Wasahn Kousoan Ehu me Ngehn en Kauno kin Koukousoan ie
Kumwail pahn diar amwail peren keieu laud nan amwail koadoahki amwail wasahn kousoan en wiahla wasahn pwoson Kauno Sises Krais oh ehu wasa me direkihla limpoak.
Riei ohl oh lih akan, I kaping kalahnganki ei pil iang lukehng I en koasoi ohng kummwail nan ke 189 en Kapokon Lap en Mwomwohdiso en Sises Krais en Souleng en Imwin Rahn akan. Rahn wet [Eipril 6] ahpw nan pahr 1830, Joseph Smith koasoanehdi Mwomwohdiso wet pahn kaweid en Kauno. Mwekid wet wiawi nan imwen peneinei en Whitmer limwahn Fayette, New York. Towe wenemen oh ele aramas 50 me iang mih mwo rahno.
I sehse dahme Soukohp Joseph nda de ia mwomwe ansou me e kesihnenda mwohn kisin pwihno, ahpw I ese dahme aramas pwuko me pwoson Sises Krais pepehm ni rahno. Irail kehn Ngehn Sarawi, oh irail pepehm me re mihmi wasa sarawi ehu. Irail uhdahn pehm me re wialahr ehu.
Ih soangen pepehm manaman wet me kitail koaros anahne en mie nan imwatail kan. Ih soangen pepehm me kin miehda sang, nin duwen en Pohl kawehwe, “nsenohki kapwaiada kupwur en Kauno.”1
Rahn wet I men padahngki dahme I ese duwen atail kak kalapw warohng ahneki soangen pepehmo oh luke en kin mihmi rehn atail peneinei kan ahnsou reirei. Nin duwen amwail esehier, met sohte mengei. Uhpene, pohnmwahso, oh dihp anahne kasohrala. Limpoak mehlel en Krais anahne mihla nan mohngiong en irail kan nan atail peneinei.
Adam oh Ihp, Lihai oh Sariah, oh pahpa/nohno teikan me kitail ese nan pwuhk sarawi diar me mewet inenen apwal. Ahpw miehte karasaras en peren en peneinei oh wasahn kousoan kan me kak kakehleikitailda. Oh karasaras pwukat kak kasalehiong kitail mwomwen eh kak pweida rehtail oh rehn atail peneinei kan. Kumwail tamataman dahme ntingdi nan 4 Nihpai:
“Oh e wiawiher me sohte uhpene nan sahpwo, pwehki limpoak en Koht me kin ketiket nan mohngiong en aramas akan.
“Oh sohte peirin, sohte pingiping, sohte mwoarong, sohte tiahk en nenek, sohte likamw, sohte kamaramas, pil sohte tiahk samin teikan, oh mehlel sohte pwihn en aramas ehu nanpwungen aramas akan me pein limen Koht ketin kapikadahr me kin peren duwehte irail.
“Oh sohte sounpirap oh sohte sounkam aramas, solahr mehn Laman kan de ehuehu keinek kan, ahpw irail wiahki ehu, serien Krais oh irail me pahn sohsohki wehin Koht.
“Oh irail meid pai! Pwe Kauno me ketin kapairaildahr ni arail doadoahk kan koaros. Ehi, irail pil kapaidahr oh pweidahr lao lel keimwisekpen sounpar epwiki-eisek oh dih keieu sang ketdo en Krais pil sohralahr, oh sohte uhpene wiawi nan sahpwo pwon.”2
Nin duwen amwail esehier, mwehi kapereno sohte doudoula kohkohlahte. Soai en nan 4 Nihpai koasoia duwen kahrepe kan me kahrehda luwetalahn palingehn en aramas mwahu pwukat. Met wia mwekid ehu me wiewiawiher rehn aramas koaros sangete mahs, nan mwomwohdiso kan, oh me keieu kansensuwed, nan peneinei kan. Ni atail kasukuhlki mwekido, kitail kak kilang mwomwen atail kak apwali oh ni mehlel kalaudehla pepehm kan en limpoak nan atail peneinei.
Iet mwomwen luwetala wet ah tepda mwurin sounpar 200 en arail momourki mour meleilei unsek me rongamwahuo kin wahdo:
Pohnmwahso tepda.
Aramas pwukat sohla sawaskihpene arail pai.
Irail tepda wiahki me ekei irail lapalap de tikitiksang mehteikan,
Arail pwoson Sises Krais tepda tikitikla.
