Noumw Pwuken Kaweid en Prihsduhd
Wiahda pein noumwail pwuken kaweid en amwail pahn kasalehieng pein kumwail amwail pahn wia tohn padahk en Krais kei.
Tihsempe nekiero, Presidensi pakairkihda me kisin pwutak sounpar 11 kan kakehr iang “patehng pwihn en Prihsduhd en Aaron kan … nan tepin Senweri en nan pahr me irail pahn sounpar 12.”1
Pwehki met, tepin nan pahret, ekei me sounpar 11 lemleme me re pahn mihmihte nan Praimeri lau lel arail ipwidi kohkohdo ahpw met irail tepier iang wa seli kamadipw sarawi Rahn Sarawi kan nin duwen arail wiahier dihken kapw kei nan Mwomwohdiso wet.
I men ese isime keieu pwuriamweikihla wekdekla wet—ma dihken kapw ko de arail nohno pahpahko. Ong mepwukat kerenieng dohken kapw me 80,000, me tohto ieiang kitail pwohnget nan kapokon lap kaselel wet de pil iang patehng kilkilang kasdo wasa teikan. I kasamwoh kumwaildohng nan pwihn en pirien en prihsduhd wet!
Wekidekla wet kahrehieng mihting wet ah wia ehu poadoapoad—me duwehte pwihn en Prihsduhd en Aaron keieu laud kan me patehng tiepene en prihsduhd nan kapokon lap. Sang ni kemwekid kesempwal wet, I men kairehki ahi padahket mehlel ohng mwahnakapw kan en Prihsduhn en Aaron.
Kaskuhl en Esehsang Pelien Mwadong kan
Me iangahki wia tohn sukuhl kei, pali tohtohn kumwail wie kalkalaudehla amwail koahiek kan, dahme kumwail men wia, oh perenki wia sang ni kemwekid en sukuhl kan de kaskuhl tohror teikan, oh soangen pwihn kei likin sukuhl, me iangahki pwihn en mwadong.
Pwehki ahi kin perenki soangen kamwadong koaros, I kin kepinga irail akan me kin kalapw kaiahnehng ren esehla kamwadong kan lau irail iangala pwihn en mwadong wadawad kan. Pwehn emen en mwahula douluhl nan mehkot ieu, e anahne, kapatahieng ah koahiek, kasukuhl laud, tohnmetei, oh ansou reirei en esehla oh kasukuhlki. Soun mwadong kan kalapw rong soun ruwes ngoang kan oh men pwilikihdi dahme irail perenki met pwehn wiahla aramas wadawad kei ehu rahn.
Kitail ese me ekei tohn Mwomwohdiso wet oh me kolokol prihsduhd kan wehwehki duwen pweidahn irail soun kamwadong wadawad kan. Mie soangen karasaras kasalel kei, ahpw ekeite me I kak kasalehda pwe ansou me mwotomwot. Mwein kumwail pahn kak kasawiada ekei soun mwadong pwukat: nan iakiuh—Jeremy Guthrie oh Bryce Harper; nan pahsked—Jabari Parker oh Jimmer Fredette; nan soccer— Ricardo Rojas; nan rugby—William Hopoate; oh nan football—Tayson Hill, Daniel Sorensen. Irail koaros wia aramas kesempwal kei nan kamwadong me irail iang.
Mendahte arail pweidahr douluhl nan pelien kamwadong me irail mih loale, irail me pahn tepin inda me irail sohte nohn maieng mwadong kan de irail sohte wia aramas unsek kei. Rasehngete kitail koaros, irail kin doadoahk laud pwe irail en samaniala kamwadong kan—oh momourki rongamwahuo. Irail kin pilehu uhda ma irail kin pwupwseli oh kin nantihengete pwe ren mwamwahula.
