2010–2019
Kilanglahng Sises Krais
Kapokon Lap en nan Epreil 2019
2:3

Kilanglahng Sises Krais

Sang Elder Kim B. Clark

En Isiakan

Ma ktail pahn kilanglahng Sounkomouro, E pahn sewese kitail en momourki atail inou kan oh kadaiala atail malipilip en elder en Israel kan.

Ni en Sises ah ketketseli pohn ahlo limwahn Kapernaum1 kiden aramas kapelpene Ih, lih emen me tungoalenki soumwahu doar ehu erein sounpar 12 ahpw pengla oh sair ni imwin Sapwellime likouo. Ni ansouhote liho pa kehlailda.2

Pwuhk Sarawi mahsanih me Sises ketin pehmada “kisin [manaman] kis kohsang Reh”3 “e ahpw ketin sohpeiseli nan pokono”4 oh “ketin mahsenseli … pwe en mahsanih ihs me wiadahr meo.”5 “A liho, nan eh ese dahme wiawihong,”6liho “poardiong mwohn aluweluwe oh, patohwanohng Sises mehkoaros.”7

Sises eri mahsanihong liho “Nei serepein, omw pwoson me kakehleiukada. Eri, kohkohwei ni popohl.”8

Sises Krais ketin doarehlahr liho. Liho kehlaildahr, ahpw ni en Sises eh mahsenlahng ih, liho kasalehda eh tungoal pwoson Ih oh E ketin kakehlada ah mohngiong.9 E mahsenlahng liho ni limpoak, kehsehki liho Ah ketin pwungkilahr, oh kapaiekihda liho Sapwellime popohl.10

Riei ohl oko, ni atail alehier prihsduhd sarawi, kitail kepwukoakidier doadoahk en komour. Nan kaimwseklahn pahro Kauno ketkihong pwukoahn kaukaweid doadoahk wet pohn irail elder kan en Israel.11 Kitail tungoalenkidier pwukoa sarawi ehu sang Kauno—en patehng riatail lihakan, wia doadoahk en sawas ni mwomw sarawi kehlail, kamwadangala kapokonpenehn mehn Israel nan mour wet oh rehn me melahr akan, koasoanehdi nan imwatail kan en wiahla wasahn kakairada pwoson oh kasukuhlki rongamwahuo, oh kaunopada sampah ong Ketdo Keriau en Sises Krais.12

Sounkomouro kasalehiong kitailehr ahlo nan mehkoaros: kitail anahne kilanglahng oh papah Sises Krais ni E kin ketin kilanglahng oh papah Semeo.13 Sounkomouro mahsanih duwen met ong Soukohp Joseph:

“Kilangdohng ie nan madamadau koaros; dehr peikasal, dehr masak.

“Kilang lipwen ohla ni pengpengeiet, oh pil lipwen metehkan nan pehi ka oh paten nehi kat; ahneki pwoson kolokol ahi kosonned akan, oh ke pahn sohsohki wehin nanleng.“14

Nan mour mwohn mour wet, Sises inoukihong Semeo me E pahn wia kupwuren Semeo oh wiahla atail Sounkomour oh Soundoar Ni en Semeo eh keinamwe, “Ihs me I pahn poaronehla?15 Sises ketin sapengki:

“Iet ngehi maing, Komw ketin poaroneiehla.”16

“Semei, kupwurahr en pweida, oh klohri ong Komwi kohkohlahte.”17

Nin doken Ah ieias pohn sampah Sises ieiaski inouo. Ni karakarahk, ohpampap, oh limpoak E padahngki Sapwellimen Semeo padahk oh wia Sapwellimen Semeo doadoahk ni manaman oh mweimwei me Semeo ketkiongehr Ih.18

Sises ketkihda Sapwellime mohngiong unsek ong Semeo. E mahsanih:

“I poakohng Sahmo.”19

“I kin poaden wia mehkan me kin kansenamwahui ih.”20

“I kohdihdo … pwe I en kapwaiada kupwur en [Semei] me ketin kadariehdo.”21

Nan Sapwellime eimwoalu nan Kedsemeni E ketin loulou mahsanih, “Ahpw soh, kaidehkin nsenei pwe kupwuromwihte en pweida.”22

