Rongamwahu en Sises Krais Mehlel, Mwakelekel oh Mengei
Poakoahng Koht oh poakoahng mehn mpatail kan me wia poahson en doahdoahk en papah; kasukuhl en nan peneinei oh sang Mwomwohdiso; kaudek en rahn en Sapad; oh doadoahk en komour.
Riei ohl oh lih akan, e apwalehng ie ien kamehlele me sounpar 71 samwalahro nan 1948, I wia emen misineri nan England oh sounpar 44 samwalahr ngehi oh ai pwoud Barbara wahla aht peneinei Canada ni ansou me I wia presiden en Canada Toronto Misin. Ni ansou I papah wasao nan Epreil 1976, I alehdi pwukoah ohng Pwihn en Utuht Keieu en Isiakan, oh ni soh kasikpe nan 1985, I alehdi pwukoah ohng nan Pwihn en Wahnparon Ehk-riemeno. Ni eh weksang ahi pwukoah kan en mwowe me iangahki me I kin komoaldihsang kan, ahpw ien komoaldihsang ai pwukoahn wia emen Ehk-riemeno sohte wia pilipil me keieu mwahu ohng ie ansou wet; ahpw, I kapakapki me I pahn komoldi mwurin ahi wiadahr mehkoaros me Kauno malipehkin ie en wia.
Ni ahi kin medewe sounpar 43 me I wie papahki ni ahi wia emen Kaun Lapalap oh ansou mwahu me I ahnekiher pwehn sewese seri kan en Sahm Nanleng, I diaradahr ni mehlel me E ketin kuwpurki Sapwellime seri koaors, irail koruhsien, en diar meleilei, popohl oh peren nan arail mour.
Soukohp Lihai padahngki me, “Ohl [oh lih] kan mie pwe irail en kak ahniki popohl.”1 Mie kahrepe tohto me kitail sohte kin diarki meleilei, popohl oh peren nan mour wet, iangahki paisuwed, mahwen, kahpwal en sampah oh kerempw soh kasikpe kan nan wasahn doadoahk, en paliwar oh ehupenehn nan peneinei.
Ahpw tetehn kitail sohte kak powehdi kahpwal en mas liki pwukat me kin kamwakid atail mour kan pohn sampah, ni atail kin nanantihong en wiahla tohnpadahk pwoson en Kauno Sises Krais, kitail kak diar meleilei, popohl oh peren tetehn kahpwal en sampah kan me kin kapil kitailpene.
Ehu pako emen nei serihko nda, “Ipa, I medmedewe me I sohte pahn kak pweida.” Ngehi eri sapeng nda, “ihte me Sahm Nanleng kupwurki iei kitail en wia uwen atail kak koaros rahn koaros.” Riei ohl oh lih akan, kumwail wia uwen amwail kak koaros rahn koaros, oh e pahn sohte pwand a kumwail pahn diar me Samamwail Nanleng mwahngi kumwail oh E ketin poakohng kumwail. Oh ni ansou me kumwail pahn esehda—uhdahn esehla douluhl—e pahn miehla kahrepe oh wehwehn amwail mour, oh kumwail pahn direkihla popohl oh meleilei.
Sounkomouro ni Eh wia Marain en Sampah ahpw mahsani, “Mehmen me kamehlele ie sohte pahn kin mihmi nan rotorot.”2
“Sises Krais me iei mwahr me Sahmo ketikihda, oh sohte pil ehu mwahr me [kitail] kak komourkihla;
“Pwe kilang, ohl [oh lih] koaros anahne ale mwahr me Sahmo ketkiheng irail.”3
Pwuhk Sarawi padahkihong kitail me Sehdan kin men kahluwa aramas akan ohng nan rotorot. Ah doadoahk koaros iei en kin karotongala me mehlelo en rongamwahu en Sises Krais oh Sapwellime rongamwahuo. Iei me Lihai padahkihong nah seri kan, me tepilo kin “rapahki pwe aramas koaros en kin nsensuwed duwehte ih.”4 Ma en Sahm Nanleng “doadoahk … oh kilohri” iei “en kin wahdo mour sohte mehla oh mour soutuk en [ohl oh lih akan],”5en Lusiper “doadoahk” iei en kin wahdo nsensuwed oh lokolok soutuk ohng seri en Koht kan. Dihp oh sapwung kin karotongala Marain en Krais nan atial mour. Ihme kahrehda kitail anahne mihmi nan Marain en Krais, me kin wahdo meleilei, popohl oh peren.
Nan irair en sounpwung eisek waluh samalahro, Kauno kamarainihkier Sapwellime soukohp oh Wahnparon kan en koasonehdi wekdekla kesempwal kei. Ahpw, I periki pwe kahrepe sarawi en wekdekla pwukat de salongala nan atail perenikihda wekdekla pwukat.
