahu en Heber.
Nan pahr 1859, Thomas me iang sawas kawada kehl en Heber, wiawihda pwehn pere irail. Irail doadoahngki lepin tuhke koatin pwe ihme mengei, e kin keirekweite pwe en wiahda poahsoan. Ihmw tuhkeh kei pil kokouda masloalen kehlo sang ni soangen tuhkehute. Wiepen doadoahko karehda wasao wia wasahn poadoandoar oh silasil mwahu ong peneinei ko ni arail soandi oh kin kaudokiong Kauno.
Pil duwehte kitail. Imwetail kan me pahn doare kitail sang me suwed en sampah kan. Nan imwatail kan kitail pahn kohdo rehn Krais sang atail pahn kin esehla en idawehn Sapwellime kosonned akan, sang ni onopki pwuhk sarawih kan oh kapakap pene, oh sang ni sawaspene pwehn weweidte nan ahl en inouo. Kaweid kapw duwen onop en emen emen oh onop en peneinei nan imwatail kan sang ni mehn padahko Kohdo, Idawehniehdo wiawihda “pwe kitail en kak weliakapwala oh en sewesei kitail en duwehla Sises Krais.”4 Ni atail pahn wia met kitail pahn duwehla dahme Pohl mahsaniho “kitail pahn wiahla aramas kapw men”5 ni mohngiongitail kan oh ngenitail kan wekidiong Koht. Kitail anahne mehn kakehlailo pwehn pelian oh perehsang kitail doadoahk en imwintihtio.
Ni atail pahn momourki loaloapwoat me kin tepsang pwoson Sises Krais, kitail pahn kak kehn meleilei en Ngehn Sarawi, me kin kahluwa kitailahng ni me mehlel, kamarainih kitail en kin mour warohng Sapwellimen Kauno kapahi kan, oh kadehdehda me Koht ieias oh ketin poakohng kitail. Mehpwukat koaros pahn mih masloalen kehl en imwatail kan. Ahpw tamataman, me uwen manaman kehlail en nan imwatail kan pahn pahrekiong uwen kehlail en pali ngehn en emenemen kitail nan imwatailkan.
Preseden Russell M. Nelson padahngkier, “Nan rahn akan me wie kokohdo, palingenitail sohte kak pweida ma sohte mehn kaweid, oh mehn kahluwa, oh koaloalamwahu, oh ieiang en Ngehn Sarawi ansou koaros.”6 Nin duwen Sapwellimen Kauno soukohp ieias, ohl sarawi, oh soun kaudiahl en atail mwehi, me wia soun silasil pohn wasahn iroir en atail kehl kan, Mwomwohdiso en Sises Krais en Souleng kan en Imwin Rahn akan, ih me kin kilang mwekimwekid en atail imwitihtih kan.
Riei ohl ako oh lih ako, kitail wie mahmahweniong sehdanki palingenitail. Mahweno tepsangete mwohn atail ipwidi. Sehdan oh silikis ehu en Sapwellimen Sahm Nanleng serihkan sohpeisangehr Sapwellime Inou kan en peren. Sangete ansouo, irail kan me idawehnla me suwedo kin wie pepeiong me pwoson kan me piladahr Sapwellimen Koht koasondi.
Sehdan ese me ah rahn akan kileldier oh e wie mwotomwotalahr. Mendahte e loalokong oh mwersuwed, e sohte pahn kana. Ahpw, ah mahwin e pahn nanantiengete song en kolowehdi pali ngenen emen emen kitail.
Pwehn doare kitail, kitail udahn pahn kawada kehl kehlail en palingenitail oh mehn doarehla ngenitail kan, kehl kehlail ehu me, me suwedo sohte kak pwedilong loale.
Sehdan rasehng sneik loaloakong men, e kin wailong nan atail madmadau oh mohngiongatail ni ahnsou me kitail kin mweidehng pein kitail en luwetala, oh ahnsou me kitail kin sohpai nsensuwed, de solahr koapworopwor. E kin pitihkin kitaildi ah lokaia kadek, oh inou en mour mengei, oh koaloalemwahu, de kansenemwahuwih kitaildi ni atail luwet akan apw kisin ahnsou. E kin akupwungki me pohnmwahso, me aklemei, me likamw, me nsensuwed, oh tiahk suwed lao irail solahr “nsenohki.”7 Ngehn Sarawi kak kohsang kitail. “Oh iei me tepilo pitiedier ngenirail kan, oh pahneiraildilahng nan ehl.”8
Ahpw me weksang, kitail kin kalapw kehn Ngehn Sarawi laud ni atail kin koulki atail kaping ohng Koht ni lepin mahsen me duwehte met:
Atail kehl kehlail iei atail Koht,
Wasahn iroir kehlail me sohte kak ohla.
