Kamadipwki Mahsen akan en Krais
Kitial kak momourki mahsen en Krais ansou koaros oh wasa koaros ma kitail kaunopada atail mohngiong kan.
Samatail Nanleng poakoahng kitail. E ketin koasoanediong kitail koasoandi mwahu ehu pwe kitail en pereperenki Sapwellime kapai kan. Nan mour wet kitail koaros luhk ohng en alehda rongamwahu kopwurpwurdo en Sises Krais sang ni papdais, ale kisakis en Ngehn Sarawi, oh momourki rongamwahu wet ni pwoson. Nihpai kawehweh me atail inou en papdais duwehte atail doudahngehr pohn “ahl inen oh tehtiko,” oh e pil katamankin kitail en “wenlahte mwowe oh tengediong Krais, … kamakamadipwki mahsen en Krais, oh dadaurete lel ni imwi,” pwe kitail en kak alehdi kapai koaros me Samatail Nanleng nekinekid ong kitail (Tehk 2 Nephi 31:19–20).
Nihpai pil doulahte kataman kin kitail me ma kitail pahn “kamadipwki mahsen kan en Krais,” irail pahn padahkiong kitail soahng koaros me kitail pahn wia” (Tehk 2 Nephi 32:3) oh me kitail pahn ahniki manaman en powehdi “kasongsong suwed kan en tepelo” (Tehk 1 Nephi 15:24).
Dahkot kamadipwki?
Ansou me I pwulopwul, I kin medemedewe me kamadipw duwehte kang mwenge laud me iangahki rais, sushi, oh soyu ape. Met I esedahr me kamadipw ni mehlel laudsang kangkang kisin mwenge iou. E wia mehkot ehu me ke pahn esekihla peren, kekeirkihda, katkataman, ehukihwei, kasalehda limpoak ong peneinei oh irail kan me ke poakohng, kasalehiong Koht atail kaping kalahngan, oh ehuong mehteikan ansou me ke perpereniki diren mwenge iou kan. I kamehlele me ansou me kitail pahn kamadipwki mahsen akan en Krais, atail madamadau pahn pil duwehte met. Perepereniki pwuhk sarawihkan kaidehn kitail en wadewadekete. E pahn wadohng kitail peren mehlel oh kamwahuiala atail ehuong Sounkomouro.
Met inenen sansal mwahu ong kitail sang nan Pwuken Mormon. I men kapwuredohng kitail ahn Lehi ouraman ah kilangada tuhkehu “wen iou en wahn tukehu kak kiong emen peren.” Wahntukehu iei limpoak en Koht, oh ni ansou me Lehi songada wahntukehu, “e udahn … iou, sang wahntuhke koaros me e song ehr.” E “audehkihla pali ngene unsek ki peren laud” oh e wia mehkot ehu me e men ehukiong ah peneinei (Tehk 1 Nephi 8:10–12).
Ansou me kitail kin kamadipw laud, kitail pil pahn diarada me kaidehn uwe de soangen mwonge me mie some mie sohte wiahda mehkot, ma atail mohngiong kan kin audaudki kaping. En Lehi peneinei kin momourki uduk amas nan sapwtehno, ahpw Nihpai kawehweh songen kahpwal wet, kosoia, “Kapingki laud Sapwellimen Kauno kapai kan” me karehda “aht pwoud kan kehlail oh kaipwihdi serihkan “ni sohte kaulim” (Tehk 1 Nephi 17:1–2).
Ekei pak kamadipw kin pid duwen kesou kan me kin wiawi oh namanam en soangen wiepen mwongehkan. Alama kosoia duwen weren tuhke mwahu ehu me paodidi nan atail mohngiong kan Ma kitail pahn kasawih mwahu, kitail pahn esehda me weren tuhke wet kin tepda, “ioula” (Tehk Alma 32:28–33).
Kamakamadipwki Mahsen akan en Krais
Kapai en kamakamadipwki mahsen akan en Krais me manaman oh kak wekidala mour. Mie soahng siluh me I men lukehiong kumwail en doadoahngki nan amwail mour.
