![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F02%2Fa3%2F02a37e6521efc1979fc04a6ec1d1df2f145740d7%2F02a37e6521efc1979fc04a6ec1d1df2f145740d7.jpeg/full/!250,/0/default)
Kaunopda Pwe Ken Alehdi Soang koaros me Anahnepe
I kadehdehki me kapai kan pahn kodohng kitail sang ni atail pahn nantiheng kapwaiada pein atail pwukoah en onopki oh poakohng rongamwahu kapwurpwurdo en Sises Krais.
Prokram oh kemwekid kan en Momwohdiso en Sises Krais en Souleng en Imwin Rahn Akan wie mwamwahula nan pelien poahsoankihda nan Imwetailkan oh pahn utuht en Mwomwohdiso,me sansaldasangehr ireklahn kaweklahkan me pakairki nan Kapokon Lap samwarahro. Preseden Russell M. Nelson padahkiong kitailehr: “Mie soahng tohto wie kokohdo. … Kang kanamwail wini en roson kan. Kommoal mahs. Udahn e pahn kaperen mehlel.”1
I kapakapki oh peki sawas en Ngehn Sarawi ni atail pahn medemedewe duwen lipwen mwekid kapw pwukat nan Sapwellimen Kauno Mwomwohdiso wet.
Padahk en Rongamwahuo en wia Poahsonen nan Imwetail kan Pahn Utuht en Mwomwohdiso
Elder Craig C. Christensen wia peliei nan kapokon en prihsduhd me ahpwtehn neko, oh e kihda iren peidek riau pwe en sewesehki padahk en imwatail kan en wiahla wasahn kaskuhl pahn utuht en Mwomwohdiso. E nda me ni ansou me kitail kin pwurala ni imwatail kan mwurin sarawi kitail en dehr idihdek,“Dahme kumwail esehla duwen Sounkomouro oh Sapwellime Rongamwahuo ni ihmw sarawio rahnwet?” Ahpw nan atail mihting kan en ihmw sarawio e konehng kitail en idek, “Dahme kumwail esehla nan amwail onopki duwen Sounkomouro oh Sapwellime Rongamwahuo nan imwamwail kan nan wihket?” Wauneki mehlel Rahn en Sapad, mehn kasukuhl kapwo, oh kamwotomwotalahn koasoandien mihting kan koaros pahn sewese kitail en esehla rongamwahu pali koaros nan imwatail kan oh nan ihmw sarawi.
Emenemen tohn Mwomwohdiso en Sises Krais en Souleng en Imwin Rahn akan pwukoakihdier en esehla oh momourki Sapwellimen Kauno padahngkan oh alehdi tiahk sarawi kan en komourala oh kesepwilda ohng lapalapala, sangrehnme ahneki mweimweio. Kitail sohte pahn kaskasik koasoandi en Mwomwohdiso en padahk de ndahiong kitail soahng koaros dahme kitail anahne ese oh wia pwe kitail en wiahla tohnpadahk poadidi kei oh dadaurete lel ni imwi ni loalapwoat.2 Ahpw, pein atail pwukoah en esehla dahme kitail anahne esehla, pwe kitail en momourki dahme kitail uhdahn anahne en momourki, oh pwehn wiahla dahme Kaun lapalapo ketin kupwurki kitail en wiahla. Oh nan imwatail kan me keiou mwahu ohng ale kaskuhl, momourki rongmwahuo, oh koahiekla.
Joseph Smith eh wia kisin seri, e esehla Koht sang nan ah peneinei. Pwehki eh nannantieng en diarada Kupwur en Koht, kahrehiong Joseph en rapahkiseli me mehlelo nanpwungen soangsoangen pelien lamalam kei, wie mengmengloalki audepen pwuhk sarawi kan, oh kapakap ni ngidingid ong Koht. Ni ahnsou me Joseph Smith pwurala nihmweo sang welin tuhke sarawio, mwurin eh patohwanehr Sahm Nanleng oh Sapwellimehu , e lokaiaiong mahs eh nohnohu. Ni eh “idihdengek wasahn kisinieio, [eh] nohnohu idek reh dahme sapwung. [Joseph] sapengki, ‘sohte, soahng koaros mwahu—I mwahu.’ [E] apw ndalahng [ah] nohnohu, ‘Pein ngehi esedahr.’”3 Dahme Joseph lelohngo kahrehiong atail esehla wiepe kesempwal ehu me emenemen kitail anahne kahlmangih. Kitail pil anahne pein esehla.
