Silepen Sihpw mwahu, Sihmpwul en Koht
Sises Krais kin ketin poahngoakehkin kitail Kapitie oh Mware. E ketin rapahkihla oh kihkitailpene. E kin ketin padahngki duwen papah ni limpoak.
Riei kempoakepahi ko, mie pak me kumwail apwal en meirla oh tepda wadwadek sihpw nan ahmw madamadau? Ansou me sihpw ko pahn tepda lusla palio kehlo, ke tepda wadek: 1, 2, 3, … 245, 246, … 657, 658 …1
Ohngie, wadepen sihpw sohte mwahn kin kameiriehla. I kin pwunodiki emen de salongala eri I sohte kin kak meirkihla.
Se iang kihda ngilat rehn kisin pwutako me soun silepen sihpw me uhd wiahla emen nanmwarkio, me mahsanih:
“Kauno iei me silepei; solahr me I pahn anahne.
“E ketin kommoaleiehdi nan mohs en dihpw kaselel kei, oh kin ketin kahluwaielahng ni pihl mwakelekel.
“E ketin kakehleiehda sapahl.”2
Nan ansou en Ihster wet, kitail kin wauneki Silepen Sihpw Mwahu, iei me pil Sihmpwul en Koht. Nanpwungen Mware kan koaros, mwahr wet me keieu sansal me kin kasalehda sapwellime kupwur kadek. Kitail kin esehla sang atail Sounkomour ah kin mahsanih pein Ih nin duwen Silepen Sihpw mwahu men oh sang kadehde kan en Soukohp akan duwen Ih me Sihmpwul en Koht. Pwukoah oh kilel pwukat kin inenen doadoahkpene—ihs me kak apwalih mwahu sihmpwul kan mwahu sang Silepen Sihpw mwahuo, oh ihs me pahn mwahu en wia atail Silepen Sihpw me pahn mwahu sang Sihmpwul en Koht?
“Pwe iei uwen Koht eh ketin loalloale sampah, me e ketikihdohki Sapwellime Iehros,” oh Sapwellimen Koht Iehros meirongkihla eh mour ni eh peikiong Seme.3 Sises kadehdeda, “Ngehi me silepen sihpw mwahuo: silepen sihpw mwahu kin tohnmeteikihla eh mour pwehki sapwellime sihpw akan.”4 Sises sapwellimaniki manaman en tohnmeteikihla eh mour oh manaman en pwurehng ale.5 Ni eh ehuieng Seme, atail Sounkomour kin kapaikitailda, nin duwen atail wia Silepen Sihpw Mwahu oh Sihmpwul en Koht.
Nin duwen eh wia Silepen Sihpw mwahu men, Sises Krais kin ketin malipehki Sapwellime sihpw kan Kapitie oh Mware. E ketin rapahkihla oh kihkitailpene. E ketin padahkiheng kitail mwomwen papah ni limpoak. Kitail en medemedewe oaralap siluh pwukat, oh tepkihda Eh ketin malimalipei kitail sang ni Kapitie oh Mware.
Keieu, Silepen Sihpw mwahuo kin “malipehki nah sihpw akan ni ederail. … Sihpw kan kin ese ngile.”6 Oh “ni pein mware me e kin ketin malipehkin kumwail, iei mwaren Sises Krais.”7 Ni atail kin ngoahngki idawehn Sises Krais, kitail ahpw kin alehdi kamarain en wia me mwahu, poakohng Koht oh papah Ih.8 Ma kitail pahn onopki pwuhk sarawi kan rahn koaros, medemedwe, oh kapakapki; ma kitail kin inou sapahl ansou en kamadipw sarawi oh wia inou kan en tehnpas sarawi; oh ni atail pahn luke koaros en kodohng Sapwellime Rongamwahu oh tiahk sarawi kan, eri kitail wie rongorong Kapitie.
Ansou pwukat, Presiden Russell M. Nelson koangoangehkin kitail en ekerki eden mwomwohdiso kopwurpwurdo ahdo me Sises Krais ketin kasalehda, iei: Mwomwohdiso en Sises Krais en Souleng en Imwin Rahn akan.9 Kauno ketin mahsanih, “Mehkoaros me kumwail pahn kin wia, kumwail pahn kin wia ni edei; iei me kumwail pahn kin kahdanki mwohmwohdiso ni edei; oh kumwail pahn kin peki rehn Sahmo ni mwarei pwehn kapaiada mwomwohdiso pwehki ngehi.”10 Wasa koaros nan sampah, nan atail mohngiong kan oh imwatail kan, kitail kin alehdi malipilip sang Sahmo ni mwaren Sises Krais. Se kapingki kapai kan me kin kohdohng nan imwatail kan, utuht me sang kaudek en Mwomwohdiso, onop en rongamwahu wet, oh soangsoangen kemwekid en peneinei kan.
