Weliakapw Kehlail oh Poatopoat ong Sahm Nanleng oh Kaun Sises Krais

Sang Elder Quentin L. Cook

En Pwihn en Wahnpoaron Ehk-riemeno

Aht pwukoa iei en kak sewese mwomwohdiso oh peneinei kan en kak ahniki pwoson laud oh kehlail en pali ngehn oh weliakapw ni mehlel.

Ihme Presiden Russell M. Nelson ahpwtehn kawehwehda mwahu, sounkaweid kan en Mwomwohdiso wet koadoakoadoahkehier ansou reirei wiepen “sukuhlki duwen padahk kan, kakehlaka pwoson, oh kakairada kaudok me peneinei oh Mwomwohdiso wet kin sewese.” Presiden Nelson pil pakairkihda ehu wekdekla me pahn elehda “kapahreklahn kasukuhl en rongamwahuo nan peneinei oh nan Mwomwohdiso wet.”¹

Pwehn kapwaiahda mepwukat—me pakairdahr pahn kaweid en Presiden Russell M. Nelson oh nin duwen koasoandi en Kaunsel en Presidensi Keieu oh Pwihn en Wahnpoaron Ehk-riemeno—mihting en Rahn Sarawi pahn wekdekla nan ire pwukat tepda nan Sanuweri en 2019.

Koasoandi en Rahn Sarawi

En Mwomwohdiso wet mihting kan en Rahn Sarawi pahn audaudki ehu mihting en kamadipw sarawi me reireiki minit 60 ni ehu Rahn Sarawi, me doke Sounkomouro, tiahk sarawi en kamadipw sarawi, oh padahk sarawi. Mwurin keseulahng nan pere kan, tohn Mwomwohdiso wet pahn iang ehu kasukuhl me pahn kin wekwekidek ni ehuheu Rahn Sarawi.

Santi Skuhl pahn kin wiawi ni keieu oh kesilulhn Rahn Sarawi kan.
Mihting kan en Prihsduhd, Pwihn en Sawas en Lih, oh Peniakapw kan pahn kin wiawi ni keriau oh kapahioun Rahn Sarawi kan.
Mihting kan ni kelimwauhn Rahn Sarawi pahn kin wiawi pahn kaweid en pisop.

Praimeri pahn kin wiawi wihk koaros ni ansou me mihting en minit 50 kan kin wiawi me pahn audaudki koul oh kasukuhl.

Kilel

Koasoandi en kaskuhl en rahn sarawi

Me pid koasoandi en mihting en Rahn Sarawi, sounkaweid mah kan en Mwomwohdiso wet diaradahr nan erein sounpar kei me ekei towe kan kin apwalki ieiang sarawi awa silu ni Rahn Sarawi kan. Met me inenen mehlel ong pahpa/nohno kan en seri tikitik, seri en Praimeri, me mah kan, towe kapw kan, oh mehteikan.²

Ahpw mie kahrepe tohto me elehda wekidekla wet en kamwoatehla koasoandi en mihting en Rahn Sarawi. Presiden Nelson pil kasaledahr ah tungoal kaping kalahngan ong uwen me kin pweida sang ni pwoson en towe kan. Ih oh koaros me kaukaweid Mwomwohdiso wet, anahne pahpa/nohno kan, seri kan, me pwulepwul kan, me kiripw kan, me mah kan, souleng kapw kan, oh irail kan me mesneri kan kin kaskasukuhli nan imwarail kan pwehn pahrekiong dahme re ale nan Mwomwohdiso wet en ahneki peren laud nan rongamwahuo. Koasoandi wet oh wekdekla kan me apwtehn wiawi pwehki kahrepe kan oh kapai pwukat:

Kaloaliala weliakapw ong Sahm Nanleng oh Kaun Sises Krais oh kakehlaka pwoson ni Mwararail.
Kakehlailiala emenemen aramas oh peneinei kan arail kasukuhl nan peneinei oh nan Mwomwohdiso wet me kalaudehla arail perenki rongamwahuo.
Wawauneki rahn en Sapad, ni mehlel tiahk sarawi en kamadipw sarawi.
Sewese seri en Sahm Nanleng kan koaros me melahr or momour pwehki doadoahk en misineri oh aliahle tiahk sarawi kan oh inou kan oh kapai kan en nan tehnpas sarawi.

Utupen Wehwekihla Rongamwahuo nan Ihmw oh Mwomwohdiso

Koasoandi en Rahn Sarawi wet pahn kalaudehla ansou ong ehu soutik nan wasahn kousoan oh onopiki rongamwahuo nan peneinei kan ni Rahn Sarawi, de ni ansou teikan me emenemen aramas oh peneinei kan pahn pilada. Ehu soutik en peneinei kak wiawi Niehd de ehu ansou tohrohr. Pwehki met, sounkaweid kan anahne dehr koasoanehdi mehkot ong ni soutik en Niehd kan. Ahpw emenemen aramas oh peneinei kan me pahn koasoanehdi ansou me re pahn onopiki rongamwahuo oh mwekid teikan.