Kahrepe me keieu kesempwal nan koasoandien Samatail Nanleng iei pwe Sapwellime seri kan en duwehla Ih. Eri, E ketikihong kitail ahnsou mwahu kan en keirda oh pweida. Atail inou en esehla oh momourki nin duwen me mehlel inenen kesempwal nan sampah “pingiping wet”4 oh me kasahliel oh suwed mehlel. Kitail sohte kak kaskasik me kohlahte sarawi oh towehda prokrahm kan oh soahng koaros mwahuer en kamarainda palingehn oh silasildier me pahn kak kahrehiong kitail en kak “powehdi nan ahnsou suwed wet.”5
“Nohno pahpa ahniki pwukoah sarawi en apwalihda neirail serihkan ni limpoak oh pwung.”6 Soun kaweid kamarain kan en Mwomwohdiso, sounpadahk kan, oh kemwekid kan kin sowese emenemen oh wiewia kan en peneinei kan en kak keirda nan palingehn. Mendahte kitail koaros anahne sawas pwe kitail en wonoweite pohn ahl en inouo, kitail me pahn pein pwukoahki kakehlepen palingehn oh dahme mwahuehng emen emen kitail.
Kumwail tamanda mwomwen Nihpahi, nein soukohp Lihai nah pwutako, inengieng en kilang, pein rong, oh pein esehda sang ni manaman en Ngehn Sarawi mehkan me semehu kilangadahr nan sansal en tuhkehn komouro. E sansal me Nihpai anahne karasaras oh e kapahikihda nan eh pwulopwul sang ni karasaras oh padahk kan en ah “nohno pahpa mwahu.”7 Apw, duwehte Joseph Smith, e kin mehn esehla oh pein ih diarada.
Ma kumwail koaros de ahi wehwehki duwen Sises Krais oh Sapwellime rongamwahu kapwurpwurdo duwehte dahme ekei aramas kin padahngki de kosoia, eri poahsoan en atail kadehde en Ih oh Sapwellime doadoahk lingan en Imwin Rahn Akan koukouda pohn pihk.8 Kitail sohte kak kehlkihte mehkoaros sang ekei aramas de ke sohte kak pekihda en emen marain oh en ekei loaloakong—mendahte ma irail kan me kitail poakohng oh koapworopworki.
Soukohp Joseph Smith padahngki me emen emen tohn Souleng en Imwin Rahn akan anahne pein wehwehki mahs “wiepe oh kahrepe kan en Koht me kitail kohkihdo sampahwet.”9
“Ma kitail kak wadek oh wehwehki mehkoaros me ntingdier sangete mwein Adam, duwen aramas rehn Koht oh tohnleng kan nan ahnsou kohkohdo, kisin meh kis me kitail pahn wehwehki. Ni atail kin wadek duwen dahme kin wiawiheng ekei aramas, de kaudiahl me kin kohieng irail, sohte pahn kasalehda ni oaretik duwen pein kitail oh nan pwungen kowe oh Koht. Kamarain en mepwukat kin alahldihte sang ni ahmw pahn pein esehla sang tiahk sarawi kan me Koht ketin koasoanehdi ohng ni kahrepe wet.”10
Sawas pwehn kapwaiada doadoahk sarawi wet ong emenemen aramas oh peneinei kan me ehu kahrepe kesempwal ong mwekid kan en Mwomwohdiso en Sises Krais en Souleng en Imwin Rahn Akan ar tepida poahsoankihda nan imwatail kan oh pahn utuht en Mwomwohdiso ahnsou kiset nan irair en kaimwiseklahn ahnsou.
Wahnpadahk en Poahsoanda nan Imwatail kan oh Pahn Utuht en Mwomwohdiso
I pahn oaralapihada ekei wahn padapadahngki rongamwahu eh wia lalaudla nan imwatail kan oh pahn utuht en Mwomwohdiso.
Udahn wasahn kaskuhl en misineri kin tepsang nan imwatail kan; ah keriau nan wasahn kaskuhl misineri kan me mih Provo oh Manila, oh Mexico oh nan wasa teikan. Kaweid en Santi Skuhl me keieu katapan anahne wiawi nan pein atail onop oh onop en peneinei nan atail wasahn kousoan; Santi Skuhl nan ihmw sarawi kak pil sawas ahpw e sohte pahrekiong nan imwatail kan.
