Kaunopada ohng Ketidohn Kauno
Mwomwohdiso en Sises Krais en Souleng en Imwin Rahn akan ahneki mweimwei oh kamanamanlahr en kapwaiada soahng koaros me anahnepe ong ni Ketido Keriau en Kauno.
Mwurin wihk riau, kitail pahn kawauwih Ihster. Iasada en Sises Krais kasaledahr uwen sarawi en Sises Krais oh mehlel en Koht Sahm. Atail madamadau kan kin ulahng Sounkomouro, oh kitail kin medewe “Sapwellime mour me inenen sikilahsang koaros oh manaman soutuk en Sapwellime tohnmetei laud.”1 I koapworopworki kitail en pil medewe Sapwellime rahn en ketido ni ansou me “E pahn ketin kaunda nin duwen Nahnmwarki en Nahnmwarkih kan oh Kaun en Kaun akan.”2
Rahn teio nan Buenos Aires, Argentina, I iang kapokon lap ehu me kaun lapalap en soansoangen pelien lamalam tohto iang towehda. Arail limpoak ong aramas akan me inenen sansal. Irail kin inengieng sewese me tihwolahr kan oh sewese aramas akan en maiaudahsang nan limeidihd oh semwehmwe. I kin medewehdo duwen iren sawas tohto kan me Mwomwohdiso wet kin kihda, patehng soangen doadoahk teikan me kitail kin ehukiheng ekei pwihn en lamalam me iang patehng kapokon lapo. I ahniki kaping laud pwehki uwen kadek en souleng kan en Mwomwohdiso en Sises Krais en Souleng en Imwin-rahn akan me kasalehda sawas kan sang ni arail kin kahlemangih Sises Krais.
Ahnsowohte, Ngehn Sarawio padahkiong ie soahng riau. Keieu, doadoahk en sawaski mehn anahn kan me inenen kesempwal oh anahne doudoulahte. Keriauo me sohte kasikpe, ahpw e manaman oh sansalamwahu. Iei met—me laudsang kadek en papah, iei me uhdahn keieu kesempwal en kaunopada sampah ong ni Ketido Keriau en Kaun Sises Krais.
Ni ansou me E pahn ketido, limeidihd oh sapahrek en tenek pahn sohrala, re pahn uhdi:
“Kidienwel kan oh sihpw kan pahn kousoanpene ni popohl, lepard kan pahn kin wendi mpen kisin kuht kan, koupwul kan oh laion pwulopwul kan pahn kin mwengepene, oh kisin seri kan me pahn wia sileperail. …
“Sohte meninkau de mehkot suwed pahn mie nan Saion, sapwellimen Koht dohl sarawio. Pwe Sampah pahn direkihla kupwurokong en Kauno, duwehte madau eh kin direkihla pihl.”3
Semwehmwe oh lokolok sohte pahn katikalahte, ahpw re pahn sohrala douhlul:
“Solahr me pahn men mwenge, pil solahr pahn men nempil; irail pil pahn sohla mih pahn ketipin de wasa me karakar.
“Pwe Sihmpwulo me kin ketket nan mwoahle pahn ketin kamwengei irail, oh pahn ketin kahluwa irailahng nan pilen pillap ieias: oh Koht pahn ketin lumwiasang pilen meserail kan.”4
Pil duwehte medek oh nsensuwed en mehla pahn pil sohrala:
“Nan erein rahno seri pwelel men pahn sohte mehla lau eh mahla; oh ah mour pahn duwehte sounpar en tuhke pwoat;
“Oh ansou me e pahn mehla e sohte pahn meir, met wehwehki pohn sampah, ahpw pahn kamwomwala ni marep ehu, oh pahn ketdahla, oh kommoaldi ni klohri.”5
Eri ei, kitail nantiheng wia uwen atail kak en sewese kamwauiala lokolok oh pahtou kan met, oh kitail en nantiheng loaloapwoatiheng atail pwukoah en kaunopada anahn akan me anahnepe ong rahn ni ansou me medek oh me suwed akan pahn sohrala, ni ansou me “Krais pahn ketin Kaunda sampah; oh … sampah pahn welialihda kapw oh alehda klohri en nan paradais.”6 E pahn wia rahn en komour oh kadeik. Anglican Bishop en Durham, Toahke N. T. Wright, kawewehdahr mwahu duwen Tomwpen Krais, sapwellime Iasada, oh Kadeik ni ah powehdi sapwung kan oh kapwungala soahng koaros.
