Kihpene Soahng Koaruhsie Rehn Krais
Manaman en rongamwahu en atail Sounkomouro pwehn kawiliakapwala oh kapaikitailda kin pwilisang atail kak kasawiada oh ahpw momourki minimin mehlel en padahk piselap kan, padahk pisetik kan oh tiahk kan.
Kitail koaros ese me sahl pwoat wia dipwsou kesempwal ehu. Sahl kin wiawidahsang ni mwein likou, de sang tuhke kan, sahl mete, de dipwsou teikan me kin oapwoat oapwoat kisin dereht kei me kepirpene de ingihngpene. Me kapwuriamweio, kisin oapwoat te mwomwen sohte katepe apw kin ingihngpene oh kin inenen kehlaila. Ah kin kohpene mwahu oh katengpenehn mehn wiahda sahl pwukat kin kak wiahda dipwsou en doadoahk katapan mehlel.
Rongamwahu en Sises Krais pil duwehte sahl eh kin kehlail sang ni totohn ingihngpenehn ehu ehu dereht kan, sang ni ah kin kasalehda ni sansal ire mehlel kan oh kihda kapahi kan ni atail kin kapwaiada padahk en Pohl duwen “ketikipene soahng koaruhsie nanleng oh sampah pahn tahpwteieu, iei pahn Krais.”1 Me kesempwal-o, mwekid en nsenoh wet en kihpenehn me mehlel kin poasoankihda oh dokdokehte Kauno Sises Krais pwehki Ih “me ahl, Ih me mehlel, oh Ih me mour.”2
I kapakapki me Ngehn Sarawi pahn kamarainih emenemen kitail ni atail pahn medemedewe mwomwen padahk enkihpene Soahng Koaruhsie rehn Krais eh pahn doadoahk ni wiepe kan pwe kitail en marainkihla oh kin momouriki Sapwellime rongamwahu kapwurupwurdo nan rahn koaros.
Mwehin Kaudiahl Ehu
Kitail mih nan mwehi kapwuriamwei oh nan ahnsou en kaudiahl kan en kapwurpwurdohn Mwomwohdiso en Sises Krais. Kahrepen pakair en koasoandi kapw me wiawi rahnwet iei: pwehn kakehlailih atail pwoson Sahm Nanleng oh Sapwellime koasoandi oh Sapwellime Iheros Sises Krais oh Sapwellime Tohmw. Koasoandien en mihting en Rahn Sarawi sohte kamwetemwetlahte. Ahpw, mie kalaudpen atail ahnsou mwahu oh pwukoa nin duwen emenemen oh peneinei kan pwehn doadoahngki atail ahnsou ong kin kamwahupen Rahn en Sapad nan imwatail kan oh ni ihmw sarawi kan.
Nan Eipril samwalahro, kaidehn koasoandi en pwihn en prihsduhd kan wekilahte. Ahpw, kitail ale kaweid kehlail duwen doadoahk sarawi en atail pahn papah oh sewese riatail souleng kan.
Duwehte ingihng en dereht ko en sahl eh wiahda mehkot kehlail oh dipwsou en doadoahk katapan, soangen mwekid pwukat kin ehupene pwe kaweid kesempwal, mehn sawas kan, oh doadoahk en Sapwellimen atail Sounkomour Mwomwohdiso kopwurpwurdohr en patengete doadoahk kesempwal wet, iei: pwehn sewese Koht en komourala oh kaunsekala Sapwellime seri kan. Menlau kumwail dehr pwunodkihte medemedewe ia mwomwen mwekid en pakair kapw-o pahn pweida. Oaretik en kapwaiada mwekid wet en dehr karehiong atail sohte kak wehwehki kahrepe ni palingehn.
Se koapworopworki me en aramas ar pwoson duwen Koasoandi en Sahmo oh doadoahk en atail Sounkomouro pahn lalaudla nan sampah oh Sapwellimen Koht inou poatopoat pahn koasoansoandier.3 Ihte me se mwahuki iei pwehn sewese wiliakapwalahng Kauno en doudoulahte oh pwehn kalaudehla limpoak oh papah mehlel ong riatail souleng kan.