Joseph F. Smith mahsanih: “Rongamwahu en Sises Krais me mehlel, mwakelekel oh mengei kopwurupwurdohr. Kitail ahniki pwukoah en apwahpwali pohn sampah wet.”6 E kapatahiong me rongamwahu mehlel, mwakelekel oh mengei iei me wia “en Krais koasondi en komour.”7
Nan Articles of Faith, Soukohp Joseph Smith padahngki me “sang ni Tomwpen Krais, aramas koaros komourlahr, sang ni peikihong kosonned akan oh tiahk sarawih kan en Rongamwahuo.”8
Keieu en padahk kan en rongamwahuo iei pwoson Kaun Sises Krais, koluhla, pepdais, ale kisakis en Ngehn Sarawi, oh dadauhrete lel imwi. Rie pwutak Hyrum padahngki me, “Padahkohng irail [oh pwurehng] kapwurehieng: kumwail ahpw pahn diar rahno oh pil mwurin rahn akan madmadau kapw akan oh kamarain laud en rongamwahuo me pahn sansalehng kumwail. Kumwail kak kadaiala amwail padahngki … pwehn wehwehkihla mwahu. Kumwail eri kak kawehweda mwahu rongamwahuo ohng irail kan me [kumwail] kin kasukuhli.”9
Me keieu mwahu ong kitail en kilang kahrepe sarawi en Mwomwohdisoht iei en kin momourki padahk mehlel, mwakelekel oh padahk mengei kan en Krais oh pil doadoahngki Sapwellimen Sunkomouro kosonned laud riauo: “Kumwail pahn poakong Kauno amwail Koht ki amwail mohngong unsek. ... Kumwail pahn poakohng mehn mpamwail duwehte pein kumwail.”10
Peikiong kosonned laud riauo pahn kalaudehla popohl oh meleilei rehmwail. Ni atail kin poakohng oh papah Kauno oh poakohng oh papah mehn mpatail kan, kitail pahn uhdahn pehm popohl laud me kin lelohng kitail ni mwohmw mwahu ehu.
Poakoahng Koht oh poakoahng mehn mpetail kan iei me wia poahson en padahk sarawi en papah; poahson en nan imwatail, Mwomwohdiso utung pelien kaskuhl; pwongih rahn en Sabad; oh doadoahk en komourla pali koaros en kahdengo me utung Relief Society kan oh pwihn en kohrum. Soahng pwukat koaros poasondahsag kosonned sarawi kan me iei poakohng Koht oh poakoahng mehn mpetail kan. Mie mehkot me pahn kak kaselel sang, kehlail sang de mengei sang mepwuko?
Momourki koasondien rongamwahu mehlel, mwakelekel oh mengei pahn mweidehng kitail ansou mwahu en kin pwarek lih oh ohl me arail pwoud kan melahr, seri sopwoupwou kan, me laloid, soumwahu oh semwehwe. Kitail pahn diar meleilei, popohl oh peren nan atail mour ni atail pahn kin papah Kauno oh mehn mpatail kan.
Wekdeklahn rahn en Sapad me kasalehda mwahu duwen poahson en nan imwatail, utuht en Mwomwohdiso nan kaskuhl oh onop en rongamwahuo wia ansou mwahu en pwurehng kakehlaka palingenitail oh atail loaloapwoat ong Koht nan atail wasahn kouson akan. Dahme pahn kak en mengei sang, sohte nohn apawl sang, oh katapan sang? Riei ohl oh lih akan, kumwail kak kilang me esehla oh kasukuhlki rongamwahuo nan atail peneinei kan wia ahl kesempwal ehu en diar popohl oh peren nan atail mour?
Me pid rahn en Sapad, Sounkomouro mahsani, “Pwe mehlel iei rahno me pilipildahr pwe kumwail en koamoaldihsang amwail doadoahk kan, oh wia amwail kaudekiong me Lapalahpieo.”11 E kapatahiong, “Pwe amwail popohl en kak unsekla … [sang] amwail pereniki oh kapakapki … kumwail [anahne] wia mepwukat ni kaping kalahngan, ki mohngiong peren oh poh komwokomw … [oh] sang ni mohngiong peren oh poh komwokomw.”12
Menlau tehk ekei mahsen kesempwal kan nan kaudial wet: popohl, pereperenki, kaping kalahnganki, mohngiong peren, peren mohngiong, oh poh komwokomw. Met wehwehki me kaudek en rahn en Sapad anahne kiheng kitail en mas peren.
Ni atail kin kalaudehla oh sarawiala nan atail pwukoah doadoahk en papah, menlau alehda wen kesemwpwal en atail pahn kin kasamwoh koaros me kin kohdo iang patehng atail kaudek en Mwomwohdiso, ahpw mehlel irail toweh kapw akan oh me kin pwarek kitail kan. Kitail koaros anahne pereniki kokoulki koul en sarawi kan oh rong mwahu mahsen kan en kapakap en kamadipw sarawi ki atail mohngiong oh atail lamalam unsek.
