Apwahpwalih Sihpw Akan
Kitail en sewesehda mehteikan sang ni limpoak pwehki ih malipilip me atail Sounkomouro kihong kitail.
Kempoakepahi men apwtehn ehukiongie me ni ah pwulopwulo, kapw nan mwomwohdiso, mie ansou ieu me e wiahkintehieu pehmada me e soansuwed nan eh ward-o. Misineri me padahki ko kesousangehr wasao, oh e kehn me e kelekelehpw oh sohte me men tehk. Ni eh sohte kempoakepah men nan ward-o, e uhd tuhwongdi kempoakepah mehn mahs kei, eri ni eh patehng iraildi, e iang irail wia soangkei me kadohwanla oh sohla patehng koasoandi kan en mwomwohdiso. Soahngkei me e wia kahrehiong eh salongasang nan mwomwohdiso. Ni pilen mese wie kerekerdi e kosoia uwen ah kapingki mehlel emen tohn mwomwohdiso ah sewesehda oh luhkehdo en pwuredo. Sounpwong kei mwuri, e pwurehng patehng kemwekid en mwomwohdiso, kakehlakahda mehteikan oh pein Ih. Kitail sou kalahnganki irail soun silepen sihpw akan nan Brazil, me rapahkihla mwahnakapw menet, Elder Carlos A. Godoy, me met iang mwomwohdehr ni tihnsouweie ni ah wia emen tohn Presedensi en Isiakan?
E kapwuriamwei mwomwen wiewia tikitik kan kin kak mie lipwe nan mour soutuk. Mehlel wet me poahsoan en doadoahk en papah nan mwomwohdiso wet. Samatail Nanleng kak ale atail wiewia tikitik kan en rahn koaros oh kalaudehla wiada mehkot kapwuriamwei mehlel. Sounpwohng wenohu doulahr Presiden Russell M. Nelson pakairkihda me “Kauno kaunopadahr wekidekla kesempwal kei duwen atail pahn epwelpene,”1 dene, “kitail pahn tapiada ehu mwekid kapw oh sarawi pwehn apwalih oh papah meteikan. Kitail pahn kadaniki soahngen mwekid pwukat ‘papah.’”2
Presiden Nelson mahsanih: “Ehu koasoandi sansal en Mwomwohdiso me mehlel, iei eh koasoandi mwahu en wia doadoahk en papah ong emenemen Sapwellimen Kauno serihkan oh arail peneinei tikitik kan. Pwehki Sapwellime Mwomwohsido met, atail pwukoah, nin duwen atail wia Sapwellime soun papah, pahn sewesehda emen, duwehte dahme Eh ketin wiaier. Kitail pahn sawaski ni Mware, ni Sapwellime manaman oh mweimwei, oh limpoak.”3
Sangete mwurin pakairo, amwail utuht inenen kaselel! Se alehdi repwoht en wekidekla pwukat ah pweidahr mehlel nan kerenieng Sdeik koaros nan sampah nin duwen kaweid wet ah patohsangehr atail Soukohp ieias. Ni karesepe, soun papah ohl oh lih akan, kapwukoakihdier peneinei kan. koasoandien wad riemen —iangahki mwahnakapw oh peinakapw akan— koasoansoandier, oh ehupene oh kosoiapene pweidahn doadoahk en papah wet pil wiwiawi.
Kaidehn depweilah ieu met me sounpwong weneu mwohn pakair en aio, iei: “pahrekiong padahk oh sawaspene nan wasahn kousoan oh nan Mwomwohdiso,”4 pakair duwen “doadoahk en papah” wiawi. Me pahn tep nan Sanweri, ni atail pahn kamwotehla kaudok nan ihmw sarawi, soahng koaros me kitail eselahr duwen doadoahk en papah pahn sewesei kitail en audaudkihda ahnsou me kitail sohte kaudok nan ihmw sarawi, wiewia sarawi oh katapan rehn atail peneinei nan atail wasahn kousoan.
Nin duwen koasoandi mwahu ah kaunopadahr, kitail mwein pahn medemedewe, “ia mwomwen atail ese me kitail wie sawasawas nin duwen dahme Kauno kupwurki? Kitail kin sewese Silepen Sihpw Mwahuo nin duwen me E ketin kupwurki?”