Dene: “Koht ketin kaunopadahr rahn ehu me e pahn ketin kadeik sampah ni pwungih sang ohl emen me e ketin piladahr—oh duwen metpwukat e ketin kasalehiengehr koaros sang ni ah ketin kamourada ohl menet sang mehla. Me mehlel akan duwen Sises en Nasaret, oh mehlel sapwellime iasada sang mehla, me wia poahsoan en inou me sampah sohte kepikpikda mwahl. E sohte wia mehkot kapingiping ehu; eh kasalehda me ni atail kin wia me pwung nan rahnpwukat kitail sohte wie kawehkihla mwahl atail ahnsou, nannantiheng en utungada ihmw ehu me pahn kereniengehr pwupwudi, de kamwahihala sdohsa pwoat me pahn inenlahte ni wasan kihd. Ni ansou me Koht ketin kamourada Sises sang mehla, met me wia mehn sosohng tikitik me kasalehda soahng koaros me wiawi oh me wia mehn sosohng laudo iei ni oaralap rahn en kadeiko me duwehte weren tuhke ehu iei weren tuhke, en koapworopwor unsek. Koht ketin kasalehda, ni mwohmw manaman ehu, me Sises en Nasaret iei ih me Mesaia. … Ni e wie sapahrek keiu laud nan poadoapoad en samaph, [Sises] pein ih alehdi kalokolok lemei oh kadeik sapwung, ni eh ketla nan wasa ehu me kasalehda oh oarepene soahngen mwekid en lemei oh kadeik sapwung koaros, pwe en kak kanangamahieng kapingipingo, rotoroto, aklemei pwuko, kadeik sapwung pwuko, Ih alehda, oh kihsang douhlul manamanpe.”7
Nan ansouo ni kapokon lap nan Buenos Aires I koasoia ninkapwano, Ngehno kasalehieng ie ni sansal me Mwomwohdiso en Sises Krais en Souleng en Imwin-Rahn Akan iei me pilipildahr en kakehlaka oh kamwakid anahn akan me anahnepe ong ni kaunopadahn Ketido Keriau en Kauno: iei me mehlel, e kopwurupwurdo pwehki sang ni kahrepe wet. Mie wasa kis me ke kak diar ehu pwihn en aramas me kin kamehlele mwehin ahnsou wet nin duwen eh kokohpkihdar iei “irair en kaimwiseklahn ahnsou,” me Koht kupwure ong ni “kapokonepene mehkoaruhsie pwehn wiahla ehu rehn Krais”?8 Ma ke sohte kak diar wasaht ehu pwihn en aramas me nannantihong en kapwaiada dahme anahnepe ong me momour akan oh me melahr akan pwehn kaunopadahng rahno, ma ke sohte kak diar wasaht ehu pwihn me kin tohnmetekihla arail ahnsou oh neirail sent pwehn kapokonepene oh kaunopada aramas en inou kan pwe re en kak alehdi Kauno, eri sohte ehu wasa tohrohr me ke kak diar ie.
Ni mahsen ehu ong Mwomwohdiso nan pahr 1831, Kauno poahngoaki me:
“Kih kan en wehin Koht koasoandihengehr ohl en sampah, oh sang met kohkohla rongamwahuo pahn lel wasa koaros ni idin sampah. …
“Peki rehn Kauno, me sapwellime wehio pahn wenlahte nin sampah, pwe towe kan en alehdi, oh onopadahng rahn kokohdo kan, me Nein Aramaso pahn ketidihdo sang nanlehng, likilikawih marain en sapwellime lingaling, pwehn tuhwong wehin Koht me koasoandier pohn sampah.”9
Dahme kitail kak wia pwe kitail en kak kaunopada ohng rahno? Kitail kak kaunopkitailda; kitail kak kapokonepene Sapwellimen Kauno aramas en inou kan; oh kitail kak kapwurehdo inou en komour me “kohieng atail pahpa ko,” iei atail peneinei en mahs ako.10 Soahng pwukat koaros uhdahn anahne wiawi mwohn Kauno pahn ketido sapahl.