Koht me wia sawasapatail,
Kin kalowehdi mehn kaluwet en mour kan.9
Ni atail pahn kawada kehl en mour kehlail ni palingehn, kitail kak liksang wiewia kan en me suwedo, sohpeilahsang, oh kehn meleilei en Ngehno. Kitail kak idawehn karasaras en atail Kauno oh Sounkomour, me alehdier kasongosong nan sapwtehno, me mahsanih, “Kokohweisangie, Sehdan.”10 Emenemen kitail anahne esehla ia mwomwen wia met sang dahme wiewiawiong kitail nan mour wet.
Soangen kahrepe pwung wet wehwe mwahu nan Pwuhk en Mormon ni ahnsou me kapden Moronai kaunopada Mehn Nihpai kan en pelian Amalakai ohl mwersuwedo, me kin men kakerehdihte ntahn aramas, oh kin noahreke manaman en kaunda wasa. Moronai kawada kehl pwehn perehla mehn Nihpai kan “pwe irail en kak momour pahn Kauno arail Koht, oh pwe irail en doudoulahte nan dahme arail imwintihti kan kin kosoiahki arail mour en souleng.”11 Moronai “tengeteng ni eh pwoson Krais”12 oh aramas akan kin loalopwoatohng kosonned akan en Koht … oh liksang wiewia suwed kan.”13
Ahnsou me mehn Leimenko kohdo mahweniong mehn Nihpahi kan, re inenen pwuriamwei oh pehrdi pahrail pwehki mehn Nihpai kan arail kaunopada mwahu. Mehn Nihpai ko kalahngankiong “Kauno arail Koht, pwehki Sapwellime manaman me sohte me pahrekiong pwehn kapitirailsang arail imwintihti kan.”14 Re kawada kehl mehn pereiraildi sang liki, oh re kawada pwoson Kauno Sises Krais loalerail—nan palingenarail akan.
Dahnge me kitail en kak wia en kakehlaka pein kitail nan ahnsou apwal pwukat pwe kitail en “wia weliepen nin limen Koht nan doadoahk kesemwpwal wet”?15 Kitail en tehk nan pwuhk sarawi kan.
Kitail peik. Kauno poarone atail pahpa Lihai en kadarala ah tungoal pwutangko en pwurala Serusalem pwehn “kilangada rekohtko, oh wahdo nan sapwtehno.”16 Lihai sohte peipeidengki; e sohte kaulumki idihdek pwehda oh ia mwomwe. Ahpw Nihpai, me sapengki. “I pahn kohla oh wia mehkan me Koht ketin mahsanih.”17
Kitail kin mwekidki peik me duwehte Nihpai? De kitail kin peikasalki Sapwellimen Koht koasoandi kan duwehte rien Nihpai pwutangko, me sohpeisang Kauno pwehki ara pwoson sohte itar? Doadoahngki atail peik sang nan atail “mohngiong sarawi,”18 iei me Kauno ketin peki rehtail.
Kitail kamehlele Kauno, me mahsaniong Sosua, ni eh kakaunop en kahluwa mehn Israel ko kolahng Sahpwen inou, “Ke en kehlail oh kommwad, dehr masak, de lamalam tikitik pwehki Kauno omw Koht pahn ieiang uhk wasa koaros me ke pahn kin kohla ie.”19 Sosua kamehlele mahsenko oh apw padahkiong aramas ako: “Kakehlailih pein kumwail: pwe lakapw Kauno pahn ketin kasalehiong kumwail me kapwuriamwei.”20 Kauno pwalangpeseng pihl en Sordan, oh en mehn Isreal ko kakahnselier nan sapwtehn erein sounpahr 40 imwiseklahr.