Me keren ahi kosoieng Presiden Henry B. Eyring, e patohwan me Souleng kan aleier kaiahn en wekidek pwukat oh pil kapingki sang ni eh koapworopwor me tohn mwomwohdiso wet pahn kak kasawihada me papah kaidehn irail en “anahne kadekte.” I sohte nda me kadek sohte katepe, ahpw irail me wehwehki kesemwpwal en papahki ni manaman en ngehno pahn kilangada me e sohte uhdihte rehn kadek. Ma e wiawi nin duwen kupwuren Kauno, papah pahn inenen wia mehkot me pahn mwahu kohkohlahte erein lel mour soutuk, nin duwen dahme pil wiawiongehr Elder Godoy.
“Sounkomouro kasalehda sang ni karasaras, kahrepen papah sang ni Eh ketin kasalehda limpoak sang ni sawas … E … ketin kaweid, kapakapki, oh kansenamwahuihla, oh kapai irail akan me ketiket Reh, luhkeiong koaros en idawehnla Ih. Ni tohn mwomwohdiso ar pahn papah ni ngoang mehlel oh sarawi, Re kapakapki oh rapahki nin duwen me E ketin kupwurki—en ‘apwalih mwomwohdiso wet ansou koaros, oh ieiang oh kakehlairailda,’ ‘en pwarek en souleng kan wasahn kousoan akan,’ oh sewese emenemen en wiahla tounpadahk mehlel en Sises Krais.”5
Kitail wehwehkier me emen silepen sihpw mehlel men kin kahluwa nah sihpw akan, e ese eden emenemen, oh “e kin nsenohkin” irail.6
Mie kempoakepahi men sangete mahs, me erein ah mour kin apwalih mahn nan sahpw, kin wia doadoahk laud apwahpwalih pelin kou oh sihpw kei pohn nahna takain kan. E kosoiahiengie soangen kahpwal kan oh soangen keper en wia pwukoahn silepen sihpw men. E nda me nimenseng en spring, ni ansou me sinoh kin apwtehn peipeseng pohn kumwukumw en nahna tehlap ko, e kin wahla pelin sihpw me lel 2,000 samwa pohn nahnahu ni ansoun karakar. Wasao, e kin apwalih sihpw ko lao lel ni ahnsoun lemwulemwur, a re kin keseula sang pohn nahna ahnsoun karakar uhd pakahrlahng nan sapwtehno ahnsoun kapou. E kawehwehda uwen apwal en sinsile pelin sihpw, me kin anahne sangkenei ninsohrahn oh pepehd lel nan lukopen pwong ape—sangkenei pirda mwohn ketipin oh kommoalla pwand mwurin eh rotorotdier. E sohte kin kak kelehpwki.
Ekei kin iang sawas apwalih pelin en mahn ako, me iangahki ekei irail me esehier duwen epwel en mahn kan ahpw mehlel ekei me pwulopwul me paikihla koaiek en me kaiahnkier doadoahk wet. E pil kin doadoahngki oahs riemen, oahs pwulopwul riemen me pil kaikaiahnda, kidi mah riemen oh me pwulopwul silimen. Asnou e kin lel nan ahnsoun karakar, iengeio oh nah sihpw ko kin sohpai kisinieng oh kotou mosul, soumwahuda, ohla, men nimpilda, oh pil soangkei me apwal me sohte pahn kak medewe. Ekei pahr re kin elingek pihl nan ahnsoun karakaro pwon pwe sihpw ko de mehla. Oh, nan pahr koaros ni ahnsoun lemwulemwur, ansou me angin ahnsoun kapou kin keperla oh sihpw akan kin pakahr sang pohn nahnahu oh pil wadawaddi, e kin kak lel meh 200 me salongala.
Pelin en mahn 2000 me kin mih pohn nahnahu ansoun padok wahnsapw kin malaulaukihla lel 1,800. Pali laud en sihpw ko sohte kin salongala pwehki soumwahu de audahte pein mehla, ahpw mahn keper kei me soang laion de kidienwel nan sapwtehn kan me kin kemeirailla. Mahn keper pwukat kin parok kisin simpwul kan me kin salongasang pahn epwel en pelin sihpw-o, kelehpwla kohsang pahn epwelpen soun silepen sihpw. Ke pahn kak medewe kisin ansou ieu dahme I apwtehn kawehwehdahret, ni wehwe ni palingehn? Ihs me wia soun silepen sihpw? Ihs me wia pelin mahno? Ihs irail ko me wia soun sawas en silepen sihpw ko?
