![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F48%2F08%2F4808ff48448cd2b3ccc5e5a46b3ed4c75bc3e68c%2F4808ff48448cd2b3ccc5e5a46b3ed4c75bc3e68c.jpeg/full/!250,/0/default)
Kilangki ni Pwoson
Ansou me kitail pwokada oh pilada dahme kitail pwungki nan kalohk o, kitail pahn ale kapai poatoapoat, oh kasalehda me kitail nohn kesempwalki kemwekid en sampah.
Mwohnte Ah pahn kalopwuhla, Sises ahpw wisiklahng mwohn Pilate nan perehn kopwungo. “Komwi me Nahnmwarki en mehn Suhs kan?” Pilate keinemwe Reh. Sises sapeng: “Ahi wehi kaidehn kisehn sampah. … I kohdo sampah, pwe I en kadehdehda me mehlelo. Irail kan me kisehn mehlelo kin rong ngileiet.”
Pilate pil pwurehng idek, “dahme mehlel?”1
Nan sampah rahnwet, peidek me nda “Dahme mehlel?” kak wia mehkot kamedek ong irail kan me wia kisehn sampah wet.
Rapahki nan Google “Dahme mehlel?” pasapeng kak pohnangin rar kei. Mie mehn kaweid tohto me kak kaweid kitail nan neitail delepwohn kan sang pwuhk kan en prik oh mortar. Kitail momourki Iren kaweid oh madamadau tohto. Mwekid suwed oh kasongosng ekehker kitail wasa koaros me kitail kin sohpeila ie.
Sawehwe me mie ansouet, me kahredahr me tohto me kamehlelehiongehr pein irail koasoai me wiawihier sounpar 2,500 samwa samwalahro sang Protagoras ong Socrates: E koasoaia, “Dahme pwung ong uhk,” “ihme pwung ong uhk, oh dahme pwung ong ie ihme pwung ong ie.”2
Mehlelo kin sang Kopwurupwurdohn Rongamwahu en Sises Krais
Rongamwahu en Sises Krais wia mehkot kapai, kitail kin aktikitikla oh nda me mie mehkot me imwsekla oh mehlel. Mehlel poatoapoat wet duwepenehte rehn Sapwellimen Koht serepein oh pwutak kan koaros.
Pwuhk sarawih kan padahngki me, “Pwung me wia kamarainpen soahng koaros me pahn wiawi, oh me wiawiahier, oh me pil pahn kohdo.”3 Mehlel me kin sohpeila mwuri oh mwowe, kin katehlapahla wehwehn atail kisin ansoute kis.
Sises mahsani, “Ngehi me ahl, mehlel.”4 Mehlelo kin kasalehiong kitail ahl en kolahng mour soutuk, oh met kakete wiawi sang rehn Sounkomour, Sises Krais. Sohte pil oapwoat ahl.
Sises Krais padahkiong kitail ia mwomwen atail pahn momour oh sang ni Sapwellime tomwo oh Iasadahu, kihong kitail lapwepen dipatail kan oh mour soutuk palio. Met udahn mehlel.
Sises Krais padahkiong kitail me mehnda ma kitail kepwehpwe de semwehmwe, sansal de soh, loalokong de ekis. Ahpw, atail pwukoahn pohn sampa en kakehlailiala atail pwosonKaun Sises Krais, pilada mwahu sang me suwed, oh kolokol Sapwellime kosonned akan. Ansou me kitail kin kemedipwe wekdeklahn science oh wini, mehlel en Koht kin daulih mepwukat.
Pwehki mie me uhong me mie mour soutuk, e kin kalapw mie soangen mwohmw kei me kin wekidasang Sapwellimen Koht serih kan me mehlelo. Akamai en imwintihtio me kin wiawi rahn pwukat duwehte dahme wiawiher Rong mepwukat, mahsen en pahr 2,000:
“[Kumwail] sohte kak ese mehkot me [kumwail] sohte kin kilang. … [Dahme aramas emen wiadahr] sohte kalokepe.”