Kilel

Idawehn Iehdo—Ohng emen emen oh Peneinei kan

Onopiki rohngamwahu me peneinei oh emenemen aramas akan kin wia pahn kehlaila ma re kin doadoahngki mehn kasukuhl kapw Come, Follow Me [dipwisoun kasukuhl] For Individuals and Families me kin peiante kasukuhl me kin wiawi nan Santi Skuhl oh Praimeri.³ Nan Saniweri, me pwulepwul oh me mah nan Santi Skuhl oh Praimeri en Mwomwohdiso wet pahn kasukuhlki Kadehde Kapw. Mehn kasukuhl kapw Come, Follow Me [dipwisoun kasukuhl] For Individuals and Families—pil iangahki Kadehde Kapw—me wiawihda pwehn sewese towe kan en onopiki rongamwahuo ni imwarail. E kawehweh me: “Dipwisou wet wiawihdang aramas oh peneinei koaros nan Mwomwohdiso wet. E wiawihda pwehn sewese [kitail en esehla mwahu] rongamwahuo—ong pein [kitail] de ong [atail] peneinei. … Koasoandi kan nan mehn kasukuhl [kapw] wet koasoandi ong kasukuhl en ehu wihk.”⁴

Mehn kasukuhl kapw ong Praimeri Come, Follow Me me kin kasukuhl nan mwomwohdiso pahn idawehn koasoandi en wihk ohte. Santi Skuhl en me mah oh me pwulepwul ni keieu oh kesiluhn Rahn Sarawi kan pahn pil kairekdi mwahu pwehn utungada mehn kasukuhl kapwo Come, Follow Me. Ni keriau oh kapahieun Rahn Sarawi, me mah kan nan Prihsduhd oh Pwihn en Sawas en Lih pahn peusehla arail sukuhlki padahk kan sang sounkaweid en Mwomwohdiso wet kan, ahpw mehlel padahk kapw sang soukohp kan.⁵ Peinakapw kan oh Prihsduhd en Aron kan pahn onopiki oaralap en rohngamwahuo ni Rahn Sarawi pwuko.

Mehn kasukuhl kapw en nan peneinei audaudki “Wiepe kan en Onopiki Pwuhk Sarawi nan Peneinei oh Soutik en Peneinei.”⁶ Oaralap kan en ehuehu wihk kin audaudki kaweid en onop oh mwekid kan ong emenemen aramas oh peneinei kan. Come, Follow Me [dipwisoun kasukuhl] For Individuals and Families pil kolokol ire tohto me pahn sewese kalaudehla en emenemen aramas oh peneinei arail kasukuhl, ahpw mehlel en seri kan.⁷ Dipwisoun kasukuhl kapw wet pahn nehneieng ehuehu peneinei ni Tihsempe en par wet.

Presiden Nelson, sangete ni tepin padahk me e wiahiong tohn Mwomwohdiso wet nan Saniweri, kaweidkinkitailehr en onopada ong Ketdo Keriau en Sises Krais ni atail kin kolokol atail inou kan.⁸

Pwehki piripir en mwehiet, kitail anahne kaloaliala atail weliakapw ong oh kakehlaka atail pwoson Sahm Nanleng oh Sises Krais oh Sapwellime Tomwo. Kauno ketin kaunopadahr ong kitail, irehn kaweid ong ansou apwal me kitail sohsohpai. Nan pahr kei me kerendo, Kauno ketin kamarainihkin kitail en apwali inondehn ire pwukat me iangahki:

Wauneki rahn en Sapad oh tiahk sarawi en kamadipw sarawi me koangoangpe pwurehng wiawi nan irari en sounpar silu samwalahr ko.
Pahn kaweid en pisop, pwihn en prihsduhd oh Pwihn en Sawas en Lih kan me kehlaildahr kin kapwaiada pwukoahn Mwomwohdiso wet⁹ oh sewese towe kan wiahda oh kolokol inou sarawi kan,
Sausawas ni mwoahmw kaperen oh lingan pil wiawihier ni popohl.
Medemedewehn pweidahn doadoahk, inou kan en nan tehnpas sarawi oh sawas ong poadopoad en peneinei wialahr kisehn apwali inou kan.

Wekidekla me pakairdahr ni mensengo wia ehu karasaras en kaweid ong kahpwal kan en rahn pwukat.

