Kilang Sihmpwul en Koht
Weklahn koasoandi en Rahn Sarawi wiawi pwehn kilelehdi Kamadipw Sarawi en Kauno nin duwen eh wia poahsoan sarawi en atail kaudek en wihk koaros.
I mwamwahu lau ngehi kilangada pilen mesen me pwoulopwoul me iang mih nan pwihn en koulo. Pilen mas pwukat wia kapahrek inennen sarawi sang dahme I pahn kak kihda.
Ni eh kilkileng sang apali pihlo, palilahsang pokono en aramas me men iang pepdaisko, Sohn Sounpepdais kilangada riehu, Sises en Nahsared, ketket kohkohdo inendohg reh pwehn pil peki soahngohte. Ni wahu, ahpw ekis ngil laud pwe mehn mpehkan en rong Sohn kepingahda ih me kamwkamwakid kitailte sounparehr riekid mwuri: “Kilang Sihmpwul en Koht.”1
E wia iren kamarain ehu me e pahn wia meninkeder ohng Sises ahpw kaidehn en ekerki Ih “Siohwa” de “Sounkomour” de “Soundoar” de pil “Iehros en Koht”—lengileng pwukat koaros udahn konehng. Soh, Sohn pilada lengileng me keieu kalapw doadoahk nan palien lamalam en nah aramas akan. E doadoahngki ahd ehu me kin kohieng sihpw men me kin meiroangla pwehn wia tomwpen dihp kan, pahtou kan, kasongsong kan oh kahpwal kan en sampah me olahr oh tohn sampah me ohlahro.
Menlau mweidehngie ien ekis padokada oh kawauwih.
Mwurin ara pekeusla sang nan Mwetuwel en Eden, Adam oh Ihp sohpai lapalahn kahpwal. Pwehki ara langahdahng kitail mour me kin mehla oh mour en sampah wet, ira ritingedihsang ira mour me sohte kin mehla oh mour soutuk. Pwehki sapwung me ira piladahro, ira uhd sohpai mehlahn palin war oh mehlahn pali ngehn, katohrohrsang pahn mwetehn Koht kohkohlahte.2 Dahme re pahn wia? Mie wiepen pitsang kapwal wet? Kitail sohte nohn medewe wen ara pahn anahne taman kaweid me ira pahn alehdi nan mwetuwelo, ahpw ira pilese ,me ira anahne wia ehu kasarawi, ahpw sohte me ndahieng ira wehwehn kasarawio—ira anahne meirongkihong Koht emen sihpw kaselel, me tepin ipwidio.3
Mwuhr tohnleng men ketla oh kawehwe me meiroang wet wia kilel ehu, karasaras en meiroang lap ieu me pahn wiawi sang rehn Sounkomour en sampah me pahn ketdo. “Met rasehng en Iehroso Sahmo tohnmeteio,” tohnlengo ndahki ara meirongo. “Pwe, … kumwail pahn koluhla oh peki rehn Koht ni mwaren Iehroso sang met kohkohlahte.”4 Paiete, mie wiepen pitila.
Nan tiepene lap en nanleng mwohn mour wet, Koht ketin inoukiehngehr Adam ih Ihp (iangahki kitail koaros) me sawas pahn kohsang rehn Sapwellime Iehros me sohte dipe, iei Simpwul en Koht “me kamakamlahr sangete ni kapikipikdahn sampahu,”5 duwete dahme Wahnpoaron Sohn kawehwehdi. Sang ni arail meiroangki neirail simpwul kan nan mour wet, Adam oh kadoudokarail kan kasalehda duwen arail anahne tomw en Sises me Keiediero.6 Mwuri, Impwal en nan sahpwtehno me uhd wiahla wasahn tiahk sarawi wet oh mwurin mwo, tehnpas sarawi me Solomon kauwada.
