Rongorong Sapwellime Mahsen
Nan sampah ieu me diren ngihl, I kadehdeki me Samatail Nanleng wiadahr pwe kitail en kak rong Sapwellime mahsen kan oh idawehn Ih.
Nimensengo, rien ei pwoud pwutak kihong kisin likou kis me e ntingihda ong ah nohnohu sounpar kei samwalahro. Ansouo ei pwoud wia kisin seri kis. Wasahkis nan kisin likouo e nda, “Ahi Nohno kesempwal, mahkehngie pwehki ahi sohte wia ahi kedehdeh rahnet—ahpw i poakpoakeiuk.” Ansou me se kohla mwongehn souwas, i pil madmadau laud ki irehu. Eri i mwohndi, ngehi ntingiada kisin likou kis me nda, “Ong President Nelson, mahkohngie pwehki ahi sohte wia ahi padahk rahnwet—ahpw i poakpoakeiuk.” Ahpw irehu sto mwomwen pwungehng ahi pepehm. Eri iet kitail, oh i men kapatahieng ahi sawas ong irail kan me tiengehr mwohi nan tiepene wet rahnwet.
Pahr kei samwalahro, I iangih kisin sompihr tikitik ieu eri me dake sompihro kapwehng katanga sompihr. Kerenlahng aht pahn peidio, soahng koaros mwomwen mwahu. Ahpw ansou me se kereniengeh soko,I rong ngilen pakairo ah indalahng soun katanga sompihro en “pwurada.” Soun katanga sompihro kilenglahng nah soun kaiahno ah wie kaukaweidilahng pali pah, pwehn keisang ni elen sompihro, oh e inda “Met!”
E kawetala warat sompihro pah pali meing, eri pwurada wasa soanamwahu, pwurehng inenla, kiht peidi nan wasahn peidio ni soanamwahu. Se ahpw uhd diarada mwuhr me mie ehu sompihr pihrda wasa me se pahn peidiehu. Ma se sohte idawehn kaweid en keper me kohieng kihto, se kakete loisang, sompihr me kohkohdohu. Soahng kesempwal riau me I koledihsang irair wet: Keieu, nan ansou apwal akan nan atail mour, kitail kin rongada ngihl kei ahr sihsiaiki ihs me kitail pahn rong. Oh keriau, udahn e kesempwal kitail en peikieng ngihl me pwuhngo.
Ngihl en Siai kan
Kitail mih nan sampah ehu me ngihl tohto kin song pwe ren kaloweikitaildi. Pakair en apwal koaros, tweets, blogs, podcasts, oh soangsoangen peneu me kin sang Alexam, Siri, oh mehteikan, kitail kak apwalki ese mehnia me kitail pahn liki. Ekei pak kaweidpen atail mour kin sang aramasa tohto, kitail kin medewe me ma pali laud kamehlel eri ihme kitail pil pwungki. Ekei pak kitail kin “peikasalki … soahng riau”1 “pilada me lomwlomwuro de karakaro.”2 Ahpw ekei pak kitail kin idawehnte me mengeio, kin rongorongte ehu ngihl de soahngetehiu pwehn kaweid kitail, de pein wiahte dahme kitail mih nan atail madamadau.
Kemwekid pwukat kakete sawas, ahpw pein dahme kitail pahn lelehng pahn kasalehieng kitail me e sohte kin katapan ansou koaros. Dahme aramas kan kin pereniki wia kaidehn ihme kin pwung ansou koaros. Peikasalki soangen madamadau riau sohtoa kak kiheng uhk kaweid. Kamengei sohte kin kalapw weidlahng mehkot me katapan kan. Rongorongete ehu ngihl de idawehn pein ahmw madmadau kak karotehla dahme ke kin kilang. Oh pein ideidawehn atail madmadau kan kin kak kahrehda pwunod laud. Ma kitail pahn sohte kanaiehng, ngihl sapwung kan kak kadohwan kitail sang rongamwahuo oh wai kitaillahng wasahkei me kitail pahn kin diar kahpwal en ahneki pwoson, oh kitail kak diar apwal, oh pahtou laud.
Rongorong Ngihl Sapwung kan
I pahn kasalehieng kumwail ehu karasepe oh pil ehu karasaras sang nan pwuhk sarawi. Pwihnen daur nahna kan kin inda ma ke doukidar meter 8,000 ke miher nan “keperen mehla” pwehki, wasa ileilehu sohte itar mehn esingeken mour. Pil mie keperen mehla nan pali ngehn. Ma kitail pahn kin kalapw mih wasa me aramas sou pwoson mihe, udahn ngihl sohte mwahu kan pahn kin kihsang mehn esingek en pali ngehn me kitail anahnehu.
