Ia Wasa Met Pahn Lella Ie?
Kitail kin wiahda pilipil mwahu ma kitail kasawih wiepe teikan oh medewe wasa re pahn kahrekitaillahng ie.
Kapwurupwurdohn rongamwah en Sises Krais kin kakehlakei kitail en medemedewe duwen ansou kohkohdo. E kin kawehwe duwen kahrepen mour wet oh mehlelpen mour kohkohdo. E kin padahkiong kitail lamalam mwahu kei me pid duwen ansou kohkohdo me pahn kaweidih atail wiewia kan rahn wet.
Ahpw, kitail koaros ese aramas me kin pwunodkihte ansou wet: net rahnwet, perenikihte rahnwet, oh sohte kin medemedewe sang mwurin met kohla.
Atail mour en ansou wet oh atail mour en ansou kohkohdo pahn soanamwahu ma kitail pahn kin medemedewehte duwen ansou kohkohdo. Ni atail kin wia pilipil kan en ansou wet nan atail mour, kitail anahne wie medemedewe, “Ia wasa met pahn lella ie?”
I.
Ekei pilipil kan, aramas pahn pilada ma re pahn wia mehkot de sohte wia mehkot. Pahr tohto samwalahro I rong soai pwoat duwen soangen pilipil wet nan kapokon en steik nan U.S.
E wiawi nan kehl en koalet. Mie pokon en tohn skuhl kei me mwomwohd pohn reh kan. Soun kapahrek me koasoaia soai pwoatet dene me pokono wie kilikilang lapalahn skuerel men me pwadaikieo mosul, wie mwadmwadongseli ni tepin tuhke. Ekei pak e mihseli nan pwehl, a ekei pak e douseli nan tapin tuhkehu. Ahpw dahme kahrehda pokon en tohn skuhlo pahn men kilangki met?
Mie kidi men me mih karanih wasao me wie wonohn pohn reh kan. Tohn skuhl ko wie kilikilang kidio, a kidio wie kilikilang skuerelo. Ansou koaros me skurelo kin pidakih tuhkeo oh lau ke sohla kak kilang, kidio kin ekis keieng oh ahpw pwurehng wendi, mwomwen sohte tehk mahno. Ihme tohn skuhl ko wie mwasamwasahn. Irail nenenlahte, oh masarail ko koaros tengedieng dahme inenen sansal pahn wiawi.
Eri, ni ansou me kidio mihte limwah e ahpw luhsda pohn skuerelo, oh ngalispene. Irail ahpw pwuriamweikihla, oh tohn skuhl ko tenge kidio ahpw poarokasang kisin mahno, ahpw re nohn pwandehla. Skuerelo melahr.
Mie aramas nanpwungarail me kak karawansang skuerelo sang ni ahr pahn oaloallahng de wering, ahpw sohte me wia. Irail wie kilikilangte mendahte e sansalehr dahme pahn wiawio. Sohte me idek, “dahme pahn wiawi mwurin met?” Ni ansou me dahme sansal ah wiawiher, koaros tangpene pwehn doarehla, ahpw re udahn pwandehr. Ihte me re kak wia sengki ahr koluhkihlahu.
Soai mehlel wet duwehte karasaras pwoat. E dokdoke soahng kan me kitail kilang nan pein atail mour, oh nan mour oh irair kan me kapilkitailpene. Ni atail kak kilang mehn keper kan ahr wie kerekereplahng aramas de dahme re kin pereniki kan, mie atail pilipil en lokaia de mwekid de nennenlahte. E mwahu en idek, “Dahme pahn uhd wiawi?” Ansou me kahpwal pahn mwadangete wiawi, kitail sohte kak nennenlahte. Kitail anahne mwadang kaparkihong de utungki sawas en doarehsang kahpwalo mwohn e solahr ansou.
Pilipil pwukat me I apwtehn kosoiahda me pid duwen atail pahn pilada nanpwungen mwekid de sohte douluhl wiahki mehkot. Dahme kalapw wiawi iei aramas pahn pilada nanpwungen soangen mwekid riau. Ekei pak aramas pahn pilada nanpwungen me mwahu de me suwed, ahpw palilaud en ansou re pahn pilada nanpwungen soang mwahu riau. Met pil mwahu en idek dahme pahn uhd wiawi mwurin met. Kitail ahniki pilipil tohto nanpwungen me mwahu riau, oh e kin kalapw pid duwen mwomwen atail koadoahki atail ansou. E sohte suwed mwadongki video games, tetext de kasdo de koaskoasoai pohn sehlpwohn. Ahpw nan soahng pwukat koaros aramas kak “kangala mwahl ansou” wewehki me ma kitail pahn kawehkihla ansou reirei wiewia soahng teieu, a kitail uhd katiasang ansou mwahu en wia soahng teikan. I koapwoaroapwoarki me kumwail kak kilang me kitail anahne tenekih ni madamadau mwahu dahme kitail katiasangehr ni atail kin nohn mwohd wereiki soahng tehieu, mehnda ma e mwomwen mwahu.
Rahnteio I kihda padahk ieu duwen “Mwahu, me Mwahusang oh me Keieu Mwahu.” Nan kapahreko I kosoia “mendahte mehkot eh mwahu kaidehkin ihte kahrepe me kitail pahn wia. Sohte itar atail ansou en kapwaiada soahng koaros me mwahu en wia. Mie soahng kei me mwahu oh mie me mwahusang, oh me mwahusang me kitail anahne koadoakihada nan mouratail kan. Ekei pak kitail anahne meirongkihla me mwahuo pwehn pilada me mwahusang de me keieu mwahu.”1
Kumwail en kasawih mwahu. Dahme pahn wiawi nan ahi mour ansou kohkohdo pwehki pilipil me I wiahda met? Tamataman uwen kesempwalpen kohla skuhl, onopki rongamwahu, wiewia inou sapahl ni atail kin tungoale kamadipw sarawi, oh kohla nan tehnpas sarawi.
