Rapahki Eripit Sang Ngehno

Sang Elder Mathias Held

En Isiakan

Kitail anahne esehla duwen atail pahn kasawih dahme mehlel kaiden sangete pein atail madamadau ahpw pil sang ni kisin ngihlen mwenginingin kis en Ngehn Sarawi.

Maing riei ko, Kauno kin ketin mahsaniheng kitail en “rapahki eripit sang ni onopki oh pil sang ni pwoson.”¹ Kitail kak alehda kamarain oh eripit kaidehkin sangete ni pein atail koahiek en wehwehki, ahpw pil sang ni kaweid oh kamarain en Ngehn Sarawi.

Soangen iren kaweid kapatapat en eripit wet sohte kin kalapw wia kisehn ahi mour.

Ahi pwoud, Irene, oh ngehi iangala Mwomwodiso wet sounpahr 31 samwalahro ni ansou me se apwtehn kapwopwouda. Kiht koaros keirda Colombia, ahpw sounpwohng kei mwurin aht kapwopwoud, ahi doadaohk karehda aht kohla kousoanla Sehmen. Se me pwulopwul oh ahniki koapwoaroapwor laud oh se kin kasik diren mehkot; e wia ansou mwahu oh kaperen ohng kiht.

Kilel

Sister oh Elder Held

Nan ansou me I nanantiheng ahi doadoahk, Irene kehn me se pahn alehdi mehkot sang nanleng, ni ah sehse ia mwomwe oh ansou da. Eri, e tepida mweidolong sohte lipilip en soun net kan me wa neirail encyclopedia, mehn kamwakehl, pwuken kuk, dipisoun wie mwengeh kan, oh soahng kei, ni ah kin kasikasik mehnia me e pahn alehdi pehpehmo sang reh.

Ehu ni soutiko e indahng ie me mwahnakapw pwulopwul riemen me likou tontol letelet ni ara wenihmwo oh e ahniki pepehm mwahu oh pwung en mweid irahlong. Ira inda me ira men koasoaiong me pid duwen Koht ahpw ira pahn pwurehng pwurodo ansou me I pahn mihmi nihmwo. E sou ih rohng me kita kaskasiko me?

Ira tepida tuhweng kiht, oh sang ni ara kaweid, se kin wadek nan pwuhk sarawi kan oh wehwehkihla kesemwpwal en Sises Krais ah wia atail Sounkomour oh Soundoar. Sahpw koluhkihla aht pepdaisla ansou se seri pwelelo, pwehki e sohte wia kisehn inou sarawi kan. Ahpw, ma se pahn pwurehng pepdais e wehwehki me se pahn wiahla tohn Mwomwodiso kapw wet, eri mwowe se anahne wehwehkihla mahs soahng koaros me pid duwen Mwomwohdisoh.

Ahpw ia mwomwen aht pahn ese me dahme misineri kan indahiong kiht me pid duwen Pwuhk en Mormon, Joseph Smith, oh pilahn en komour e mehlel? Eri, se wewehkihla me sang ni mahsen kan en Kauno me se kak “eseiraila sang ni wahrail kan.”² Eri, pwehki aht udahn men esehla, se tepida kasawih Mwomwodiso wet sang ni aht kilang wahn arail doadoahk kan. Dahme se kilang? Ihmwo, se kilangada.

Aramas peren oh kempoakepahn oh peneinei kaselel kei me wehwehki me kitail udahn kohnehng kin ale peren nan mour wet oh kaidehkinte insensuwed oh pahtou.
Mwomwohdiso ehu me sohte kin pwain sounsawas kan ahpw mwomwohdiso ehu me toweh kan kin alehda kepwukoah kan oh pwukoah teikan.
Mwomwodiso ehu me Sises Krais oh peneinei kan me wia poahsoan en mehkoaros, me irail souleng kan kin kaisihsol pak ehu nan sounpwung ehu oh wia arail meirong en sewese irail me paisuwed oh anahn laud kan, wasa me rosonmwahu anahnepe mie, kaskuhlihkiheng kitail en kalakeikitail sang mehn kasahliel kan.

