2010–2019
Pwihn en Utuht: Wasahn Kaminimin Ehu
Kapokon Lap en nan Epreil 2019
2:3

Pwihn en Utuht: Wasahn Kaminimin Ehu

Sang Elder Carl B. Cook

En Presidensi en Pwihn en Isiakan

Kauno kupwurki kitial en ehupene nan atail pwihn en uhtut en prihsduhd kan. Ni E ketin ketkipene sapwellime serikan, re pahn anahne wasa ieu me re kak towehda oh keirda.

Nan pahr 2010, pwutak pwulepwul Andre Sebako kin wie reparapahki me mehlel o. Mendahte e saikinte kapakap sang nan mohngiong unsek, e medewehda en song. Mwurinte mwo, e tuhwong misineri kei. Ira kihong ih tehn doropwe ehu me kilel en Pwuken Mormon mih powe. Andre kehn mehkot ih eri peki rehn misineri ko ma ira kak netkiong ih pwuhko. Ira ndahiong me e kak ale pwuhko ni soh isepe ma e kohla iang sarawi.1

Andre kelehpw iang sarawi nan Mochudi Branch me ahnsouo-apwtehn miehda nan Bostwana nan Africa. Ahpw tohn Brancho wia aramas ekei me kin poakpene oh miniminpene me mwein tohtohki aramas 40.2 Irail kasamwo Andre ni kadek. E ale padahk sang misineri kan oh pepdaisla. E inenen kaselel.

Ahpw dah mwuri? Ia mwoamwen en Andre eh pahn kekehlail? Ihs me pahn sewese en wie kekeirda nan elen inouo? Ehu pasapeng ong peideko iei pwihn en utuht en prihsduhd me e ieiang.3

Koaros me kolokol pihsduhd, sohte lipilipil arail kahpwal, kin ale sawas sang pwihn en utuht kehlail ehu. Riei mwahnakapw kan me kolokol Prihsduhd en Aron, Kauno kupwurki kumwail en kauwada ehu pwihn en utuht kehlail, wasa me mwahnakapw koaros kin miniminpene ie, wasa me Ngehn en Kauno pahn ketket ie, wasa ehu me kin kasamwo oh kesempwalki towehkan. Ni en Kauno kin ketkihpene Sapwellime kan, irail anahne ehu wasahn ehupene oh keirda.

Emenemen kumwail tohn presidensi en pwihn en utuht kin kihda kaweid ni amwail kin ale kamarain4 oh kakairada limpoak oh ehupene nan pwungen tohn pwihno. Kumwail kin tehk mwahu irail toweh kan me kapw, sohte kalap sarawi, de me mie arail anahn tohrohr.5 Kumwail kin kauwada pwihn en utuht kehlail ehu sang ni manaman en prihsduhd.6 Oh pwihn en utuht kehlail oh miniminpene ehu kin kawekala mour en emen pwutak pwulepwul.

Ni ansou me Mwomwodisoht pakairkihda kasukuhl en rongamwahuo nan peneinei,7 ekei medewehda towehkan me duwehte Andre oh idek, “Ia duwen irail me pwulepwul kan me kohsang nan peneinei me sohte kin kasukuhlki rongamwahuo oh wasa me kasukuhl oh momourki ronngamwahuo sohte kin wiawi nan ihmw? Irail pahn manoknokla?”

Soh! Sohte emen kak manoknokla! Kauno kin poakehng emenemen mwahnakapw oh peinakapw. Kitail, me kolokol prihsduhd kan, iei me wia limen Kauno. Iei kitail me wia utupen Mwomwohdiso nan doadoahk wet. Ansou me sawas nan peneinei kan kin sohla itar, pwihn en utuht en prihsduhd oh sounkaweid kan oh kempoakpatail kan kin sewese emenemen aramas oh peneinei kan me anahne.

I kilangehr eh wiawi. I pil lelohngehr Ni ahi lel sounpar weneu, ahi pahpao oh nohnou mweipeseng oh ahi pahpa mwesel sang ahi nohnohu oh seri tikitik limmen. Ahi nohnohu tepda doadoahk pwehn apwali kiht. Ehu ansouo liho anahne doadoahk riau oh pil ale kasukuhl. Sohla ah ansoun keirda. Ahpw, pahpa/nohno kahlap kan, ulepei kan, nohno teikan, pisop kan oh sounpadahk en peneinei kan ehupene oh sewesehda ahi nohno kesempwalo.