Kihpeseng oh Katohrepeseng
Ekeipak kitail tohn Mwomwohdiso kin kihpeseng, katohrepeseng, oh kin momourki rongamwahu sang ni atail wiahda kairekedi en oaralap en onop kei oh soangen doadoahk kei me kitail pahn wia. Ahpw soahngo kak kerempwahla atail wehwe. Kitail anahne kanaiehng pwehki nohn pwunodki soangen koasoandi pwukat pahn kadohwankitail sang Kauno.
Kahrepeo oh kamwakelekel, peren oh popohl, pepeuslahn wialiakapw oh silasil me kin pwilisang “atail kin mweidohng Kauno mohngiongatail kan” 4 oh “alehdi Sapwellime roson nan masatail kan”5 sohte kak alahldihte sang atail kin wialahsang oh kapwaiada soang koaros ni palingen me kitail anahne wia. Ahpw, manaman en rongamwahu en atail Sounkomouro pwehn kawiliakapwala oh kapaikitailda kin pwilisang atail kak kasawiada oh apw momourki padahk mehlel kan, tepin padahk kan oh tiahk kan. Ni atail kin kihpene soahng koaruhsie rehn Krais oh pohsonkihda Ih, pahn kahrehiong mehlel kan en rongamwahu kin doadoahkpene pwehn sewese kitail en wiahla dahme Koht kupwurki ong6 oh dadaurete lel imwi ni loalopwoat.7
Esehla oh Kadokepene Mehlel kan en Rongamwahu
Rongamwahu en Sises Krais me rasehngete tehi mweimwei lingan en mehlel me “kolkolpene unsek”8 oh ingihngpene. Ni atail kin esehla oh kadokepene mehlel kan en rongamwahuo, kitail alehdi kapahi en wehwehki oh koahiekla ni palingehn sang ni atail kak dehdehkihla lipwen nin limen Kauno nan mouratail kan oh kitail ahpw inangih rong oh kapwaiada Sapwellime mahsen.9 Oh tepin padahk duwen kihpene soahngkoaros wiahki ehu—pahn Kupwure—kak sewese kitail en kihpene irekedien soahng kei me kitail ahnlahr wia pwehn wiahla doadoahk teieu. I pahn kihda karasaras riau, ehu sang padahk mehlel ah ehu sang Mwomwohdiso me pahn kasalehda dahme I koasoakoasoia.
Karasaras #1. Iren pwoson kapahieu-o me keiou sansal mwahu en kihpene soahng koaruhsie pahn Krais: “Se kamehlele me keiou en padahk kan oh tiahk sarawi kan en Rongamwahu iei: keieu, pwoson Kauno Sises Krais; keriahu, Koluhla; kesiluh’ pepdais ni keduhdi ong ni lapwapen dihp akan; kapahieu, Pwildi en peh kan ong alehda kisakis en Ngehn Sarawi.”10
Pwoson mehlel kin dokedoke Kauno Sises Krais—pwoson Ih pwehki Ih me Sapwellimen Sahm Iehros oh pwoson Ih pwehki Sapwellime doadoahk en komour me e ketin kapwaiadahr. Pwe Ih me ketin kapwaiadahr imwilahn kosonnedo, oh e pahn ketin alehdi irail koaros me pwoson ih; oh mehmen me pahn pwoson ih pahn tengeteng ni me mwahu kan koaros; eri Ih me wiliepen aramas akan.”11 Kasalehda ahmw pwoson Krais wehwehki koapworopworiki liki Ih nin duwen atail Sounkomour, koapworopworki mware, oh Sapwellime inou kan.