Emen tohn pisoprik me kin kaweid rahn en kadehde kan oh kadehdeh kan en pwoson en atail kaisihsol ahpw ehukihda kadehde mwotomwot ehu me pid pilahn en popohl oh rongamwahu en Krais me mehlel, mwakelekel oh mengeio. Koaros anahne idawehn karasaraso. Kitail anahne tamataman me mie wasa me kitail anahne ehukihda soai kan de atail seiloak kan, Ni atail kin wia atail kadehde ni mengei oh kin pidete rongamwahu en Krais, E pahn kin ketin kaweliakapwi palingenatail ni atail pahn kin ehukiheng mehteikan atail kadehde kan.
Papah ni mehlel kin keieu sansal sang ni limpoakohng Koht oh limpoak ong mehn mpatail kan. E sansalehr me kitail kin papah pwehki atail kin poakong Samatail Nanleng oh Sapwellime serih kan. Atail doadoahk mwahu en papah kan pahn pweida mwahu ma kitail pahn kin kamangaihala. Popohl laud kin kohsang ni mehkot mengei kan en mour, eri kitail anahne kanaiehng dehr medewe laud anahn kan me anahne kapatpatieng wekdekla kan me kitail alehier ong ni kalaudlahn pwoson oh kadehde kehlail kan nan mohngiong en Sapwellimen Koht serih kan.
Iremen kitail kahpwalehla mehkot oh kadirehla mihting kan de anahn teikan. Wia me mengei. Iei nan me mengei kan me kumwail pahn diar meleilei, popohl oh peren me I koaskoasoiahier.
Nan erein sounpar kei kahrepeh kan en pwihn en kaun akan en Mwomwohdiso, me sansal nan Pwuken Kaweid 2, iei me wia pweidahn doadoahk kan me sansal oh mengei, sang ni dahme I pahn wadekada:
“Sounkaweid kan kin kangoange towe koaros en ale tiahk sarawi en prihsduhd kan, kolokol inou kan oh waroahng en kak iang sepwilda oh ahniki mour soutuk. …
“Me mah kan: Kangoange emenemen me mah pwehn waroahng ale tiahk sarawi kan en nan tehnpas sarawi. Padahkihong me mah kan koaros en tehkada kadaudekerail kan oh wia tiahk sarawi kan koaros ohng irail.
“Me pwulopwul kan: Sewese kaunopada pwutak pwulopwul kan en ale Melkisedek Prihsduhd, ale tiahk sarawi en nan tehnpas sarawi, oh waroahng en wia arail doadoahk en misin. Sewese kaunopada peinakapw koaros en waroahng wiahda oh kolokol inou sarawi kan oh ale tiahk sarawi kan en nan tehnpas sarawi. Kakehlailih me pwulopwul kan ni arail kin towehda mwekid me mie katepeh kan.
“Toweh kan Koaros: Sewese kaun en prihsduhd oh pwihn kan, kaunsel en ward kan, ward oh misineri kan, oh towehkan en doadoahkpene ni wiepe pahrek ehu pwehn doarehla aramas akan, kakehlaka peneinei kan oh iunid en Mwomwohdiso kan, katohtowehla kemwekid en prihsduhd, oh kapokonepene Isrehl sang ni weliakapw, katengehdi oh kapwurehdo towehkan. Padahkihong towehkan en kin apwali pein irail oh arail peneinei kan oh sewese me semwehmwe oh me anahn kan nin duwen me Kauno kin ketin wia.”13
Ei papah nan Mwomwohdiso wet kapaiedahr ki irair kapwuriamwei kan en palingehn. I wia emen sounkadehde me Kauno kin kahluwa Sapwellime Mwomwohdiso pwehn kapwaiahda Sapwellime doadoahk kan. I alehdier kaweid sarawi me laudsang dahme I kin pein medewe me I kakehng. Popohl en momourki rongamwahuo ohng ie poahsonkihda mehlel, mwakelekel, oh padahk mengei oh rongamwahu en Sises Krais.
I papahkiher pahn kaweidpen kih kan oh kaweid kan en soukohp wenemen oh Presiden kan en Mwomwohdiso sang Spencer W. Kimball lel Russell M. Nelson. I kadehde me emen emen irail wia soukohp malipilipdahkei sang Koht. Irail padahkiheng kitailehr padahk kesemwpwal akan me pid duwen Mwomwohdiso wet oh rongamwahuo oh padahk melehl en Krais. President Nelson wouwa kowei Sapwellimen Kauno doadoahk ni wen marahra ehu. I nda “marahra” pwe ih kelehpw nan pwungen Wahnparon kan me mahsang ie, ahpw I kin ahneki ansou apwal en pwakihiedi ih! I wia soun kadehde me kadehdehki me kih kan en prihsduhd oh kapwat en soukohp en Koht patohier powe. Presiden Nelson kin padahngki rongamwahu en Sises Krais mehlel, mwakelekel oh mengei. I kadehdehki me Sises iei Ih me Krais oh Sapwellime Mwomwohdiso met—iei met me I kadehdehki ni mwaren Sises Krais, ahmen.