Pwuken Kaweido
Nan pwihn en kamwadong kan, mwadong kan kin wiawihkihda soangen kemwekid en mwadong kei oh re kohpene wiahda pwuken kaweid ohng soun mwadong. Soun mwadong kan kin esehla arail palih kan ong ehu ehu wiepen mwadong. Soun mwadong pweida kan kin ngoangki onopki neirail pwuken kaweido pwe ansou me mwadong kin wiawi, irail kin esehier, kerenieng ansou koaros, ia wasa irail pahn mihe oh dahme re pahn wia.
Kilel sang Dave Kaup/REUTERS/stock.adobe.com
Ni soahngohte, kitail me kolokol prihsduhd pil mie atail pwihn—pwihn en utuht—oh pwuken kaweid—me iei pwuhk sarawi kan oh mahsen en soukohp kan en mwehiet.
Kumwail kin kakehlailih iangamwail kan?
Ia mwomwen amwail kin onopki noumwail pwuken kaweido?
Kumwail wehwehki amwail pwukoah kan?
Kasongsong kan oh Uhpene
Pwehn kadauluhlla karasaras wet, kitail ese me soun ruwes wadawad pwukat ese kehl oh luwet kan en neirail pwihn iangahki irail me uhweng kan. Irail kin wiahda koasoandi me pahn kin kahrehieng irail en pweida. Ah kumwail?
Kumwail ese soangen kasongsong dahnge me kumwail keieu luwetieng, oh kumwail kak medewehda ia mwomwen kasongsong wet ah pahn song en kaluwetei kumwailla. Mie ansou me kumwail pein wiahda koasoandi pwoat oh pwuken kaweid pwe kumwail en kak ese ia mwomwen amwail pahn sohpai kahpwal kan?
Ni ansou me kumwail kin sohpai kasongsong kang—me kin sang mehteikan de ansou me kumwail kin kelkelehpw kilkilang kasdo—kumwail esehier dahme kumwail pahn wia. Ma emen iengemw songkinuhk ken sakau de kang mehn kasahliel ape, ke esehier dahme ke pahn wia. Kumwail kaiahnehr oh esehier dahme kumwail pahn wia.
Sang ni ahmw koasoandi, kaweidpen pwuhko, oh kehlpen inou me kumwail wiadahr pwehn sewese amwail palien, kumwail pahn mengeieng powehdi kasongsong kan. Kumwail pahn koasoanedier ia mwomwen amwail pahn powehdi oh doadoahngki. Kumwail sohte pahn anahne kalapw wiahda koasoandi ansou me kumwail miher nan kasongsong.
Emen Wahnpoaron ko ahpwte soaiahda soai pwoat me pid duwen padahk wet. Ni eh wia emen prihs nan high school, e iangiangih iengehko. Mwurin arail mwengehier irail tangatang seli, ah emen irail medewehda ren kohla kilang kasdohiu. Kahpwalo iei me E esehier me kasdohu e sohte konehng kilang. Tetehne pwunodadahr oh salohkidahr kemwekdo, ahpw miehier ah koasoandiheng. Met e esehsangehr sang nan nah pwuken kaweid en prihsduhdo.
E esingek lauda ih koaskoasoane pein ih oh ih indahda, “I sohte mwahuki kasdohn. Kumwail waiehlahte nihmwo,” eri irail pil wahlahte. Met mwomwen mengei ahpw katapan laud! Pahr kei mwuri, emen ienge me iang pwohngo kawehwehda mwomwen ah karasaraso ah kiheng kehl en pil iang idawehn soangen mwohmwohte nan ah mour.
Teh kan sang nan Pwuken Kaweido
I idek rehn ekei iengei tohn doadoahngko irail en sawaski ekei kaweid me kumwail kak kapatahieng nan noumwail pwuhken kaweido. Iet ekei kaweid mwahu me irail sawaskihda:
-
Kapakapki kamarain laud rahn koaros oh kadehdehpen Sises Krais.
-
Rong mwahu kasukuhl kan me sang amwail pahpa nohno oh amwail koaun en Mwahnakapw kan oh pwihn en utuht kan.
-
Liksang kasdo suwed kan oh kemwekid samin en nan interned.
