![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F88%2F75%2F88756cbca310ba34d7827c16f6452d410efc16b0%2F88756cbca310ba34d7827c16f6452d410efc16b0.jpeg/full/!250,/0/default)
Krais: Maraino Me Kin Dakerada nan Rotorot
Ma ke pehmada me marain en ahmw kadehde wie tikitikla oh wie rotorotala, kumwail en koapworopwor. Kolokol ahmw inou ong Kauno.
Ahi ohpis me mih nan ihmwen Pwihn en Sawas en Lih-o salahngete Tehnpas Sarawi en Salt Lake-o. Pwohng koaros ni awahn doadoahk kan, dengki kan en likin tehpaso kin okada. Tehnpas Sarawio wia dengki lingaling ileilehieu me mihmihte likin ahi wenihmwtoko.
Ehu pwohngo nan sounpwong en Pepwerio, ketipino kihrlahr ahpw ahi ohpiso wie rotorot te. Ni ahi kilangdihla sang wehnihmwtoko, tehnpas sarawio rotorot. Dengkihkan saik okada. I ekis nsensuwedla. I sohte kak kilang tehpas sarawio me I kin kalapw kilang soutik koaros erein sounpar tohto.
Ansou me I kilang rotorot wasa me I kasik I pahn kilang marain katamandohng ie duwen atail anahne ehuiehng serepatail—iei Sises Krais. Ihme wia poahsoan en atail kehl, Maraino oh Mour en Sampah. Ma kitail sohte pahn ehuong Ih, pali ngenitail pahn tepte mehla. Pwehki Sedan kin wehwehki mepwukat e kin nantiheng kediropwei kitail pwunoud en ehu ehu rahn akan. E kin song en katikitikala atail marain, kakunla lihoalo, pwe kitail en kelekelepw nan rotorot. Soahng pwukat me kin wiwiawi nan mour wet, ahpw Sedan kin nantihehng kihsang kitail oh ndahng kitail me kitail kelehpw me wiwia mepwukat.
Ekei kitail sohla kak mwekidki pwunod.
Ma songosong kin poweikitaildi, ma atail mour kin medekila kitail kin sohla kak esingek, ansou me kitail kin kamakam me duwehte ohl me kohkolahng Seriko oh kerenieng mehla, Sises kin ketdo oh widekihong leh nan atail ohla kan, pwok kitailda ni keneinei, kalikawih kitailda, waikitaila nan imwen keiru, oh apwalih kitail.1 Ohng kumwail me kin mihmi nan pwunod, E mahsanih, “I pahn … kihsang amwail katoutou kan, me kumwail kakete sohte kehn , … pwe kumwail en kak ese me Ngehi , Kauno kin pwarek nei aramas akan nan arail kahpwal akan.”2 Krais kin ketin kamwahuiahla ohla kan.
Ekei kitail kin pwangada.
Elder Jeffrey R. Holland patohwan: “E sohte koasoandi kitail en tang marahra sang wen me kitail kak. … Ahpw, [mehdate met] I ese ... me tohtohn kumwail kin tang [uhdahn], marahra eri karehda sohla amwail kehl oh angimwail eri ekei pak sohla mehn kakehlailih kumwail.”3 Ansou me koapworopwor kin audeikitaila, kitail kak kahkala mwuri oh peki rehn Samatail Nanleng dahme kitail anahne uhdihsang. Kisehn atail mour kin songosong en esehla dahme kitail sohte pahn wia. Ahpw, ekei pak mour kin inenen kapwang. Sises mahsenih “Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla.”4
Krais kuwpurki iang kitail oh waik pwe kitail en marahra dahsang atail katoutou kan. Krais iei kommoal.
Ekei Kitail Pehm me Kitail Sohte Duwehte Pali Tohto en Aramas.
Pwehki kahrepe kei, kitail pehm me aramas sohte kin pwungkinkitail. Kadehde Kapw kasalehda soangen wiepe kaselel me Sises Krais ketin wia pwe en kak sewese soangen aramas koaros: me toktok kan, soun rik daksis kan, serihkan, mehn Kalilih kan, soun netin paliwar akan, soun netinet kan, lih akan, mehn likih kan, me dipan akan, mehn Sameria kan, lihohdi kan, parisi kan, sounpei en Rom kan, soun kamwahl akan, me saminkihla dihp. Kerenieng nan soai koaros, koaosiahda duwen ah kin ketin sewesehda irail kan me aramas sohte kin nohn pwungki nan pein arail wehio.
