Ia Mwoamwen Ahi Kak Wehwehki?
Ansou me kitail mehlelieng, mohngiong loalki, kehlailieng, oh inengieng rapahki pwehn esehla rongamwahu en Sises Krais oh padahkpene, padahk pwukat pahn sair mohngiong kan.
Riei ohl oh lih akan, meid kaperen mehlel atail kak pwurehng pokonpene nan kapokon lap wet en Mwomwohdiso en Sises Krais en Souleng en Imwin Rahn Akan pahn kaweid en atail soukohp kempoake, Presiden Russell M. Nelson. I kadehde ong kumwail me kitail pahn ahneki ansou mwahu en rong kepitien atail Sounkomour, Sises Krais nan padahnk kan sang irail kan me pahn kapakap, koul, oh koasoia duwen anahn kan en ansou pwukat nan kapokon wet.
Nin duwen eh ntingdi nan pwuken Wiewia kan, Pilip soun Kalohko eh padahngki rongamwahuo ong mehn Idiohpia men me patohla Serusalem pwehn kaudek. E wia soun kanekid men me kin apwahpwali en kuwihn en Idiohpia ah tungoal dipwisou kesempwal akan.1 Ni eh pwurpwurasang ah kaudek nan Serusalem, e wie mwomwohd nan were kurumao oh wadwadek pwuken Aiseia. Ni en Ngehno eh tihda powe, Pilip eri keilang limwahn ohlo oh nda, “Komw wehwehki dahme komwi wadwadek?
“A [ohlo] nda, Ia mwoamwen ahi kak ma sohte me pahn kawehwehiong ie? …
“Pilip kihpeseng ewehu, oh tepida sang iren Pwuhk Sarawi wet, e ahpw padahkihong ohlo duwen Rongamwahu en Sises.”2
Peidek me wiawihsang olen Ethiopia o wia ehu mehn ketemen me pid pwukoa sarawi me kitail koaros ahneki, emenemen de peneinei kan, pwehn nantiheng esehla oh padahkihong mehteikan duwen rongamwahu en Sises Krais.3 Ni menlel, nin duwen kaskasukuhlki oh padpadahngki rongamwahuo, kitail ekei ansou duwehte olen Idiopiao—kitail anahne sawas sang emen sounpadahk marain oh pwoson; oh kitail pil ekei ansou duwehte Pilip—kitail anahne kasukuhli oh kakehlaka mehteikan nan arail weliakapw.
Kahrepen atail kin ale kasukuhl oh padahngki rongamwahu en Sises Krais pwe en kalaudehla atail pwoson oh en irail kan arail pwoson me kitail kin kasukuhlihki duwen Koht oh Sapwellime koasoandi en popohl sarawi oh Sises Krais oh Sapwellime tohnmetei en tomwo oh pwehn weliakapwala. Keirdahn pwoson oh weliakapwo pahn sewesei kitail en wiahda oh kolokol atail inou kan ong Koht, oh kakehlailiala atail men idawehn Sises oh koaloaliala atail weliakapw, ni soangen mwoahmwohte, weliakapwih kitailla, nin duwen me Wahnparon Paul padahngki nan nah kisinlikou ong mehn Korint kan.4 Weliakapw wet pahn wadohng kitail peren laud, pwerisek oh roson mwahu oh sewese kitail en kolokol marain poatopot. Kaidehn ihme wiawihong olen Ethiopiao mwurin eh esehla duwen Sounkomouro oh weliakapwehng Sapwellime rongmwahuo? Pwuhk Sarawi mahsani me ohlo “douluhla nan eh seiloak pereperen kohla.”5
Kosonned en sukuhlki oh padahngki rongamwaho ong emenemen sohte kapw; e poden wie kapwurupwurehng sangete ni tepin kawao.6 Nan ehu irairo, ansou me Moses oh nah aramas akan patpato nan patapat en Moab mwohn arail pedelong nan sapwen inouo, Kauno kamarainieki ih en panauwihki nah aramas akan ire me pid arail pwukoa en esehla kosonned akan oh inou me irail alehier sang Kano oh padahkihong neirail serihkan,7 pali tohtohn irail me sohte iang kilang arail kotehla Sehd Weitahta de alahldien kaudial pohn Dolen Sainai.