Dipwisoun kasukuhl en Mwomwohdiso wet dokedoke dahme kin alalhdi nan Sarawi en Rahn Sarawi. Kitail ese me ni ansou me kitail ale kasukuhl mwahu oh towe kan me kaunopadahr palingenarail, kitail kin ale kaweid mwahu sang Sarawi en Rahn Sarawi. Kitail kin ale kapai ansou me Ngehno kin kakaraida oh kakehlaka weliakapw nan Mwomwohdiso.

Dipwisoun kasukuhl kapw me peneinei oh Mwomwohdiso wet kin sewese anahne kakehlaka en peneinei arail kin kaudok oh wiewia oh en aramas arail kin kaudok oh wiewia. Kitail ese uwen manaman en ngehno oh weliakapw loal oh poatopoat me kak alahldi nan wasahn kousoan. Sounpar kei samwalahro, ropirop ehu kasalehda me mwahakapw oh peinakapw kan kin ale kaweid sang Ngehn Sarawi ni arail kin pein onopki pwuhk sarawi oh kapakap nan arail wasahn kousoan. Atail pwukoa iei en kapahrekiala sawas me kitail kin ale nan Mwomwohdiso oh nan wasahn kousoan ni mwoahmw ehu me pahn kakairada pwoson, palingehn, oh kaloaliala weliakapw ong Sahm Nanleng oh Kaun Sises Krais.

Nan pali en sawas sang wasahn kousoan oh Mwomwohdiso, e mweimweiong emenemen aramas oh ehu peneinei en pilada ni kapakap ansou da oh mwomwen eh pahn wiawi. Ni karasepe, tetehn e pahn kapaiada peneinei kan, nin duwen anahn kan me mie, e pahn inenen mwahu ong me kiripw pwulopwul kan, me mah kiripw kan, pahpa/nohno me kiripw kan, peneinei me ekeite me wia towe kan, souleng kapw kan¹⁰ oh meteikan en kin pokonpene likin kaudok kan me kin wiawi Rahn Sarawi pwehn ehupene oh ale kakehlail sang ni arail kin wiahki ehu onopki dipwisoun kasukuhl en Mwomwohdiso nan wasahn kousoan kan. Met pahn kin wiawi sang irail kan me anahne.

Nan wasa tohto kei nan sampah, aramas akan kin men mihmihte nan ihmw sarawi mwurin kaudok en Rahn Sarawio pwehn patpene oh pereperenpene. Sohte mehkot nan wekdekla wet me pakairdahro pahn kerempwa mwekid mwahu oh katapan wet.

Pwehn sewese towe kan onopada ong Rahn en Sapad, ekei ward kan kin kadar pakair nan internet mwohn Rahn Sarawi. Pwehki wekdekla wet, se koangoange soangen wehwepene wet en kin wiawi. Pakair pwukat kin katamanehng towe kan koasoandi en mihting en Rahn Sarawi kohkohdo, iangahki oaralap en padahk, oh kin sewese pepeuslan koaskosoi en rongamwahuo nan wasahn kousoan. Mihting en me mah kan ni Rahn Sarawi pahn pil kihda ire kan me pahn kadokepene kasukuhl en nan Mwomwohdiso on wasahn kousoan kan nan ehuehu wihk.

Mihting en kamadipw sarawi oh mihting en mwurio pahn anahne meleilei ni kapakap pwehn kak kesempwaliki koasoandi kan en palingehn ahpw kaidehn pirokrahm akan. Ni karasepe, pakair kan kak ansou koaros wiawi nan luhk me kin kohda mwohn Rahn Sarawi de ntingda nan ehu doropwehn pirokrahm. Pwehki kapakap en ritingada oh ritingedi pahn anahne wiawi nan mihting en kamadipw sarawi, mihting en mwurio pahn anahnete kapakap en ritingedi.¹¹

Nin duwen eh kasansaldahr mwowe, koasoandi en mihting kapw wet pahn ahpw tepda nan Sanuweri 2019. Iet kahrepe kan. Me keieu kesempwal kan iei, keieu, pwe en mie ansoun kihpeseng Come, Follow Me [dipwisoun kasukuhl] For Individuals and Families oh, keriau, pwehn mie ansou ong steik presiden kan oh pisop kan en koasoanehdi ansoun mihting kan pwehn kak ahneki ansou mwahu en tuhpene mwowe ni rahno.

Ni en sounkaweid kan ahr rapahki kaudiahl, kaweid me alahldi nan irair en sounpar kei iei en kakehlaka mihting en kamadipw sarawi, wauneki rahn en Sapad, oh koangoange oh sewese pahpa/nohno kan oh aramas akan en wiahkihla arail wasahn kousoan kan wasahn kakehlaka palingehn oh kakairada pwoson—wasahn popohl oh peren.