Luk 19 koasoaiahda soaipen soun rik daksis en Seriko men me adaniki Sakies. E douda nan tuhkeu pwe en kilang Sises ah pahn aluhdohu. Sakies wie tohn doadoahk ohng koperment en Rom oh mehn Suhs ako kin wiahki aramas mwersuwed oh dipan. Sises mahsanihada nan tuhkehu oh eker, mahsanih, “Sakies, mwadang, doudihdo; pwe I pahn kohla nimwomwo rahnwet.”5 Oh ni Sises Ah mahsanihada mwahu mohngiong en Sakies oh soahng kan me e wiahng aramas teikan, E ahpw alehda luhko, koasoia, “rahnwet komour lelehr nan ihmw wet, pwehki e pil wia nein Eipraam pwutak.”6
Krais pil mahsanih ong mehn Nihpai kau, “I inoukiong kumwail me sohte emen pahn kohkohla.” 7 Piter pil alehdi soangen kaudiahlo nan Wiewia kan 10 ansou me e pakairkihda me, “Kauno kasalehiong ie me I sohte pahn ekerki ekei aramas mehn liki de samin.”8 E wia koasoandi kehlail ehu ong tohnpadahk souleng kan en Souleng en Imwin Rahn-akan en kasalehda arail limpoak ong emen emen.9 Sises pil luklukei kitail duwehte Ah ketin luke Sakieso: “Rong I uhier ni wenihmwo, wie letelet: Ma [ke] rong ngileiet, oh ritingada wenihmwo, I pahn pidelongowei [rehmw], I pahn iang uhk, oh ke pahn iangie kita ahpw koanoakoanoat.”10 Krais kin kilang kitail nan tuhkeu.
Ekei kitail ohkilahr peidengkan.
Sounpar kei samwalahro I nsensuwedkihla oh mwomwen lingeringerkihda peidek kei me I sohte kak sapengala. Nimenseng en rahnkaunop ehu I ahpw ouramanda. Nan ouramano I kilangada kisin ihmw kis oh I ese me I pahn kohla oh kesihnenda loale. Mie wenihmwtok pwonopwon limau pidahkihpene, ahpw wenihmwtok ko wiawihkihda takai. Nan ouramano I kaulim, pwehki I sohte men kohla loale pwe e nohn koait. Ahpw madamadau ehu kodohngie me rien Sared pwutako kapeipeseng takai wiakihla klahs. Klahs iei takai me kin wekdekla. Ansou me Kauno Sair nein rien Sared pwutako kisin takai ko, Irail ahpw marainda nan sohp rotoroto.11 Sohte pwand I ahnkidahr pepehm en men pidolongala nan kisin ihmwo sang wasa teikan. Ih wasahu—ihte wasa—ong ie me I uhdahn men “kilang.” Peidengkan me kin kapwkapwunodeie sohte kohsang rehi, ahpw nan ahi madmadau marainkihda peidengkau ni ansou me I pirida: “Ia mwomwen ahmw kak kalaudehla ahmw pwoson, me duwehte rien Sared pwutako, pwe noumw takai kan en kak marainda?”12
Atail mwahliel kan wiawihda mehn kitail en rapahki loalokong oh wehwehkihla soahng kan I sohte ese kahrepe koaros me karehda kahdengo me koaduhpwalkitaildi ah nohn mosulki. Kaidehn ansou wet ansou en ese pasapeng kan ahpw ansou en kakairada palingenitail. Ansou wet me kitail pahn kamwahuiala atail inou de (ekei pak koapworopworki) soahng kan me kitail sohte kin kilang. Kamwahuiala atail wiewia kan sohte kin kalapw mengei en kasawihada, ahpw mie marain wasa rotorot kan. Sises mahsanih, “Ngehi me marain, oh mour, oh mehlelpen sampah.”13 Ohng irail akan me kin rapahki mehlelo, ni tapio eh pahn duwehtete mih nan pere tikitik oh wenihmwtok kan wiawikida takai. Ahpw ni kanengamah oh roporop ni pwoson, Sises kak wiahda wenihmwtok takai ko en wiahla kilahs oh marain. Krais iei mehn kamarain.
Ekei Kitail kin Pehm me Kitail Sohte Kak Itar
Mehn koaduh poh weitahta me mih nan Kadehde Mering kaidehn poh mwahi te ahpw e pil sohte kak sarasang, me wehwehki weitahtao sohte kak kohsang ni likouo mehndahte ma e lopwolopw pak tohto.14 Sehdan doadoahngki wiepe wet ni duwe met: dene likou pwetepwete me mwahila sohte kak pwurehng pwetepwetala. Ahpw Sises mahsanih, “Ahi wiewia kan ileilehsang amwail wiewia kan,”15 oh manaman en Sapwellime kalahngan kin doadoahk ansou me kitail kin koluhla, Sawpellime ntao kamwakeleikitailda. E sohte mengei en wehwehki, ahpw e mehlel.