Irail tepda kailongki aramas.
Irail tepda wiahda soangen dihp koaros.
Pahpa/nohno marain kan pahn kak tehkada mwekid pwukat ni arail pahn pwarada rehn tohn arail peneinei kan. Irail uhdahn pahn kin tetehk. Ahpw irail pahn ese me kahrepen mwekid pwukat kin tepsang rehn Sehdan me kin songosong en kahluwa aramas mwahu ohng dihp oh kasohrala manaman en Ngehn Sarawi. Eri, pahpa/nohno marain kan pahn kin tehk ansou mwahu pwehn kahluwa emenemen seri, oh pein irail en alehda en sapwellimen Kauno luhk en kohdo Reh.
Kumwail sohte kak pweida ni amwail pahn ndahieng seri men en koluhla oh sohla pohnmwahso. Kumwail kak song peki rehn seri kan en kin sapanpene nanpwungarail. Kumwail kak peki rehrail en sohla medewe me irail mwahu sang emen tohn peneinei. Ahpw kumwail pahn uhd lellahng soahngo me pwuhk sarawio kawehwehdier iei “Arail pwoson Sises Krais tepda tikitikala.”
Iet wiepen kahluwa amwail peneinnei pwehn kadaiala palingenarail ni uwe me kumwail mwahuki—oh kumwail en pil iang irail. Ni amwail sewesei irail en kakairda arail pwoson me Sises Krais iei Soundoaro, re pahn pil men koluhla. Ni arail koluhla, karakarahk pahn weliandi pohnmwahso. Ni arail tepda pehm dahme Kauno ketkihong irail, irail pahn men ehukihda ni soupeikasal. Uhpene pwehn ndandla de sansal mwohn aramas pahn sohrala. Kailok pahn pekeusla pwehki limpoak. Oh ni imwio, duwehte dahme wekidala sapwellimen Nanmwarki Pensamin aramasko, ineng en wia me mwahu pahn kalewehdi kasongsong en wiahda dihp. Sapwellimen Nanmwarki Pensamin aramas ko kadehde me irail “sohla inangih wiahda me suwed.”3
Eri, kakairadahn pwoson Sises Krais me kin tapiada kakehlailih palingehn me kin luwet nan amwail peneinei oh wasahn kousoan. Pwoson wet kin kalapw kahrehiong aramas en koluhla sang kaweid me kin uhwong mehn kaluwetala palingehn.
Keieu mwahu kumwail en kin wia mehn kahlemengi. Tohn peneinei oh mehteikan anahne kilang amwail keirda nan pein ahmw pwoson Sises Krais oh nan Sapwellime rongamwahuo. Kumwail apwtehn ale sawas laud. Pahpa/nohno kan nan Mwomwohdiso wet kapaikidahr mehn padahk kamarain ehu ohng peneinei kan oh emenemen. Ni amwail kin doadoahngki, kumwail pahn kakehlada amwail pwoson oh en noumwail seri kan arail pwoson Kauno Sises Krais.
Kekeirdahn Pwoson
Amwail pwoson Sounkomouro keirdahr ni amwail idahwen en Presiden Russell M. Nelson ah kehkehlik en pwurehng wadek Pwuhken Mormon. Kumwail kilelehdier irehkan oh koasoi kan me koasoia Sounkomouro. Amwail pwoson Sises Krais keirda. Ahpw, duwehte tuhke me apwtehn poadidi, amwail pwoson Sises Krais pahn sohrala ma kumwail sohte pahn koasoanehdi kumwail en douloalli oh kapakap pwehn kakairada.
Tohn amwail peneinei koaros kakete sohte kahlemengi keirdahn amwail pwoson ansou wet. Ahpw kumwail loallehdi dahme wiawihong Alma me nein Almao. Ni eh weikengkihla ah anahne koluhla oh ale mahk, e tamanda en eh pahpao ah pwoson Sises Krais. Noumwail seri kan kak tamanda amwail pwoson Sounkomouro ansou ehu me irail anahne koluhla. Alma ndahki songen ansouo mepwukat:
“Kedekedeo ni ei wie lokolok, I weikengkilahr ei tamataman dipei kan, I pil tamanda ei rong en ahi pahpao kokohp ohng aramas akan duwen ketdohn Sises Krais, Iehros en Koht, pwehn tomwiki dipen sampah kan.