Moses panawihki nah aramas akan:
“Kumwail rong kanaiehng met kosonned kan oh koasoandien tiahk kan me I pahn padahkihong kumwail, oh kapwaiada, pwe kumwail en kak mourla oh kak pedelong oh sapwenkihla sahpwo me Kauno, Koht en amwail pahpa kahlap ako pahn ketkihong kumwail. …
“ … Kasukuhlihki noumwail seri kan oh nein noumwail seri kan.”8
Moses kairala, mahsani, “Kumwail kapwaiada sapwellime kosonned akan me I kihong kumwail rahnwet, pwe en kak mwahu ong kumwail oh kadaudokamwail kan, oh kumwail pahn mour werei nan sahpw me Kauno ketikihong kumwail pwe kumwail en sapwenkihla kohkohlahte.”9
Soukohp en Koht kan kin kalap kaweidkin kitail en kakairada atail peneinei kan pahn epwel oh kaweid en Kauno10 oh nan marain oh me mehlelo.11 Presiden Nelson apwtehn koasoia, “Pwehki kieweklahn mwehi et oh reklahn kasdo suwed kan, pahpa/nohno kan tungoaleniki pwukoa sarawi en padahkihong neirail seri kan kesempwal en Koht [oh Sises Krais] nan arail mour kan.”12
Riei ohl oh lih akan, en atail soukohpo ah peneuo pil katamanehng kitail en emenemen kitail atail pwukoa en sukuhlki oh esehla pwehn padahkihong atail peneinei kan me Sahm Nanleng me ketin poakehng kitial oh me kapikadahr koasondien en popohl ong Sapwellime seri kan; me Sises Krais, Sapwellime Ieroso me wia Soundor en sampa; oh kitail pahn komourla ma kitail pwoson Mware.13 Atail mour kan anahne pahsonda pohn takain Soundor Sises Krais, me pahn kin sewese emenemen kitail oh peneinei kan en katengehdi ngehno nan atail mohngiong kan pwehn sewese kitial powehdi pwehki atail pwoson.14
Kumwail kak tamanda nein Sohn Sounpepdais tohnpadahk riemen me idawehnla Sises Krais mwurin ara rongasang en Sohn ah kadehde me Sises iei Simpwul en Koht, Mesaiao. Eri ira ahpw “iangada oh kilangada”15 wasa me e kin ketket ieo oh ira eri patpatohte Reh rahno. Ira wehwehkihda me Sises iei Meseiao, Ieros en Koht,oh ira eri idawehnla Ih erein ara mour.
Ni soangen mwoahmwohte, ni atail kin ale en Sounkomouro luhk en “kohdo oh kilang,” kitail anahne pwongi Ih, koaloaliala atail kin wadek pwuhk sarawi, pereniki mahsen kan, esehla Sapwellime kosonned akan, oh momourki mour me E ketin ieiaski. Ni imwio, kitail pahn wehwehkihla Ih, kasawiada Kepitie, esehla me ansou me kitail pahn wehwehkihla Ih oh kamehlele Ih, kitail pahn sohla men mwenge oh men nimpilda.16 Kitail pahn kak wehwehki me mehlelo ansou koaros, nin duwen me wiawiheng tohnpadahk riemen me idawehnla Sises rahno.
Riei ohl oh lih akan, mepwukat sohte pahn wiawi mwahl. Kaiahnehkin kitail en rongorongete ngilen kaweid mwahu kan sohte wia mehkoat mengei; e anahne poden likweriong Koht oh esehla mwoamwen loalehdi rongamwahu en Sises Krais nan atail mour kan. Ma kitail wia met, I inoukihda me manaman en Ngehn Sarawi pahn kasalehiog mohngiongitail oh atail lamalam me mehlelo oh kadehde ong kitail me mehlelo,17 kamarainda mehkoaros.18
En olen Ethiopiao ah peideko, “Ia mwoamwen ahi kak [wehwehki], ma sohte me kaweid ie?”pil ahneki ire kesempwal ehu nan atail pwukoa en audehki padahk kan en rongamwahuo me kitail esehier en kaweid atail mour. Me pid olen Idiopiao, ni karasepe, e mwekidki me mehlelo me e koledi sang Pilip. E pekihda en pepdaisla. E wehwehkihda me Sises Krais iei Sapwellimen Koht.19
Riei ohl oh lih akan, atail wiewia kan anahne en duwehte dahme kitail eselahr oh kin padahngki. Kitail anahne kasalehda dahme kitail kamehlele nan atail mour. Sounpadahk keieu mwahu kin wia mehn kahlmengi men. Padahngki mehkot me kitail kin wie momourki kin kak wekidala mehkot nan mohngiong en irail kan me kitial kin kasukuhli. Ma kitail men aramas, tetehn peneinei de soh, en pereniki iren pwuhk sarawi kan oh padahk kan en wahnpoaron oh soukohp momour kan, irail anahne kilang me kitail kin perenki mepwuko. Duwehte, ma kitail men irail en ese me Presiden Russell M. Nelson me wia soukohp, ohl sarawi oh sounkihda kaudial rahn pwukat, irail anahne kilang atail kauwada pehtail pwehn utungada ih oh diarada me kitail kin idawehn ah padahk sarawi kan. Iei duwen lepin kahs en America me nda, “Wiewia kin ngil laud sang koasoi kan.”
Mwein ele ekei kumwail ansou kiset pein idek rehmwail, “Elder Soares, I kin wiewia mepwukat koaros oh kin ideidawehn wiepen kasukuhl wet ong emenemen oh peneinei kan, ahpw paisuwed, pwe ekei kempoakepahi kesempwal kan kadohwan irailsangehr rehn Kauno. Dahme I konehng wia?” Ong kumwail kan me ansou wet tungtungoaleniki kapahtou, lokolok, keluhla, oh ele kak mwarosala, menlau wehwehki me irail sohte salongala douluhl pwe Kauno ketin mwahngi wasa irail mihmi ie oh kin mwasmwasahn irail. Tamataman, irail pil wia Sapwellime seri kei.
