Dirkihla Kapahi kan
Pali laud en kapahi kan me Koht kupwurki ketkiong kitail kin anahne atail pali en doadoahk—atail wiewia kin poahsonki atail pwoson Sises Krais.
Riei ohl oh lih ako, Samatail Nanleng oh Sises Krais kupwurki en kapahiada emenemen kitail.1 Sangete mahs ni pelian lamalam aramas kin akahkupwungki mwomwen ar pahn alehdi kapahi kan.2 Ekei kin kosoia me ke pahn pein koadoakiada kapahi kan; kitail kin alehdihte sangete atail doadoahk kan. Ekei kin akamaiki me Koht piladahier ihs me E pahn ketin kapahi oh ia mwomwe—oh koasondi pwukat sohte kin wekla. Soangen lamalam riau pwukat koaros uhdahn sapwung. Kapahi en nanleng kan sohte kin alahldihsang kapkapatpenehn “wiewia mwahu kei,” e pil sohte kin alahldihsang atail kin mwomwohd awiawihte kapahi kan en pein pwarada. Soh, ni mehlel e ekis ehu soahng sang met ahpw e pil konehng ong nanpwungen Sahm limpoak mehn oh me pahn sousouki Sapwellime wehi–iei kitail. Kopwurupwurdohn mehlel kan kasalehda me kitail sohte mwahn kin pein koadoahkiada kapahi kan, ahpw atail mwekid en pwoson kan me kitail tepin wia oh me wiewiawihte, me kesempwal.3
Ni atail pahn medemedewe duwen ia mwomwen atail alehdi kapahi kan sang rehn Koht, kitail pahn karasahkieng kapahi en nanleng ohng lapalahn kapakap en tuwi. Medewehieng nan werengen kapakapo kisin mehn kadaurur, mwuri kisin mwaremwaren tuwi. Mwuri kisin tuhke, mwuri lepin tuhke tuwi kei, oh mwuri lepin tuwi me ahlapasang. Kapakap en tuwi pwukat pahn wiahda lapalahn kisiniei, oh pahn kak wie maramarain oh karakar ong rahnkei. Na medewehieng ririn masis pwoat limwahn koaskoasuk en tuwi kei, soang me kin idingete ni sohte lipilipil apw lul.4
Oh pwe angin kisinieng nan tuwihko en lulda, kisin lepin massis o anahne mahs iding oh isik mehn kadaurur. Mehn kadaurur ko pahn mwadangete lulda oh kahrehieng tuwi laudko en lulda. Ahnsou me lullulo tepda, e kin wie lulluloh lao tuwihko koaros luldier de solahr angin kisinieio.
Iding ririn masis pwoat oh isikada mehn kodourur wiewia tikitik ehu me pahn kak en kiong tuwihko en esingek pwe en kak lulda.5 Ma masiso sohte kak lulda mahs, sohte mehkot kak pweida, mendahte ia uwen koaskoasuk en tuhwihko. Ma masiso pahn isik apw sohte doadoahngki mehn kodourur, uwen lulul en ririn masis pwoat oh karakarih sohte kak kaukehda sang ni kisin masiso kelehpw oh esingek en nan tuwihko sohte kak en lulda. A ma kisinieio sohte kak esingek, lullulo udahn pahn kunla.