Nan Pwuhk en Mormon, kitail wadekehr nan Korihor, me koasoaiahda dahme wiawihengehr. E pwungki aramas ah perenki padahk me e kin wiahko pwe re “kaperen [ohng] arail kin madmadau en kamwahlko.”3 E inda me pahpa nohno kan oh soukohp kan kin padahngki tiahk likamw kei pwe re men irehdihte saledek oh e mengeieng irail.4 E kin akipwungki me aramas kan anahne pein pilada dahme mwahu ohng irail pwe kosonned kan kin wiawidahte pwehn irehdi aramas.5 Ohng ih, kamehlelpen Tomw en Sihses Krais e wia “kisehn madmadau en aramas sahliel,” e wiawi sang ni atail pahn kamehlele mehkot ieu me sohte kak wiawi pwe kitail sohte kilang Ih.6
Korihor wiahda lapalahn kepingiping, kahrehda ah pekiek dohng mwohn sohnkapwung lap oh nah prihs lapalapko. Wasahu, e ksinenda “ni ngihl laud,” kawe irail kaun ko oh inda me e anahne ehu kilel. Kilel ieu ahpw sansaldahr. Udahn e pwuriamwei oh sohla kak koasoai. Kohrior eri diarada me e pein pitihdi pein ih, oh ni eh medemedewe soahng mehlel kan meh soikalahro, E mengmengloalki, “ansou koaros I kin ese.”7
Korihor eri pekpek mwenge seli ih lau pwihn en Zoramite kei kehmehla.8 Keimwseklahn ah soaio kohsang nan ire wet: “Oh ni mehlel kitail kak kilang me tepelo sohte pahn utung sapwellime seri kan rahn en neko, ahpw e pahn kol iraildieng nan ehlo.”9
Ngihl me Pwuhng
Pwehki Samatail Nanlehng kin kupwurki dahme mwahu ohng kitail, E ketin mweidada pwe kitail en kak rong sapwellime mahsen kan. Pak tohto, kitail kin rong Ih sang ni manaman en Ngehn Sarawi. Ngehn Sarawi me wia kesilimen en Koht Sahmo. E kin kadehde Samatail Nanlehng oh Sapwellime Iehroso,10 e pekederdo pwe en “padahkiheng [kitail] soahng kan,”11 “oh pahn kasalehieng [kitail] soahng koaros me [kitail] anaane wia.”12
Ngehno kin sair aramas sohte lipilipil ni soangen wiepe tohto kei, oh E kakete sair emente aramas nan soangen wiepe kei nan ansou kei. Ni mehkoaros, E kin ketin wehwehieng kitail erein atail mour ni soangen mwohmw tohto. Ekei pak, e kin sair kitail nan atail “madmadau kan oh nan [atail] mohngiong kan”13 sang ni ngihl tikitik, ahpw kapehm laud, e kin sair “irail kan me… kin rongorongo mwahu.”14 Ekei ansou, Sapwellime kapehm kan “kin kipehla nan [atail] madamadau [kan]” de “sang [atail] pepehm kan.”15 Ekei ansou, kitail pahn kak pehm “rasehng lullulen kisiniei [loalatail].”16 Pil ekei pak, E kin kadirehkihla pali ngenitail kan popohl, kamarainih atail madamadau kan,17de ketkiheng kitail popohl nan atail mohngiong kan.18
Raparapahki Sapwellime Mahsen kan
Kitail pahn diar Sapwellime mahseno wasa tohto. Kitail pahn kin diar ni ansou me kitail kin kapakap, wadek neitail pwuhk sarawi kan, oh ni ansou me kitail kin iang sarawi, iang kihda irehkan duwen rongamwahuo, de kohla nan Tehnpas Sarawi. Ei, kitail pil pahn udahn diar nan kapokon wet.