“[Koht sohte kapaiukada, ahpw] [aramas koaros pweida] sang ni [pein] arail loalokong.”5
“E sohte mehlel me soangen aramas … Krais [kak] wia Sapwellimen Koht.”6
“[Dahme ke kamehlele wia tiahk en pweipwei ehu oh e] kapingada nan ahmw [madmadau].”7 Duwehte rahnwet, kaidehn?
Kopwurpwurdohn rongamwahu wet, Koht ketkiong kitail ahl en kaskuhl oh wehwekihla kesempwal en mehlel kan en pali ngehn: Kitail esehla sang nan pwuhk sarawih kan, sang ni atail kapakap, soahng kan me kitail lelohngehr, sang ni kaweid en soukohp ieias oh wahnparon akan, oh sang ni kaweid en Ngehn Sarawi, me kak sewesei kitail “esehla me pwung en mehkoaros.”8
Mehlelo Kin Wehwehieng Ngehno
Kitail kak esehla soahng koaros me pid Koht ma kitail pahn rapahki ni pali ngehn. Paul masanih, “sohte aramas ese ia kupwuren Koht , ihte ma Ngehn en Koht ketket reh.” Pwehki ngehnohte me kak wehwehki.”9
Kilang mahlen wet sang rehn Micheal Murphy. Sang ni wiepen mahlen wet, ke sohte pahn kamehlele me pwoaren mesen aramas ehu me mihmi nan kilel wet. Ahpw ma ke pahn tehk mwahu kisin dokomwei kan, ih ahmw pahn kilangada kaselel en wiepen mahleno.
Pil duwehte, kitail kak kilangada mwahu mehlel kan en Koht sang ni pwoaren mas en pwoson. Wahnpoaron Pohl ketihtihkiong kitail mehlelo: “Pwe mehmen me sohte kin ahneki Ngehn Sarawi, e sohte kak ale kisakis kan me kin pwilisang rehn Ngehno. E pil sohte kak wehwehki soahng pwukat, pwe e kin wiahki mehkot mwahl. Ngehn Sarawihte me aramas kak kasawiheki mehkot ni pali ngehn.”10
Pwuhk Sarawi, atail kapakap, soukohp en rahnpwukat, oh kisakis en Ngehn Sarawi kahrehiong atail kak kilang mwahu wasa kitail seiseiloakla ie pohn sampah.
Kalohk me sang Ideidawehnki ni Pwoson
Na kitail kilangki mwahu mahs Kalohk ehu ong peneinei ki pwoaren mas en pwoson.
Presiden Gordon B. Hinckley kawehwehda “Peneinei: Kalohk ehu ong Sampah” ire wet kodahr sounpar 24 samwalahro: “Tohto me uhong oh kasalehda dahme re pwungki, ki soangen widing kan me pidada kosonned oh ire teikan, en widing oh kasongosong me kawelahr samapah, se ahniki pepehm en kaparkin kumwail.”11
Kalohko tepkihda: “Aramas koaros—ohl oh lih—kepikipikda ni mwohmw en Koht. Emenemen iei seri pwutak de serepein ngehn keneinei en pahpa nohno nanleng, oh, pwehki met, emenemen ahniki mwohmw sarawi oh mour en ehu rahn me koasoandi sarawi.”
Me pwukat pwung poatoapoat kei. Kowe oh ngehi kaidehn sapwungala kita en wia kepikipik en Kauno.
I kaselelki mahsen pwukat: “Nan mour mwohn mourwet, pwutak oh serepein ngehn kan kin ese oh sarawihong Samarail Koht Nanleng oh pwungki Sapwellime koasoandio.”12
Kitail momourehr mwohn atail ipwidi. Mwomwatail pahn duduwehte kohkohlahte. Kitail sohte kin nohn wehwehki, me kekeirdahn pali ngenitail nanleng me wiahda ihs kitail sampahwet.13 Kitail alehda Sapwellimen Koht koasoandi. Kitail ese me kitail pahn lel kahpwal akan,medek, oh kapwunod kan en sampah.14 Kitail esehier me Sounkomouro pahn pwurodo oh ma kitail pahn kasalehda me kitail warohng, kitail pahn iasada oh “lingan en Kauno pahn mihmi pohtail kohkolahte.”15
Kalohk Ehu kosoia ni pisetik: “Se kalohngki me wiepe me mour en pohn sampah kin kepikipikda koasoandihsang powe. Se kamehlel kesempwalpen mour oh kesempwalpe nan sapwellimen Koht pilahn poatoapoat.”