Pil duwehtehte met, pali laud en kapahi kan me Koht kupwurki ketkiong kitail kin anahne atail pali en doadoahk—atail wiewia kin poahsonki atail pwoson Sises Krais. Pwosonki Sounkomour iei me padahk me pid wiewia oh manaman.6 Kitail pahn mwekidki mahs ni pwoson ah mwuri manaman ahpw pahn kohdo—nin duwen kupwur en Koht oh sapwellime ansou. Koasoandipe me kesempwal.7 Doadoahk kan me anahne wiawi inenen tikitiksang uwen kapahi kan me kitail kin alehdi.8
Medewe dahme wiawi ahnsou me sineik poisin kei me Kauno kadaralahng nan pwungen mehn Isreal ko ni arail wie kokohwehng nan sahpw en Inou. Keikei en sineik poisin ko kin kemehla aramas. Ahpw me keikeidi kak mwahula ihte ma e kilanglahng sansal en sineik me Moses wiadahng pohn ah sokono.9 Ia uwen apwal en kilangte? Koaros me kilang alehda manaman en nanleng oh mwahula. Ekei irail mehn Israel ko keikeidi oh mehla pwehki re sohte kilenglahng sineik prons o. Mwein re pwupwkihdi ar sohte ahniki pwoson en kilangte.10 Mwein re sohte kamehlele me wia kisin mehkot mengei kak kamwekidida inouhn kamwahwiala. De mwein re kakeptakaila arail mohngiong kan oh kahng rong kaweid en Sapwellimen Koht Soukohp.11
Padahk en tapiada kapahi kan me kin pwilisang rehn Koht me poatopoat. Kitail en pil duwehte mehn Isreal en mahs ako, kitail pil anahne mwekidki atail pwoson Sises Krais pwe kitail en kak kapahida. Koht ketin kasaledahr me “mie kosonned poatopoat me koasoansoandier nanleng mwohn tepin sampah wet wiawihda, me kapahi kan koaros poahsoankihda- oh ni ahnsou me kitail kin alehdi kapahi sang rehn Koht, e kin pwilisang atail peikiong kosonnedo me kapahio poahsoankihdao.”12 Ahpw mendahte mepwukat, sohte me kin wahdong pein irail kapai kan—lamalam wet me sapwung—ahpw kitail kin anahne warohng Komourpetail kin kohsangete rehn sapwellimen Sises Krais kupwurmwahu oh kalahngan.13 Uwen lapalahn Sapwellime tounmetei wehwehki koskosuk en tuwi me poatopoat; a atail wiewia kan inenen tikitik oh sohte mwahn pahrekiong. Ahpw mie, oh re sohte mwahl; Nan rot, masis me lullul kakete sansal sang wasa doh. Ni mehlel, e kakete sansal sang nanleng pwehki mwekid tikitik en pwoson kan kin anahne ohng ni isikada sapwellimen Koht inou kan.14
Pwehn alehdi kapahi kan me ke mwahuki sang rehn Koht, wiewia ni pwoson, pwehn kamourada manaman en nanleng me kapahio kin poahsoanki. Karasape, ehu kahrepen kapakap iei pwehn alehdi kapahi kan me Koht kupwurki ong kitail ma kitail pahn peki.15 Alma kapakapki mahk ni ngidingid oh medek en mwahula; e solahr toutouki sang dahme kin wia mwowehu en dipeh kan. Ah peren powehdi ah medek—pwehki ah pekpeki ni pwoson Sises Krais.16 Angin tapiada me kitail anahne iei en pwoson Krais oh peki rehn Koht ni kapakap oh pwungkihda Kupwure oh sapwellime koasoandi en pasapeng.
E kin sohte itar en raparapahki oh pekpekihte kapahi kan; angin tapiada kin anahne kitail en doudoulahte, kapwkapwurehiong atail wiewia kan me direki pwoson. Nan werengin pahr kid walupwiki, Brigham Young kaweidiong pwihn ieu en tohn mwomwohdiso pwe ren kohla dawi oh kousoanla Arizona, sahpw madekeng nan North America. Ni arail lella Arizona, pwihn wet nekla nimerail pihl oh re masakada re pahn lokolok. Re ahpw peki sawas rehn Koht ni ngidingid. Ekis keieng keteu oh snow tepda mwer, irail apw kakehr audehda arail diramwko oh miehier mehn epwelpen neirail pelin mahn ako. Re dirki ar kalahngan oh kehn ar kehlailda, re pwurala nan kahnihmw en Salt Lake pereperenki Sapwellimen Koht kupwurmwahu. Ni ar pwuredo, re ahpw pakairki soang koaros dahme wiawiong irail ohng Brigham Young oh kosoia me re diarada me aramas sohte kak kousoan nan Arizona.