Paisuwed, pwe me wia kilel en arail koluhla mehlel oh mour pwoson, meiroang en neirail sihpw kan sohte nohn mie katepe, ih me sansal nan pali laud en Kadehde Mering. Mour pwung me konehng iang meiroang pwukat ekei ansou sohte kin werei sang ansou me ntahn mahn me meiroanglahu kin madada. Ni mehlel, e sohte wiawihki ansou reirei pwehn irehdi kamakamalahn aramas ni Kein ah kemehla rie pwutak Eipel ni tepin diho.7
Pwehki kahpwal oh sapwung kan me wiawihkiher ansou reirei, kahrehda tohnleng kan kokoulki arail peren ansou me Sises ipwidi—Mesaia me koaros wie kaskasiko. Ni kaimwseklahn Sapwellime doadoahk pohn sampah, Sihmpwulo kaunopada Sapwellime tohnpadahk ko ohng Sapwellime pwoulahu ni Eh ketkihda kamadipw sarawi nan en Kauno Koanoat en Soutik, wiepen tiahk sarawi mengei ehu me wiawiher likinte Eden. Meiroang pahn wiawihte, e pahn iangahki tohnmetei, ahpw e pahn wiawi nin duwen pwoulahn Krais me wia tohnmetei mwuledek ehu me emenemen anahne douloalih oh sohte kakerehdi ntahn sihpw. Ohng mehn Nihpai kan, mwurin Sapwellime Iasadahu, Sounkomouro mahsani:
“Kumwail solahr pahn kakerehdi nta pwehn wia amwail meirong. …
“… Kumwail pahn tohnmetei kihong ie meiroang en mwohngiong karakarahk oh ngehn peik ehu. Oh mehmen me patohkihdo ni mohngiong karakarak ehu oh ngehn en peik ehu, e pahn ale pepdais en kisiniei oh Ngehn Sarawi. …
“… Ihme kahrehda, … koluhla, … oh komourla.”8
Riei ohl oh lih kempoake kan, pwehki wiepen kasukuhlki rongamwahuo ohng atail peneinei kapw oh kaselel wet, e kesempwal kitail en tamataman me kitail anahne (nin duwen kehkehlik en pwuhk sarawi) “kohla ni imwen kaudek oh meiroangki atail kamadipw sarawi ni rahn sarawi.”9 Me patehng atail kasukuhl en rongamwahuo nan atail peneinei kan, iei wekdeklahn kaudek en Rahn Sarawi pwehn kamwotehla atail mihting kan oh kasalehda ni mehlel me kamadipw sarawi ni eh tepsang en Kauno Koanoat en Soutiko, wia me keieu sarawi oh inondehn atail kaudek en wihko pwon. Kitail anahne tamataman ni uwen atail kak koaros me Krais pwoula pwehki sang ni weikeklahn mohngiong karakarak ehu oh eimwoluhn Sapwellime ngehno me toutoukihdier dihp oh pahtou oh lokolok kan koaros en tohn sampah unsek.
Sang atail patehngehr kemwekid en katoutou lap wet, e wia mehn kawahu ohng kitail. Se kangoangei kumwail en kin mwadang kohdo ni wahu, likouda mwahu pwehn iang kawauwih tiahk sarawio. Aramas solahr nohn kesempwalki “Likoun sarawi” rahn pwukat, oh pwehki atail wauneki Ih ihme kitail pahn pato pahn kupwure, kitail anahne pwurehng kin kaunop kitailda mwahu oh likouda mwahu uwen atail kak.
Me pid mwadangodo, kitail pahn kin mweidehng nohno kan me mie neirail seri, wisik ehd en kirahka oh daiper kan, kahkahre polohn seri katairong ehu en kin kohdo pwand. Ni soangen mwoahmwohte, miehte me pil pahn undahn loieng ehu soangen kahpwal ni menseng en Rahn Sarawi. Ahpw, se pahn wehwehki ma kumwail kin kohdo pwand pak ehu nan irair en ansou ieu, ahpw ma kumwail kin pwand Rahn Sarawi koaros se anahne kumwail en kapwungala amwail mwekid kan.
Ni ansouohte, se pil men wia ehu pekipek sang wahnpoaron kan kumwail en katikala katairong me kin wiawi nan tehnpas en kaudek kan. Se pereniki pwarek emenemen, oh kitail anahne wia met—pwe e wia ehu ire kaperen ni atail kin kohdo Sarawi—ahpw e sohte konehng wiawi nan wasa me kaudek kin wiawi ie. I periki pwe irail me kin pwarek kitail sang ehu palien lamalam tohrohr de kin pwuriamweikihla soangen mwekid kasohwahu kan me kin wiawi nan wasahn kapakap, wahu oh meleilei. Ele nanleng pil kin iang pwuriamweikihla.