Wasahn poadoapoad en Peneinei kan ahnsou wet miehier nan imwatail kan. Mie me kin pwukoahki ni pelien sawas ohng repen poadoapoad en peneinei nan atail ihmw sarawi kan.
Kaskuhl en kaunopadahng tehnpas sarawi me keieu kesempwal kin wiawi nan imwatail kan; wasa me keriaun kesempwal en wia kaskuhl en kaunopadahng tehnpas sarawi kak wiawi nan ihmw sarawi kan ekei pak.
Wiahda nan imwatail kan en wiahla wasahn poadoandoar iei wasa me kitail en kak “keskesinen nan wasa sarawi kan”11 me kesempwal ni Imwin Rahn Akan. Oh uwen kesempwal duwehte padahk kan en poahsoankihda nan ihmw oh pahn Utuht en Mwomwohdiso ohng kakehlepen palingenitail oh poadoandoar en rahn pwukat, e pahn pil inenen kesempwal ong nan rahn kokohdoh kan.
Padahk en Poahsonkihda nan Imwetail kan oh Pahn Utuht en Mwomwohdiso oh Onopadahn Mwohn Pidelong nan Tehnpas Sarawi
Menlau medemedewe mwomwen padahk en “poahsoankihda Nan ihmw oh pahn utuht en Mwomwohdiso” eh doadoahk nan en emenemen kitail, atail wie kakaunop oh warohng en alehdi tiahk sarawi kan oh inou kan nan tehnpas en Kauno.
Ni mehlel, onopada mwohn tehnpas sarawi me inenen kesempwal nan imwatail. Ahpw tohto tohn Mwomwodiso wet me kin sehse dahme mwahu en kosoia oh sohte konehng en kosoia likin tehnpas sarawi duwen dahme e wia nan tehnpas sarawi.
Preseden Ezra Taft Benson kawehwehda dahme karehda soahng wet sohte pahn wiawihki:
“Tehnpas sarawi iei wasa sarawi ieu, oh tiahk sarawi kan nan tehnpas sarawi wia mehkot me sarawi. Pwehki e me sarawi ekei pak kitail sohte pahn kosoia mehkot me pid tehnpas sarawi ong neitail serihkan oh ong nein neitail serihkan.
“Ni eh kesemwpwal, me tohto sohte kakairada ineng mehlel en kohla nan tehnpas sarawi, de ma re kohla, re kin wia ni sohte kaunopada mahs ong pwukoa oh inou kan me re pahn pidelongla loale.
“I kamehlele me wehwehki mwahu de onopada mwowe udahn pahn sewese neitail me pwulopwul kan ong tehnpas sarawi … [oh] pahn miher loalerail ineng en alehda kapai en prihsduhd kan duwehte Eipraam eh alehda ah.”12
Mie kaweid mengei riau me kak sowesei kitail en marainkihla mwahu me Preseden Benson kosoia.
Kaweid #1. Pwehki atail poakohng Kauno, atail kosoi kan duwen Sapwellime tehnpas sawari pahn kin mih ni wahu ahnsou koaros. Kitail sohte pahn kasalehda de kosoiahda kilel kan me kin iang inou kan me kitail kin alehdi nan tehnpas sarawi. De pil kadilla me sarawih kan me kitail kin inoukihda nan tehnpas sarawi en deh kosoia.
Peneu #2. Tehnpas Sarawi me tehnpas en Kauno. Dahme kin wiawi koaros nan tehnpas sarawi kin kahluwakitailahng rehn atail Sounkomouro, Sises Krais. Kitail kak kosoiahte kahrepe oh padahk kan me pid duwen tiahk sarawi oh inou kan en tehnpas sarawi.
