Tomw en Sises Krais

Sang Tad R. Callister

Ahpwte Kakomoaldihsang Presidensi Lap en Santi Skuhl

Tomwpen Sounkomouro kaidehnte ohng koaros ahpw e pil ohng emen emen.

Nan irair en pahr wet kitail kin kepkepinga oh koadkoadoroapwe duen Tomw en Sounkomouro. E wia iren padahk kesempwal, kopwuriamwei, oh dei ehu me sampa wet tungoalenki. Iei met me kiheng koapwoaroapwoar oh kahrepen atail momour.

Eri ia wewehn Tomw en Sises Krais? Ni madmadau, e wia kemwekid kei me tepsang ni Mwetuwel en Ketsemeni, lelahng pohn lohpwuo, oh imwikihla Iasadahn Sounkomouro sang nan sousou. Met me pweidahr sang ni limpoak unsek me E ketkihong emen emen kitail. E anahne aramas emen me sohte dipe, me ahniki manaman pohn mehkoaros—iangahki mehla; me pahn kak ahniki tohnmetei pwehki dipatail kan oh luwet akan koaros, oh mehlel me pahn kak alehda kasongsong kan koaros.¹ Iei met me wia sapwellimen Sises Krais doadoahk—met iei Sapwellime Tomwpen Dihp.

Eri a ia karepehn? Iei pwehn kamangaieng kitail en kak pwurala rehn Koht, en duwehla Ih, oh ahniki popohl unsek. Met e wiawiher sang ni ah powehdi songen kahpwal pahiou:

Mehlahn paliwar
Mehlahn pali ngehn wiawi pwehki Adam oh dipatail kan
Atail kahpwal akan oh soumwahu kan
Atail luwet akan oh sou itar akan

Ahpw ia mwomwen Sounkomouro ah pahn kak kapwaiada mepwukat ni ah pahn sohte kawehla kosonned akan?

Kilel

Mengein pwupwisang nan sompihr

Ia duwen ma ohl emen wie medemedewe mwomwen ah pahn lusdihsang wasa ileilei ehu apw wiahkinte wiahda pilipil ehu me e sohte medewe mahs ia pahn imwin a pilipilo oh lusieisang nan sohnpir kiso. Mwurin eh wia met, e pahn mwadangete medewehda wen pweipwei me e wia. E men sokedi mwahu, ahpw mie kahpwal ehu me mie iei—koasoandi en ahng. E kamwakid pehkau ni wen wuk ehu, koapwoaroapwoarki me e pahn pihr, ahpw e sohte pweida. E koasone paliwere pwehn song peipei de en kak mwekid wei ni wen wawai ehu, ahpw kosonned en ahng me lel paliwere sohte douluhl sawas oh kiheng ah ahnsou. E song nantiheng ah kak koaros ong ni kosonned wet ahpw dene: “E wia mehkot sapwung ehu. I pahn sohte pwurehng wia.” Ahpw dahme e koasoia kau sohte duwehte e koaskoasoiheng aramas salengepon kei. Kosonned en ahng wet sohte kin ese ahniki pepehm en kadek; sohte mehkot e kin mweidala. Sang ni paiamwahu, ohlo mwadangete kehnda mehkot nan tihnsewe. Kempoakepah men me mihmi nan sounpihro me kehn ansouo me mie mehkot pahn sapwung, ahpw kiheng rakasau mwohnte ah pahn luso. E diarada sahlo ahpw waik. E ahpw esingekda oh pipihr kohdi oh sokedi nan pwehlo paiamwahu. Kitail mweihn kak idek, “E kasapwungehla kosonned en ahng wet, de rakasa me doadoak nan kosonnedo me kahrehda eh peidi mwahu?”

