Manaman en Utungada ni Pwoson

Sang President Henry B. Eyring

Sounsawas Keriau nan Presidensi Keieu

Ni amwail kawada pehmwail kan pwehn utuht, kumwail inoukidahr rehn Koht, me kumwail pahn utung irail.

Pak tohto I kin rong kaun kan en prihsduhd kin kaping kalahnganki utuht ni pwoson en irail kan me irail kin papah. Pwehki sang ni ngilarail kan, kumwail kak ese me arail kaping kalahngan kan me inenen loal oh mehlel. Rahnwet I pahn peuse Sapwellimen Kauno kaping pwehki amwail utungada Sapwellime sounpapah kan nan Sapweillime Mwomwohdiso. Oh I pil men kangoangei kumwail en doadoahngki oh keirda nan manaman en utungada mehteikan nan amwail pwoson.

Mwohn amwail ipwidi, kumwail kasaledahr manaman wet. Medewehla dahme kitail kin ese nan sapwen ngehn mwohn atail ipwidi. Samatail Nanleng ketkihda koasondi ehu ohng Sapwellime seri kan. Kitail mihmi mwo. Lusiper, riatail ni ngehn, uhwongada koasondio me pahn mweidohng kitail saledek en pilada. Siohwa, Sapwellimen Sahm Nanleng Iehroso, utungada koasondio. Lusiper eri Kaunda pwihn me uhwengo. Ngilen utuht sang Siohwa pweida, oh E pein pilada en wiahla atail Sounkomour.

Amwail mihmier nan mour wet kasalehda me kumwail utungada Sahmo oh Sounkomouro. Kumwail anahne pwoson Sises Krais pwehn utungada koasondi en popohlo oh en Sises Krais pwukoa nan koasondio ni amwail sohte nohn ese kahpwal kan me kumwail pahn sohpai nan mour wet.

Amwail kin pwoson utungada sounpapah kan en Koht me pahsonehda amwail popohl nan mour wet. Ni amwail kin pwungkihda en misneri men ah kehkehlik en kapakap pwehn ese ma Pwuken Mormon wia mahsen en Koht, kumwail ahneki pwoson pwehn utungada sounpapah men en Kauno. Ni amwail kin pwungkihla kumwail en pepdaisla, kumwail utungadahr sounpapah karakarahk men en Koht.

Ni amwail kin mweidehng emen en pwilikihdi pehkan pohn moangomwail oh nda “Ale Ngehn Sarawi,” kumwail utungadahr ih ni eh kolokol Prihsduhd en Melkisedek.

Sangete rahno, sang ni amwail kin papah ni pwoson, kumwail utungadahr irail akan me pwekadahng pohmwail prihsduhd oh me kasarawi kumwail ohng ehu ohpis nan prihsduhdo.

Ni amwail tepin alehda prihsduhd, utuht ehu kin kasalehda likilik me kumwail ahneki ohng emen sounpapah en Koht. Met, tohto kumwail me kesepwildahr ohng wasa me utuht solahr wia mehkot mengei.

Kumwail kin pilada me kumwail pahn utungada koaros me Kauno malipe—ohng sohte lipilipil pwukoa me Kauno malipehkin irailehr. Pilipil wet kin wiawi nan kapokon kan nan sampah pwon. E wiawiher nan kapokon wet. Nan mihting pwukat, mwar en ohl oh lih akan—sounpapah kei en Koht—kin likiwerda, oh kumwail kin lukehng en kauwada pehmwail kan pwehn utungirailda. Kumwail kak sohte utung, de kumwail kak kasalehda amwail utuht ni pwoson. Ni amwail kin kauwada pehmwail pwehn utung, kumwail kin wiahda inou ehu. Kumwail inoukihong Koht me sapwellimaniki souhnpapah pwukat, me kumwail pahn utung irail.