“Met ni ahi tamanda ire wet, sang nan mohngiongi I ahpw werkihda: Maing Sises, komwi Iehros en Koht, ketin kupwurei ie, me patpato nan inondehn kahpwal, oh selkipenehr sahlmetehn mehla.
“Oh met, kilang, ni ahi medewehda mepwukat, I sohla taman ahi medek kan; ehi, I sohla lokolongki ahi tamada dipei kan.”4
Kapakap ni Limpoak
Me patehng amwail karasaras en keirda nan pwoson, amwail kapakap en peneinei kak kahrehiong amwail wasahn kousoan kan en wiahla wasa sarawi ehu. Emen aramas pahn kin pilipilda pwehn wiliandi peneinei kapakap. Ansou me kapakapo kin mehlel ong Koht oh e wiliandi aramas akan me kelepwikihdi oh rongorong, pwoson kin keirda nan loallarail koaros. Irail kak pehm arail poakohng Sahm Nanleng oh Sounkomouro. Oh ni ansou me aramas wie kapakapo pahn ndahla eden aramas akan me wie kelkelepwikihdi oh anahne sawas, koaros kak pehm limpoakpene nan peneineio.
Mendahte ekei tohn peneinei sohte iang koukousoan nan en peneineio wasahn kousoan, kapakap kak kakehlada arail limpoak. Kapakap nan peneinei kin kak lel wasa koaros nan sampah. Pak tohto I kin esehda me emen tohn ahi peneinei me doh kin wie kapakapki mehkot me I wie kapakapki ni ansouohte. Ohng ie, lepin kahs me dene “Peneinei me kin kapakapene kin mihmihpene” kak katehlapala oh uhd nda “Peneinei me kin kapakapene kin wie mihmipene mendahte arail dohpeseng.”
Padahngki duwen Koluhla Mwadang
Pwehki sohte emen kitail me unsek oh atail pepehm kin mwadang ohla, peneinei kan kak wiahla wasa sarawi ma kitail kin koluhla mwadang oh mehlel. Pahpa/nohno kak wia mehn kahlemengi. Kitail anahne koluhkihla mwadang oh ni mehlel koasoi kepweikeng oh lamalam suwed kan. Ndahte “menlau mahk” kak kamwahula ohla kan oh elehda mahk oh limpoak.
Soukohp Joseph Smith wia ehu karasaras mwahu ohng kitail ni eh kin apwalih kahpwal kan, aramas suwed kan, oh pil akupwung kan me pwarada nan ah peneinei. E kin mwadang mahk mendahte e ese me aramaso kak pwurehng wia suwediong ih. E kin peki mahk, oh e kin saledek en mahkohng aramas.5
Kakairada Ngehn en Doadoahk en Misineri
Sapwellimen Mosiah pwutangko koasonehdi me irail pahn kalohki rongamwahuo ohng aramas koaros. Ineng wet pwilisang arail koluhla. Irail sohte pwerieng medemedewe en ekei aramas arail pahn lokolongki dihp duwehte me irail alehier. Irail eri sohpai katohrohr, kahpwal, oh mwekid keper pwehn kalohki rongamwahu en Sises Krais ohng arail imwintihti kan. Nan mwekido, irail diar popohl rehn me tohto me koluhlahr oh pehmada popohl en ale mahk pwehki Tomw en Sises Krais.
Tohn atail peneinei kan pahn keirda nan arail men ehukihda rongamwahuo ni arail pehm popohl en ale mahk. Met kak wiawi ansou me re kin wiahda inou sapahl ansou me re ale kamadipw sarawi. Ngehn en doadoahk en misineri pahn keirda nan atail wasahn kousoan ni en seri kan oh pahpa/nohno kan kin pehm mahk nan kaudek en kamadipw sarawi. Sang ni arail karasaras en wahu, pahpa/nohno kan oh seri kan kak sewese emenemen en ahneki popohl. Popohlo kak wekidehng atail wasahn kouson kan en wiahla wasahn kasukuhliada misineri. Koaros ele sohte pahn wia arail misin, ahpw koaros pahn pehm ineng en ehukihda rongamwahuo, me kahrehiong arail alehier mahk oh meleilei. Oh mendahte re wiewia arail misin de soh, koaros kak ale popohl sang arail ehukihda rongamwahuo ohng mehteikan.