Ni ansou me Kauno ketin mahsanihong elder kan en Israel en “sohpeidohng ie nan madamadau koaros” oh “kilang ohla kan” ni Kalepe me iasadahro, met wia likiwer ehu en sohpeisang dihp oh sampah oh sohpeilang Ih oh poakoang, oh peikong Ih. Met wia malipilip ehu en padahngki Sapwellime padahk kan oh wia Sapwellime doadoahk nin duwen Kupwure. Met pil wia malipilip ehu en liki Ih ni unsek, tohnmeteikihla atail anahn kan oh kauwalahng Ih atail mohngiong kan, oh pwehki Sapwellime manaman en komour duwehla Ih.23

Riei ohloko ma kitail sohpeilang Sises Krais E pahn ketin kapai kitailda pwehn wiahla Sapwellime elder kan nan Israel—karakarahk, ohpampap, aktikitik, direkihla Sapwellime limpoak.24 Oh kitail pahn wahdo popohl oh kapai kan en Sapwellime rongamwahuo oh Sapwellime Mwomwohdiso ong atail peneinei kan oh riatail ohl oh lih akan nan mour wet oh ong me melahr akan.

Presiden Russell M Nelson panginkinkitailehr en sohpeilahng Sises Krais nin duwen mwohmw wet: “E sohte mengei aramas en wiahkintehieu wiahla tohpadahk kehlail kei. Kitail anahne katengetengdi ong Sounkomouro oh Sapwellime rongamwahuo. E wia mehkot apwal en medemedewe Ih nan atail madmadau koaros. Ahpw ni atail kin wia met, atail peikasal kan oh masak koaros kin sohrala.”25

Kateng wia koasoi kesempwal ehu. E wehwehki katengetengdi kehlail, pwehn ale oh koledi ni unsek.26 Kitail kin katenge kitaildi ong Sises Krais oh Sapwellime rongamwahuo ni atail kin momourki atail inou kan.

Ni atail kin momourki atail inou kan, atail koasoi oh wiewia kin wekila. Kitail kin momourki mour en inou ehu27 me direkihla mwekid mengei en pwoson Sises Krais; kapakap sang atail mohngiong unsek ni Mware wadek oh douloali Sapwellime mahsen, sohpeilahng Ih pwehn koluhkihla dipatail kan, kolokol Sapwellime kosonned akan, aliahle kamadipw sarawi oh wawauneki Sapwellime Rahn Sarawi, kaukaudok nan Sapwellime tehnpas sarawi kan ni uwen atail kak koaros, oh wie doadoahngki Sapwellime prihsduhd sarawi pwehn papah seri en Koht kan.

Mwekid en wawauneki inou kan kin langahda atail mohngiong kan oh atail lamalam kan ong manaman en komour en Sounkomouro oh manaman en kenkenla sang Ngehn Sarawio. Ekis ekis Sounkomouro kin kawekala atail mour, kitail eri weliakapwala ong Ih oh atail inou kan kin wie momour nan atail mohngiong kan.28

Inou kan me kitail wiahieng Samatail Nanleng wiahla inou tengeteng kei me kitail keieu anahne. En Sahm Nanleng inou kan kin audehkin kitail kalahngan oh popohl.29 Atail inou kan solahr wia kosonned kei me kitail kin idawehn ahpw wiahla koasoandi kaselel kei me kin kamarain oh kahluwai kitail oh katengehdi atail ehuehng Sises Krais.30

