Kupwur Sapan en Koht
Mendahte atail wie awiawih kupwuren Kauno, miehte kapai kei me kin mwadangete kodohng kitail.
Sounpar kei samwalahro, nei pwutak me sounpar limwahuo kohdo ih pakairihengie dene, “Ipa, I esehdahr mehkot iou. I diarada me wehwehn ekis keieng ohng uhk inenen werei ong ie.”
Ni ansou me Kauno de Sapwellime ladu kan kin mahsanih, “mwurin rahn ekei” de “ansouo kerendohr,” e kak wehweki ni imwin mour wet de mwuri.1 Sapwellime ansou, oh pali lauden Ah ansou, kin weksang atail. Kanengamah me keieu kesempwal. Ma sohte, kitail pahn kin sohte kak kalaudehla de kasalehda atail pwoson Koht ohng nan atail mour oh komourpatail. Ahpw ahi irehn rahnwet me iei, mendahte atail wie awiawih kupwuren Kauno, miehte kapai kei me kin mwadangete kohdohng kitail.
Ansou me Alma oh nah aramas kan kolkoldier pahn mehn Lehmen kan, irail kapakapki irail en pitila. Irail sohte mwadangete pitila, ahpw irail kanengamah awiawih ansouo, Kauno kasalehieng irail Sapwellime kupwur mwahuo sang kapai me mwadangete pwarada kan. E madangete kamwuterekihla mohngiong en irail mehn Lehmen kan pwe re dehr kemei irail la. E pil ketin kakehlakahda nein Alma aramasko oh kamarahrahda arail mehn wisik toutou kan.2 Ansou me irail pitilahro, irail seiloakla Serusalem, wasa irail kosoaia dahme irail lelehng pwehn kepwuriamweihda pokono. Aramas en Serusalem kan pwuriamweikihla, oh “ih ansou me irail mwadangete medewehda kalahngan en Koht, oh sapwellime manaman ah kak kapitala Alma oh riehko sang nan ... kahpwal, irail eri werwerkihda oh kalkalahngan ohng Koht.”3
Sapwellimen Koht kupwur sapan kin kohiehng koaros me kin likweriohng ih ni ineng mehlel oh mohngiong pwuhng. Met me wehwehki irail kan me kin likweriohng ih ni ineng mehlel, me kin ahneki koapwoaroapwoar nan ansou apwal kan.
Duwehte soukohp pwulopwul men me wia lokolok laud nan imweteng rotorot lao e werkihla: “Maing Koht ia komwi?... Ia uwen reirei en omwi pahn mweidohng ie ien lokolok … ? Ei , Maing Kaun, Ia uwen reirei … ?”4 Ni pasapengpe, Kauno sohte kin mwadangin kapitala Sohsep, ahpw E ketin mwadangete ketkiheng meleilei.5
Kauno kin mwadahngete ketkiohng kitail koapwoaroapwoar pwe kitail en kin maiausang atail apwal kan.6 Sohte lipilip dah, sohte lipilip ia wasa, ansou koaros mie koapwoaroapwoar rehn Krais.7 Kin mwadahngete kohdohng kitail.
Oh pil, kitail kolokol sapwellime inou, “Ahi kadek pahn sohte kak sohrasang kumwail.”8
Me keieu kesempwal sang koaros, Sapwelimen Koht limpoak me kin madahng. I kapatahiong ahi kadehde rehn kadehdehn Pohl me mahsanih, “sohte mwahn mehkot kak irehdihsang kitail ni limpoak en Koht me kitail ahneki rehn Krais Sises.”9 Dipatail kan kin katohreikitailsang Sapwellime Ngehno erein ahnsou kis, ahpw, e sohte kak douluhl kihsang kitail sapwellime limpoak poatoapoat.
Mepwukat wia ekei wiepe oh wehwehpe sang ni “ah kin ketin kalapw ketkidohng [kitail] kapai.”10 Met, pwehn wahdo padahk kan en rahnpwukat oh pwehn kairkihla, I ehukiheng kumwail me momour en aramas riemen pwukat kohsang ni kadehdepen kupwuramwahuh en Koht.
Sahngete ni ansou me e wia serepein pwulopwul men, Elimie kin luwetki mehn kalitopw kan. Ni ah kin song mehn kalitopw e tepda ahnla, karehda ah kin sohte kak powehdi erein pahr tohto, oh ekei pak e kin mwahula. Emilie kin wie ekieki eh kahpwalo, ahpw ni mehlel mwurin ah pwopwoudila oh wiahla nohno men.
Ni tepin ah song en uhdihsang soang pwukat, udahn e wia mehkot kahpwal ohng ih. Mie pak, Emilie ale keseun soumwahu, ahpw e saliokda, e mihmier nan ambulance kokohlahng imwen wini torohr en wasahn apwalih soangen soumwahu me nohn doahro. E tepida salohda ni ah kin medewe me e pahn dohsang nah seri kan, ah pwoud, de nimweo.
Ehu pwohngo, ni ansou me e kelikelepw , nan ah kisin pere rotoroto, Emilie apw kospene pohn ah pehto oh tepda sengiseng. Kahrepehko tikitiklahr lau met, e pwunodadahr, maspwehk oh kehn wen rotorot en nan pereo oh wen luwet en pali ngene, Emilie medewe me e pahn mehlar pwohngo. Kelekelehpw.
Nan soangen ansou apwal wet, Emilie ni wen ah kak koaros e pwourda oh kelepwikihdi. E sohte koaskoasoansoan duwehte aht kin kapakap mwowehsango, e mweidohng Koht ah mour oh peki ni ngidingid, “Maing Koht, I anahnei komwi. Menlau seweseie. I sohlar men kelepw. Menlau mweidohng ie ien koanoahdi lakapw.”