Sapwelimen Koht koasoandi me karehda ohl pwopwoud oh lih pwopwoud kak naitikiedi seri nan sampa oh kiong kitail kosonned en kawehla liseian.
Padahk kan en Kalohk kin Ehuieng Mwahu
Ansou me kitail pwokada oh pilada dahme kitail pwungki nan kalohk o, kitail pahn ale kapai poatoapoat, oh kasalehda me kitail nohn kesempwalki kemwekid en sampah. Sang ni kapakap oh medemedewe kalohko sang ni pwoson, kitail pahn esehla iamwomwen padahk kaselel kan ah dokpene, kasalehda Sapwellimen Sahmo koasoani ong Sapwellime serih kan.16
Mehlel kitail pahn pwuriamwei ansou me Sapwellimen Kauno soukohp ieias kan kin kasalehda kupwure ong ni padahk mehlel kan me kin mihmiehkihte peidek? Mehlelete me, ekei pahn kasohwe mahsen en soukohp akan,17 ahpw ekei pahn loaloapwoatehng dandarepwe arail peidek loal kan—peidek me pahn pahrengki ni kanengamah oh ahniki pwoson. Ma Koht ketkiehng Kalohko ohng aramas en ehu mwehi tohrohr, udahn pahn miehte peidengkan, ihte me ekis weksang en rahnpwukat. Ehu kahrepe kesempwal en soukohp iei en sewese kitail en alehdi pasapeng pen atail peidek ngidingid kan.18
Mwohn e wiahla soukohp Presiden Russell M. Nelson masanih: “Soukohp kan kin kilang dahme mihmi mwohtail. Irail kin kilangada dahme suwed me sehdano kin kidiher, de pahn kihdiong, nan atail ahl akan. Soukop kan pil kin kilangada pwukoah oh kapai laud kan me kin kaukaunop ong irail kan me kin nanantihong peik.”19
I kadehdehki ni pwung oh manaman en ngenen ehupenehn Presidensi keieu oh Wahnparon Ehkriemeno.
Sampah Kohkohla
Nan ahi mour, I kin kilang soahng kan me wekwekdekla ong ni dahme sampah kamehlele me pid padahk tohto me mihm nan kalohko. Ni ahi pwulopwul oh mwadang en pwopwoud, me tohto sohpeisang koasoandi en Kauno me kitail kin nda kosonned en mwakelekel, met kin wiawihte nan pwungen ohl oh lih me kopwopwoud. Ni ahi sounpar 20 oh 30 samwa me tohto sohpeisang mehn poadoandoar sarawi en liseianda, oh kawehla liseian pil tohtohla Me pil kerente, me tohto sohpeisangehr Sapwellime Koht kosonned me pwopwoud wia tiahk sarawi ehu nan pwungen ohl oh lih.20
Kilikilang me tohto arail sohpeisangehr wasah kan me Kauno ketin koasoanedier katamankin kitail rahno nan kapernaum ansou me Sounkomouro kasalehda ihs Ih oh nsensuwedla pwehki “sapwellime tohn padahk tohto … sohla iang ih.”
Sounkomouro ahpw idek rehn meh Ehkriemeo: “Kumwail pil pahn kohkohla?”
Piter sapeng:
“Maingihs me se pahn patohla reh? komwi me Sapwellimanki] mahsen en mour soutuk.