-
Taman amwail inou kan me kumwail wiadahr rehn Koht oh kolokol inou pwukat.
-
Onopki soaipen pwuhk sarawi kan en soukohp wadawad kan oh alasang arail wihwia mwahu kan.
-
Kapaiada Sapwellimen Sahm Nanleng serihkan sang ni amwail kin papah irail.
-
Kaparehng aramas mwahu pwehn sewesei kumwail en wiahla aramas me kumwail men wiahla.
-
Samaniala app en Poadoapoad en Peneineio oh rapahki poadoapoad en amwail peneinei.
-
Pilahnehda wasahkan me kumwail kak kohla ie pwe kumwail en kak pitsang kasongsong kan.
-
Poakehng oh kakehlaka irail me mih nan amwail pwihn en utuht en prihsduhd kan.
I pil wehwehieng soun mwadong me mih nan kilel me kitail ahpwte kilang kat. I pwuriamweiki arail sohte kin kawehweh pein irail sang dahme irail kin wiame pid soun mwadong wadawad kei, ahpw irail kosoiahte ihsirail nin duwen arail wia serien Sahm Nanleng kei oh kolokol Sapwellimen Koht prihsduhd.
Met kitail pahn rong arail iren madamadau kan:
-
Jimmer Fredette, wia dihken men, dene e kin momourki, “dahme I ese oh pwoson duwen mehlelpen rongamwahuo. Met kin kaweidkini ien … warehng kolokol prihsduhd oh ni mehlelo—en wia karasaras mwahu.”
KilelJimmer Fredette ni duwen dihken men -
Bryce Harper, wia ohl pwopwoud men, e ntingihdi dene, “I leme me mwohni de kepwe oh wiahla pwihnen MVP men pahn kahrehiengie ien peren. Miehte mehkot mei saikte diar. Eri, I … kaunopehngehr oh [pwedlongehr] nan tehnpas sarawio. Met I miher nan ahlen [pwuralahng] Semei Nanlengo oh miehier ahi peneinei soutik—me wia popohl keieu laud nan sampah!”
KilelBryce harper iangahki ah pwoud -
Daniel Sorensen, e wia prihs men, dene: “Pwuken kaweid mwahu ehu wia pilahn pwehn kakkoahiekihla oh kakehlailih emen emen soun mwadongo. Sang ni ahi onopiki oh doadoahngki padahk kan en rongamwahu en Sises Krais, I kak ese mwomwen ahi pahn doadoahngki ahi kehl pwehn papah nan prihsduhd.”
KilelDaniel Sorensen ansou me e wia misineri men -
Jeremy Duthrie, met e wia misin presiden men, ehukihda; “nin duwen dihken men sounpar 12 ... {I kehn} Ngehn Sarawi kadehdehiongie {me} ‘mour wet anosu en ... kaunopada pwehn tuhong Koht.’2 Koasoandien wiepen doadoahk wet iei pwoson Koht patehng wiewia {oh} Koluhla sang kalahngan en sounkomouro. ... Pwuhk en koasoandi pwukat pahn dierek nan pwuhk sarawi kan oh sang rehn soukohp ieias kan.”
KilelJeremy Guthrie ansou me e wia misin presiden men -
Jabari Parker, ahpwte pepdaisla,nda me, “I sohte kak medewe soangen aramas dah me I pahn wiahla ma I sohte koasoanehdi ien pepdaisla ansou me I pwulopwulo. … I kapingki Koht ah kak mih nan ahi mour pwehn kaweidie rahn koaros.”
KilelJabari Parker ni kasarawi en Prihsduhd ehu -
Ricardo Rojas, me wia prans presiden ansou wet, kosoia: “Sang ni Sapwelimen {Koht} Prihsduhd {kitail} kak sawas nan doadoahk wet. Kitail kin kepwukoahki kitail ‘en kehlail oh ngoangki’3 perpere mehlelo.” Met karehda eh pweida nan mwadongo oh nin duwen ohl emen me kolokol prihsduhd.