Oh ansouohte, duwehtehte dahme Sises wiahiong Pitero, e kapahla nin lime oh pwokada.11 Ansouohte Emilie meleileidi, kehlailda, insenamwahuier, oh limpoak. Nan pereo sohlar lemwulemwur, e wehwekidahr me e sohte kelikelepw, oh edin eh kehn sangete ni eh sounpahr eisek pahieu (14), me soahng koaros pahn mwahu. Ni ah “pwourdahr rehn Koht,”12 Emilie meirla nan meleilei. Oh Ih duwen “ma kumwail pahn koluhla oh kamwuterekala amwail mohngiong kan, sapwellimen Kauno pilahnen komouro pahn pweida rehmwail.”13
Mwurin ahnsou werei Emilie ahpw mwahula oh powehdi soahng koaros—sounpwung kei e kin ale mehn kakehlail, e kin iang kaiahn, oh ale kaweid, oh erein ansouo e kin kak kehn sapwellime kupwursapan kan. Oh sapwellime kupwur sapan ieiangih oh lau lel ah iang ah pwoud oh nah seri riemen pidolong nan tehnpas sarawi pwe rehn kak katengtengpene kohkohlahte. Duwehte mehn Zarahemla ko, Emilie kin tamanda kupwur sapan en Koht oh sapwellime manaman me e kapitkihsang ih nan ah apwal e kin inenen pwuriamweikihla.
Met, I pahn uhd kosoiang kumwail duwen emen me ahneki pwoson laud. Nan Desempe 27, 2013, Alicia Schroeder kasamwoh kempoakepah riemen, Sean oh Sharla Chilcote, me pwaredohng ih ni sohte kasikpe. Sean, me wia en Alicia pisop, kiheng Alicia nah sehlo oh ndahng, “Alicia se poapoakeiuk, Menlau sapeng mahs telephone et.”
Mario, en Alicia pwoudo, me koakoahl. Ih oh neira seri kan mihmi wasa ieu me re mwemweitla ia iang dake skuter en nan sinoh. Lapalahn Aksident ieu wiawier. Mario uhdahn ahneki ohla laud, oh neira pwutak laudo me sounpar [eisek] 10, Kaleb, mehla. Ni ansou me Mario ndahng Alicia me Kaleb mehla, E inenen pwuriamweikihla oh nsensuwed me pali malaulahu kitail pahn ese. E pwupwudi. Pwehki e pwonkihla pahtou mwuledek, Alicia sohla kak lokaia de mwekid.
Pisop oh Sister Chilcote mwadangete tangalahng, pwokada, oh pwoalehdi. Re iangih sengseng oh nsensuwedkihla mehlel dahme wiawi ansouo. Eri Pisop Chilcote ndahng en mweidohng pwe en kiheng kapai.
Dahme uhd wiawi mwurin mwo e wia men kahlmeng mwahu ni atail pahn kin wewehki sapwellimen Sises tomwo oh sapwellime kupwur sapan. Pisop Chilcote, pwilkihdi pehko pohn moangeo oh, ni ngilen seng, e tepida lokaia. Alicia rohngada soang riau likamwete Koht me mahmahsenihong ih. Ni tep, E rong ede, Alicia Susan Schroeder. Mwuri e ahpw rong pisopo ah peki ni ngidingid manaman en Koht. Nan ansouohte—ngilen edehu sansalda oh manaman en Koht—Alicia direkihla meleilei, limpoak, oh kaloalamwahu, pil popohl kopwuriamwei meh sohte kak kawehwehda. Oh e sohte pwurehng kokohlahsang.
A met, Alicia, Mario, oh ara peneinei sohte udihsang arail sengsengki oh loaloidki Kaleb. E apwal! Ansou koaros me I kin lokaiahiong ira, Pilen mesen Alicia kin dirada oh e kin ndahng ie wen ah poakpoake oh loaloidki nah pwutako. Oh kin mihmiehte pilen mese ni ansou me e kin ndahngie mwomwen Kauno ah sewese ih en kak nsenamwahu, ni a tepte kasalehiong ih sapwellime kupwur sapan nan ansou me keieu anahne oh nannantihengete met ni koapwoaroapwoar laud en tuhpene ehu me “sohte kin kalapw pwarda pak tohto.”
I wehwekihda me mour wet ekei pak kin kiheng kitail apwal oh kapwunod, ihme kahrehda ah kin apwal ohng kitail en kin alehdi de kasawihda soangen sawas nan atail mour duwehte Emilie oh Alicia. I lelehngehr soahng kei. I kadehdehki, nan soangen irair pwukat,Sapwellimen Koht Kupwur Sapan me kin ketkiohng kitail. Taman, mehn Israel mahso, sapwellime kupwur sapan me kin “doandoareirail”14 rahn koaros.
I kadehdeki me Sises Krais wia Soundoar, oh ni Mware, ma kitail pahn sopeilahng Ih ni ineng mehlel oh ahneki kahrepe pwuhng nan atail mohngiong kan, E pahn doaroeiukasang soahng koaros me kin songen kawehla ahmw mour de ahmw peren. Sapwellime poadoandoar ekei pak kin pwand sang me ke kasik—kak erein mour wet de reireisang. Ahpw, pwe ke en kak nsenamwahu, kakehlail, peren, oh ahneki koapworopwor, pwehn kak utuhng kumwail oh kakehlakeikumwail laou lel rahn en komourala, I ndahiong kumwail oh kadehdehki me sapwellime kupwur sapan uhdahn pahn lel ohng kumwail ni mwaren Sises Krais, Amen