Kamehlele, Limpoak, Wia
Kitail alehdi mour unsek sang ni atail wiahla tohnpadahk mehlel en Krais—idawehn Ah padahk, oh iangala Sapwellime doadoahk.
Riei ohl oh Lihakan, ehu ansou kaperen ni ahi patehng kumwail rahn kesemwpwal en kapokon lap rahnwet: en rong padahk kapwuriamwei kan;rong pwihn en koul lingan sang irail misneri kan me weliandi ihr misneri kid kei pidahki sampah—neitail serepein, neitail pwutak kei—me patkipene atail pwoson rahnwet, pwurehng utungada neitail Presiden de soukohp, Presiden Russel M. Nelson, Presidensi keiou, oh iangahki irail Kaun lapalap kan nan Mwomwohdisoht.E wia rahn kaperen ehu ni ahi patehng kumwail rahnwet.
Nahnmwarki Solomon wia emen aramas me keieu kepwehpwe nan poadoapoad.1 E ahnikisoahng koaros mwohni, manaman, limpoak, waun. Ahpw mwurin sounpar ekei nsenen palinwere, oh pwainkidahr mwohni soahng tohto kaselel kan, iamwomwen Nahnmwarki Solomon ah kasalehda eh mour?
E koasoia, “Soahng koaros sohte katepe,”2.
Ni imwilao, ohl menet me ahniki soahng koaros nsensuwedlahr, rotalahr, oh sohla peren pwehki soahng koaros me e wiadahr.3
Mie lepin kahs en German ehu, Weltschmerz. Ni sansal, e wehwehki nsensuwed me sang ni medemedewe soahng kan me sohte kaperen duwehte dahme sampah kin wiahieng kitail.
Mehlel, mie kisin Weltschmerz rehtail koaros.
Ansou me kitail kin pehmada atail mour kin toutoula, Ansou me kitail kin pehmada nsensuwed laud nihpwong oh ninrahn, Ansou mehkot me sohte mwahu wiawihong kitail, oh pil irail kan me kitail kin poakpoake. Ansou me kitail kin weweidki pein nsenatail oh kin leleohng kasongsong laud, oh medek me kin karotongei kitaila oh kansensuwedih kitaila—kitail anahne kamehlele dahme Solomon koasoiao me mour wet sohte katepe oh sohte kak kiong kitail mehkot.
Koapwoaroapwoar Laudo
Rohng kapwo iei, mie koapwoaropwoar. Miehier pasapeng pen mehkot mwahl pwukat, souwarohngoh Weltschmerz me kin wiawi nan atail mour. Pil miehier pasapengpen sou koapwoaroapwor, oh luwetala me kumwail kin kehnda.
Koapwoaroapwor wet dierekda sang manaman ehu me kak wekidkitaila me iei rongamwahu en Sises Krais oh manaman en Sapwellimen Sounkomouro tomwo me kamwahuiala pali ngenitail.
Sises masanih, “I kohdo pwe aramas akan en kak ahniki mour, oh irail en kak ahniki mour unsek.4
Kitail pahn alehdi mour unsek kaidehn sang ni atail pahn nsenokihte pein atail anahn akan de atail pweidahkan ahpw sang ni atail pahn wiahla Sapwellimen Sises Krais tohnpadahk; sang ni atai pahn idawehn oh wihwia Sapwellime doadoahk. Kitail diarada mour unsekwet sang ni atail pahn manokehla pein kitail oh nantiong wia dahme Krais ketin kupwurki.
Oh dahkot kupwuren Krais? Iei kitail en kamehlele Ih, limpoak duwehte Sapwellime limpoak oh wia me E ketin wiahier.
Sises “ketla oh wihwia dahme pwung.”5 E ketla rehn irail me semwehmweh kan, me pokouslah kan, me soumwahu kan, oh me nameneklahr kan. E ketin sewesehda me sohte kehlaparail, me luwet, me sohte kempoakepahrail kan. E ketkiong irail Sapwellime ansou; E mahsenieng irail. “Oh ketin kamwahuih iraila koaros.”6
Wasa koaros me Sounkomouro ketla ie, E ketin padahngki “rohng kapw kan”7 en rongamwahuo. E ketin ehukihda mehlel soutuko me kasaledekiala palingenitail oh pil palinwaratail.