Tepin wahn atail kin koapworopworki atail Sounkomouro iei koluhla oh sohpeisang me suwed. Ni atail kin kasalehda atail pwoson Kauno, kitail kin sohpeiong, kodohng reh, oh kin anahne Ih. Eri, koluhla wehwehki likilik oh kehlki atail Soundoar pahn wia dahme kitail sohte kak pein wia. Emenemen kitail anahne “[likihte] ih me sapwellimaniki roson en doarehla aramas”12 pwehki ihte “sang ni roson, oh kupwur kadek oh kalahngan en Mesaia”13 me kitail kak wiliakapwala rehn Krais14 oh ahpw pwurala oh patopato mwohn silangin Koht.
Tiahk sarawi en pepdais en kaduhdi ohng ni lapwapen dihp kan wiawi pwehki sang atail kin likih Ih, kehlki Ih, oh idawehn Ih. Nephi mahsanih, “I ese me ma kitail pahn idawehn Ieroso, ni mohngiong unsek, ni sohte mwekid en mwalaun oh sohte likamw mwohn Koht, apw ineng mehlel, koluhkihla dipwomw kan, kadehdehieng Sahm me ke inengieng alehda mwaren Krais, ni pepdais—ehi, sang idawehnla Kauno oh ahmw Sounkomour kodihla nan pihl o, ninduwen sapwellime mahsen, kilang, ke pahn apw alehda Ngehn Sarawi; ehi, pepdais en kisiniei oh Ngehn Sarawi apw pahn wiawi.”15
Tiahk sarawi en pwildi en peh ong ni kisakis en Ngehn Sarawi kin anahne kitail en likih Ih, kehlki, idawehn Ih, oh wenlahte mwowe Reh oh aliale sawas sang Sapwellime Ngehn Sarawi. Nin duwen me Nihpai mahsanih, “I ese ma aramas emen sohte pahn dadaurete lel ni imwi, kalkalemengih Iehros en Koht ieias, e sohte kak komourala.”16
Kapahieu en iren pwoson sohte kin kilelehdihte padahk kesempwal kan oh tiahk sarawi kan en rongamwahu kopwurpwurdou. Ahpw, iren padahk kamarain wet duwen lamalam kan kin kihpene soahng koaruhsie pahn Krais: koapworopworiki Ih oh, kehlki Ih, idihdawehn Ih, oh wenlahte mwowe Reh—iei pwehn duwehla Ih.
Karasaras 2. Met I men kawehwehda mwomwen prokrahm en Mwomwohdiso koaros oh en mwomwohdiso koasoandi kan iei kihpene soahng koaruhsie pahn Krais. Mie karasar tohto apw I pahn kasalehdahte ekei.
Nan 1978, Presiden Spencer W. Kimball padahkiong towehkan en mwomwohdiso en kakehlailih tohn Saion wasa koaros nin sampah. E padahkiong souleng ko en kousoante nanuhdakarail oh kawada steik kehlail kan sang ni kihpene peneinei en Koht oh padpadahkiong irail koasoandi en Kauno. E pil kosoia me tehnpas sarawi kei pahn kokouda oh e inouki me kapahi kei pahn kohieng irail sohte lipilipil wasa re kin koukousoan ie nin Sampah.17
Ni eh wie totohla nempehn steik kan, e kalaudehla anahnpen ihmwen souleng kan en “wiahla [wasa] me peneinei kan [kin men] mihmi ie, wasa me re kak maramarainla ie oh diar limpoak, utuht, kalahngan, oh kakehlail.”18 Pwehki met, nan 1980, mihting en Rahn Sarawi kan tepida awa siluh pwehn “pwurehng kasalehda uwen kesempwalpen aramas oh peneinei en skuhlki, mourki oh padahngki rongamwahuo.”19 Uwen kesempwalpen peneinei oh nan ihmwarail kan kak pwurehng sansalda nan “Peneinei: Kalohk Ehu ong Sampah” me Presiden Gordon B. Hinckley tepin kapehsehiong kitail nan 1995.20
Nan Eipril 1998, Presiden Hinckley pakairki duwen kokoudahn totohn kisin tehnpas sarawi kan, iei pwehn kamengeieng tohn mwomwohdiso wet wasa koaros nin sampah en iang ale tiahk sarawi kan en tehnpas en Kauno.21 Oh ahnsou mwahu pwukat en kekeirda ni palingehn pil wie lalaudla ni ahnsou me aramas kin uhtohr sang ni sawas en Perpetual Education Fund me tepida nan 2001.22
Nan mwehin Preseden Thomas S. Monson, e kin kapwkapwurehiong eh ngoangki souleng kan “en doarehla aramas” oh e kalapw koasoia kesempwalpen apwalih me semwehmwe kan oh anahn akan nin duwen ehu pwukoa sarawi en Mwomwohdiso wet. Pwehn kalaudehla wehwehpen kesempwal en kaunopada ni paliwar, kahrehda pelien Self-Reliance Services de uhtohr tepida nan 2012.