Kilel

Dake parasuht pwehn sokedi ni sohte kahpwal

Ni ansou me kitail kin wia dihp, kitail kin duwehte ohl pweipweio me lusang pohn sounpihro. Sohte lipilipil dahme kitail kin pein wia, ihte me kin mih mwohtail, kitail kin peidieng nan kahpwal. Kitail kin idawehn kosonned en kopwung, me duwehte kosonned en ahng me inen oh sohte mahkpe mie. Ihte me kitail kak pitikihla pwehki Sounkomouro, sang ni Sapwellime Tomwpen Dihp, me E ketkiheng kitail me duwehte rakasa sarawi ehu. Ma kitail pahn ahniki pwoson Sises Krais oh koluhla (me wewehki kitail en wia atail pwukoah oh waik sahlo), eri manaman en Sounkomouro pahn tih pohtail, oh kitail pahn kak sokedi oh sohte lelehng kahpwal.

Met kak pweida, ahpw, pwehki Sounkomouro powehdi soangen kahpwal pahiou me kak en perehla kekeirdahn palingenatail kan.

1. Mehla. E ketin powehdi mehla sang ni Sapwellime Iasada kesempwalo. Wahnpoaren Paul padahngki me, “Pwehki sang rehn Adam koaros pahn mehla, oh pwehki Krais koaros pahn komourla.”²

2. Dihp. Sounkomouro powehdi dihp oh pahtou ong irail kan koaros me koluhla. Wen lol oh sansalamwahu en Sapwellime manaman me Aiseia inoukihdi me, “Itarete dipemwail kan ah mwakelekeldahr, irail pahn udahn pwetepwet duwehte sinoh.”³

Mie pak ekei me I tuhwong Souleng mwahu kei me ahniki kahpwal en mahkehng pein irail, me kin sohte ese ahpw sapwungalahr oh itehieng en Sounkomouro manaman en komour iraila. Ni arail sohte wewehki me irail alehier Tomwpen Dihp poatoapoato oh itehieng me elehda diparail oh arail luwet sohte kak maiawada. Ahpw e wia Tomwpen Dihp poatoapoat ehu pwehki e kolpene oh kawuhdi dihp oh luwet koaros oh pil iangahki kalokolok oh medek koaros me kohsang rehn mehteikan.

Truman G. Madsen me wiahda mehn keseu mwahu wet:

“Ma mie ekei rehmwail me kin lohdieng nan mehkot me kin kahdohwanuhkala, ... oh kahrehieng ah miedahr pwoaisin en dihp me kin kahrehieng ah apwalehng ken wiahla dahme ke kakete wialahro— ah komw anahne rong ie.

I wia ahi kadehde me komw sohte kak duhla loalsang marain oh eripit poatoapoat me Sises Krais kak lel ie. I kadedehki me ihte ma pahn mie kisin marain en ineng en koluhla oh en lella, E pahn ketin ketket mwo. E sohte ketin udahte ketdihdo rehmwail; E ketin ketdihdo pah, pwe En kak ket loale oh ni wasa koaros, iei maraihn en me mehlelo.’ [Doctrine and Covenants 88:6.]”⁴

Ehu kahrepe me inenen kesemwpwal en wewehki Sapwellimen Sounkomouro Tomwpen Dihp oh audepe poatoapoat akan iei sang ni atail pahn kalaudehla atail wewehki e pahn pil kalaudehla atail ineng en mahkehng peihn kitail oh mehteikan.

Itarete ma kitail kin kamehlele sapwellimen Krais manaman en kamwakelehda dipatail kan, iren kalalapak wet kin kalapw pwarada: “Ia mwomwen ai ese ma dipei kan lapwadahr?” Ma kitail pahn kehn Ngehno, eri ih iei atail sounkadehde me dipatail kan lapwadahr, de lapwepen dihpo wihwiawi. Presiden Henry B. Eyring padahngki me, “Ma kumwail kehnehr doadoahk en Ngehn Sarawi … , a kumwail kakehr ale oh wiahki mehn kadehdeh me Tomwpen Dihpo wie doadoahkehr nan amwail mour.”⁵

Kilel

Idin ahl

Ekei kin idek, “Ahpw ma I alehier mahkepen dipeikan, a dahme karehda I kin ahnikihte pahtou?” E kak wia mehn sosohng sang rehn Koht en wia sain en uhdi ehu ong lepin ahnsou, me pahn ruwesei kitail ni ansou me kasongosong teikan pahn song kitail ni ah pahn ruwesehieng kitail en: “Ieremen kohdihwei pohn ahl men. Kumwail ese wen medek me e kak wahdo.” Ni songen wiepe wet, e wia mehn perehre, kaidehn mehn kalokolok.