Oh miehda ahi pwihn en utuht. I kaping kalahngan ong kempoakepai kan-riei kan- me poakpoakeie oh seweseiehda. Ahi pwihn en utuhto wia ehu wasahn kaminimin. Ekei aramas kak medewe me I sohte pahn kak pweida pwehki kahpwal en nan ahi peneinei. Mwein ele iei. Ahpw pwihn en prihsduhd kamangaiala kahpwal ko. Ahi pwihn en utuhto kapeliepene oh kapaiada ahi mour kouwahlap.

Tohto mehn mpetail me ahneki soangen kahpwal pwukat. Mwein ele kitail koaros kak lelohng soahngohte. Ahpw kitail koaros naineki pwihn en utuht, wasa me kitail kak alehdi ie kakehlail oh pil kihda kakehlail. Pwihn en utuht wia “en emenemen oh en koaruhsien.”8 E wia wasa me kitail kin ale kasukuhl, papah mehteikan, oh kakairada minimin oh ehupene ni atail kin papah Koht.9 E wia wasa me manaman kan kin pweida ie.

I pahn ndahieng kumwail duwen ekei manaman me wiawi nan en Andre ah pwihn en utuht nan Mochudi. Ni ahi ehukihda karasaras wet, mwasahn soangen koasondi kan me kin kakehlaka pwihn en utuht en prihsduhd me kin doadoahngki koasondi pwuko.

Mwurin ah pepdaisla, Andre ieiang misneri kan arail kin kasukuhli mwahnakapw pahmen me pil pepdaislahr. Met mwahnakapw limmenlahr. Irail tepda kakehlailih emenemen irail oh brancho.

Kewenemen en mwahnakapw, Thuso, pil pepdaislahr. Thuso pil ehukihda rongamwahuo ong kempoakepah pwutak silimen, oh kedekede irail wialahr meh duwemen.

Werek en Sises Krais ko pil alahldi ni soange mwoahmw wet—ekei ni ehu ansou, ni arail kin alehdi luhk sang kempoakaparail kan, Keilahnaio, ansou me Andru diar Sounkomouro, e mwadangete alehdi rie pwutak Saimon oh “kahrehdo rehn Sises.”10 Duwehte, mwurinte en Philip e wiahla emen werek en Krais, e lukehdo kempoakapah Nathaniel en “kohdo oh kilang.”11

Nan Mochudi, ke ehk en mwahnakapw pil iangalahr Mwomwohdisou. Misineri ko diar ke ehkemen. Oh ke ehkriemen en mwahnakapw pepdaisla mwurin eh kilang weliakapwalahn kempoakapah kan.

Tohn Mwomwodisohn Mochudi inenen perenda. Mwahnakapw pwukat “weliakapwlahr ong Kauno, oh … wialahr tohn mwomwohdiso.”12

Pwuken Mormon wia ehu kahrepe laud nan arail weliakapw.13 Thuso tamatamante, “I kin tepda wadek Pwuken Mormon … ansou koaros me I kin pisek, ma nihmwo, de nan sukuhl, wasakoaros.”14

Oratile pwungkihla rongamwahuo pwehki karasaras en kempoakepah kan. E kawehwe me, “[Irail] mwomwen wekila ni marep tehieu. … I lemehkiong me kakate … pwehki kisin … pwuhk me irail tepda wa seli nan … wasahn sukuhl me kahrehda. I kak kilang araill kak wiahla mwahnakapw mwahu kei. … [I] men pil weliakapwala.15

Mochudi Branch

Irail meh 12 ko koaros alahldi oh pepdaisla nan irair en sounpar riau. Emenemen irail kelehpw sang nan arail peneinei ni arail iangala Mwomwohdisou. Ahpw irail kin ale sawas sang arail peneinein Mwomwohdiso, iangahki Presiden Rakwela,16 arail branch presiden; Elder oh Sister Taylor,17 pwopwoud mah ehu; oh tohn branch teikan.

Brother Junior,18 sounkaweid men en pwihn en prihsdud, kin luke mwahnakapw kan en kohla nimweho mwurin souwas kan en Rahn Sarawi oh kin kaweid irail. Mwahnakapw kan kin sukuhlkipene pwuhk sarawi oh kin wia arail kaudek en ni soutik kan ni imwarail kan.