Kitail kin uhki me mehlelo, duwehte dahme soukohp Apinadai wiaier nan Pwuhk en Mormon. E selidi, wisiklahng mwohn nanmwarki Noha oh nah samworo suwedko, Apinadai padahkiong irail kosonned eisek ko oh padahk kehlail me Krais pahn “ketdihdo nan pwungen aramas akan, oh … doarehla Sapwellime aramas akan.”21 Ih eri, sang ni eh pwoson kehlail, e apw patohwan, “Oh maing ei Koht, komw alehda palingeni,”22 oh Apinadai apw “lokolongki kisiniei oh mehkihla.”23
Kitail kin wiahda oh onesapahlih atail inou kan ni atail kin tungoale kamadipw sarawi oh sang ni atail kaudok nan tehnpas sarawi. Kamadipw sarawi me poahsoan en atail kaudok en rahn sarawi kan, wasa me kitail kin alehda inou en “Sapwellime Ngehn Sarawi en kin ieiang [kitail] ahnsou koaros.”24Ni doahk sarawi wet, kitail inoukidahr me kitail pahn alehda mwaren Sises Krais, oh kin ideidawehn Ih, oh kin apwalih atail pwukoah kan nan doadoahk sarawi wet nin duwen me E ketin wia. Kitail kak “pwilikihdi kisehn sampah”25 oh pwarala nan tehnpas sarawi oh kehn me Kauno ketiket wasao oh kehn Sapwellime popohl unsek. Kitail kak nsenohki peneinei me melahr akan, oh atail peneinei kan, irail en kak ale mour soutuk mwohn sihlangin Sahm. Ihme Preseden apwtehn kosoia nan Rom: “Kamwahupen tehnpas sarawi wet pahn inenen wad mehlel.”26
Kitail anahne mehlel nan mehkoaros me kitail kin wia. Kitail anahne koadoahkiada atail mehn kosou kan oh mehn kaweid kan pwe kitail en dehr kin wie pwunpwunodkihte dahme pwung oh sapwung. Kitail anahne rong mwahu kaweid en Piter, Wahnpoaron en mahso en Mwomwohdiso me kaweidki, “Kumwail kilang mwahu oh mwasamwasahn; pwe amwail imwintihtio tepil, kin kokohseli duwehte laion emen me kin weriwer, raparapahki ihs me e pahn kadallehla.”27
Ni atail pahn ngoahngki kakehlaka atail wasahn poadoandoar kitail pahn duwehla Sises Krais, nin duwen Sapwellime tohnpadahk mehlel kei, sang ni pein ngenitail ni Eh kin ketin doandoareikitail.
Pein ahmw kadehde en Sises Krais me wia pein ahmw kehl, silepen palingenomw. Ni ahi pahpa kahlap oh iengeh tohn paionihr ko arail kawada Kehl en Heber, re kin kihda ehu ehu lepin tuhkehko wad ehu lao kehlo “nekila ”28oh irail pitsangehr kahpwal. Ih pil duwen atail kadehde. Ehu wad ehu kitail kin kalkalaudehla atail kadehde sang Ngehn Sarawi duwehte Eh ketin mahsen ohng pein ngenitail, padapadahk duwen “me mehlel o.”29 Ni atail pahn momourki rongamwauh en Sises Krais, oh kehlki Sapwellimen Sounkomouro Tomwo oh wonewei ni pwoson, sohte masak, kitail pitsangehr widing en atail imwin tihtio. Atail kadehde kan kin kadokeikitaildahla nanleng, oh kitail kin kapaikihda “mehlel en mehkoaros.”30 Oh, duwehte kehl kehlailo, Kitail pitila sang ni limpoak en Sounkomouro ah kin pwoalehkin kitaildi limeh kan.
Soukohp Ihder padahngki, “Eri, mehmen me kamehlele Koht pahn koapworopworiki mehlel me mie sampah mwahu ehu, me iei ni palimaun en Koht, soangen koapworopwor me kin tepsang pwoson, e wiahda peipwung ong palingehn en aramas, me kin kahrehiong irail en tengeteng oh loaloapwoat, wiewia me mwahu ahnsou koaros, pwehn kalingana Koht.”31
Riei ko, I kihong kumwail kapahi en woneweite ni koapworopwor rehn Kauno oh Sapwellime rongamwahuo. Pwoalehdi irail akan me kin dipekelekel oh ni kehlail en Ngehn Sarawi me kin ieiang uhk, kahluwairaildo ni limpoak nan kehl en mour kehlail en Palingehn oh poadoandoaro. Rapahki “ken duwehla Sises”32 nan mehkoaros me ke wia, sohpeisang me suwedo oh kasongosong kan, ahniki mohngiong mehlel, mour inen oh mwakelekel, kasalehda ahmw kadek oh limpoak, oh poakohng Kauno ahmw Koht ni ineng mehlel nin duwen tohnpadahk mehlel men.
Atail kadehde kan en rongamwahu en Sises Krais, imwetail kan, nan atail peneinei kan, atail towe en Mwomwohdiso en Sises Krais en Souleng en Imwin Rahn Akan kak en wia pein atail kehl en poadoandoar kan me kapikapil kitail oh perekitail sang manaman en me suwedo. Met I wiahki ahi kadehde ni mwaren atail Kaun oh Sounkomour, iei Sises Krais, amen.