Ehu ire me inenen kesempwal ohng ni ketidohn Kauno, iei anahne en mie pwihn en aramas ehu nin sampah me kaunopadahngehr alehda Ih ni ansou me E pahn ketido. E mahsanih me irail kan me mihmihte pohn sampah ni rahno “sang me tikitik [lel] me laud, … pahn audaudkihda eripit en Kauno, oh pahn kilangki meserail, oh ngilerail kan pahn ngilaudla, oh sang ni ngilerail kan irail koaros pahn koulkipene koul kapw ehu me koasoia: Kauno ketin kapwuredohr Saion. … Kauno ketin kapwurepenehr soahng koaros wiahla ehu. Kauno ketin kapwuredidohr Saion sang powe. Kauno ketin kapwuredalahr Saion sang pah.”11
Nan mwehin kawau, Koht ketin malipehier Saion ong pein Ih.12 Sang ni karasaras wet, ni imwin rahn ako Saion kapw pahn alehda Kauno ni ansou me E pahn ketido.13 Saion iei irail akan me nan mohngiong mwakelekel, pwihn en aramas ehu me ahniki mongiong teieu oh lamalam tekis, me kin mourki pwung oh sohte me semwehmwe nanpwungarail.14 Soukohp Sosep Smehd koasoia me, “Kitail anahne kawada Saion en wia atail pwukoah keieu laud.”15 Kitail kawada Saion nan imwatail kan, ward kan, branch kan, oh steik kan sang ni minimin, wiewia mwahu, oh limpoak en Krais.16
Kitail anahne ese me kawadahn Saion wiewiawi nan ahnsou ehu me diren kahpwal—“rahn ehu me kelingeringer, rahn ehu me kisiniei lullul, rahn ehu me kapahtou laud mie, sengiseng, nsensuwed, oh kaulim; oh me pahn duwehte kisinieng me pahn kipehdi sampah pwon, iei me Kauno ketin mahsanih.”17 Ahpw, pokonpenehn steik kan pahn wia “mehn periper oh wasahn ruksang melimel kan oh sang kahpwal akan ni ansou me e pahn widekdiheng pohn sampah pwon.”18
Duwehte nan ansou kau me kitail kin “tuhpene, kaisihsol oh kapakap, oh kin koasoiheng mehteikan me pid duwen epwelpen palingenitail kan. Oh … tungoale pilawa oh [pihl], ong ni katamanpen Kauno Sises.”19 Nin duwen Presiden Russell M. Nelson kawehwehdi nan kapokon lap en sounpwong en Oatohpe, me “Ehu kahrepe laud nan Mwomwohdiso iei sewese souleng kan en kalaudehla arail pwoson atail Kaun Sises Krais oh Sapwellime Tomw, sewese irail en wiahda oh kolokol arail inou sarawi kan rehn Koht, oh kakehlaka oh katengtengehng arail peneinei kan.”20 Pil ni ansouohte, e kasalehda duwen kesempwalpen inou sarawi kan en tehnpas sarawi, rahn en Sapad, oh nan ehu ehu rahn akan en onohnopki rongamwahuo nan wasahn kousoan kan, utuht sang mehn kaskuhl kapw en Mwomwohdiso. Kitail men esehla duwen Kauno, oh kitail men esehla Kauno.21
Doadoahk en kak pweida ong ni kawadahn Saion iei sang ni kapokonpenehn sapwellimen Kauno aramas en inou kan.22 “Kitail kamehlele me mehn Israel kan pahn pile ehu pwurpene oh duwen kopwurpwurdohn Keinek Eiseko.”23 Koaros me pahn koluhla, kamehlele Krais, oh pepdaisla wia Sapwellime aramas en inou kan.24 Pein Kauno mahsanih me mwohn Eh pahn ketido, rongamwahuo pahn lohk seli wasa koaros nan sampah25 “pwehn kapwurehdo [Sapwellime] aramas akan, me wia kisehn seri en Israel,”26 “oh imwin rahno ahpw pahn leledo.”27 Kokohp en Seremaia pweidahr:
“Eri, kumwail kilang, rahno leledohr, Kauno ahpw mahsanih, me [irail] solahr pahn [inda], Kauno ieias, me kahluwahsang serihn Israel kan sang nan sahpw en Isip;
“Ahpw, Kauno ieias, me kahluwahsang serihn Israel kan nan sahpw en paliepeng, oh sang nan sahpw kan koaros me e ketkihsang irail; oh I pahn ketin kapwurei irailahng nan sapwen arail pahpa kan me I ketkihong irail.” 28
Presiden Nelson kin kalapw kapwurehieng me “kapokonpenehn mehn [Israel] iei me wia mehkot keieu kesempwal pohn sampah rahnwet. Sohte mehkot me kak karasahieng uwen laud, sohte mehkot kak karasahieng uwen kesempwal, sohte mehkot kak karasahieng uwen lapalap. Oh ma kumwail pahn pilada … e pahn mie anahnepomwail laud.”29 Souleng en Imwin-Rahn Akan ansou koaros wia misineri kei. Meh lohpw kei me aledahr pwukoahn doadoahk wet sang ni tepin Kopwurupwurdoh; meh nen kei me wiewia pwukoah doadoahk wet ansou wet. Oh, sang ni en Elder Quentin L. Cook padahk, kitail koaros kak iang patehng ni mwohmw kei me tikitik oh mengei, ni limpoak, lukehieng mehteikan en iang patehng kitail sarawi, pwarek kitail nimwatail kan, oh pwen iang wia kisehn atail pwihn. Sang ni wiawidahn Pwuhken Mormon kasalehda tepin kapokonpene wet.30 Pwuhken Mormon kelehpw me wia dipwisou en pokonpene wet oh weliakapw.