KilelRicardo Rojas ansou me e wia prans presiden -
Taysom Hill, e wia misineri men, pehm me rongamwahu en Sises Krais kin papahki pwuken kaweid pwehn kaweid ah nan mour. E ehukihda dene, “Ahi kamehlelpen sapwellimen [Koht] pilahno oh wiwia wen ahi kak koaros pwehn kapwaiada ahi pwukoah kin seweseie pwe ien kehn meleilei oh peren nan ahi mour, e kin kasalehiengie me Koht kupwurperenkihda ahi doadoahk kan.”
KilelTaysom Hill ansou me e wia misineri -
William Hopoate, iang en nah pwutako ah wia kapai en nah seri me wia keinek kapahiu, dene me rongamwahu wet sewese pwehn “kasalehda wekpeseng en koasoandi kan oh doadoahngki manaman en ngehno pwehn wia mehn sansar oh papah mehteikan.”
KilelWilliam Hopoate ni kapai pen seri men
Ah kumwail? Kumwail wehwehki wen amwail kesempwal oh sarawi nin duwen amwail wia sapwellimen Koht pwutak emen, me kolokol Sapwellime prihsduhd sarawi? Pwehn tamataman met, wiahda amwail pilahn oh pwuken kaweid en prihsduhd me pahn kaweid kumwail nan ansou en kasongsong oh kahpwal. Kapatahieng amwail pahn sinsile pein kumwail oh wenlahte mwowe ni pwoson.
Wenlahte mwowe kin kakehlahda kadehde kan oh kalaudehla ineng en tengedieng nan ahl tehtiko. Met rasehng kalapw kapakap, onopki pwuhk sarawi, iang Sarawi, pwain meiroang, oh idawehn kaweid me mih nan pwuken For the Strength of Youth
Sinsile pein kowe wehwehki koasoanehdi dahme kumwail pahn wia mwohn kasongsong ah pahn leledo. Ansou me kasongsong kohdo pwehn kawehla pein amwail lamalam kan, kumwail esehier dahme kumwail pahn wia.
Kumwail anahne esehier dahme kumwail pahn wia.
Kumwail sohte inangih kapakap rahn wet? Ih ansou me kumwail anahnehier kapwaiada dahme kumwail koasoanediero.
Kumwail pehm me amwail kadehde wie luluwetla? Miehier amwail koasoandiheng met. Kumwail ese dahme kumwail pahn wia.
Kesempwal ni Sihlangin Koht
Kumwail me kolokol sapwellimen Koht prihsduhd sarawio. Amwail inengieng en kolokol teng lepin metehu e pahn kahrehienguhk amwail pahn wiahla aramas unsek me kumwail wiawihkida pwehn wiahla.
Koht mwahngih oh poakohng kumwail. Oh E pahn ketin kapaikumwailda oh kaweid kumwail.
Mwein kumwail pahn medmedewe me kumwail sohte kesempwal, oh sohte katepomwail. Ahpw met sohte mehlel. Kumwail sohte wehwehki me Koht kalohngkiher, “Me luwet kan en sampah pahn kohdo oh kawehla me kehlail kan”?4
Eri, kumwail pehm me kumwail luwet? sohte katepamwail? Mwahu douluhl, kumwail ahpwte iangala aht pwihn!
Kumwail pehm me kumwail sohte kesempwal? sohte mehkot? Mwein kumwail me Koht anahne.
Soangen karasaras dahnge me mie likin en Dehpit ah peiengada Kolaiato. Sang ni likih Kauno, koasoandien mwadong oh pwuken kaweid, Dehpit sohte kapitalahte pein ih ahpw e iangahki sounpei en Isreal koaros!5 Ese me Koht pahn ketiket rehmwail ni ansou me kumwail mwadangete kiheng amwail kehl rehn Kauno. “Ma Koht ketiket rehtail, isime pahn kak uhweng kitail?”6
E kak ritingada wenihmw kan oh sewesei kitail en diar kehl oh koahiek kan me kitail sohte ese me mihmiher rehtail.7
Rong amwail kaun likilik kan, me duwehte pahpa oh nohno, pisop, oh sounsawas en pwutak pwulopwul kan. Esehla pwuken kaweido. Wadek pwuhk sarawi kan. Onopiki mahsen en soukohp kan en mwehiet. Wiahda pein amwail koasoandihpen dahme kumwail pahn wia pwehn kasalehda me kumwail wia sounpadahk en Krais.