Ni kapatapat:

Kitail kin mwahuki koasoia kesempwal pen kekeirdahn mour, pelien kaskuhl, doadoahk laud oh koahiek en emen emen aramas.
Se pil esehla duwen prokram en sawas me kin kohda ni ansou me kahpwal laud kan kin pwarada ie.
Oh se pil ienenen perenkihda kapokon lap kan, me kin wiawi iangahki ngilen keseng kaselel kan oh padahk en kaweid sarawih kan me kin wiawi.

Ni ansou me se kilang soahng pwukat koaros, se sohte kak diar mehkot me sapwung nan Mwomwohdiso wet. Ni pato mengei, se pereniki soahng koaros me se kilang. Ahpw, kiht pil saikinte pilada sen pepdaisla pwehki se men esehla soahng koaros mwohn aht pahn pepdais.

Ahpw, nan erein aht wie medemedewehte dahme se pahn wia, Kauno ketin kaukaunopkit ni meleilei, E ketin kaikaiahneikit, oh E sewesei kiht en kak diar me se anahne koledi mwomwen aht pahn diar me mehlelo kaiden kin sangete aht pahn kamehlele aht loaloakong kan ahpw sang ni aht pahn kak rong kisin ngihl wawai oh tikitik en ngilen Ngehno, me kin koasoaieng atail mohngiong kan.

Ngihlo oh sang ni pepehm me se alehdi ahpw kodohng kiht ehu nisoutiko mwurin sounpwong 10 en aht kaskaskuhlki rongamwahuo ni aht wadek nan Mosiah 18 me mahsanih: “Ma kumwail pahn ahniki ineng en … wahda ahn emen emen katoutou kan, … oh koaloalamwahuih irail akan me anahne sawas, … ma met wia ineng en amwail mohngiong kan, eri dahme kumwail uwongki pepdaiski ni mwaren Kauno?”³

Ire wet me kohsang nan Pwuken en Mormon udahn sair nan aht mohngiong oh pali ngenit, oh ni ansouohte se kehn oh ese me sohte kahrepe ehu me se sohte pahn pepdaiski. Se diarada me kahrepeh kan me sansal nan ire tikitik pwukat pil wia ineng en aht mohngiong oh iei kahrepe pwuko me udahn mie katepe. Irail kesemwpwal sang ahmw pahn men wehwehkihla soahng koaros pwehki dahme se esehier e itar. Se kin ansou koaros idawehn kaweid en Samatail Nanleng oh koapwoaroapwoarki sapwellime kaweid ohng kiht ansou koaros.

Eri, rahnohte, se koasoanehdi rahn me se pahn pepdais, oh ansou mwadang sahpw pepdaisla.

Kilel

En Elder oh Sister Held ara pepdaiso

Dahme kitail koledihsang soai wet?

Keieu, kitail koledi me kitail kak kamehlele Samatail Nanleng ni unsek, me kin rahn koaros nantiheng en sewesei kitail en wiahla soangen aramas me E ketin kupwurki kitail en wiahla. Kitail kamehlelehier Sapwellime padahk mehlel ni ansou me E ketin mahsanih: “I pahn ketkiheng sapwellimen aramas akan ehu ehu dake , ehu ehu padahk, ekis me ekis mwo; oh meid pahi irail kan me kin rong ahi padahk kan, … pwe irail pahn esehla eripit kan; ohng ih me pahn alehda I pahn ketin ketkihong me tohto.”⁴

Oh keriau, kitail esehla me, kisehn atail madamadau kan, mie pil ehu ahl en alehdi eripit me kak kiheng kitail kaweid oh wehwe. Iei kisin ngihl wawai oh tikitik sang rehn Ngehn Sarawi me kin sair nan atail mohngiong kan oh pil atail madamadau kan.

I men karasahieng padahk wet ong pwoaren mesetailkan. Samatail Nanleng sohte kiheng kitail ehute, ahpw riau pwoaren mesetail. Kitail kin kak kilang mwahuki pwoaren mas ehute, ahpw pwoaren mas keriauo kin kasalehieng kitail ehu soangen mwohmw. Ni ansou me ira koaros kin kilangada mehkot oh kiheng nan mwahliel, re kin wiahda kilel siluh.