E mengei, kitail en tamataman dipatail kan oh pil ni ansouohte solahr ahniki pahtou?

Alma tamatamante dipeh kan mwurin sounpar ekei me e koluhkihla. Ahpw ni ansou me e sengisengkiheng Sises en mahkehng, e koasoia, “I solahr taman ai medek kan; ei, I sapwedeksangehr nan ai iren kataman en dipei kan.”⁶

Ia mwomwen ah kak tamataman dipeh kan ahpw sohte ahniki medek de pahtou? Pwehki ansou me kitail kin koluhla, kitail “ipwkiher Koht.”⁷ Kitail wiahla duwehte dahme iren pwuhk sarawih kan koasoiahier, “aramas kapw”⁸ rehn Krais. Sang ni koaosi mehlel kitail kakehr inda, “Kaidehn ngei ohl de lih me wiadahr dihp me nekierko. I wia aramas kapw oh weliakapw men.”

[Kesiluh] 3. Kahpwal akan oh Soumwau kan. Alma kohpada me Krais “pahn ketin ketdo, lokoloki medek oh kahpwal akan oh kasongosong koaros.” Pwehda? “Pwe en kak direkihla mahk, … pwe en kak ese ia mwomwen eh pahn kak apwalih me soumwau kan.”⁹

Ia mwomwen Ah apwalih met? Ekei pak E kin ketkihsang kahpwal akan, ekei pak E kin kakehlaka kitail en dadaurete lel imwi, oh ekei pak E kin ketkihong kitail maraihn en esehla mwahu dahme kupwurerail ong kitail pohn sampah. Ni ansou me Joseph Smith wie lokolok nan Kalapwuhs en Liberty ki sounpwung riau, e ahpw sengiseng laudkihla oh inda, “O maing Koht, a ia komwi?”¹⁰ E sohte alehdi sawas ansouohte ahpw Koht sapeng oh mahsanih, “Nei pwutak, popohl en ketket rehmwi; ahmw kahpwal oh lokolok kan mie ahpw ongete lepin ahnsou; oh ma ke pahn kak powehdi mwahu, Koht pahn ketin kapaiukada.”¹¹

Joseph ahpw wewehkihla ni ansouohte me kahpwal me e ahnikio wia kisin kahpwal tikitik kis. Sang ni marain en kaudiahl wet, e ahpw intinglahng Soulengko sang ni kalapwuhsohte koasoia, “Riei kempoakepahi ohloko, kitail perenda oh wia soahng koaros me mih nan atail manaman; oh pwe kitail en kak keskesihnente ki koapwoaroapwoar unsek en kilang komour en Koht.”¹² Pwehki en Sounkomouro Tomwpen Dihp, kitail kak ahniki marain me kasalehieng kitail kahrepen atail kahpwal akan oh koapwoaroapwoar en insenamwahu.

[Kapahiou] 4. Luwet akan oh Sou itar akan. Pwehki Sapwellime Tomwpen Dihp, Sounkomouro ahniki manaman akan, ekei pak kin kak wewehki kupwur kalahngan,¹³ me kin kak sewesei kitail en powehdi atail luwet akan oh sou itar akan oh sewesei kitail nan atail seilok en nantiheng duwehla Ih.

Moronia ahpw padahngki me: “Ei, kohdo rehn Krais, oh unsekla Reh, … pwe sang ni Sapwellime kupwur kalahngan me kumwail pahn kak unsekla rehn Krais.”¹⁴ E mwomwen me mie mehn kaweid riau de mehn kamwaupetail me pahn kamwakid manaman akan me pahn kak kamwauiala—pil kawunsekihla—kitail.