E me apwal en wehwehki kahrepe koaros me ekei aramas kin wetkihsang ahlo. Me keieu mwahu kitail en wia nan irair pwukat iei en poakehng oh kolokol irail, kapakap ki arail nsenamwahu, oh peki en Kauno sawas pwehn ese dahme kitail pahn wia oh nda. Ni mehlel iang irail pereniki arail pweida kan; wiahla kempoakparail oh kin rapahki arail pali mwahu kan. Kitail sohte pahn pwangahkihda kempoakpatail kan ahpw tengetengedi ehuehg irail. Dehr kasohwe, de kadeik irail. Poakehng irail te! Karasaras en pwutak me netikihla ah sohsohu padahkihong kitail me ni en seri kan kin tamanda kapehdarail, irail kin kalap men pwurala ni imwarailo. Ma mwekid wet wiawi, audehki amwail mohngiong kan ki limpoak, tangala rehrail, ale irail oh metik irail, duwehte me pahpao wiahiong nah pwutak me netikihla ah sohsou.20
Ni mehlelo, momourki mour me warehng, kasalehda karasaras mwahu en dahme kumwail kamehlele, oh kin karanih atail Sounkomour, Sises Krais. E mwahngi oh wehwehki atail katoutou oh medek kan, oh E pahn ketin kapaiada amwail doadoahk kan oh ehuehng noumwail seri kan ma kaidehn nan mour wet, nan mour kohkohdo. Riei ohl oh lih akan, tamataman, me ansou koaros koapwoaroapwoar wia ire kesempwal ehu nan koasoandi en rongamwahuo.
Nan erein sounpar ngeder kei me I wie papah nan Mwomwohdiso wet, I kilangehr towe pwoson kan arail poden doadoahngki padahk pwukat nan arail mour kan. Met me pid dahme wiawihong nohno kiripw men me I pahn ekerki “Mary.” Mary loieng ehu mweipeseng me inenen kansensuwed. Ansouo, Mary kasawiada me koasondi me keieu kesempwal ong ah peneinei iei arail mour en palingehn. Kapakap, onopiki pwuhk sarawi, kaisihsol, oh ieiang sarawi oh doadoahk en tehnpas sarawi konehng en wia mehkot kesempwal ong liho?
Mary kin wia lih pwoson men, oh ni ansou apwalo, liho koasonehdi me e pahn wiewia dahme e esehier me mehlel. Liho diar kakehlepe nan “Peneinei: Kalohk ehu ong Sampah”: me audaudki padahk kaselel kei me iangahki, “pahpa nohno kan ahniki pwukoah sarawi en apwaliada neira serihkan ni limpoak oh mour pwung” oh en padahkihieng irail en kapwaiada kosonned akan en Koht ansou koaros.21 Liho kin rapahki pasapeng kan sang Kauno oh ehukihong nah seri pahmen nan mwekid en peneinei koaros. Irail kin kalap koasoia rongamwahuo oh ehukipene arail irair kan nan arail kadehde kan.
Tetehn pahtou kan me irail alehier, nein liho serihko perenkihla rongamwahu en Krais oh kin men papah oh ehukihong mehteikan. Meh silimen wiahier arail misin kan oh me keieu tikitiko wiewia ah misin nan South America. Nein liho serepein keieu laud, me pwopwoudehr oh ahneki pwoson kehlail, ehukihda me, “I sohte pehm me aht nohnou kelehpw me apwalih kitda pwe Kauno kin kalapw ketiket nan imwato. Ni en liho ehukihda ah kadehdeki Ih ong kiht, kiht koaros tepda pirekeklahng Ih ki aht peidek kan. I kaping kalahnganki en liho ah kamaurada rongamwahuo.”
Riei ohl oh lih akan, nohno mwahu menet pweida ni eh kapikala nimwehu en wiahla wasahn kakairada palingehn. Duwehte en olen Idiopiao ah peideko, Mary pein idek reh pak kei, “Ia mwoamwen en nei serihkan arail kak ese ma nohno men sohte kaweid irail?
Iengei kempoakehkan nan rongamwahu wet, I kadehde ong kumwail me ni atail kin ngoangki, loaleniong, kehlailki oh mehlelki atail padahngki rongamwahu en Sises Krais ni kahrepe pwung pahn manaman en Ngehno, padahk pwukat pahn wekidala mohngiong kan oh padokada ehu anahn en momourki me mehlel kan en Koht.
I kadehdehki me Sises Krais me wia Sounkomour pen sampa. Ih me wia Soundor, oh ketin Ieias. I ese me E kin ketin kaweid Sapwellime Mwomwohdisoht rehn Sapwellime soukohp kan, ohl sarawi kan, oh sounkihda kaudiahl kan. I pil kadehdehieng kumwail me Koht ieias, oh E poakehng kitail. E kupwurki kitail en pwurala Reh—kitail koaros. E ketin rong atail kapakap kan. I wia ahi kadehde ohng me mehlel pwukat ni mwaren Sises Krais, amen.