II.
“Iawasa met pahn lella ie?” pil kesempwal ni atail pahn pilada mwomwen atail kawehwe de medemedewe pein kitail. Me keieu kesempwal, emenemen kitail Sapwellimen Koht seri kei me ahneki koapworopwor en mour soutuk. Mehn kawehwe teikan, soangen doadoahk dah me kitail wia, kitail mehnia, mwomwen paliwaratail kan de mehn kawauwi kan, kin ereinte lepin ansou tekis de e sohte katepe ohng ni mour soutuk. Kumwail dehr medewe pein kumwail de doadoangki mehn kawehwe me pahn mie irepen dahme kumwail pahn nantieng kapwaiada.
Riei ohl ako, oh riei lih ako me pahn kilang de iang wadek dahme I kosokosoiaht, I koapworopworki me kumwail pahn wehwehki dahme kahrehda amwail kaun akan kin kihwei padahngkan oh peneu me se kin kiheng kumwail. Se poakohng kumwail, oh Samatail me ketiket Nanleng oh Sapwellime Iehros Sises Krais, ketin loalloalei kumwail. Sapwellimara koasoandi ohng kitail iei “koasoandi lap en peren” (Tehk Alma 42:8). Sapwelilmara koasoandi oh kosnned akan oh tiahk sarawi kan oh inou kan kin kahluwa kitailahng peren mwuledek oh popohl nan mour wet oh mour kokohdo. Ni aht wia Sapwellimen Sahm oh Nahu ladu kei, se kin padahk oh peneu ninduwen Ara kaweidkin kiht sang ni Ngehn Sarawi. Se kin inangihte koasoia me pwung oh koangoangehkin kumwail en wia dahme Koht Sahm oh Sapwellimeo kaunopada nin duwen ahl kolahng mour soutik, iei “kisakis me keieu lapalap en Koht” (Tehk Doctrine and Covenants 14:7).
III.
Iet pil ehu karasaras en kamwahulahn mour pwehki pilipil mwahu me wiawihda. Karasaras wet me pid duwen pilipil en wia tohnmetei met pwehn kapwaiada koasoandi en ansou kohkohdo.
Ni kapokonlap en steik ieu nan Cali, Colombia, lih emen kapahrengki duwen ih oh ah inoun pwopwoud inengieng kapwopwoudida nan tehnpas sarawi ahpw tehnpas sarawi me karanih ira me mih Peru apw pil doh. E inenen werei ara kin wie nekinekid neira sent peinen poas. Ahpw lelehr ansou en douda pohn poas kohla Bogota, apw ansou me re lella mwo, re diarada me sehr koaros nan poas kolahng Lima. Peru direlahr. Re kakete pwur sohte kapwopwoud de kapwopwoudahte likin tehnpas sarawi. Paiamwahute, mie ehu wiepe me ira kakete iang. Re kakete iang poaso lella Lima ma re men mwohdete nan taht nan poas-o erein rahn limahuo oh pwohng limahuo. Ihme ira pilada wia. Serepeino kosoia me e inenen apwal, mendahte ekei aramas kin mweidehng ira en mwohd nan dewerail sehr pwe irail en kak kadengedeng pohn tahto.
Dahme kapwuriamwei ohngie nan en lih menet kapahreko me e inenen kalahnganki me ih oh ah pwoud ara kak lella ni tehnpas sarawi nan soangen irairo, pwe e kawekala mwomwen ara pepehm en rongamwahu oh mwomwen ara pepehm duwen pwopwoud nan tehnpas sarwi. Kauno ketin katingehkin ira soangen keirda me kin kohsang ni tohnmetei. E pil tehkada me ara seiloak en rahn limahu kolahng ni tehnpas sarawio inenen kakehlakada palingenara sang ansou me ira kohla ni tehnpas sarawi pak tohto ahpw sohte tohnmeteikihla mehkot.
Sangete nan pahr me I rongada kadehdehn lih menet, I kin medemedewe ia mwomwen mour en pwopwoud pwulopwul wet pahn weksang met ma ira pilada ehu soahng—sohte wia tohnmetei pwehn kapwopwoudla nan tehnpas sarawi.
Kitail kin wiahda kiden pilipil kei nan mourwet, ekei lapala oh ekei mesen tikitik. Atail pahn kilengla mwuri, kitail kak kilang ia uwen lipwalipw laud pwehki ekei pilipil kan me kitail wiahda nan atail mour. Kitail kin wiahda pilipil mwahu ma kitail kasawih wiepe teikan oh medewe wasa re pahn kahrekitaillahng ie. Ni atail wia met, kitail wia idahwen kaweid en Presiden Russell M. Nelson pwehn tepki medewe dahme pahn pwarada mwur.2 Ohng kitail, dahme pahn pwarada mwur kin ansou koaors keid nan elen inou sarawi kan sangete ni tehnpas sarawi kohkohlahng ni mour soutik, me wia kisakis keiu laud nan pwungen kisakis koaros en Koht.
I kadehdehki duwen Sises Krais oh manaman en sapwellimen Tomw oh padahk mehlel teikan nan sapwellime rongomwahu ni mwaren Sises Krais, ahmen.