Kakehlailih Atail Moaselen Pali Ngehn
Onopiki oh esehla duwen pwukel kan sohte itarehng en wiahda pwukel, wadwadek oh esiesehla duwen pwoson ahpw sohte doadoahngki sohte itarehng kalaudehla pwoson.
I kapingki kapai en palin war, me wia ehu kisakis lingan sang Samatail Nanleng. Palin waratail kan kolokolki pwukel 600 kei.1 Pali lauden pwukel kan anahne mwekmwekid pwehn kakehng doadoahk ni kemwekid en rahn koaros. Kitail kak onop laudki duwen atail pwukel kan nan pwuhk tohto, ahpw ma kitail pahn medewe met atail onopo pahn kalaudeiraila, kitail pahn mwoarosala. Atail pwukel kan kin keirda anhsou me kitail kin doadoahngki.
I diaradahr me palingenatail kin duwehte met. Irail kin anahne mwekmwekid pwehn kekeirda. Pwoson kaidehnte pepehm ieu de mehn nsenen aramas; e wia padahk en wiewia kan me kalapw pwarada nan pwuhk sarawi kan patehngete lepin lokaia koadoadoahk.2 Onopiki oh esehla duwen pwukel kan sohte itarehng en wiahda pwukel, wadwadek oh esiesehla duwen pwoson ahpw sohte doadoahngki sohte itarehng kalaudehla pwoson.
Ni ansou me I sounpahr 16, riei me laudsahng ie, Ivan, ni ahnsouo e soupahr 22, pwurodo nimwahto ehu pwohngo oh ehukiohng ahi peneinei rohng ehu. E piladahr me e pahn papidaislahr nan Mwomwohdiso en Sises Krais en Souleng en Imwin Rahn Akan. Aht nohno pahpa kilanglahng, mesen peikasalki, oh I taman ahi sohte nohn wehwehki dahme wiewiawi ansouo. Mwurin sounpahr ehu, E pil ehukihong kiht ehu rohng me kapwuriamwei: E koasoanehdier me e pahn wiahla emen misineri en Mwomwohdiso, met me wehweki me e pahn kohkohlahsang nimwato oh se sohte pahn kilahngki ih erein sounpahr riau. I taman wen ahi nohno pahpa pwuriamweikihla rohng wet; ahpw, I kak kilahng wen ah inangih me kalaudehla ahi kin ienen kapingki ih oh ah pilipil me e wiadahro.
Sounpwong kei mwuri, ni ahnsou me Ivan wiewia ah papahn misineri, I iang iengei tohn skuhl kei pilanehda aht mwemweit ieu. Se men wia aht kamadipw en aht pahn neksang high skuhlo oh se men wia met pohn oaroahro erein rahn kei..
I ntinglahng riei me wiewia ah misino, ndahng ahi pilahnen mwemweito. E sapengdo ahi ntingo nda me e wie papah, wasa me se keid ie kohla mwomweit. I ahpw koasoanehdi me e pahn mwahu ma I uhdi reh oh mwomweit reh. Ah mwuri I ahpw diarada me miseneri kan sohte kin mweimwei en tuhwong arail peneinei.
I koasoanehdier mehkoaros pwe I en kak tuwohng. I taman ahi wie mwomwohd nan poaso medemedewe soahng kaperen kei me ngehi oh Ivan pahn wia nan rahn kaselelo. Se pahn mwengehn nimenseng, koasoakoasoipene, mwadohng pohn pihko, dilin ketipin—uhdahn pahn kaperen aht rahno!
Ni ansou me poaso lel wasao oh peidi, I kilahng Ivan keskesihnen limwahnpwutak emen, ira koaros seht pwetepwet oh nekdahi. I doudihsang nan poaso, kiht pwoaloapwoalda, oh ih eri kapeseiohng ie iengeo. Wen ahi sohte men kangala ansou, I ndahng rieio ahi pilahn en rahno, ahpw I sasairki dahme Ivan koasoanehdier. E kilangdohng ie, kisin kouruhr, oh nda “Me mwahu! Ahpw, kitail anahne mahs kohla wasa kei. Ke men iang kiht?” I pwungkihda, pwe I leme me pahn mie aht ansou mwuri en mwomweit pohn oaroahro.
Rahno, se aluhki awa 10 samwa, I iangih rieio oh iengeo aluseli pohn ahl akan en kahnihmwo. I kin sireieng aramas ehu ehu rahn pwon. I rahnmwahuih aramas koaros mei saik tuhweng nan ahi mour. Se lokaiahng aramas koaros, letelet ni wenihmw en imwen aramas kei me se sehse, oh pil pwarek aramas kei me rieio oh iengeo kin padapadahk ohng.
Nan ehu wasa me se kohla ko, rieio oh iengeo wie padpadahngki duwen Sises Krais oh Sapwellime pilahn en komouro. Nan Padahko, Ivan uhdi oh kilehngdohngie. I nurki, ah peki rehi ma I kak ehuki dahme ahi iren madamadau duwen dahme ira wie padpadahngkio. Nan ihmwo wiahnkintehio mehleileidi, koaros kilkilehngdohng ie. Ni tepida I mwuhr apwalki, I lao medewe dahme I pahn nda, I ahpw ehukiohng irail ahi pepehm kan me pid Sounkomouro. I sehse ma dahme I ehukidahu pwuhng de sapwung. Rieio sohte kapwungiehla; ahpw ihme e wia, e kapingkiohng ie ahi kak ehukihda ahi madamadau oh pepehm kan.