Duwehte, kitail alehdier soangen wiepe riau, sang ni paliwar ah pali ngehn. Atail madamadau kin wiahda ehu iren madamadau sang ni atail mehn pepehm kan oh sang ni atail kahrepeh kan. Ahpw sang ni manaman en Ngehn Sarawio, Samatailo pil kiheng kitailehr ire keriau, me wia keieu kesemwpwal oh keieu mehlel, pwehki e inensang Reh. Ahpw, pwehki sang ni ngihl tikitik en Ngehno ah kin nohn tikitik, diren aramas kin sohte tehk me mie soahng wet kin wiawi.

Ni ansou me soahng riau wet kin mie ni pali ngenitail kan, ehu kilel unsek kin kaselehda mehlel en mehkoaros. Ni mehlel, sang ni sawas en Ngehn Sarawi, soangen “kemwekid kei me mie,” me sansalamwahu ong kitail nan atail madamadau, kin kak kasalehda ma irail pitipitih kitail de udahn sapwung. Tamataman mahsen akan en Moroni: “Sang ni manaman en Ngehn Sarawi kumwail pahn kak esehla mehlel en meh koaros.”⁵

Ni ahi wiahkiher tohn mwomwodiso wet sounpahr 31, I loieng pak tohto ma kitail pahn kin pein idawehn atail loalokohng oh kahmahmkihla de sohte tehk kawehsak en pali ngehn me kitail kak alehdi sang ni mwengininging oh kaweid en Ngehn Sarawi, eri e pahn duwete atail wie momourki pwoaren mas ehu. Ahpw, ni mehlelo, kitail koaros kohieng kitail pwoaren mas riau. Ehupenehn mahs riau wet te me pahn kak kiheng kitail me mehlelo oh kaunsek pen kilel en mehlelo oh soahng koaros me kitail kin lelehng nan atail mour, oh kaunsek pen atail wewehki pein kitail oh kahrepen atail wia Sapwellimen Sahm Nanleng serih kan.

I tamankihda dahme President Russell M. Nelson padahkihong kitail sounpahr ehu samwalahro ni ansou meh inda “nan rahn akan me pahn kohdo, e sohte pahn mengei momour en pali ngehn en pweida mah sohte pahn idawehn kaweid, kahlmengih, kaloalamwahu, oh pepehm en Ngehn Sarawi ansou koaros.”⁶

I esehier ni mehlel me:

Mie Samatail Nanleng me poakoahng kitail, oh kitail koaros pwuhngkihda en kohdo pohn sampah wet pwehn wia kisehn sapwellimen Koht pilahn.
Me Sises iei Krais; E ieias oh wia ahi Sounkomour oh Soundoar.
I ese me Joseph, kisin pwutak soumwet men, pilipildahr oh wialha soukohp me tapiada met, irair en unseklahn ahnsou wet, sang ni kih koaros, manaman, oh mweimwei en prihsduhd en Koht.
I ese me Pwuhk en Mormon wia ehu kadehdehpen Sises Krais, oh me peneinei kan kak mihmihpene kohkohlahte.
Oh I ese me Kauno, Sises Krais, me kaweid, Sapwellime Mwomwohdiso kopwurupwurdoh, sang rehn atail soukohp ieias, President Russell M. Nelson, rahnwet.

Soahng pwukat oh soahng tohto teikan en me mehlelo wialahr mehn kakehlepen pali ngehn me Koht ketin sewesehkinie ien duwehla. Oh I pil kaskasik soangen mehn kaweid kapw kan me E ketin kupwurki ohng ie—oh kumwail—pwe kitail en alehda ni atail pahn momour kowei nan mour kaselel wet oh “esehla … sang ni atail pahn kin onopki oh sang ni atail pwoson.”

I ese me soahng pwukat koaros mehlel oh I kadehdehki mehpwukat ni mwaren Sises Krais, amen.