Keiu, sapwellimen Krais mahsen kan kak sewese kitail “kalaudehla [atail] kak ni pali ngehn en alehda kaudihal” (Russell M. Nelson, “Revelation for the Church, Revelation for Our Lives,” Liahona, May 2018, 96) Oh kaweidi atail mour ni onopek mwahu. Mormon padahngki me mahsen kan en Krais wia “men kaweid mwahu en kahlwa aramas akan en wia dahme pwung,” oh re manaman sang mehkoaros “me kedlahs” kak wia (Tehk Alma 31:5). Ni ahi pein rapahki Sapwellimen Koht marain pwe ien kak pein sewesehki ahi kahpwal kan, ansou koaros, me I kin song “Mehlel en Sapwellimen Koht mahsen akan,” (Alma 31:5) I kin pehm kaweid oh kin men wiahda pilipil me pwung, en powehdi kasongosng kan, oh kin kapaida ahi mour oh kalaudehla ahi pwoson Krais oh poakohng mehteikan. Atail soukohp Russel M. Nelson padahkiong kitail me “nan rahn ekei me pahn kohdo, pahn keper, e sohte pahn mengei en pitila pali ngenitail ma sohte kaweid, oh epwel sang Ngehn Sarawio” (“Revelation for the Church, Revelation for Our Lives,” 96). Kaudiahl me kitail anahne pahn kohdo ni atail pahn song “mehlel en mahseno,” oh mahseno pahn manaman sang soahng koaros me kitail kin song de medewe.
Keriau, ansou me kitail kin pwunodkihda pein dahme kitail kin wiahda oh sohla kamehlele pein kitail, “Sapwellimen Koht mahsen kaselel kan” (Tehk Jacob 2:8) nan pwuhk sarawi pahn seweseikitail en esehla udahn ihs kitail oh kihong kitail kehlapatail. Pohnese me I wia Sapwellimen Koht seri wia ehu ansou kansenamwahu me I pil esehla. Ansou me I pwulopwul, I sohte ese padahk kan en Sounkomouro. Ansou me I tepin wadek Kadehdeh Kapw, mahsen en Krais kamwahuiala mehlel olahn pali ngeni. I diarada me I sohte kelkelehpw oh me I wia Sapwellimen Koht seri. Ni ahi kasalehiong Kauno me I esehier ihs ngehi, I kamehlele me Sapwellimen Krais Tomwo me kamwahuihiehla.
Enos pil ehukihda soahng ehu me pein ih esehla sang ni kaweid me kohsang ni mahsen akan en Krais. Ni en Enos eh mweidehng padahk kan me ah pahpahu kaweidki me pid “mour soutuk, oh popohl en Souleng kan, me [audehkihla] nan ah mohngiong,” pali ngene “dupeklahr; oh e poardier mwohn me kapikadahu … oh kapakap ni ngidingid” (Tehk Enos 1:3–4). Nan kapakapo e esehla Sounkomouro oh esehdahr me kitail warohng, oh E ketin poakohng kitail oh kak mahkikiong kitail atail sapwung kan, oh me kitail wia seri en Koht mehlel kei.
Kesiluh, kitail kak sewesehda mour en ekei aramas sang ni mahsen kan en Krais. Me duwehte Enos me mie pein ah ansou oh wasa me mahsen en Koht sairada ah mohngiong, Kauno pahn ketin wia pein Sapwellime pwukoah en sair mohngiong en irail kan me kitail kin ehukiong rongamwahuo. Me tohto kitail kak ahniki pepehm sohte mwahu ansou me kitail kin song en lukehiong mehteikan en iang rong rongamwahu wet pwehki kitail sohte idawehn dahme kitail en wia. Mendahte dahme kin pwarada, Kauno kin lukei kitail en kin sarapeseng oh ehukiong irail padahk kan en rongamwahuo.