Kumwail anahne esehier soangen mwekid dah me kumwail pahn doadoahngki pwehn kakehlaka ngenamwail oh perehsang kumwail lidip en kasongsong kan.
Wia met ah Koht pahn doadoahngkin kumwail.
Met, mie me solahr mourki rongamwahu wet oh kohkohla. Ekei kin mwohd wasahn mwomwohd kan oh kilang sang wasa doh. Ekei pilada ren mihmihte likin wasahn mwadongo, mendahte kaun en mwadongo ah kin song en kihrailong. I lukehiong kumwail en kapitala, utung, oh poakohng irail duwehte iengomw!
Ekei kin men iangada mwadong—oh irail kin iang. Dahme keieu kesempwal kaidehn wen koahiek me irail ahniki ahpw uwen arail nsenohko ren pein kihrailong nan mohso. Irail sohte kin awih pwe neirail nempe en pehkerda, pwehki irail ese iren pwuhk sarawi me mahsanih, “Ma mie amwail ineng en papah Koht, kumwail pehkerohng en wia doadoahk wet.”8
Kumwail kak pein kohla nan wasahn ireklahu.
Kumwail kak wia met ansou me kumwail kin onopiki oh doadoahngki noumwail pwuken prihsduhd.
Ansouohte kumwail pahn pwupw seli oh sapwung seli—mehlel pak tohtohie. Kumwail sohte unsek; pwupwila wia kisehn karadahn mour me kahrehieng amwail kak kasalehda ihs kumwail oh papah ni soangen ahl mwahu ehu. Sounkomouro oh Sapwelime tomwo kaunopada ahl ehu pwe kitail en kak powehdi atail luwet kan sang ni atail pahn koluhla.
Soun mwadong kan kin kaiahnki awa epwiki samwahkei irail samsamaniala wasa koaros me re kin mwadongki ie. Nin duwen amwail kolokol prihsduhd, kumwail anahne ahniki soangen madmadauohte. Ma ke sapwungala, koluhla oh esehla mehkot sangie. kasukuhlki pwe ken kak mwahula. Udahno, kumwail me wiewia. Ke kak esehla pwuken koasoandien doadoahk wet?
I koangoangoahkin kumwail: Koapwoaroapwoariki Kauno. Likawiada likoun mahwin unsek en Koht,9 oh iang mahwin.
Malaulau me udahn iang wadawad nan pelien kamwadong kan, ahpw nan pelien tohn padahk, me tohto me kin pilada en idawehn Krais.
Ni mehlelo, amwail misin nan mour wet—iei en esehla elen Kauno kan, wiahla tohn padahk, oh nantiheng mour pahn kupwuren pilahn en Koht. Koht pahn kaitarala oh kapai kumwailda sang amwail pahn likih Ih. Kumwail kak wia met pwe kumwail wia soun mwadong kaidehn mwamwahl kei mwohn Sihlangi.
I kapakapki me kumwail pahn wiahda inou pwehn warehng momourki prihsduhd sarawi me kumwail kolokol oh nantiheng kalaudehla amwail pwukoah sarawi kan rahn koaros. I kapaikin kumwail en ahniki koahiek oh ineng en wia mepwukat. I pil kapatahieng ahi kadehdeh me pid manaman en prihsduhd me kumwail kolokol, en soukohp momour kan, oh Sises Krais oh Sapwellime karasaras nin duwen atail Sounkomour oh Soundoar. Ni mwaren Sises Krais, ahmen.