Koaros me kasarawiala pein irail ong Sapwellimen Krais doadoahk kin diarada mehle en Sapwellimen Sounkomouro inouo: “Me pahn mweidala ah mour pwehki ngehi pahn diar.”8
Solomon sapwung, riei ohl oh lih akan—mour sohte “sohte katepe.” Pwe ni mehlel, e pil kak direki kahrepe, wehwe oh meleilei.
Manaman en Sises Krais kak kamwahuiala koaros me kin rapahki Krais. I diaradahr ni sou peikasal me kamehlele oh limpoak ong Koht oh nantion idawehn Ih kak wekidala atail mohngiong kan,9 kamwahuiala atail medek kan, oh audehkihda palingenitail popohl mwuledek.10
Kamehlele, Limpoak, Wia
Pwe mehlel kitail udahn anahne wia me laudsang medewehte ahpw kitail en pil wehwehki padahk kan en rongamwahuo pwehn kak wia kamwahupen atail mour kan. Kitail anahne padokidi nana tail mour—pwehn wiahla kisehn atail mour kan oh dahme kitail kin wia.
Kitail anahne wehwehki me mourentohnpadahk tepda nan lepin koasoi silu pwukat.
Kamehlele, Poakohng, Wi a.
Kamehlele Koht, kin elehda atail pwoson Ih oh kahrehda atail liki Sapwellime Mahsen. Pwoson kin kahrehda atail mohngiong kan kakairda atail limpoak ong Koht oh mehteikan. Ni limpoako e pahn kekeirda, kitail pahn inengieng en idawehn Sounkomouro oh doula nan atail doadoahk en tohnpadahk.
“Ahpw,” kumwail kin nda, “e kin kalapw wihwiawi. Kahpwal kan en mour apwal—mehlel ahi kahpwal—ki kadohwanewei sangie wiepe mengei pwukat. Ke sohte kak kamwahuiekihla Weltschmerz lepin koasoi mengei silu pwukat: Kamehlele, Poakohng, Wia.”
Kaidehn atail koasoai kan me pahn mwahula. Limpoak en Koht o me kin kapitala, kamwahula oh komourla.
Koht mwahngih his kowe. Sapwellime seri kowe. E poakohng uhk.
Tetehn ansou me kumwail kin medewe me sohte me poakohngkumwail, E ketin poakohng kumwail.
Nan rahn pwukat—rahn koaros—E kin rapahkinuhk pwehn seweseiuk, men kamwahuihiukala, pwek kumwailda, audehkihda amwail mohngiong tehndahkan ong ni popohl mwuledek. E men koahkoahsang rotorot me karotong amwail mour oh audehkihda mehkot me momour, sarawi, oh marain lingan en Sapwellime klohri.
I pil pein esehla met.
Oh ih ahi kadehdeh ni ahi wia Wahnparon en Kaun Sises Krais me koaros me pahn kohdo rehn Koht—koaros me pahn kamehlele, poakohng, oh wia— kak pil esehla met.
Se kamehlele
Me pwuhk sarawi padahkiong kitail me, “Ma sohte pwoson kitail sohte kak kapereniada [Koht]: ahpw me pahn kohdo rehn Koht pahn kamehlele me e pahn peren.”11
Ong ekei, apwal en kamehlele. Atail pohnmwahso sohte men kitail en kamehlele. Mwein kitail kin medewe me kitail loalokong, skuhl laud, de atail ese me laud, karehda kitail sohte kak kamehlele Koht. Oh kitail kin nda me pali en lamalam wia tiahk en pweipwei.12
Dahme I esehla, kamehlele kaidehn mehkot me kitail kin linganiki duwehte mahle ehu me kitail kin en koasoia de medemedewe. Kamehlele wia mehkot ehu me kitail pahn doadoahngki nan atail mour pwe en kak sewesei kitail nan dahme kitail koadkoadoahkih, me duwehte kakerehdi pwudowomw pwe ken kak dolung me pahn mihmite.13
Kitail en kohdo rehn Koht, oh E ahpw pahn aleikitailda.14 Iei met inou ong irail koaros me kin kamehlele.