Presiden Howard W. Hunter kaweidki: “Kitail en ehukiong neitail serihkan dahme kitail kehn ni palingehn nan tehnpas sarawi. Kitail en nantiong padahkiong irail oh ni soanamwahu en kosoia mehkan me konehng en inda duwen kahrepeh kan en tehnpas en Kauno.”13
Nanpwungen dih kan sangete soukohp Joseph Smith leledo Preseden Russell M. Nelson, Kaun kan en Mwomwohdiso kin oaretikihada padahk duwen kahrepe kan en tiahk sarawi oh inou kan en tehnpas sarawi.14 Mie kiden mehn sawas ni nting, me aramas kak rong, kilang oh ire teikan pwehn sewesei kitail en esehla duwen tiahk sarawi kan en initiedori, endaumen, kapwopwoud, oh tiahk en katengetengpene teikan.15 Pil mie duwen idawehn Sounkomouro sang alehdi oh wauneki inoun kapwaiada kosonned en peik, kosonned en meirong, kosonned en rongamwahu, kosonned en mwakelekel, oh kosonned en tounmeteikihla mehkoaros.16 Tohn Mwomwohdiso koaruhsie uhdahn anahne kapehse ong irail mehn sawas pwukat me kak dierek ni temples.ChurchofJesusChrist.org.
Presiden Russell M. Nelson koasoaia uwen kesempwal en kapahrekiong sarawi kan en tehnpas sarawi oh iren sawas katapan kan me Mwomwohdiso kin kihda me kin mehlel, pwung, oh ong wehi pokon. I koangoangehkin kumwail tohn Mwomwohdiso … en wadek nan Bible Dictionary wasah kan me pid tehnpas sarawi, soangen lepin lokaia ‘Kasarawi,’ ‘Inou kan,’ ‘Tohnmetei,’ and ‘Tehnpas Sarawi.’ Ekei kumwail mwein pahn pil men wadek Eksodus ire laud 26 lel 29, oh Lipai ire laud 8. Kadehde Mering oh pil pwuhk en Moses oh Eipraam nan pwuhk en Pearl of Great Price, kin kasalehda mwomwen doadoahk en nan tehnpas sarawi en mwein kawao oh tiahk sarawi kan kin wiwiawihte.17
Na, medewehieng ma noumwail kisin pwutak de serepein idek, “Mie me ndahiengie ni imwen skuhlo me mie likou ehusoahng kei me aramas kin likawih nan tehnpas sarawio. E mehlel?” Mie kasdo mwotomwot ieu me aramas kak kilang pohn internet: temples.churchofjesuschrist.org daidelih “Sacred Temple Clothing.” Mehn sawas kaselel wet kawehwe mwomwen sangete mahs ohl oh lih kin pwungki koul sarawi,soangsoangen kapakap, likou sarawi me mie wehwehpe, kilel kei, oh tiahk kan pwehn kasalehda arail lamalam kan en loalopwoat ong Koht. Eri, Mwomwohdiso wet kin utungada soangen mwekid kan me kin poahsoankihda nan ihmw pwehn kaunopadahng kapai lingaling kan en tehnpas sarawi sang ni kaweid mengei oh mehn sawas kapwuriamwei kan duwehte kahsdo wet. Mie mehn sawas tohto ong kumwail.18
Ni atail pahn kin ngoangki karakarahkala pahn Ngehn en Kauno,19 kitail ahpw pahn paiekihla wehwe oh pweida nan imwatail kan pwehn diarada dahme konehng oh dahme sohte konehng en koaosia duwen tiahk sarawi oh inou kan en tehnpas sarawi.
Inou oh Kadehde
I ese me ekei kumwail mwein pahn medemedewe ma amwail onohnop en rongamwahu makak en poahsoankihda nan imwomwail oh utuht en Mwomwohdiso. Mwein ele kowehte me towe en Mwomwohdiso nan imwomw, de kumwail kan me amwail pwoudkan sohte kinutung uhk, de kumwail kan me kelkelehpwki pwukoahn nohno pahpa, de ahmw pwoud mweisang uhk, oh ke pahn mwein peidengki ia mwomwen padahk pwukat eh kak doadoahk ohngie. Mwein kumwail me pwopwoud kan pahn kilengpene oh peidengki, “Kita kak wia met?”
Ehi, kumwail kak wia met! I inoukiong kumwail me kapahi en sawas kan pahn pwilipwilwei oh sansal nan amwail mour. Wenihmw kan pahn ritida. Marain pahn dakada. Amwail kak koaros pahn laudla pwe en kak kaludehla amwail ingengieng oh kanengamah.
I kadehde me kapai kan pahn kodohng kitail ni atail pahn nantieng kapwaiada pein atail pwukoah en onopki oh poakohng rongamwahu kapwurpwurdo en Sises Krais. Ni mehlel kitail kak “Kaunopada pwe kitail en alehdi soahng koaros me anahnepe.”20 I inoukihong kumwail oh kadehdeda ni mwaren Kauno Sises Krais, ahmen.