Pwarek Tehnpas Sarawi
Ohng Pahpa/nohno kan oh pil seri kan, tehnpas sarawi me wia wasa keieu mwahu en ale pepehm en perenkihda wasa kaselel me rasehngete nanleng. Met kin inenen mehlel ansou me seri kan pwulepwulte. Seri kan kin ipwikihdi Marain en Krais. lellte seri pwelel men kin kak pehm me tehnpas sarawi wia wasa sarawi ehu. Pwehki pahpa/nohno kan poakong neirail kisin seri kan, tehnpas sarawi kin kahrehiong arail kin koapworopworiki me re kak poakohng neirail seri kan nan arail peneinei soutuko—kohkohlahte.
Ekei kumwail kolokol kilel en tehnpas sarawi kan nan imwamwail kan. Ni en tehnpas sarawi kan arail wie tohtohla nan sampah, e mengei ohng pahpa/nohno kan oh arail peneinei kan en kin pwarek tehnpas sarawi kan. Ekei pil kak iang kapidelong en tehnpas sarawi kan ansou me re kokouda. Pahpa/nohno kan kak peidek rehn neirail seri kan duwen arail pepehm kan ansou me re kin karanih ehu tehnpas sarawi.
Pahpa/nohno koaros kak kadehdeki duwen arail pepehm en tehnpas sarawi. Presiden Ezra Taft Benson, me kin kupwurpereniki tehnpas sarawi kan, kin kalapw koasoia ah kin kilenglang en ah nohnou ah kin aini ah likoun en tehnpas sarawi.6 E koasoiahda ah tamataman ni eh wia kisin pwutak, ah peneineio mweselsang ni imwarail pwehn pwarek tehnpas sarawio.
Ni eh wiahla Presiden en Mwomwohdiso, e kin pwarek tehnpas sarawi rahnohte wihk koaros. E kin kalapw wia doadoahk en tehnpas sarawi ohng ah peneinei me mehlar ako. E wia met sang ni ah kin kahlemengi ah pahpa/nohno.
Ahi Kadehde
Kumwail pahn diar amwail peren keieu laud nan amwail koadoahki amwail wasahn kousoan en wiahla wasahn pwoson Kauno Sises Krais oh ehu wasa me direkihla limpoak. Kapwurpwurdohn rongamwahuo tepkihda peidek karakarahk ehu nan wasahn kouson karakarahk ehu, oh e kak wiewiawi nan imwatail kan ni atail kin peusehla koasoanehdi oh ideidawehn padahk en rongamwahuo wasao. Met iei ahi koapworopwor oh me I keieu pereniki sangete ei wia kisin pwutak men. Kumwail koaros kilangehr duwen wasahn kouson pwuko. Tohto kumwail kauwadahr, sang ni sawas en Kauno, soangen wasa pwuko.
Ekei soangehr ni mohngiong unsek, ahpw saikinte ale kapaio. Ahi inou ohng kumwail iei inouohte me emen tohn Pwihn en Wahnparon Ehkriemeno wiahieng iehier. I ndahieng me pwehki pilipil kan me ekei tohn aht peneinei laud wiadahr, I sohte kamelehle me se pahn kak ehupene nan mour kohkohdo. E nda, ni uwen ei kak tamataman, “Ke pwunpwunodiki mehkot me sohte konehng. Ke anahne ahmw mour en warehng wehin celestial, oh koasondien nan ahmw peneinei pahn kaselella ni mwohmw ehu me ke sohte kin medewe.”
I kamehlele me e pahn peusehiong ire kaperen wet ohng kitail koaros me wiahier mehkoaros me kitail kak pwe kitail oh atail peneinei en kak warohng mour soutuk. I ese me sapwellimen Sahm Nanleng koasoandio iei koasoandi en popohl ehu. I kadehde me Sapwellime koasoandio kin kahrehiong emenemen kitail me wiahier uwen atail kak koaros en kak katengetengehng atail peneinei kohkohlahte.
I ese me kih kan en prihsduhd me kapwurpwurdohng Joseph Smith kohsang reh kohieng emen kohkohdo lao lel rehn Presiden Russell M. Nelson. Kih pwuko me kahrehda peneinei kan kak katengtengpene rahn wet. I ese me Sahm Nanleng ketin poakohng kitail Sapwellime seri ngehn kan ni limpoak unsek. I ese me pwehki Tomw en Sises Krais, kitail kak koluhla, mwakelekelda, oh warehng momour nan peneinei limpoak rehn Sahm Nanleng oh Sapwellime Iehros Sises Krais kohkohlahte. I kadehdehki mehpwukat ni mwaren Sises Krais, amen.