Tohn Pwarek

Brother Junior kin kahreirail oh kin pwarek toweh kan, aramas me ale kasukuhl sang misneri kan, oh sohte lipilipil aramas me anahne sawas. Irail meh 12 ko kin pwonte iang weren Brother Junior sidohshau. E kin kihraildi wad riemen de silimen ong ehu peneinei oh pwek irailda mwuhr.

Mendahte mwahnakapw pwuko apwtehn kaskasukuhlki rongamwahuo oh sohte pehm me irail ese soahng tohto, Brother Junior ndahieng irail en kin ehukihda ehu de riau ire me irail ese ong aramas me irail kin pwarek. Me kolokol prihsduhd pwulepwul pwukat kin kasukuhl, kapakap, oh sewese mwasmwasahn Mwomwohdisou.19 Irail kapwaiahda arail pwukoahn prihsduhd oh kehn kapohl en papah.

Ohl Perien Kei.

Andre nda, “Se kin mwadongpene, kouruhrpene, mwahieipene, oh wiahla perian ehu.”20 Mehlel irail kin kahdankinirail “Pwihn en Perien ehu.”

Irail koaros inoukipene me irail koaros pahn wia arail misin. Pwehki irailte me towe en Mwomwohdiso sang nan ar peneinei, irail kin ahneki kahpwal tohto me irail anahne powehdi, ahpw irail kin sawaspene nan pwungarail.

Irail wad emen alehdi neirail doaropwehn wia arail misin. Me tepin mwesel ko kin ntingdohng irail me wie kaukaunop, ehukiong irail dahme irail loieng oh kakehlaka irail en papah. Mwahnakapw ehkemen me wiahier arail misin.

Mwahnakapw pwukat ehukihong arail peneinei kan duwen rongamwahuo. Nohno kan, riarail lih, ohl, kempoakparail, iangahki aramas me irail kasukuhli nan arail misin ko, weliakapwala oh pepdaisla. Manaman kei wiawiher oh mour tohtokei me alehdi kapai.

I kak pehm en ekei kumwail lamalam me ele manaman pwukat kak wiawi wasa me rasehng Africa, wasa me kapokonpenehn Israel wiewiawi. Ahpw, I kadehde me koasondi kan me wiawiher nan Mochudi Branch kak wiawi wasa koaros. Sohte lipilipil wasa me kumwail mihie, amwail pwihn en utuht kak keirda sang nan kadaiala oh eukihda rongamwahuo. Ni en emen tohnpadahk kin kalohk ong kempoakepah, emen kin kak wiahla riemen. Meh riemen kak wiahla meh pahmen. Meh pahmen kak wiahla me welimen. Oh meh welimen kak wiahla me ehk riemen. Prans kan uhd wiahla ward kan.

Ward en Mochudi

Sounkomouro mahsani, “Pwe wasa kis me riemen de silimen [de tohtohsang] kin kohpene ie ni mwarei, … I kin iang irail mi wasao.”21 Sahm Nanleng ketin kaukaunopada mwahliel oh mohngiong en mehn mepatail kan. Kitail kak idawehn mwenginingin en ngehn sarawi, utungada ehupene, ehukihda me mehlelo, luke mehteikan en wadek Pwuken Mormon, and poakehng oh utungada irail ni arail kin esehla atail Sounkomouro.

Kereniongehr en lel sounpar 10 sang ni ansou me Pwihn en Periano en Mochudi tapiada arail seilok o, oh irail wiewiahte pwihn en perian ehu.

Katlego nda, “Se kak tohrohrkipeseng aht dohpeseng, ahpw se kin sousouwaspenehte.”22

Iei ahi kapakap kitail en ale en Kauno luhkehkin kitail en miniminiong Ih nan atail pwihn en utuht en prihsduhd kan pwe ehuehu pwihn en utuht en wiahla wasahn miniminpene ehu, wasahn pokonpene ehu, wasahn keirda ehu.

Sises Krais iei atail Sounkomour, oh met iei Sapwellime doadoahk. I kadehdehki ni mwaren Sises Krais, ahmen.