Pein Kauno, Sises Krais mahsanih. “Ngehi me wia silepen sihpw mwahu, oh I ese nei sihpw akan, … oh I pwilkihdi ahi mour pwehki sihpw akan.”7
Soukohp Nihpai pil padahngki me Sises “pahn ketin kamwenge Sapwellime sihpw akan, oh sang Reh re pahn diar wasahn kommoal.8 I diar meleilei sang ni ahi wehwehki me “Kauno me iei silepei”9 oh E ketin mwahngih emenemen kitail oh ketin sinsile kitail. Ni atail kin lel nan mour me kisinieng wuk oh kotou mosul kan, soumwahu, medekla, oh men nimpilda, Kauno—Silepetail— pahn seweseikitailda. E pahn ketin onehda sapahl ngenitail.
Ni soangen mwohmw me duwehte dahme kompoakepahi meno apwalihki nah pelin sihpw ko, sang ni sawas en soun epwel mahn me pwulepwul oh me mah koaros, oahs kan, kidi me iang wia soun silasil kan, Kauno ketin anahne sawas nan doadoahk laud ong epwelpen sihpw kan nan Nah pelin sihpw.
Ni atail wia seri en Samatail Nanleng me diren limpoak oh tohn Sapwellime pelin sihpw, kitail kin wiensensenemwahuki kapai me kohiengehr emenemen kitail sang Sises Krais. A pil ahnsowohte, kitail ahneki pwukoa laud en sewese mehn mpetail kan duwehte atail wia silepen sihpw kei. Kitail rong dahme Kauno mahsanih me iei “papah ie oh kohkihwei ni mwarei, oh … kihirailpene nei sihpw akan.10
Ihs me soun silepen sihpw? Ohl, oh lih koaros, iangahki seri kan koaros me iang towe nan wehin Koht wia silepen sihpw emen. Sohte anahne en ahneki pwukoa. Sang ni ansou me kitail kahkada sang pilen wasahn pepdaiso, kitail koasoandier en wia pwukoa wet. Kitail en sewesehda mehteikan sang ni limpoak pwehki ih malipilip me atail Sounkomouro kihong kitail. Alma koangoangehki: “Soahngen silipen sihpw dah … me naineki sihpw tohto, sohte kin sinsilei irail, pwe kidienwel kan en dehr kohdo oh kangala nah mahn akan? … E soh kin pwakihasang?11 Ansou koaros me mehn mpatail akan mih nan kahpwal en pali uduk de pali ngehn, kitail en tenge oh sewesehda. Kitail en pwokada toutou me emen emen ahneki pwe en kak marahrahda. Kitail en iangih mauk. Kitail en kansenamwahuwihala irail akan me pahtoulahr kan.12 Kauno, sang ni limpoak, koapwoaroapwoarki kitail en wia soahng pwuka. Oh rahno pahn lelodo ni ansou me kitail pahn pakadeingkihda ma kitail apwalih Sapwellime pelin sihpwo.13
Iengei soun silepen sihpwo pil ehukiong ie ehu ire kesempwal en pwukoahn apwalih sihpwko nan sapwtehno. E kawehwehda me sihpw salongala men pahn mengei en lohdieng rehn mahn keper akan. Mehlel, mwein persent 15 en ah ansou, ih oh nah pwihn en sawas ko wie raparapahki sihpw salongala kan. Ma re mwadangete rapahki sihpw salongalahu ni ansou re apwtehn tehkada me mahno salongala ahpw saikinte nohn dohsang pelin sihpwo, re pahn kak diar e mour. E kesempwal en ahneki kanengmah oh pwerisek pwe en kak diar sihpw salongala ko.
Pahr kei samwalahro, I diar ire ieu nan newspaper ieu me inenen kesempwal me karehda ahi nekidala. Mwohn news-o nting, “Kidi peik men sohte tangasang sihpwko me salongala.”14 Iren news wet pakairkihda kisin pelin sihpw kei ehu pwihn me ahpwahpwali sihpw me karanihte wasa iengeio kin mih iehu, manoknoklahr pohn nahna. Sounpwong riau de siluh mwuri, re tengala nan sinoh pohn nahna ko. Ni ansou me sihpw ko kelehpwlahu, kidio mihmite rehrail, pwe ih ah pwukoa en sinsile oh doandoare sihpwko. E sohte tangasang mwo. E mihmite mwo, kapkapel sihpw salongala ko erein sounpwong kei nan lemwulemwur en sinoh mosulo, wihwia ah pwukoahn doandoare irail sang kidienwel, laion, de mahn kamasapwek teikan me keper ong sihpwko. E mihmite rehrail lao ahnsou me e kapwurehiraillahng rehn soun silepen sihpw. Sang nan kilelo me pwarada nan nuhso, aramas kak kasawihda uwen peik oh komwad en kidi menet.