Se Poakohng
Pwuhk Sarawi masanih me wen laud en atail poakepoake Koht oh Sapwellime seri ih wen laud en atail peren.15 Limpoak me Sises mahmahsani, wasaht, kaidehn me kitail pahn doadoahngki ansou me konehng, oh pwilikihdi, de kitail pil alehda oh pil wia ehu soahng torohr. Kaidehn limpoak me ke pahn koasoia oh manokehla. Kaidehn soangen limpoak me ke wiahng emen ahpw sohte kasalehda me ke nsenohki.
Limpoak me Kauno masanih iei soangen limpoak kin sair atail mohngiong kan ansou me kitail kin pirida nimenseng, oh kin ieiang kitail rahno pwon, oh wie lalaudla nan atail mohngiong kan lao kitail wia atail kapakap en soutik.
Samatail Nanleng ketkiong kitail limpoak ehu me kitail sohte kak kawehwehda.
Ih limpoak soh idih wet me karehda atail kak kilangada mwahu mehteikan udahn ihs irail. Sang ni limpoak unsek wet, kitail kin kilang me irail Sapwellimen Koht serepein oh pwutak kei me pahn warohng en sohsohki mour poatoapoat.
Ma kitail pahn kilang mehteikan duwe met, kitail sohte kak, pohnsehse irail, de katohrei irail peseng.
Kitail Wia
Nan Sapwellimen Kauno doadoahk, e kin kalapw “wiahda kisin mehkot tikitik o mengei” ahpw “e kin kapwarehda soahng laud tohto.”16
Kitail esehier me kitail anahne kapwukapwurehieng pwe e pahn mwahula ni soahng koaros. Mehndahte ma ke keskesengki saxophone, kikimehng mpweio nan net o, de wiwie sdohsa, de dirdiraipih sompihr, e pahn sangete ni ahmw kaikaiahn me kitail pahn mwamwahukihla.17
Pwihn me Kauno wiahda pohn sampa—Mwomwohdiso en Sises Krais en Souleng en Imwin-Rahnakan—sewesei kitail en wia soahngohte. E kiong kitail wasa me kitail pahn kaikaiahnki mwomwen atail pahn momourki dahme e padahkiong kitail oh kapaida mehteikan duwehte me e ketin wiahier.
Ni atail wia tohn Mwohmwohdisoht, kitail kin ale pwukoah kan oh ansou mwahu en kohwei ni limpoak oh papah mehteikan.
Me keren, Mwomwohdiso pwurehng kapwurehda ire kesempwal ehu iei en sewese de papah mehteikan. Padahk kaselel kei me pil patehng pwe kitail en kak ese dahme kitail pahn koasoiahki ire kesempwal wet.
Ehu me kitail kahdaniki iei silepen sihpw, me pahn duwehte luhk me Krais wiahu “Kamwenge nei sihpw kan.”18A hpw, pil mie ehu mehn kerempwa: doadoahngki ahd wet kak karehda ngehi emen Silepen Sihpw en German. Eri ngehi I pereniki pwukoah en sawsawas.
Doadoahk wet ong Kitail Koaros
Mehlel, pwukoah kesempwal wet sohte kapw. Ihte e wia mehn kakapwa oh kamwahuiala atail pwukoah en kaiahnehkin kitail Sapwellimen Sounkomouro kosonned en “poakohng emen emen.”19 ehu koasoandi mwahu en kakehla oh doadoahngki kahrepen mwomwohdisoht.
Songete medewe! Uuwen dengang, aktikitik, oh kin inengieng en ehukihda rongamwahuo eh wia karasaras mwahu ehu eh kin sewese anahn en palingehn kan en mehteikan.
De doadoahk en tehnpas sarawi—raparapahki eden atail keinek kan pwe irail en iang ale kapai en mour soutuk? Met wia kilelsarawi en doadoahk en limpoak oh papah!
Medewe mwahu wiepen rapahki me semwehmwe oh mie arail ahnahn akan, pwokada pehn irail kan me daulahr de kapaida irail me soumwahu oh oh mie arail kahpwal akn. Kaidehn ih soahngen limpoak oh papah me Kauno ketin wia ni Ah ketket sampa?