Mwekid en poadidi pwukat wie langalang ong koruhsien, me pwulopwul oh me mah. Mehkoaros me I ndahier pwongpwohngwet doke kumwail mwahnakapw pwulopwul kan me kolokol Prihsduhd en Aron. I kaping kalahngan ong Koht pwehki kumwail. Kumwail kin pahkihda tiahk sarawi oh inou kan ong rar kei en Souleng en Imwin Rahn akan wihk koaros. Ni amwail kin kaunopada, kapakapki de waseli kamadipw sarawi; sewese; pepdais nan tehnpas sarawi; luke emen kempoakepamwail ong ehu kemwekid; de doarehla emen tohn amwail pwihn en utuht, kumwail kin wiewia doadoahk en komour. Kumwail pil kak sohpeilahng Sises Krais oh momourki amwail inou kan rahn koaros. I inou kihong kumwail me ma kumwail wia met, kumwail pahn wiahla sounpapah likilik kei en Kauno met oh, ni ehu rahn kohkohdo, iangala elder en Israel kehlail kan.

Rie ohloko, I ese me mepwukat ele mwomwen apwal. Ahpw tamataman mahsen pwukat en Sounkomouro “I sohte kin kelkelehpw, pwe Sahmo kin ieiang ie.”31 Eri met pil duwehte kitail. Kitail sohte kelkelehpw. Kauno Sises Krais oh Samatail Nanleng kin ketin poakoahng kitail, oh Ira kin ieiang kitail.32 Pwehki Sises ketin kehleki Semeo oh kapwaiada tohnmetei lap en tomwo ihme kitail kak sohpeikilahng Sises Krais ni koapworopwor me E pahn ketin sewesei kitail.

Sohte emen kitail me unsek. Ekei ansou kitail kin sohla kakala. Kitail kin loalmasarangda de mwarosala. Kitail kin dipekelekel. Ahpw ma kitail kin ehukiheng Sises Krais mohngiong koluhla ehu E pahn ketin pwengkitailda, kamwakeleikitail sang dipatail kan, oh kakehlailiada atail mohngiong kan. E me kanengamah oh kadek; Sapwellime limpoak en komour kin poatopoatete oh sohte kin uhdi.33 E pahn ketin sewesei kitail en momourki atail inou kan oh kadaiala atail malipilip duwehte elder en Israel kan.

Oh Sahmo pahn ketin kapaiekinkitailda mehkoaros me anahnepe mie pwehn kapwaiada Sapwellime doadoahk: “mehkan … nanleng oh pohn sampah koaros, mour oh marain, Ngehno oh manaman, me pekederdo pwehki kupwuren Sahmo rehn Sises Krais, sapwellime Iehroso.”34

Ni en marain sarawio oh manaman kin audehla nan atail mour kan manaman silu pwukat kin wiawi:

Keieu, kitail kak kilang! Sang ni kaudiahl kitail kin tepda kilang nin duwen en Sises ketin mahsanih liho: daulih mas liki lel nan mohngiong.35 Ni atail kin kilang nin duwen en Sises ketin mahsanih, E kin ketin kapaikitailda en poakoahng irail kan me kitail kin papahki Sapwellime limpoako. Pwehki Sapwellime sawas, irail kan me kitail kin papah pahn kilang Sounkomouro oh pehm Sapwellime limpoak.36

Keriau, kitail wie kolokol manaman en prihsduhd! Kitail kolokol mweimwei oh manaman en doadoahk ni mwaren Sises Krais pwehn “kapai, kahluwa, apwali, kakehlaka, oh kakehlailiada mehteikan oh kihda manaman ong irail me [kitail] poakoahng oh kolokol nsenamwahu en [atail] pwopwoud oh peneinei kan.”37

Kesilu, Sises Krais kin ketin ieiang kitail! Wasa kitail kohla ie, E kin ketla ie. Ni atail kin padahk, E kin ketin padahk. Ni atail kin kaloalamwahu, E kin ketin kaloalamwahu. Ni atail kin patohwanda kapai, E kin ketkihda kapai.38

Riei ohl oko, mie kahrepen atail pahn popohl? Ehi mie! Kitail kolokol prihsduhd sarawi en Koht. Ni atial kin sohpeilahng Sises Krais, momourki atail inou kan, oh katengehdi atail ehuehng Ih, kitail pahn iang riatail lih akan oh sawas kehlail, kihpene mehn Israel me mwerpeseng kan nan mour wet oh me melahr akan, kakehlailih oh katengeteng ong atail peneinei kan, oh kaunopada sampah ong Ketdo Keriau and Kauno Sises Krais. Ahpw e pahn wiawi. Iei duwen ahi kadehde met.