Keriau, atail Silepen Sihpw mwahu kin rapahki oh kihkitailpene pwe kitail en wiahla pwihn tehieu. E mahsanih, “Ma emen kumwail mie nah sihpw epwiki, a emen ahpw salongala dahme e pahn wia? E sou pahn pwilikihdi me duwehk duwemeno nan kehl, oh kohwei rapahkiseli me salongalahro, e lao diar?”11
Atail Sounkomour kin tehk me salongalahro oh pil iangahki me duwehk duwemeno, kalapw wiawi nan ansoutehkis. Ni atail kin papah, kitail kin pohnese me duwehk duwemeno me kin loaloapwoat oh kehlail, pil ni ansouwohte nanantiong sewese me salongalahro. Atail Kaun kin rapahki oh kapwurekitaildo “sang nan wasa kan koaros,”12“sang nan keimw pahieu en sampah.”13 E ketin kihkitailpene sang ni inou sarawi oh ntahn Sapwellime Tomw.14
Atail Sounkomouro mahsanihong Sapwellime tohn padahng kan nan kadehde Kapw, “Pil mie ekei nei sihpw me sohte mih nan kehl wet.”15 Nan sapwen Amerika, mwurin Kauno iasadahr, e ketin mahsaniong kadaudok en Lihai kan, “kumwail me nei sihpw akan.”16 A iet Sises mahsanih me mie ekei sihpw me pahn rong Sapwellime mahsen.17 Ia uwen kapahi en Pwuhk en Mormon eh wia pilehu kadehde me kin kadehdehki kapitien Sises Krais!
Sises Krais luke Mwomwohdiso en alehda aramas koaros me kin rong Kapitie18 oh kapwaiada Sapwellime kosonned akan. Papidaiski pihl oh kisiniei oh Ngehn Sarawi me ekei padahk mehlel en Krais.19 Nihpai idek, “Ma Sihmpwul en Koht, me sarawi, anahne papidaiski pihl, pwehn kapwaiada pwung koaros, a ia duwen kiht, me sohte sarawi, se soh pahn pil anahne papidais, iei, papidaiski pihl!”20
Rahnwet, atail Sounkomour kupwurki me dahme kitail kin wia oh dahme kitail pahn wiahla pahn luke aramas teikan en kohdo, idawehn Ih. Kohdo ke pahn diar limpoak, kakehlail, miniminpene, oh inou sarawi sang Reh, iangahki nan Tehnpas sarawi en Koht, iei wasa me tiahk sarawi en komour kan kin wiawi ie pwehn kapaiada dih en peneinei koaros, eri mehn Israel kapwurpwurpene sang pali koaros.21
Kesiluh, Ni eh wia “Soun silepen Sihpw en Israel,”22 Sapwellimen Sises Krais karasaras akan kin kasalehda duwen papahn Soun Silepen sihpw men ni limpoak nan Israel. Ni en Kauno kainemwe rehtail ma kitail poakohng Ih, ni e keinemwe rehn Piter, Kauno peki: “Apwalih nei simpul kan. … Apwalih nei sihpw akan. … Apwalih nei sihpw akan.”23 Kauno ketin inoukihda me ma Sapwellime silepen sihpw kan pahn apwalih Sapwellime sihmpwul oh sihpw akan, Sapwellime aramas akan “solahr pahn perki de masak mehkot, oh sohte emen rehrail pahn salongala.”24
Silepetailo padahngki me silepe kan en Israel en tehk mwahu re de meirla,25 de kamwarakpeseng,26 de karehieng sihpw akan en salongala de kilang pein kitail ong ni kamwahupatail.27 Sapwellimen Kauno Silepe kan ahneki pwukoahh en kakehlail, kamwahuwiala, kamohdi dahme ohla, kapwurehdo dahme salongala, rapahkinirail akan me salongalahr.28
Kauno pil mahsanih duwen me kin ale pweipweio “sohte mwahn kin nsenohki sihpw kan,”29 oh “soukohp likamw akan me kin pwarodohng kumwail ni mwomwen sihpw, a loalarail re uhdahn rasehng kidien wel kan.”30
Atail Silepen Sihpw Mwahuo kin kupwurpereniki ni ansou me kitail kin kapwaiada nsenatail ong ni kahrepe mwahu oh ni pwoson. Irail akan me mih nan sapwellime kehlo kin kapingki atail Sounkomour pwehki sapwellime tohnmeteio. Kitail inoukihda en idawehn Ih, kaidehn ni sohte kahrepe, duwehte aramas maskun, de “aramas sarohdi,” ahpw sang ni mohngiong oh lamalam unsek pwehn poakohng Koht oh mehn mpomw kan, sawasawaskipene wisik toutou kan oh pereperenpene pwehki en aramas arail peren kan. Duwehte Krais ah ketin mahsenih me kupwure me iei kupwur en Sahmo, ni aktikitik ktail pil aleiehng pein kitail Mware. Ni popohl kitail kin men iang patehng sapwellime doahdoahk en kapilpene oh papah sapwellime Koht seri koaros.