Ma kaidehn kowe emen tohn Mwomwohdisoh, I lukei komwi en kohdo oh patehng kit.20 Ma kowe emen tohn Mwomwohdiso ahpw sohla patehng kemwekid kan, menlau pwurodo. Se anahneikumwail!
Kohdo, kpatahiong ahmw kehlail en ong aht aka.
Pwehki pein ahmw koahiek, kak, oh wihwia, kak seweseikit pwe sen kak pil mwahula oh pereperen. Ma ke pahn wia met se pil pahn seweseiuk pwe ken pil mwahula oh pereperen.
Kohdo, sewesei kit kawada oh kakehlailiala wiepen kamwahuiala, kadek, oh mahk ong koaros Sapwellimen Koht serih kan. Pwe kitail koaros nannantiheng wiahla mehkot kapw, “kasehla me wiewia en mahs” oh “mehkoaros wiliakapwala.”21 Koht kasalehiong kitail iamwomen—atail kak wekidkitaila. E masanih, “Ma kumwail poakohng ie, kapwaiada ahi kosonned akan.”2119Kitail doadoahk pene pwe kitail en wiahla soangen aramas me Kauno men kitail en wiahla.
Ih soangen tiahk en rongamwahu me kitail anahne doadoahngki iei Mwomwohdiso en Sises Krais. Wasahn pohnsehsehla ahn emen emen sapwung, lipahned, oh kesehdi ekei. Kaidehn, wasahn koasoaia ahn emen luwet kan, kitail pahn pwokada oh sewesehda mehteikan irail en wia dahme kitail kin wia.
Mweidehngie ien pwurehng lukeikumwail. Kohdo iang kihtl Se anahneikumwail.
Sohte unsek en Aramas
Ke pahn diarada me Mwomwohdisoh audaudkihda soangen aramas mwahu me sampa kak kihda. Irail me kadek, limpoak, mwahu, oh mehlel. Irail kin tohnmetei, doadoahk laud, oh ekei pak kin komwad.
Oh irail pil kin sapwungala ekei pak.
Irail kin wiahda sapwung.
Ekei pak irail kin nda mehkot me re sohte anahne koasoaia. Irail pil kin wia mehkot me re sohte pahn wia.
Ahpw irail kin wia met—irail kin mehn kamwahuih iraila oh karanaiala Kauno, atail Sounkomour.
Irail kin nanantiong wiahda me pwungo.
Irail kamehlele. Irail poakohng. Irail wia.
Irail kin men wiahda mwahu, kalaudehla arail limpoak, mwakelekel, oh men duwehla laud Sises.
Plahn en Peren
Ei, mour kin kak apwal ekei pak. Mehlel, kitail koaros mie atail ansou en sohla koapworopwor oh luwetala.
Ahpw rongamwahu en Sises Krais ketkiong kitail koapwoaropwor. Oh, nan Mwomwohdiso en Sises Krais, iei wasa me kitail kin tuhong irail kan me kin rapahki wasa me kitail kak wiahki atail wasahn kouson me kitail kak patpenekalaudehla atail kamenlele, limpoak, oh wia.
Mehndahte atail wekpesengkitail anahne ese me emen emen kitail wia Sapwellimen Sahm Nanleng serepein oh pwutak kei.
Ahi kaping me inenen mwuledek pwehki ahi wia towe mehlel en Mwomwohdiso en Sises Krais en Souleng en Imwin Rahn-akan oh ese me Koht poakong Sapwellime serih kan ketkiong irail plahn en peren oh wewehn mour oh ahl en kak esehla duwen popohl soutuk nan pere lingan nan mour me pahn kohdo.
I kaping kalahnganki en Koht ketikihong kitailehr elen kamwahula ohlahn palingenatail oh Weltschmerz en mour wet.
I kadehde me ni atail kamehlele Koht, ni atail poakohng Ih oh poakohng mehteikan sang nan atail mohngiong unsek, oh nantihong wia dahme Koht kupwurki kitail en wia kitail pahn diar kamwahu patail oh meleilei, peren oh kahrepen atail mour. Ni mwaren Sises Krais, amen.