Oh pil me keieu kesempwal nan kaunopdahn Ketido Keriau iei pwukoahn doadoahk sarawi me kin wiawi ohng atail peneinei en mahs ako. Kauno ketin inouki me E pahn ketin kadaredo soukohp Elijah mwohn Ketido Keriau, “rahn keieu kaselel oh kamasepwehk en Kauno”31 en “kasalehda … Prihsduhd” oh “podokedi nan mohngiong en seri kan inou me E ketin wiahiong arail pahpa kau.”32 Elijah ketidohr nin duwen me E inouki. Rahno iei Epreil 3, pahr 1836; wasa iei nan Tehnpas Sarawi en Kirtland Ohio. Nan wasahu oh nan ansouo, e ketkihda inou en prihsduhd, kih kan ohng komour pen me mehlahr akan oh katengtengpenehn ohl pwopwoud kan, lih pwopwoud kan, oh peneinei kan sang mahs kohkohdo lel dih en ahnsou oh erein mour soutuk.33 Ma sohte mepwukat, eri kahrepen kepikipikdahn sampah pahn kakete kasapwurupwur, oh pwehki met, sampah pahn wia sampah “keria” de “sohte katepe ehu.”34
Ni kasarawihn Tehnpas Sarawi en Rome Italy, me pwulopwul kan, serepein oh pwutak pwulopwul epwiki samwa me iang kasalehieng Presiden Nelson kisin doaropwe kan me irail kaunopada me eden arail peneinei en mahs akan nting powe. Irail onopadahr en pidolong nan tehnpas sarawi pwehn wia pepdais ong arail peneinei en mahs ako. E wia ahnsou kaperen ehu, ehu karasaras na pwungen mehkei me pid kalaudehlan doadoahk en kawada Saion ong dih kan me tihengehr mwowe.
Ni atail wie nantiheng en kawada Sahion, patehng atail pwukoah ong kapokonpenehn Sapwellimen Kauno aramas pilipildah kan oh komour en me melahr akan, kitail anahne uhdi oh taman me iei Sapwellimen Kauno doadoahk met oh Ih me ketin katkatanga. Ih me Kaun en mwetiwelo, oh kitail me wia Sapwellime soun papah kan. E ketkihong kitail doadoahk nan mwetiwelo sang ni atail kehl koaros nan “keimwiseklan ahnsou wet” oh E ketin iang kitail wiewia doadoahk.35 E pahn pwung ma kitail inda me E mweidehng kitail en iang Ih doadoahk. Ni Pohl ah mahsanih, “I podokedier, pihl en Apollos; ahpw Koht me kalaudehla.”36 Iei Ih me peihn kamwadangahla Sapwellime doadoahk nan sapwellime ahnsou.37 Kitail wie uwen atail kak koaros, mehndahte e sohte itar, ah sang ni atail “doahk soh itar kan,” Kauno kin ketin kalaudehla.38
Nan mwehin irair wet e wie kekeirda mwadang lao lel ni imwio—Saion pohn sampah, pahn ehuieng Saion sang powe ni rahn me Sounkomouro pahn ketido ni klohri. Mwomwohdiso en Sises Krais kamanamanlahr en kaunopada sampah ong rahno—oh ihme wiwiawi ahnsou wet. Eri, Ihster wet, kitail en kawauwih mehlel Iasadahn Sises Krais oh soangen kilelpe koaros: Sapwellimen mwehin popohl erein pahr kid, kadeik pwung oh pwuhng pahrek unsek ong koaruhsie, mour kohkohlahte ong aramas koaros me mour pohn sampah sangete tepin kawa, oh inoun mour soutuk. Sapwellimen Krais Iasadao me kasalepen me soahng koaros pahn wiawi ni pwung. Kitail nantihlahte oh kawada Saion pwe rahno en kak leledo. Ni mwaren Sises Krais, ahmen.