Riei ohl oh lihoko, Sises Krais wia atail Silepen Sihpw Unsek. Pwehki eh ketin meirongkihla Sapwellime mour ong kitail oh met E iasadahr kin klohri, Sises Krais pil wiahla Sihmpwul unsek en Koht.31
Mie kokohp duwen meirong en Sihmpwul en Koht sangete tepin kawa. Tohnlengo kawewehiong Adam duwen ah meirong “iei karasaras en meirong en Iehros en Sahmo,” me pahn luke kitail en “koluhla oh kapakapohng Koht ni mwaren Naho sang met kohla.”32
Sahm Eipraam, me tepin koasoanehdi kapai en inou sarawi kan ong wehin sampah kan koaros, kehnehr ia wehwehn meirongki nah iehroso.
“Aisek ahpw idek rehn seme Eipraam, ipa! A e ahpw sapeng, Dahmwo samwa? E apw nda, I kilikilang samwit en kisiniei oh tuwien meirong kat, a ia sihmpwul mehn meirongen …?
“Eipraam sapeng nda, Samwa, Koht pahn pein ketikihda kisin sihmpwul.”33
Wahnpoaron oh soukohp en mahs ako esehier oh inenen perenkihda doadoahk en Sihmpwul en Koht me koasoansoandier mwohn sampah. Sohn sang Sapwen Kawa oh Nihpai sang Sahpw Kapw kadehdehda duwen “Sihmpwul en Koht,”34 “ei, iangahki Sapwellimen Koht[,] … Sounkomour en sampah.”35
Apinadai kadehdehda Sapwellimen Krais tomwo: “Kitail koaros, sou duwehte sihpw, me kin salongala; ememen kitail kin sohpeila ni pein nsenatail; oh Kauno meirongkilahr pein Ih pwehki [dipen] koaruhsie.”36 Alma kahdanki meirong lapalap oh kaimwiseklahn meirong en Sapwellimen Koht “me keieu kesempwal sang koaruhsie.” Alma koangoangehkin kitail en, “Pwoson Sihmpwul en Koht”; “kohdo oh dehr masak.”37
Mie kempoakepahi men ehukiengie duwen ah kadehdehn Tomwpen Sises Krais eh keirda reh. sang ni ah tikitik kohda e iang kamehlele me dihp kin kahreda kalokolok laud, oh kitail anahne lokolongki kelehpw. E peki ni ngidingid rehn Koht en wewehki duwen eh kak alehdi lapwepen dipe sang Reh. E kapakap pwehn ese ia mwomwen Sises Krais ah kak mahkehng irail akan me kin koluhla, ia mwomwen kalahngan ah kak apwaliala pwuhng.
Ehu rahno ah kapakapo ahpw pasepengla ni wekidalahn pali ngehn. Pwutak mas duhpek men tangieidohsang nan sdohwahu wah ehd en mwonge riau. E tangieila nan ahl me diren sdohsa oh aramas, kaun en sdohwahu pwakiheila oh koledi, apw tepda werwer oh pepeieng. Ahpw lih menet sohte kadeik pwutak menet inda me e lipirap, ahpw e direkihla loale uwen ah inenenen poakehla pwutak menet. E sohte masepwehk de pil pwunodiki dahme pahn wiawiheng, e inenlahngete ohl riemeno me akahkamaiko. E pwuriamweikihla pein ih ah nda, “I pahn pwain mwonge kan. Menlau kadarala. Menlau mweidehngie ien pwainla kene mwonge kan.”