Mwurin arail rongehr met, Brigham Young ahpw idek rehn ohl emen nan perehu dahme e medemedewe duwen seiloko oh manaman kapwuriamweio. Ohl menet, Daniel W. Jones, mwadang en sapeng nda, “Ohngie, I pahn kihpenehte ahi kopwehkan, pwurala, oh pwurehng kapakapki.” Brother Brigham Young kihda pehu pohn Jones oh nda, “Ih ohl menet me pahn apwalih ehu pwihn me pahn kohla Arizona.”17
Kitail koaros kak tamataman ahnsou kan me kitail kin nantiongewei oh pwurehng kapakap—oh kapahi kan ahpw wiawi. Dahme Michael oh Mirian Holmes wiahier kasalehda padahk pwukat. Ngehi oh Michael papahpeneier nan Isiakan en Wasahkei. Ahnsou koaros I kin pwungki ma e kin pekpekda en kapakap nan aht tiepene kan pwehki uwen loal en ngehn sarawi me kin inenen sansal; e kin ese mwomwen patohieng Koht. I kin mwahuki rong ah kapakap. Ahpw ansou me re tepin pwopwoud, Michael oh Mirian sohte kin kapakap de iang sarawi. Re kin kediropwki neira kisin seri silimen oh ara pisines en wia ihmw me re pweida loale. Michael sohte kehn me eh wie ohl emen me kesempwalki sarawi. Soutik ieu, ara pisop pwarala ni imwerahu oh koangoangehkin ira en tepda kapakap.
Mwurin pisop kokohla, Michael oh Marian medewehda ira en song kapakap. Mwohn ara pahn meir, ira kelepwikihdi limwahn ara peht oh, Michael tepda kapakap. Mwurin eh indahla kapakapkei ni soansuwed, Michael uhdi, nda, “Miriam, I sohte kak wia met.” Ni eh pahn kesihnenda oh aluhlahsang, Mirian koledi pehu, waikedi pwehn kelepwikihdi, oh nda, “Mike, ke kak wia!” Pwurehng song!” Sang ni koangoang wet, Michael doula oh kapakap mwotomwot.
Peneinei en Holmes tepda kin wie kapakap rahn koaros. Re alehdi luhk sang mperail en iang towehda sarawi. Ahnsou me re pidelong nan ihmw sarawio oh rong koul en ritingada, Ngehn Sarawi mwengininginkiong irail, “Met me pwung.” Mwuri, re sohla pwar oh sohte me luke irail, Michael iang sawas waieiala kihd sang nan ihmw sarawio. E kehnda pepehm ieu me nda, “Ih Tehnpesei Met.”
Michael oh Mirian pwungkihda malipilip kan en Mwomwohdiso oh papahier nan ara ward oh steik. Ira katengtengpene, oh neira seri silimenko pil katengtengehng ira. Ekei seri ahpw ipwidi mwuri, patpene koaros seri ehk riemen. Ira papahkier misin preseden nan ara kin papahpene—pakehr riau.
Keiou en ah kapakap e saloh, me mwotomwot ahpw dirki pwoson me tapiada kapahi en nanleng. Peneinei en Holmes kamwengehda kisiniei en pwosono sang ni arail tepda ieiang sarawi oh kin papah. Ara wia tohnpadahk poadedi erein sounpar tohto wia elehieng lapalahn kisiniei mwehl me leledo rahnwet kin kamkamarainih kitail.