Erein sounpahr kei, kitail ale padahk kehlail duwen padahk kesempwal en atail pahn kesempwaliki rahnen Sapad nan imwamwail kan oh ni ihmw sarawi,23 oh kaunop kitaildahr ong mihting en Rahn Sarawi me pakairdahr nan kapokon lap wet.
Oh sounpwung wenehu samwalahro, pwihn en Melkesedik Prihsduhd kan kakehlaildahr oh kainenehiong pwihn en utuht kan pwehn kapwaiada doadoahk kesempwal oh sarawi en papah.
I kamehlele me kahrepe oh ahnsou me mwekid pwukat wiewiawi erein soupahr kei kak sewese kitail en dehdehkihla doadoahk teieu ah kaidehn irekedi en soangsoangen mwekid tohrohr kei. “Koht ketkidahr koasoandi en kekeirda ni palingehn ong emenemen oh peneinei kan sang ni tiahk sarawi kan, padahk, koasoandi kan, oh kemwekid kan me kin poahsonkihda nan imwatail oh Mwomwohdiso kin utungada. Mie koasoandi kan en Mwomwohdiso pwehn kapaiada emenemen aramas oh peneinei kan ahpw ehuehu koasoandi pwukat sohte kin doadoahk tohrohrpeseng.”24
I kapakapki me kitail pahn pohnese sapwellimen Kauno doadoahk kaselel en sampah pokon me wia lalaudla nan peneinei kan oh Mwomwohdiso. I ese oh kadehdehda me Kauno wie kapwkapwarahda oh me pahn wiawi mwuhr me kaselel tohto oh mehkoaros me kesempwal ong Wehin Koht.25
Inou oh Kadehde
I tepkihda ahi iren kaweid ni ei kasansalehda mehn kakehlailo me wiawihsang ni ehuehu dereht en mwein soahng kei me kin kepirpirda oh ingihngpene wiahda sahl pwoat. Me rasehngete, I inouki me kalaudlahn wehwe, kahrepe, oh manaman pahn sansalda ni atail sukusukuhlki oh momourki rongamwahu kopwurupwurdo en Sises Krais o ni atail kin nantieng kihpene soahng koaruhsie rehn Krais—iangahki Ih.
Ahnsou mwahu kan oh kapai kan me pid mour soutuk kin tepisang, kak wiawi oh mie kahrepe oh kin dadaurete pwehki Kaun Sises Krais. Duwen me Alma padahki: “Sohte ehu ahl de wiepe tohrohr me aramas kak komourkihla, ihte sang rehn Krais. Kilang, ih me mour oh marainpen sampah.”26
I pato ni peren ahi kadehde duwen sarawi oh ieias en Sahm Soutuk oh Sapwellime Iehros, Sises Krais. Kitail kin diar peren sang rehn atail Sounkomour. Oh sang Reh kitail kak nsenamwahukihla “popohl nin sampah wet, oh mour soutuk nan mour kokohdo.”27 I kadehdehki mehpwukat ni lengileng sarawi en atail Kaun Sises Krais, ahmen.