Ire kan

  1. Tehk Band of Brothers Original Book, Band of Brothers resource files, 2012–19, Wasahn poadoapoad en Mwomwohdisoht, Kahnihmw en Salt Lake, Utah.

  2. Personal correspondence, Letanang Andre Sebako, Band of Brothers resource files, 2011–19, Church History Library, Salt Lake City.

  3. President Boyd K. Packer koasoia: “Ni ansou me ohl emen alehda prihsduhd, e wiahla mehkot me laudsang pein ih. E wia mehkot me ketket masliki me ohlo kak patohwenda inou mwuledek en idawehn” (“The Circle of Sisters,” Ensign, Nov. 1980, 109–10).

  4. Presiden Russell M. Nelson kawehwe mwomwen atail kin rapahki kaudial oh mahsani, “Ni amwail kin kalipwelipwa mwekid wet rahn koaros, sounpwon koaros, pahr koaros, kumwail pahn keirda nan koasondi en kaudial” (“Revelation for the Church, Revelation for Our Lives,” Liahona, May 2018, 95; see also Teachings of Presidents of the Church: Joseph Smith [2007], 132).

  5. Tehk Handbook 2: Administering the Church (2010), 8.3.2.

  6. Mehteikan pil iang sawas, iangahki tohn pisoprik oh sounkaweid kan. Elder Ronald A. Rasband koasoia me ehu kamwahupen koasonsapahl en pwihn en utuht kan en Prihsduhd en Melkisedek me pakairda ni March 31, 2018, iei e “mweidehng pisop en kak kasau ekei arail pwukoa ong presiden kan en elder kan oh Pwihn en Sawas en Lih pwe pisop oh arail sounsawas kan en kak wia inondehn arail pwukoa—mehlel kakaun peinakapw kan oh mwahnakapw pwulepwul kan me kolokol Prihsduhd en Aron. ”(“Kilang! A Royal Army,” Liahona, Mehi 2018, 59). Tohnleng kan pil pahn sawas. Me kolokol Prihsduhd en Aron kan kin kolokol kih kan en sausawas en tonleng kan. (see Doctrine and Covenants 13:1pil tehk Dale G. Renlund and Ruth Lybbert Renlund, The Melchizedek Priesthood2018], 26). Elder Jeffrey R. Holland nda: “ansou tohto Sohteme kin kilang (sounsawas de tohnleng kan). Ekei ansou kitail kin kilang. Mepwukat kin wiawi ansou koaros mehnda ma kitail kilang de soh. Ekei ansou arail pwukoa kan kin inenen kesempwal oh e kin kesempwalohng sampa pwon. Ekei ansou sawas kan kin dokehte aramas emen. Ekei ansou tonleng kan kin kaparkin kitail mehkot. Ahpw pali laud iei e kin wia mehn kaloalamwahu, pwehn kaweid, kapar nan ansou apwal kan” (“The Ministry of Angels,” Liahona,Nov. 2008, 29). Ma kumwail anahne sawas pwukat, kumwail kak, “peki, a kumwail pahn ale” (John 16:24).

  7. Tehk Russell M. Nelson, “Tepin Kapahrek,” Liahona,Nov. 2018, 7–8.

  8. Tehk Alexandre Dumas, The Three Musketeers (1844).

  9. Tehk Handbook 2, 8.1.2.

  10. Tehk Sohn 1:40–42.

  11. Tehk Sohn 1:43–46.

  12. 3 Nihpai 28:23.

  13. Tehk D. Todd Christofferson, “The Power of the Book of Mormon” (kapahrek me wiawi ni tiepene ong misin presiden kapw kan, Suhn 27, 2017).

  14. Thuso Molefe, in Taylor, The Band of Brothers, 22.

  15. Oratile Molosankwa, in Taylor, The Band of Brothers, 31–32.

  16. Lucas Rakwela, Mochudi, Botswana.

  17. Mark oh Shirley Taylor, Idaho, USA.

  18. Cilvester Junior Kgosiemang, Mochudi, Botswana.

  19. Tehk Doctrine and Covenants 20:46–47, 53–54.

  20. Personal correspondence, Letanang Andre Sebako, Band of Brothers resource files.

  21. Tehk Doctrine and Covenants 6:32.

  22. Katlego Mongole, nan “Band of Brothers 2nd Generation” (unpublished compilation), 21.