Nan erein ahi ieiang irao, rieio oh iengeo sohte pak ehu ira sohpeido rehi oh padahk ohngiehte , ahpw mendahte mwo, soahng tohto me I wewehkihla duwen rongamwahu laudsang aht kin wie koskosoipene mwoweo. I iang dehdeki uwen tohtohn me wekidekla sang ni arail alehdi kamarain en pali ngehn ohng nan arail mour. I kilang mwomwen ekei arail diar koapworopwor sang nan ara padahk ko, oh I koledi mwomwen ahi pahn sewese mehteikan oh tounmeteikihla pein ahi ineng kan. I wiewia dahme Sounkomouro padahngki “Mehmen me men idawehniehdo, en tounmeteikihla pein ih.”3
I kin tamanla ahnsouo, I tehkada me ahi pwoson keirda rahno pwehki rieio kiheng ie ahi ansou mwahu en kasalehda ahi pwoson. I koadoadoahkih sang ni aht wadek nan pwuhk sarawi kan, rapahki aramas pwehn padahk ohng, wia ahi kadehde, papah meteikan, oh pil soahngkei. Se sohte pweila dilen ketipin rahno, ahpw ahi mohngiong direkihla marain sang nanleng. I sohte douluhl kilangedi ehute kisin pihk kis en ni oaroahro, ahpw I kehn me ahi pwoson keirda duwehte kisin weren kadiring kis.4 I sohte mwemweit nan rahn kaselelo duwehte sounseiloak men, ahpw diren soahng mwahu kei me I koledi, oh sohte tehk me, I wia misineri men—nan ahi saikinte wiahla tohn mwomwohdiso wet!
Ansou mwahu en kakehlailiala Moaasel kan en Pali Ngehn.
Kalahngan en Kapwurupwurdohn Rohngamwahuo, met kitail kak wehwekihda ia mwomwen Samatail Nanlehng Ah pahn sewese kitail en kalaudehla koahiek en pali ngehnitail kan. E uhdahn pahn kin kiheng kitail ahnsou mwahu en kak pein koadoakihada kisakis pwukat kaidehn Kauno pahn audahte ketkiheng kitail ma kitail sohte kin nantieng ni pali ngehn oh paliwar. Ma Ngehn Sarawi ketket rehtail, kitail pahn kak esehla kasawiada ahnsou mwahu kan oh ahpw mwekidki.
Ma kitail pahn nantiong kanengamah, ele mwein kitail pahn diarada me ihme kitail anahne en esehla kankanengemah ni ahnsou me kitail wie awiawi pasepeng. Ma kitail men ese ia mwomwen atail pahn kalaudehla atail poakohng mehn mpetailkan, kitail kak mwohndi limwahn emen me mas kapw nan atail ihmw sarawi. Duwehte atail pwoson: ni ansou me peikasal kin pwarada rehtail, ah mie anahnepen kamehlele sapwellime inou kan pwe kumwail en kak wenla mwowe. Nan soahng wet, kitail wie kakehlakahda atail mwoasel en pali ngehn oh kalaudehla pwe en wia kehl nan atail mour.
Uhdahn e sohte pahn mengei nin tapio, oh mwein e pahn wia kapwal laud. Sapwellimen Kauno mahsen, sang rehn soukohp Moronai, dokdoke kitail rahnwet: “ma kumwail pahn kohdo rehi I pahn kasaleiohng kumwail amwail luwet akan. I kin kiheng aramas kan arail luwet pwe ren kak karakarahkla; pwe I kin pereniki aramas koaros me kin karakarahkla mwohi; pwe ma re kin karakarahkla mwohi, oh kin koadoadoahki arail pwoson, ah I pahn wekidala arail luwet kan en wiahla mehn kakehleparail.”5
I kapingki riei pwutak Ivan, me kaidehnte e ehukiongiete rohngamwahuo ahpw e lukeiohng ie en iang momourki oh diarada ahi luwet akan. E sewese ie en iang alehdi sapwellimen Kauno luko: “kohdo, idawehniehdo”6—ien iang alu duwehte Soukomouro, rapahki duwehte ah kin rapahki, oh poakohng aramas duwehte ah poakpoakei kitail. Sounpwong kei mwuri, mwurin ahi iang misineriko, I koasoanehdi me I pahn iang papidaisla oh wia papahn misineri.
Kitail en alehda en Presiden Russell M. Nelson luhko oh iang kohdo rehn Sounkomouro7 ni atail pahn diarada atail moasel kan me anahne kakehlaila ni pali ngenitail kan oh tepda kakehlailihada. Weirin tang me kitail ieiang me reirei, karehda ke deh manokehla wiewiahte soahng tikitik kan ni palingehn me pahn kakelakahda mwoasel kesempwal en pali ngenitail kan. Ma kitail men kalaudehla atail pwoson, ah kitail en wia mehkan me pid pwoson.
I kadehdehki me kitail wia Sapwellimen Sahm Nanleng seri kei me diren limpoak. Sapwellime Iehros, Sises Krais, ketin poakohng kitail. E ketido sampah wet pwehn kasalehiohng kitail ahlo oh pein Ih ketin pilada tohnmeteikihla peinAh mour pwe kitail en kak alehdi koapworopwor. Sounkomouro luke kitail en alasang Ih, en kak kakehlailih ahmw pwoson Ih oh sapwellime tomwo, oh en kak kalaudehla kisakis kan en pali ngehn me e ketkiohng kitailehr. Ih me ahlo; Met iei ahi kadehde ni mwaren Sises Krais, ahmen.