“Oh se pwosonlahr oh esehier me komwi iei Krais, Ieros en Koht ieias komwi.”21
Koaros Sohte Nohn Pwungki Dahme Mih nan Kalohko
Me tohto, me pwulopwul oh mah, me kasalehda arail mehleliong padahk kan en soukohp kan, mehndahte arail wiewiahn rahnteiko oh met sohte duwehte dahme mih nan peneinei kalohk ehu ong sampah: serihkan me arail mour okihla pwehki mweipeseng kan en nohno pahpa; me pwulopwul kan me kempoakepahrail kan kin kawehla kosonned en mwakelekel; ohl oh lih me ohkihla arail pwoud me sohte mehlel kan; pwopwoud me sohte kak nainiki seri; lih oh ohl akan me ahr pwoud sohte iang arail pelien lamalam nan rongamwahu wet; ohl oh lih me, mie kahrepehkei, karehda arail sohte kak pwopwoud.
Emen kempoakepahi me kerenieng sounpar 20, me I kin kesempwaliki, me sohte pwopwoud pwehki e pereniki aramas me ira duwepene. E kolokol inou kan me e wiahda nan tehnpas sarawi, oh e kalaudehla ah koahiek oh wie papah nan Mwomwohdiso oh wasahn kousoan. E ndahngie me keren, “I kak pwungki irail kan me duweiehte me pilada en dehr kolokol kosonned en mwakelekel nan sampah wasa kitail koukousoanie. Ahpw Kauno sou masanih me ‘kaidehn kitail kisehn sampah’? Met sansal me Sapwellimen Kauno kosonned weksang me mie nan sampah.”
Kosonned en aramas kalapw dauliala kosonned en Koht kan. Irail me kin inengieng kapereniada Koht sang arail pwoson, kanengamah, oh ngoangki inenen mie anahnepe.22
Ngehi, oh ahi pwoud Kathy, ese lih emen me sohte pwopwoud, sounpar 40 samwa met, oh e kapaikihda koahiek mehlel oh kin wie papah nan ah ward o. E pil kin peikieng kosonned en Koht akan. E intingiada dene:
“I ouramanda rahn me I pahn kapaida miehda ahi pwoud oh nei serio. I pil wie awiawihte. Ekei ansou, dahmei mih loaleht kin wahdo pepehm mei manoknoklahr oh kin kelkelehpw, ahpw I kin song ien deh medewe dahme sohte ahi oh medewehte dahme I kak wia oh ia mwomwen ahi kak sewese mehtei kan.
“Papah ahi peneinei kan, nan ahi ward, oh nan tehnpas sarawi seweseie. I sohte manoknokla de kelkelehpw pwe I wia kisen, oh kitail koaros kisehn, peneinei lap ehu.
Mie Emen Me Mwahngih
Ekei pahn nda, “Ke sohte wehwehki dahme I mihmi loale.” Mwein e pwung, aphw I kadehdehki me mie emen me ese.23 Mie Emen me mwahngi ahmw katoutou kan pwehki sang Sapwellime tohnmetei me E wiahier nan mwetuwelo oh ni lohpwuo. Ni ahmw pahn rapahki oh kolokol Sapwellime kosonned kan, I inoukiong uhk me E pahn kapaiukada oh ketkihsang ahmw katoutou me ke sohte kak kelehpw wahda. E pahn ketkiong uhk kempoakepahmw me poatoapoat oh ansou mwahu en papah. Me keieu kesempwal, E pahn ketin audehkin uhk manaman en ngehno Ngehn Sarawi oh kasalehiong uhk me E ketin kupwurkin komwi. Sohte pilipil, sohte mehkot me kak kahmahmkihla me Ngehn Sarawio pahn ieiang kitail oh kapai poatoapoat kan pahn kohieng kitail sang atail pahn warohng.
I ese me Sounkomour ieias. I kadehde me I me poasoanehda me pwung koaros me kin wiawi oh E pahn ketin ketkihda kapai koaros me E ketin inoukiong irail kan me pahn kolokol Sapwellime kosonned kan. Ni mwaren Sises Krais, ahmen.