Kapai Kan

Ia wehwehn wekdekla pwukat ong tohn Mwomwohdiso en Sises Krais en Souleng en Imwin Rahn-akan? Se liki me towe kan pahn ale kapai mwuledek. Rahn Sarawi kak wiahla ehu rahn en onopiki rongamwahuo oh padahk kan en mwomwohdiso nan wasahn kousoan kan. Ni en emenemen aramas oh peneinei kan arail pahn ehupene nan kaunsel kan en peneinei, poadopoad en peneinei, sausawas, papah, kaudok en emenemen aramas, oh ansou mwahu en ehupenehn peneinei, Rahn Sarawi pahn wiahla rahn kaperen ehu.

Kilel

Peneinei en Carvalho

Ehu peneinei sang Brazil wia tohn ward me songadahr dipwisoun kasukuhl en nan wasahn kousoan Come. Follow Me. Pahpao, Fernando, emen mesneri me pwuredohr, oh ah pwoud, Nancy, nainiki seri pwulopwul pahmen repwohtki me: “Ansou me pirokrahm en Come, Follow Me leledo nan aht steiko, I inenen perenkihda, oh I medewehda me ‘wiepen aht onopki pwuhk sarawi ni imwato pahn wekila.’ E inenen pweida ni imwato, oh ni ei wia emen sounkaweid en Mwomwohdiso wet I nsenohki en pil pweida nan wasahn kousoan teikan. … E sewesehda aht kin koasoia pwuhk sarawi ni imwato. Ahi pwoud and ngehi wehwehkihla mwahu ire me se kin onopiki. … E sewesei kiht … kalaudehla aht wehwehki rongamwahuo oh kakehlaka aht pwoson oh kadehde. … I kadehde … me I ese me Kauno me kamarainih pwe kasukuhl en kosonned oh padahk nan pwuhk sarawi en kak poaden kakairada pwoson, kadehde, oh marain ong peneinei kan … nan sampah dipan wet.”¹²

Nan steik kan me pirokram wet kasosohngdahr nan sampah, e sansal uwen arail pwungki dipwisoun kasukuhl en nan wasahn kousoan kapw wet Come, Follow Me. Me tohto repwohtki me arail wadek pwuhk sarawi kekeirda oh met re kin uhd onopiki pwuhk sarawi. Mie pepehm laud me mwekid wet kakehlailiala pwoson oh elehda wekdekla mwahu nan sampah.¹³

Weliakapw Kehlail oh Poatopoat

Kahrepen wekdekla pwukat iei en elehda weliakapw kehlail oh poatopoat rehn me mah kan oh dih en aramas kohkohdo. Pali keieu en dipwisoun kasukuhl ong emenemen aramas oh peneinei patohwan: “Kahrepen kasukuhl oh padahk koaros en rongamwahuo iei en kakehlaili atail weliakapw oh sewesei kitail en duwehla Sises Krais. … Met wehwehki me kehlki Krais kin wekidala atail mohngiong kan.”¹⁴ Met kin pweida sang ni “kadaialahn kasukuhl ong nan mohngiong en aramas oh wasahn kousoan. E anahne wiewiawi rahn koaros oh momourki rongamwahuo. Weliakapw mehlel anahne sawas en Ngehn Sarawi.”¹⁵

Kilel me keieu kesempwal oh kapai mwuledek en weliakapw kehlail oh poatopoat iei en warehng ale inou kan oh tiahk sarawi kan en inouo.¹⁶

Se koapworopworiki me kumwail pahn ehupene oh rapahki kaudiahl pwehn kapwaiada wekdekla pwukat—ahpw sohte rapahki dahme sohte konehng de idingehng emenemen aramas oh peneinei kan. Ire kapatapat kan ahpw pahn pekeder nan mehn kair kohkohdo, iangahki kisin likou oh me patehng kan sang Presidensi Keieu.

I kadehde ong kumwail me nan mihting kan en Kaunsel en Presidensi Keieu oh Pwihn en Wahnpoaron Ehk-riemeno nan tehnpas sarawi, oh mwurin en atail soukohp kempoakeo pekiher Kauno en ketkihda kaudiahl pwehn kamwakidada wekdekla pwukat, irail koaros ahpw alehdi pasapeng kehlail ehu. Russell M Nelson iei atail Presiden oh soukohp. Pakair kan me wiawi rahn wet pahn elehda kapai kan ong irail kan me perenki kapwaiahda wekdekla pwukat oh rapahki kaweid en Nghen Sarawi. Kitail pahn karaniala Samatail Nanleng oh atail Kaun oh Sounkomour, Sises Krais, me I wia emen sapwellime sounkadehde. Ni mwaren Sises Krais, amen.