Kilel sang iStock.com/iinwibisono
“Mehnda ma kumwail weitahtahkilahr dipamwail kan, ahpw I pahn kamwakeleikumwailda duwehla sinoh. Mehnda ma dipamwail wiahla mwahi weitahta douluhl, ahpw kumwail pahn pwetepwetala duwehla wunen sihpw.”16 Kauno ketin mahsanih: mehmen “me kolukilahr … [dipe], e pahn ale mahkepen dipe, oh Ngehi Kauno sohte kin tamtaman.”17 Kauno mahsanih: Kumwail kohdo mahs kitail kapwungala mahs ire pwukat.18 Ke kin wiahda sapwung; koaros kin wiahda sapwung. 19 Kohdo rehi oh koluhla.20 I pahn manokehla dipomw kan.21 Ke kak pwurehng unsekla.22 Mie doadoahk me I mwahuki ken wia.23 Krais kin kamwekele wunen sihpw pwehn pwetepwetala.
Ahpw dahnge kendahke anahnepe kan? Dahme keieu kesempwal pwe aramas en kak poadohng ni manaman en Sises Krais ansou me atail maraino wie luluwet? Presiden Russell M. Nelson mahsanih e inenen mengei: “Me keieu kesempwal iei en wiahda oh kolokol inou sarawi kan. … E sohte apwal.”24 Poahsoankihda Krais ahmw mour.”25
Ma ke pehmada me marain en ahmw kadehde wie tikitikla oh wie rotorotala, kumwail en koapworopwor. Kolokol ahmw inou ong Kauno. Kihda ahmw peidek kan Kanengamahieng kapeipeseng takaio pwehn wiahla kilahs. Sohpeilahng Sises Krais, me ketin loaloalete komwi.
Sises mahsanih, “Nghei me marain me kin serehda nan rotorot, oh rotoroto sohte kak karotongehla.”26 Met wehwehki e pahn wia wen ah kak koaros, ahpw rotoroto sohte kak karotongehla maraino. Kohkohlahte. Ke kak koapworopworki me Sapwellime maraino pahn ieiang uhk.
Kitail, de aramas me kitail poakohng, kak ekei pak mihla nan rotorot. NI Tehnpas Sarawi en Salt Lake eh rotorotala, mie me mwadang en koahl Brother Val White, me sounkohwahki tehnpaso. Aramas tehkada. Dahme sapwung ni dengkihn tehnpaso? Keieu, tohn doadoahko kohlongala nan tehnpaso oh kaokehda nan panelo eri dengki koaros ahpw pwurehng okada. Eri irail ahpw kihsang padiri ko nan mesihn ko oh desih pwe ren diarada dahme sapwung.
E apwal ken kelehpw kaokehda dengkio. Kitail anahne kempoakepatail kan. Kitail anahne emen emen kitail. Me duwehte tohn doadoahk me kin apwalih nan tehnpaso, kitail kak sewese emen emen sang ni atail pahn kohla reh, kakehlailihala neitail padiri en pali ngehn pwehn kamwahuiala dahme sapwung.
Ele pein atail marain rasehngete kisin dehngki ehu ni tuhke Ahpw emen emen kin sara pein ah kisin marain kis, duwehte Temple Square ni ahnsoun Krismas, kitail kin wahdo aramas rar samwa ohng ni tehnpas en Kauno. Me keieu mwahu sang koaros, me Presiden Nelson kakehlaka kitail, kitail kak wahdo marain en Sounkomouro nan atail mour oh irail kan me kitail kesempwaliki sang ni kisin ire mengei me iei kolokol arail inou sarawi kan. Ni soangen mwomwen ahl ekei, Kauno kin katingiheki me pwoson kan kehl oh peren.27
I kadehdeki me e poakohng uhk. Kauno mwahngih ia wen ahmw nannanti. Ke wie kekeirda. Wenla mwowe. E kin mahsanihada ahmw tohnmeteikan oh kapatahieng ahmw wiewia mwahu kan oh mwahu en irail kan me ke poakpoake. Ahmw doadoahk kan sohte doadoahk mwahl. Ke sohte kelkelehpw. Uhdahn mware iei, Imanuel, me wehwehki “Koht kin ieiang kitail.”28 E kin ketin ieiang uhk.
Alialu kohwei pohn ahl en inouo, mehndahte ma ke sohte kak kilengwei wasa doh pwe me nohn rotorot. Maraino pahn pwurodo. I kadehde me Sapwellimen Sises mahsen kan me mehlel, oh re audaudkihda maraino: “Keido rehi oh I pahn keiwei rehmw; rapahkinie oh ke pahn diariehda; peki, oh ke pahn ale; letelet, oh e pahn ritdahnguhk.”29 Ni mwaren Sises Krais, ahmen.