I kaimwsengkihla kapakap wet sang nan ahi mohngiong, me kitail koaros, koaruhsien, pahn kehleki Sises Krais nan madamadau koaros. Dehr peikasal. Dehr masak. Ni mwaren Sises Krais, ahmen.

Ire kan

  1. James E. Talmage dene Sises ketket “limwan Kapernaum” ansou me kakehlail wet wiawi (tehk Sises iei Krais [1916], 313).

  2. Tehk Luk 8:43–44; pil tehk Madiu 9:20–21; Mark 5:25–29.

  3. Luk 8:46.

  4. Mark 5:30.

  5. Mark 5:32.

  6. Luk 8:47.

  7. Mark 5:33.

  8. Luk 8:48.

  9. James E. Talmage ntingih me dahme liho kesempwalkihsang eh kehlaildaho iei en Sounkomour kadehdehiong ih dahme liho keieu anahne, me E ketin alehda en liho pwoson (tehk Sises iei Krais, 318). Sises kamwahula en liho soumwahu oh langahda palingen en liho ong nan elen komour.

  10. Epil katapan me Jairus, emen kaun nan sinakokeo, mihmi rehn Sises ansou me kakehlailo wiawi. Sises ketket kolahng ni imwen Jairus wasa me E pahn kamourda nein Jairus serepeino sang mehla. Lih me Sises kamwahuwiala ele lekdeksang nan sinakokeho pwehki en liho ah kohwa soumwahuo. Ni en Sises kamwahuiala lihi, E kasalehiong aramasko me mihmi wasao ni mehlel, iangahki Jairus, me liho wia serepein kempoake men, mia ah pwoson, oh me unsek ni paliwar oh palingehn.

  11. Tehk D. Todd Christofferson, “The Elders Quorum” (Liahona, Mei 2018, 55–58) pwehn koasoia duwen mwekid kapw kan me pahn wiahda pwihn en Melkisedek tehieu nan ehu ward. Kahrepen wekdeklaho kawehwehdahr nan wasa me Peidek kan me kin Kalap Wiawi en webste en Ministering: “Kolokol ehu Pwihn en Utuhut en Melkisedek Prihsduhd nan ehu ward kin kaminiminpene irail me kolokol prihsduhd pwehn kapwaiada doadoahk koaros me pid komour, iangahki doadoahk en nan tehnpas sarawi oh poadopod en peneinei me kin epwel sang kaun en pwihn en ahi prihs kan mahso” (“This Is Ministering: Frequently Asked Questions,” question 8, ministering.ChurchofJesusChrist.org).

    Wekdekla me wiawi mwuri uhd koasonehdi sounkaweid en missin nan ward oh kaun kapw en tehnpas sarawi oh poadopod en peneinei nan ward pan kaweid en presidensi en pwihn en utuht en elder kan. Pwehki sawas ong peneinei kan eh miher pahn arail kaweid, wekdekla pwukat koasonedier doadoahk en komour nan pwihn en utuht en elder kan. Mehlel, pisop me kolokol kih kan en doadoahk en komur nan ward kan, ahpw e kin kasau pwukoa pwukat oh manaman en doadoahk wet ong presiden en pwihn en utuht en elder kan pwe pisopo en kak ahneki ansou laud en apwali ah peneinei, kakehlailih me pwulepwul kan oh wia pwukoahn sounkapwung nan Israel.

  12. Tehk Russell M. Nelson, “Let Us All Press On,” Liahona, Mei 2018, 118–19; Russell M. Nelson, “Becoming Exemplary Latter-day Saints,” Liahona, Nop. 2018, 113–14; Quentin L. Cook, “Deep and Lasting Conversion to Heavenly Father and the Lord Jesus Christ,” Liahona, Nop. 2018, 8–12.