Ni mehlel, kisinei, anahne aliale esingek sang tuwi pwehn kak kadarala angi en kak lulda. Me kasansalda sang Michael oh Mirian Holmes, pwoson Krais kin anahne dadaurete pwe ahmw marain en kin doudoulahte. Doadoahk tikitik kin audehda atail kak aluhwei nan ahl en inou oh kahluwalahng kapahi kan en Koht me kak kohieng komwi. Ahpw angin kisinieng kin miehda ma kitail karasehiengete doudouweite ni kamwkamwakid patin nehtail kan. Ekeipak kitail anahne ketiou oh ketiou kesik mwohn kaudiahl kan pahn leledo ih atail pahn repen mwonge.18 Ekeipak kitail anahne wiahda dipwsou en doadoahk mwohn kaudiahl pahn leledo pwe kitail en kak kawada sohp.19 Ekeipak, sang ni kaweid en Sapwellimen Kauno soukohp, kitail anahne uhmw kisin keik sang ni kisin leh oh pilawa amas me kitail kin alehdi sang sah en leh oh pekid en pilawa me sohte kin nek.20 Oh ekeipak kitail anahne “nennenla oh ese me Koht me Koht,” oh likih Sapwellime ahnsou.21
Ni ahmw alehdi kapahi sohte lipilip sang Koht, ke kak kasawi me ke kapwaiadahr kosoned poatoapoat me ke alehdi me iangete kosenedo.22 Ahpw tamataman me “kosonned poatopoato” sohte mih pahn koasoandi en ahnsou, wehwehki kapahi kan kin kohdo ni ahnsou me Koht kupwurki. Soukohp en mahs ako kin nanantiong pwe ren pwurala nan dewarail nanleng23 mehla nan arail pwoson, sohte alehdi inoukan, ahpw mendahte re kilang sang wasa doh … re ahpw kamehlelehte.”24 Ma ke saikinte alehdi pasepeng en dahme ke mwahuki, ke sohte anahne pwunodada, medmedewe dahme ke kak wia me laudsang. Ahpw, peikiehng en Joseph Smith kaweid en “wia mehkoaros uwen me ke kak ni peren; oh ahpw … nenenla, ni koapwoaropwor, en kilang … limen [Koht] eh pahn sansalda.”25 Ekei kapahi kan kin wie neknekiohng mehn mwuhr, mendahte ma irail seri kan me kin keiou poadedi ohng Koht.26
Sounpwung wenohu samwalahro, utuhdtdahn Mwomwohdiso wet koasoanehdi oh kihda duwen pelien onopki padahk, kakehlakahda pwoson, oh kakehlailih emenemen oh nan peneinei kan. Preseden Russell M. Nelson inoukihda me wekidala pwukat kak sewesei kitail en pweida nan palingehn, kalaudehla atail perenki rongamwahu, oh koaloaliala atail kin koasoi ohng Sahm Nanleng oh Sises Krais.27 Apw kitail me wiewia, ma kitail men alehdi kapahi kan. Emenemen kitail me pahn pein pwukoahki en pahkpeseng oh onopki pwuhk en Kohdo, Idawehniehla—Ohng emenemen oh Peneinei kan, iangahkieng pwuhk sarawi kan oh pwuhk teikan en Kohdo, Idawehniehla.28 Kitail anahne kosoiahkipene nan atail peneinei oh rehn kempoakepatail kan oh koasoanehdi atail rahn sarawi en isikada kisinieio. De kitail kak kihdihte pwuhk kan en wie mwomwohd nan imwatail kan wie posposokehda duwehte me nting kan loakdi loale.
I lukei kumwail en pwurehng loalopwoatieng manaman en nanleng pwe kumwail en kak alehdi kapahi kan sang rehn Koht. Doadoahngki pwoson pwe ken kak isik masis oh kaukehda kisinieio. Saunehng anahnepe ahnsou me ke awiawih kanengengaiong Kauno. Sang ni luhk pwukat, I kapakapki me Ngehn Sarawi pahn kaweid kumwail oh kahluai kumwail, pwe kumwail, duwehte “ohl lelepeko” me nting nan Lepin Padahk Audepan Kan, pahn.”29 I kadehde me Samatail Nanleng oh Sapwellime Sises Krais, ieias, kin ngoangki epwelpetail, oh ketin kupwurki kapahikitailda, ni mwaren Sises Krais, ahmen.