Aramas pwukat sohte unsek, pil kumwail. Pwehn kolokol amwail inou kan pahn anahne pwoson kehlail me Kauno me ketin malipe irail. Ni amwail pahn kolokol inou pwuko eh pahn pil wahdo popohl poatopoat. Solahr kolokol inou pwuko pahn kahrehda nsensuwed ohng kumwail oh ohng irail me kumwail poakepoake—oh kahpwal me kumwail sohte kak medewe.

Mwein mie me idekehr, de pahn idek, rehmwail ma kumwail utungada amwail pisopo, steik presideno, Kaun Lapalap akan oh kaun teikan en Mwomwohdisoht. E kak wiawi ni ansou me pekipeko wiawiong kumwail en utungada kaun teikan oh kaun kan nan ehu kapokon. E kakete wiawi ni ansou en koasoikoasoipene ehu rehn emen pisop de steik presiden.

Ahi kaweid ohng kumwail me sang ni amwail nsenoh oh kapakap, kumwail pahn medemedewe mahs iren peidek ko. Ni amwail wia mwo, kumwail kak kilangla mwuri oh medewe amwail lamalam kan, koasoi kan oh wiewia kan. Song en tamanda oh koasoanehdi amwail pasapeng kan me kumwail pahn kihda ansou me Kauno pahn ketin kapeideki kumwail, ni amwail eseier me ihme E pahn ketin wia ehu rahn. Kumwail kak onopada ni amwail kin pein idek rehmwail peidek pwukat:

I kin medewe de koasoia luwet kan en aramas me I inoukidahr I en utung?
I rapahkiher kadehde pen Kauno ah kin ketin kakahluwa irail?
I kin nantiong oh nsenohki idawehn arail kaweid?
I koasoiahier duwen kadehde me I kak kilang me irail wia sounpapah kei en Koht?
I kin kapakapkin irail oh mie ahi pepehm en limpoak?

Peidek pwukat pahn, ohng me tohto rehtail, kahrehiong atail soansuwed oh anahne koluhla. Koht ketin mahsanihong kitailehr en dehr kadeik mehteikan ni sapwung, ahpw ni mehlel, e kin apwal ohng kitail en sohla wia. Kereniong mehkoaros me kitail kin patehng aramas oh wia kin kahrehiong atail kin kasawi irail. Oh kereniong mehkoaros nan atail mour, kitail kin karasahiong en mehteikan arail mour. Kitail kin ele wia met pwehki kahrepe kei, ekei me pwung, ahpw e kalapw kahrehiong atail kin kaulum.

Presiden George Q. Canon kaperkin kitailehr oh met I pahn wiahki ahi oh peusehwei. I kamehlele me e koasoia me mehlel: “Koht ketin piladahr Sapwellime sounpapah kan. E ketin mahsani me Sapwellime pwuhng en keria irailla, ma irail anahne riahla. E sohte ketin ketikihong kitail en wekid oh keria irailla. Sohte aramas emen, mendahte uwen kehlail en ah pwoson, de uwen lapalap nan prihsduhd, kak kadsuwedi irail me Kauno ketin piladahr oh kasohwe manaman en Koht pohn sampah ahpw sohte ale Sapwellime engieng. Ngehn Sarawi sohla pahn ieiang aramas menet, oh e pahn alialu nan rotorot. Pwehki met, kumwail kilangehr kesempwalpen atail pahn kanaiehg?”¹

I kasawih me tohn Mwomwohdiso wet nan sampah pwon kin kalapw wauneki emenemen oh irail kan me wie kakaun irail. Ahpw miehte kamwahu kei me kitail kak oh anahne wia. Kitail kak kadaiala atail manaman en utungada emenemen. E pahn anahne pwoson oh doadoahk laud. Iet ire pahieu pwukat me I men kitail en doadoahngki nan kapokon wet.