E pil pahn kasarawihla irair en atail kamadipw sarawi kan ma irail me pahn kaunda kan kin sondier nan dewarail mwhon mihting pahn tepda, wie rongorong ngilen piano oh kasalehda wahu me tohn kaudeko anahne alasang. Ma mie medakahn wiwiawi mwohn mwoahlo, kitail sohte pahn pwuriamweiki ma mie medakahn wiwiawi nan pwungen tohn sarawio. Se kepinga kumwail pisop oh sounsawas kan me solahr kihda pakair mwohn mihting pwe e kin kasalongehsang ngehno nan atail kaudek. Ngehi, emen, me sohte kak medewe emen samworou nan tehnpas sarawi en Kauno keilahnaio—ni eh pahn iang ehu oh ihte tiahk sarawi en samworou kan me e kak iang nan ah mour—ni mehlel I sohte kak medewe mwoamwen eh pahn uhda mwohn mwoahlo oh kataman kin kitail me ehu kamwadong pahn wiawi mwurin wihk weneu.
Riei ohl oh lih akan, awahn kamadipw sarawio me kasarawihsangehr Kauno wia awa me keieu sarawi nan wihko. Kitail kin pokonpene pwehn ale tiahk sarawi me kin wiawi nan sampah pwon nan Mwomwohdisoht pwehki kosonned. Met wia mehn ketemen en Ih me peki kepo me E pahn nektehn ketiki en dehr pweida ahpw E doula pwehki E ketin mwahngi me pwehki kitail E pahn ketiki kepo. E pahn sewesei kitail ma kitail kin tamataman me weliepen kepo wie wawai kohkohdihdo rehtail sang dihken sounpar 11 de 12 emen.
Ni ansou me awa sarawio lel pwe kitail en kihda atail kisakis en tohnmetei ohng Kauno, kitail anahne kapwungala dipatail oh atail sohitar kan; ihme kahrehda kitail kohkihla. Ahpw kitail pahn pweida nan mwekid en koluhla pwukat ma kitail pil pohnese mohngiong ohla oh ngehn weikekla kan me kapelkitail pene kan. Mie me mwomwohd sohte dohsang kitail me ele wie mwahmwahieier—mas liki de mas loale—erein kaudeko pwon. E sou mwahu kitail en kasalehda atail kadek lamalam pwehn kansenamwahui irail—de towe me wie nannanti me sohte iang sarawi oh ma kitail sohte kapakap kin irail, kakete sohte iang sarawi wihk kohkohdo? de pil ohng riatail ohl oh lih me sohte iang towehda Mwomwohdiso wet ahpw wia riatail? Mie kahpwal oh lokolok wasa koaros nan sampah wet, nan Mwomwohdisoht de liki, eri kilang seli oh kumwail pahn diar irail kan me ahneki medek me nohn toutou re solahr kak pwekada oh mohngiong ohla me solahr kak uhdi. Ehu wiepen atail kak “kalapw tamataman ih”10 iei en iangala Toahkte Lapo nan Sapwellime pwukoa sohte uhdi o pwehn pwakada me toutoulahr oh kansenamwahui irail me pahtou kan.
Kempoakepahi kan, ni atail kin ehu pene nan sampah wihk koaros nan dahme kitail kasik iei kekeirdahn kasarawi en tohnmetein tomw sang Ieros en Koht, kitail en kin wahdo ni mwoahl en kamadipw sarawi “pilen mas en pahtou [oh] medek pwehki sapwellime weirek.” Ni atail kin kataman, kapakap, oh kalipwelipwa inou, kitail en ale sang nan ansou sarawio “kanengamah laud nan kahpwal, … kaping laud pwehki komour.”11 Pwehki kanengamah oh komour, pwehki sarawi oh koapworopwor, I kapakap ki kitail koaros ni Mware me pelingpeseng tepin pilawa en mahk oh audehda wain en komour, iei Sises Krais, me lingan, mahk, sarawi Sihmpwul en Koht, amen.