Keieu, tiahk sarawih kan. Iren pwuhk sarawih kan mahsanihong kitail me, “Nan tiahk sarawih kan koaros, manaman sarawih miehier.”¹⁵ Ekei pak kitail kin medewe me tiahk sarawih kan wia irekdien doadoahk kei—me anahnepe ong lapalapla, ahpw ni mehlel ehu ehu tiahk sarawih pwukat kin sapwadada ehu ehu manaman me kin sewesei kitail en duwehla Krais. Ni karasaras:

Ansou me kitail pepdaislahr oh aledahr kisakis en Ngehn Sarawio, kitail mwakelekeldahr—oh pil sarawihla rasehng Koht.
Pwehn kapatahieng, ni ansou me kitail ale kisakis en Ngehn Sarawi, atail madamadau kan kin kak marainda oh atail mongiong kan kin mwuterekla pwe kitail en kak ahniki madamadau oh pepehm en duwehte Ih.
Oh ni ansou me kitail kin katengtengehng atail pwoud kan, kitail alehdi pwuhng ong “sehr en nanmwarkih kan, wehi kan, pai kan, oh manaman kan”¹⁶ me wia kisakis kei sang rehn Koht.

Keriau en men kaweid me pahn kamwakid manaman pwukat iei kisakis en Ngehno. Pwehki Sapwellimen Krais Tomwpen Dihp, kitail warohng en ale kisakis en Ngehn Sarawi oh kisakis teikan me iangedo. Kisakis pwukat wia wiewiah sarawih kei; ihme karehda, ehu ehu ahnsou me kitail kin ale kisakis en Ngehno, kitail kin duhduwehla Koht. Ni sohpeikasal me karehda iren pwuhk sarawih kan kin mahsaniheng kitail ansou tohto en kin rapahki kisakis pwukat.¹⁷

Presiden George Q. Cannon padahngki me: “Sohte ohl emen kak inda, ‘O I sohte kak; pwe ih mwomwen ngei en me.’ E sohte kasalehda kahrepe mwahu nan ah koasoi, pwehki sang ni kahrepe me Koht ketin inoukiher en ... ketkihdo kisakis kan me pahn kihsang [atail luwet akan]. … Ma ekei kitail sohte unsek, met e wia atail pwukoah en kapakapki kisakis me pahn kak kawunsekih kitaila.”¹⁸

Ni oaralap, Sapwellimen Sounkomouro Tomwpen Dihp kiheng kitail mour ong mehla, “kaselel ong wie pehsla,”¹⁹ kamwaula ong insensued, oh unsekla ong me luwet. E wia mehn epwel sang nanleng ong me apwal akan oh me nanantih kan pohn sampaht.

Nan Sapwellimen Soukomouro keimwseklahn wihk pohn sampah, E mahsanih, “Nan sampaht kumwail pahn ahniki kahpwal: ahpw kumwail ahniki peren; pwe I powehdier sampah.”²⁰ Pwehki Sounkomouro ketin wiahier Sapwellime Tomw, sohte ehu songen mwohmw de kemwekid de aramas—sohte dihp de mehla de kamweimwei—me pahn kak ireikitaildihsang en ale mour me keieu laud rehn Kauno, ihte kitail en kapwaiada sapwellimen Koht kosonned akan. Sang ni eripit wet, kitail pahn kak en nantihla mwowe ki peren oh koapwoaroapwoar unsek me Koht ieiang kitail nan pwukoah doadoahk sarawi wet.

I kadehdehki me Sapwellimen Sounkomouro Tomw sohte poatoapoate ni pokonlap ehu ahpw ong emen emen—me e sohte kak pwuralahngete rehn Koht ahpw kitail en kak duwehla Ih—iei me moangehda koasoandi en Sapwellimen Krais Tomw. Met me I wiahki ahi kaping oh kadehde ni mwaren Sises Krais, amen.