  13. Sahmo poaronehdo Sises Krais pohn sampah (tehk Sohn 17:18).

  14. Tehk Doctrine and Covenants 6:36–37.

  15. Tehk Abraham 3:27.

  16. Tehk Abraham 3:27.

  17. Tehk Moses 4:2.

  18. Mie nting tohto nan pwuhk sarawi me kadehde duwen mahsen kan me Sises ketin wiewia Sapwellimen Sahmo doadoahk oh padpadahngki Sapwellimen Sahmo padahk kan. Tehk ni karasepe, Sohn 5:19 (Sises ketin wia dahme E mahsanih me Sahmo ketin wia); Sohn 5:36 (Sahmo ketkihong Sapwellime Ieroso doadoahk me pahn wiawi) Sohn 8:26 (Sises padahngki dahme E ketin alehdi sang Semeo); Sohn 14:28 (Sapwellime padahk iei padahk me Semeo ketkihong Ih); 3 Nihpai 11:32 (Sises mahsani “Semeio lapalap sang Ie”).

  19. Sohn 14:31.

  20. Sohn 8:29.

  21. Sohn 6:38; pil tehk Sohn 5:30.

  22. Luk 22:42.

  23. Lepin lokaia kilang nan padahk wet (tehk Doctrine and Covenants 6:36–37) kolokol wehwe kei me kin peian malipilip en Kauno: pwehn kilang (de pirekekieng); pwehn kaweid emen; pwehn kehleki; pwehn rapahki; pwehn awiawi ni koapworopwor; pwehn medemedewe; pwehn kasik de awiawi (tehk “Look,” Merriam-Webster.com).

  24. Tehk Doctrine and Covenants 121:41–42. Wiewia me duwete en Krais me koasoiepe wiawi nan pwuhk sarawi wia kisakis kei sang Ngehno me kin wiawi pwehki mahk oh kalahngan en Sises Krais. Iei mepwukat me kahrehda elder kan nan Israel wiahla Sapwellime elder kei.

  25. Russell M. Nelson, “Drawing the Power of Jesus Christ into Our Lives,” Liahona, Mei 2017, 41.

  26. Tehk “Rivet,” nan Merriam-Webster.com.

  27. Pwehn wadek koasoipen koasondien inou en mour, tehk Donald L. Hallstrom, “Living a Covenant Life,” Ensign, Suhn 2013, 46–49. Ardikel wet alahldihsang ehu kasalada reirei me wiawi nan BYU--Idaho nan Mei en 2011. Pwehn wadek koasoio pwon, tehk Donald L. Hallstrom, “A Covenant Life” (Brigham Young University–Idaho devotional, May 10, 2011), byui.edu.

  28. Tehk Seremaia 31:31–33, wasa me Kauno kalohkihda me E pahn wiahda ehu inou kapw ong wehin Israel me pahn ntingdi nan arail mohngiong kan. Wiepen inou kan me kin ntingdi nan atail mohngiong kan, de inou kan me wie momour nan atail mohngiong kan, kin kak dierek nan en Pohl nting kan (tehk 2 Korint 3:3; Ipru 8:10). Pwehn wadek koasoiepen weliakapw oh mohngiong, tehk David A. Bednar, “Converted unto the Lord,” Liahona, Nop. 2012, 106–9.

  29. Kapakap en kamadipw saraw ong pilawao kasalehda ni mehlel mour en atail inou ong Samatail Nanleng. Nan en Sahmo koasoandien popohl kitail wiahda inou kan ong Samatail Nanleng ahpw kahrepe kan en inou pwukat kin sansalda oh ni atail warehng kapai kan me inoupe mie rehn atail Kaun Sises Krais: Ih me pil wia Sounkamwahu. Nan tiahk sarawi en kamadipw sarawi kin kadehde ong Sahmo (ni mehlel, kalipwelipwa atail inou ong Ih) me kitail pwungki ale oh pwekadahng pohtail mwaren Sises Krais, tamataman Ih ansou koaros, oh kapwaiahda Sapwellime kosonned akan, oh kitail en kolokol Sapwellime (Ngehn Sarawi) en ieiang kitail.