Sounpar riau samwalahro, Kauno ketin sairehr mohngiong en ahi nohnohu, me sewesedahr pwe en kak ale tiahk sarawi en papdais. I awiawieki rahno kerenieng sounpar 35. Pwe en kak wiahda ah pilipilo, tohn Mwomwohdiso tohto me poakohng oh sewese duwehte dahme Krais ketin wiahier. Ehu Rahn Sarawio, e medewehda pwe en kohla iang sarawi. Eri e idawehn kaweid en Ngehn Sarawio. Ansou me e mwomwohd mwowehu oh awiawih pwe mihting en kamadipw sarawi en tepda, kisin pwutak sounpar pahieu men ahpw kesinenda mwowe oh kilkilang. E ahpw kouruhrieng. Eri kisin pwutako ahpw pwuralahng nan dowehu, pelipeliante wasa me ahi nohnohu mwomwohd ie. Kisiin pwutako pwokada pwuken koul ehu sang nan dowehu oh pwurala kiong ahi nohnohu oh pwuralahng nan dowehu. Ahi nohnohu kilangada me mie pwuken koul nan sehr koaros me mihmi nan imwen sarawio. E mengeiong en kak pwokadahte ehu sang nan sehr me mih limwahu. Ahpw, e inenen pwuriamweikihla en kisin pwutako ah kadek mehlel, me e esehla sang nan imwehu oh nan mwomwohdisoh. E wia ansou kesempwal ehu ohng ih. E ahniki pepehm kehlail ehu me Koht ketin lukluke pwe en kohdo oh idawehn Sounkomouro. E pehmada me e anahne papdais. Kisin pwutako sohte rapahki kaping pen dahme e wiahu, ahpw e wiahte wen ah kak en momourki mahsen en Koht me iei poakohng mehn mpomw. Ahpw ah kadeko wia mehkot kesempwal oh wekidala mohngiong en ahi nohno.
Mahsen en Krais pahn sair mohngiong kan oh pahn kapehdepeseng mesen irail kan me sohte kilang Ih. Tohn padahk riemen iang Ih Sises alialu kohla pohn ahl en Emmaus. Ira inenen nsensuwed oh sehse me Sounkomouro ketin powehdier mehla. Wen ara nsensuwed ira sohte tehk mwahu me Krais me ketin ieiang ira. Mehndahte Sises “ketin kaukauwehweh iren pwuhk sarawih kan me pid pein ih,” ira pil sohte diarada me Ih Sounkomour me iasadahro lao irail mwohd pene oh iang Ih piltikihpene pilawahu. Eri ih ansou me “pwoaren masarah kau” pehdpeseng. As we—or our friends, associates, and neighbors—feast and break bread with Him, our eyes of understanding will open. Ansou me tohnpadahk en Emmaus kau tamandahr mwahu ansou me irail kin patehng Sounkomour me iasadahro, irail nda me arail mohngiong kan mwasikala ansou me e pahkehng irail iren pwuhk sarawih kan (Luk 24:27-32). Met pil pahn mehlel ong kitail koaros.
Keimwsekla
Pwe ien kairala, I kadehdehki me momourki oh perepereniki mahsen en Krais kak wiawi ansou koaros oh pil ansou kesempwal kan ma kitail pahn kaunopada atail mohngiong kan en alehda. Momourki oh Perepereniki mahsen kan en Krais pahn karehiong atail kak ese mwomwen atail pahn momour, kasalehda ihs kitail oh me kitail warohng uh mwohn Koht ni duwen Sapwellime seri, oh kahlwadohng kempoakepahtail kan rehn Krais oh mour soutuk. Pwe ien kaimwsekihla luhk me Nihpai wia ni ah koasoaia: “Kitail udahn pahn wenla mwowe ni atail tengetengediong Krais ahniki koapwoaroapwoar unsek, oh poakohng Koht en aramas koaros. Eri, ma kumwail pahn nantihla mwowe, momouriki mahsen en Christ, oh dadaurete lel imwi, kilang, iet me Sahmo mahsaniher: Kumwail pahn ahneki mour soutuk” (Tehk 2 Nephi 31:20). Ni mwaren Sises Krais, ahmen.