E alehdi pepehm sang Ngehn Sarawi oh dirkihla limpoak me e sohte kin kehn mwoweo, E nda, “Ihte me I men wia sewese oh kapitala mwahnakapw meno.” Kempoakepahio koasoia me e tepda wehwehkihda Sises Krais oh Sapwellime Tomwo—ia mwomwe oh dahme kahrehda Sises Krais, sang ni sapwellime limpoak unsek, kupwurki tohnmeteikihla pein ih pwehn wiahla eh Sounkomour oh Soundoar, oh dahme e pwungkihki.38
Ihme kitail koulki koul wet:
Kilang, Silepen Sihpw mwahuo wie raparapahki,
Raparapahki sihmpwul me salongalahr ko,
Kapwureiraildo ni ar wie pereperen,
Poadoandoarala ni uwe ieu me sohte kak kapwungpwungala.39
Ni eh wia Sihmpwul en Koht, atail Sounkoumour ketin mwahngih ansou me kitail kin pehm kelehpw, wiemwahlla, peikasal, de masak. En Nihpai eh kilangada nan kasansalo, E kilangada manaman en Sihmpwul en Koht “kohdi pohn souleng kan en mwomwohdiso en Sihmpwulo, oh pohn Sapwellime aramas me kin wiahda oh kapwaiada ar inou kan.” Mendahte “arail mwarahkpeseng nin sampah pwon … re kin kehlki pwung oh manaman en Koht ni lingan lapalap.”40
Inou en koapworopwor oh koaloalomwahu wet kin duwduwehte sangete mahs.
Kowehte me tohn Mwomwohdiso nan ahmw peneinei, de skuhl, de doadoahk, de nan wasahn kousoan? Mie ansou me ke medemedewe me tohn ahmw prahns nohn malaulau de ahmw prahs kelkelehpw? Ke iangehr kesoula wasa kapw, mwein soahng koaros kapwehng uhk ni lokaia oh tiahk kan? Mwein ele koasoandi en ahmw mour wekila, oh ke uhd lellahng mehkan me ke sohte medewe kak wiawi ong uhk? Atail Sounkomour inoukihong kitailehr me sohte lipilip wasa kitail mihie, dahme atail kahpwal akan, sohte lipilipil ihs kitail: “E pahn ketikipene sihmpwul kan, e pahn ketin apwalihkin irail ni keneinei, oh e pahn ketin kahre inarail kan ni keneinei.”41
Riei ohl oh lihoko, atail Sounkomour kin malipehkin kitail Kapitie oh ni Mware. E kin ketin rapahki, kihpene, oh kin ketido rehn Sapwellime aramas akan. Kauno kin ketin luke kitail sang rehn sapwellime soukohp ieias akan oh kitail, E ketin luke koaruhsie en kohdo oh diar meleilei, kahrepe kan, kamwahula, oh popohl nan Sapwellime rongamwahu me kapwurpwurdo oh pwuredohng nan Sapwellime ahl en inou. Sang ni karasaras, E ketin padahki silepen sihpw en Israel ko ren kin papahki Sapwellime limpoak.
Pwehki Ih me Sihmpwul en Koht, Sapwellime pwukoah sarawi koasoansoandier mwohn mour wet oh wahnpoaron oh soukohp akan pereniki mehlel. Sapwellime Tomw, me poatoapoat oh sohte imwi, me keieu kesempwal nan pilahn en peren oh kahrepen kapikpikdao. E ketin inoukiong kitail me sohte lipilipil iren mouratail kan, E kin ketin kolokol irail karanihte Sapwellime mohngiong.
Rieiko, kitail en ahniki ineng en “idawehn Koht oh Sihmpwulo ni karakarahk,”42pwe edetail en iang intingdi nan sapwellime pwuhk en kamouro,43 oh koulki koul en sihmpwulo,44 kitail en iang luhkieng ni Sapwellime kamadipw.45
Nin duwen Silepen Sihpwo oh Sihmpwulo, E kin ketin malipei kitail, en Sapahldo “nan marain mehlelo … nin duwen [amwail] Soundoar, … [amwail] silepen sihpw lapalap oh mehlel.”46 E ketin inoukier me “sang ni Sapwellime kalahngan kitail pahn kak en uhnsekla rehn Krais.”47
Nan Ihster wet, kitail kepinga Ih:
“Ihme wia Simpwulo!”48
“Ohsahna ong Koht oh Sihmpwulo!”49
I kadehdehki Ih, atail Soun Epwel Sihpw unsek, iei Simpwul unsek en Koht. E ketin malipei kitail sang ni adatail kan, ni Mware—iei mwar sarawi en Sises Krais—ahmen.