    Kisakis kan en Sahmo inou kan kin kohdo sang ni manaman en komour oh kakehlail en Sises Krais. Ni karasepe, Presiden Russell M. Nelson padahngkiher me, Sises Krais me wia utupen popohl koaros (tehk “Joy and Spiritual Survival,” Liahona, Nop. 2016, 82). Eri, katengehdi atail ehuong Sises Krais kin wahdo popohl nan atail mour kan sohte lipilipil atail irehkan.

  30. Presiden Ezra Taft Benson kawehwehda mwahu wekdeklahn wiewia wet oh kapehse ni eh koasoia, “Ansou me peik sohla wia mehkoat kapwang oh wiahla mehkoat kaperen, ni ansouohte Koht pahn kapai kitailda ki manaman” (nan Donald L. Staheli, “Obedience—Life’s Great Challenge,” Ensign, Mei 1998, 82).

  31. Sohn 16:32.

  32. Pwehn wadek ire kapatapat me pid en Sahmo oh Ieroso Ara ketin nsenokin kitail, pereniki, poakehng, oh apwahpwali atail mour kan, tehk Jeffrey R. Holland, “The Grandeur of God,” Liahona, Nop. 2003, 70–73; Henry B. Eyring, “Walk with Me,” Liahona, Mei 2017, 82–85. Pil tehk Madiu 18:20; 28:20; Doctrine and Covenants 6:32; 29:5; 38:7; 61:36; 84:88.

  33. TehkRom 8:35–39; 1 Korint 13:1–8; Moronai 7:46–47.

  34. Doctrine and Covenants 50:27. Tehk pwe Kauno kin ketkihong koaros me kasarawilahr oh kadarwohng inou wet me pid, oh kileledihong, soangen kepwukoa me kohieng ih:

    “Met duwehte me pilipildahr pwehn keieu lapalap, mendahte ih me keieu tikitik oh kin liduwe koaros.

    “Ihme kahrehda, ih me ahneki mehkoaros, pwe mehkoaros kin papah ih, nanleng oh pohn sampa, mour oh marain, Ngehno oh manaman, pekederdo sang ni kupwuren Sahmo rehn Sises Krais, Sapwellime Iehroso.

    Ahpw sohte aramas kak ahneki mehkoaros ihte ma e kin mwakelekella oh widewidsang dipe kan.

    “Oh ma kuwail kamwakeldahr oh widewidsangehr dipamwail kan, kumwail kak peki sohte lipilipil amwail anahn ni mwaren Sises oh e pahn pweida.” (Tehk Doctrine and Covenants 50:26–29).

  35. Tehk 1 Samuel 16:7; 1 Korint 2:14. Ehu karasaras en kapai en kilekilang duwen en Sises ketin mahsani, tehk en President Henry B. Eyring koasoiepen irair en ah wia pisop ong pwutak pwulepwul men me wiadahr dihp toutou ehu. Kauno mahsaihong Pisop Eyring, “I pahn mweidohng uhk ken kilang ih duwehte Ahi mahsani ih” (“Walk with Me,” 84).

  36. Iei inou oh doadoahk me Soukomouro ketkihong aramas akan ni tehnpas sarawi en Bountiful. E koangoangehkin irail en momourki Sapwellime marain oh Sapwellime karasaras pahn mihi rehrail, pwe irail en kak pwekada Ih pwehn kamarain sampa nan arail mour oh nan arial luhk kan ong mehteikan en kohdo Reh. NIn duwen Sapwellime tohnpadak kan arail momourki, oh nan arail luhk kan, mehteikan pahn pehm Ih oh kilang Ih rehn en Kauno ladu kan. (Tehk 3 Nihpai 18:24–25.)

  37. Tehk Russell M. Nelson, “The Price of Priesthood Power,” Liahona, Mei 2016, 68.

  38. Tehk Doctrine and Covenants 84:88.