Nan Kadehde Kapwo, kitail diarada ehu karasaras oh kaweid sang Sounkomouro me alehdo kamarain me pid atail wia silepen sihpw kei, ohl oh lih me kin sewese oh kansenamwahuihla sihpw salongalahr ko:
“Ma emen kumwail mie nah sihpw epwiki, a emen ahpw salongalahr, e soh pahn pwilikihdi me duwehk duwemeno nan eh kehl, oh kohwei rapahkiseli me salongalahro, e lao diar?”
“A ni eh diaradahr, e pahn perenda oh kidahng pohn pwopwe.
“Oh ni ah walahng ni imwe, oh kapokonepene kompoakepah kan oh mehn mpe kan, oh ndahng irail, kumwail iangie perenda, pwe I diarehr nei sihpw me salongalahro.”15
Ni atail oaralapiada padahk me mie nan karasaras wet, kitail kin diar kaweid kesempwal wet:
-
Kitail en kasawiada sihpw me salongalahro.
-
Kitail kin rapahki lao re dierek.
-
Ni arail dierekier, mwein kitail pahn anahne kidahng pohn pwopwetail kan oh kapwureiraildo.
-
Ni arail pahn pwurodo kitail eri kapilkinirailpene kempoakeparail kan.
Riei kan, dahme kitail en keieou apwalki oh isais mwahuki pahn kohdo ma kitail kihla sawas rehn sihpw salongalahr kan. Towe kan en mwomwohdiso nan pwuhk en Mormon kin “tetehk neirail aramas akan, oh sewese irail oh apwalihkinirailda mehkan me pid mehlel.”16 Kitail kak kahlamangih arail karasaras ni atail tamataman me papah iei idawehn Ngehno … liahn, oh koadoahkehda anahn akan en emen emen me wia towe …” E pil inenen kesempwal ma kitail nantieng sewese emen emen oh peneinei kan oh kaunop ong irail arail tiahk sarawi me pahn wiawi mwurin met, kolokol [arail] inou kan … , oh re lau uhtohrada.”17
Aramas koaros kesempwal ong Samatail Nanleng. Pein Sapwellime luhk oh sawas inenen kesempwal oh keneinei ong Ih, pwe e wia Sapwellime doadoahk oh lingan. Ih uhdahn doadoahk en mour soutuk. Emenemen Sapwellime serihkan inenen keneinei nan Sapwellime kairoir. E ketin loaloalekin kumwail limpoak me kumwail sohte kak medewe. Duwehte kidi peik me kin apwalih sihpw akan, Kauno pahn ketiket te pohn nahna pwe en doarei uhk sang kisinieng, kotou mosul, sinoh, oh soahng teikan koaros.
Presiden Russell M. Nelson mahsaniong kitail nan kapokonlap nekilahro: “Atail iren kapehseiong sampah oh kak kapatahieng, ong iangatail pwihn en sarawi me mengei oh karakarahk; se luke Sapwellimen Koht seri koaruhsien nan pali koaros en kahdengo en kodo rehn Sounkomour-o, ale kapai kan en tehnpas sarawio, ale popohl poatoapoat oh warohngala mour soutuk.18
I koapworopwoarki me kitail pahn koasoanehdi soang me kitail en koadoahkehda mehlel kairoir en kokohp wet, pwe kitail en kak kahrehla aramas akan ong nan tehnpas sarawio oh mehlel ong atail Sounkomouro, Sises Krais. E sohte ketin kasik kitail en wia soang koapwuriamwei kan. Ihte me e ketin peki kitail en walahng riatail reh, pwe E Sapwellimaniki manaman en komourla aramas akan. Ni atail pahn wia met, kitail kak oh pahn apwaliala inou wet. “Oh ni ansou me silepen Sihpw pahn ketdo, kumwail pahn alehdi manaman en mware lingan me soh kak sohrala.”19 Sang ni met I kadehdeki—oh duwen Sises Krais nin duwen atail Sounkomour oh Soundoar—ni mwaren Sises Krais. Ahmen.