Kitail kak kilelehdi ni sansal wiewia kan me koasoiepe wiawi nan kapahrek kan oh tepda doadoahngki sang rahn wet kohla. Ni atail wia met, atail manaman en utung irailda pahn kehlailla.
Kitail kak kapakap kin irail ni arail wie kapakapahrek pwe Ngehn Sarawi pahn ale arail koasoi kan oh saireki mohngiong en irail akan me kitail poakepoake. Ni atail esehda mwuri me atail kapakap kan pasapenglahr, atail manaman en utungada sounkaweid pwuko pahn kehlailla.
Kitail kak kapakapki me sounkapahrek kan pahn ale kapai oh kehlailla ni arail wie kapakapahrek. Ni atail kilang me irail kehlailla, kitail pahn keirda nan atail pwoson en utungada irail oh e pahn poatopoat.
Kitail kak rong arail koasoi kan me wia pasapengpen atail kapakap en pek sawas kan. Ni en pasapeng kan ahr kohdo, oh re pahn, kitail pahn keirda nan atail pwoson pwehn utungada sounpapah en Kauno kan koaros.

Me patehng kamwahulahn atail utuht ohng irail kan me kin papah nan Mwomwohdisoht, kitail pahn esehda me mie pil ehu pali me kitail kak kadaiala atail manaman. E pil kak wadohng kitail kapai laud. Iei nan imwatail oh nan atail peneinei kan.

I pahn koasoi ohng mwahnakapw pwulepwul kan me kolokol prihsduhd oh koukouson rehn arail pahpa ni imwarailo. I pahn peusehwei dahme I loiengehr me pid mwomwen pahpa men eh kin kehn amwail utuht ni pwoson. E kak mwomwen kehlail ohng kumwail. Ahpw e kin sohpai kahpwal tohtosang dahme kumwail ese. Ekei ansou e sohte kin kak kilang ahlo pwehki kahpwal kan me mihmi mwowe.

Amwail kepinga ih pahn sewesehda ekis. Amwail limpoak ohng ih pahn sewesehda laudsang. Ahpw dahme pahn keieu sewesehda ohlo iei lokaia mehlel duwehte mepwukat: “Ipa, I kapakap kin komwihdar, oh I kehn me Kauno pahn sewese komwi. Soahng koaros pahn pweida. I ese me e pahn.”

Koasoi duwehte mwohkan kolokol manaman ma e kin kapwurpwurla, sang pahpao ohng naho. Ma pwutak emen pahn wiahda sapwung laud ehu, ele ni palingehn, e mwein pahn mwaroskihla ah sohte pweida. Ni ahmw wia eh pahpa, ni ansouo, komw pahn pwuriamweiki, mwurin ahmw kapakap pwehn ese dahme komw pahn wia, Ngehn Sarawi pahn ketikihong pato pwukat nan ewemwo; “Nei pwutak, I pahn ieiang uhk lel ni imwi. Kauno ketin poakohng uhk! Ke kak pweida pwehki Sapwellime sawas. I ese me ke kak oh ke pahn. Ngehi pil poakohng uhk!”

Nan pwihn en prihsduhd oh pil nan peneinei, kadaiala pwoson pwehn utungada emenemen iei mwomwen atail kin kauwada Saion me Kauno kupwurki kitail en kauwada. Kitail kak, oh kitail pahn pwehki sang ni Sapwellime sawas. Kitial pahn anahne esehla poakong Kauno sang ni atail mohngiong unsek, kehl unsek, lamalam unsek oh kak koaros oh poakong mehteikan duwehte atail poakohng pein kitail.

Ni atail keirda nan limpoak unsek en Krais, atail mohngiong kan pahn langada. Pwe limpoak pahn kahrehda atail karakarahkdi oh kaluwakitaillahng koluhla. Atail koapworopworiki Kauno oh emenemen pahn keirda. Oh kitail eri pahn wiahla ehu, nin duwen Kauno ketin inoukiehr me kitail kak.²

I wia ahi kadedeh me Koht Sahm ketin mwahngih oh poakoahng emen emen kitail. Sises iei ih me Krais. Mwomwohdiso wet me iei Sapwellime. Kitail kolokol Sapwellime prihsduhdo. E pahn ketin wauneki atail songosong en keirda nan atail manaman en doadoahngki manamano oh pil pwehn utungada emenemen. I kadehdehki ni lengileng kapai en Sises Krais, ahmen.