Rahnwet kitail kasaledahr atail utuht ohng irail meh 15 duwen soukohp kei, soun alehdi kaudiahl, oh soun kihwei de kasalehda kaudiahl kan. Arail direkihla ngehno oh dahme irail lelehngehr kahrehda arail kak sewese kin kitail dahme udahn kitail anahne. Arail padahng kan me kin sansal oh mengei en wehwheki. Re kin indahng kitail dahme Kauno kin kupwurki kitail en ese, mendahte ma kitail kin men rong de soh.19
Raparapahki Sapwellime mahsen nan soangen wasa pwukat me mwahu, ahpw me mwahu sang kitail en rahpahki wasa kan me dir sang met. Oh ni ansou me kitail kin rongada, kitail kin anahne idawehn. Wahnpoaron Seims koasoaia, “Kitail en kin kapwaiada Sapwellime mahsen kan, ah kaidehn kitail en rongorongete.”20 Oh Presidend Thomas S. Monson padahngki ehu pak: “Kitail kilang. Kitail awih. Kitail kin rong kisin ngihl, tikitiko. Pwe ni ansou me e pahn mahsen, ohl oh lih eripit kan kin peikieng.”21
Ansou me Kaweid kin Pwand en Kohdo
Ni tepin ahi doadoahk, ngehi oh sister Homer alehdi kapwukoah kapw ehu. Ni ansouo, e mwomwen wia pilipil laud ehu ohng kiht. Se onopki, kaisihsol ki, oh se kapakapki, ahpw pasapengo pwand en kohdo. Ele, se wiadahr aht koasoandio oh wenla mwowe. Ni aht wia met, se kak kehn me se insenamwahu oh mwuri se ahpw diarada ih keieu pilipil mwahu me se wiahda mwo.
Ni karepe wet, me se diarkihda me ekei pak atail pasapeng kin pwandodo. Ele met kaket wiawi pwehki e saik lel ansou pwungo, pwehki sohte anahne pen pasapeng ieu, de kakete pwehki Koht ketin kupwurki kitail en peihn pilida. Elder Richard G. Scott padahngki ehu pak me kitail anahne kapingki soangen ansou pwukat oh inou kihong kitail me: “Ni ansou me kitail kin warohng oh kin wiahda pilipil en ideidawehn Sapwellime padahng kan oh mwekidki, kitail ananane doula ni atail likih. … Koht sohte kak mweidohng uhk en doudoulahte mwowe ma e sohte pahn keper kin uhk me dahme ke piladahu sapwung.”23
Kitail Anahne Pilada
Eri, kitail anahne pilada mehnia ngihl, nan pwungen ngihl tohtoh pwukat, me kitail pahn idawehn. E kohnehng kitail en idawehn gihl sohte katepe kan me kin kohsang ni sampah wet, de kitail anahne mweidohng mahsen en Koht en kak kaweid kitail oh doarei kitail sang nan apwal? E mengei en rongada Sapwellime mahsen, ma kitail pahn kin rapahki ni ineng mehelel. Kiadehn pwehki e kin ngil laudla ahpw atail menhn rongorong kan ngihl laudlahr. Soun komouro inoukihong kitail “ma kitail pahn peikiehng [Sapwellime] padahng kan, oh rong [Sapwellime] kaweid,” E “pahn ketkiheng [kitail] me laud sang met.”24 I kadehdeki me inou wet udahn mehlel—ohng emenemen kitail.
Kerenieng sounpar ehu samwalahro, riei pwutak laudo mehsang kiht sang ni lapalahn aksiden en sdohsa iou. Ni en John pwulopwulo e direkihla inou oh pweida. Ahpw eh laudehro , paliwere tepida ohla oh ah madmadau sakanakan kahrehda ah mour udahn apwala. Pwehki kesikpen en mwahulahu ah sohte wiawi nan mour wet, John ahnikihte pwoson, e koasoanehdi me e pahn dadaur, wen ah kak koaros, lau lel imwi.
I ese me John sohtoa unsek, ahpw I kalapw medewe dahme kahrehda ah kak dadaurerete. Diren ngihl kin likwerieng en kin pilada me sohte mwahu, ahpw e kin pilada en deh iang. E kin uhd wia wen ah kak koaros en katentengdieng rongamwahu wet. E momour wasahu, pwe e ese me e kak diar Sapwellimen Koht mahsen kan mwo; E momour wasahu, pwe ese me ih wasahu me e kak ale padaksang ie.
Kairala
Riei ohl oh lihoko, nan sampah ieu me diren ngihl, i kadehdeki me Samatail Nanleng wiadahr pwe kitail en kak rong Sapwellime mahsen kan oh idawehn. Ma kitail pwersekieng, Ih oh Sapwellime Iehroso pahn ketkiheng kitail kaweid me kitail raprapahki, kehl me kitail anahne, oh peren me kitail men alehdi. Ni mwaren Sises Krais, ahmen.