Kohdo, Rong Ngilen Soukohpo
Ma kitail kakehlailihala doadoahngki oh rong kaweid en soukohp ieias kan, kitail pahn alehdi kapai soutuk kan me inoupe miehier.
Pwehki ahi koskosoia duwen Presiden en Mwomwohdiso en Sises Krais en Souleng en Imwin Rahnakan, Kauno mahsanih:
Oh pilehu, pwukoah en Presiden en ohpis en Prihsdud Laud iei en kaunda mwomwohdisoht, oh en wia duwehte Moses—
Ei, en wia ohl sarawi, soun ale kaudiahl, soun kawehweh, oh soukohp men, me kolokol kapai kan koaros me Koht ketikihiongehr pohn kaun en mwomwohdisoht” (tehk Doctrine and Covenants 107:91–92; kawehweh patehng).
I kapaikidahr ei kak kilang Koht eh kin ketin kapaiada irail Sapwelime soukohp kan. I pahn ehukihong kumwail ehu soangen irair kesempwal wet me I lelohngehr? Mwohn ahi alehdi pwukoah mei mih loale met, I kin iang sawas nan palien kilelehdi oh utungada wasah kan me tehnpas sarawi kan pahn kokoudaie. Mwurin Septempe 11, 2001 e apwala en kak en pidelong nan U.S. Pwehki met, souleng tohto kin anahne en seiloak kihla awa riau de siluh sang Vancouver, Canada, pwehn kak kohla ni tehnpas sarawi en Seattle Washington. Presiden Gordon B. Hinckley, me wia soukohp nan ansouo, kosoia me ma mie ehu tehnpas sarawi nan Vencouver Canada, e pahn kapaiada souleng tohto. Repen pen wasa mweimweidahr, oh ni ansou me se rapahki wasah kan me mwomwohdisoht sapweniki, se pil rapahki wasa teiken me mwomwohdisoht sohte sapweniki.
Se diarada wasa ieu me inenen kaselel oh kaunopdahr ong wasahn imwen sarawi kan limwahn Ahl Laud en Canada. Wasahu udahn mengei en pidelong, oh pil audaudkihda tuhke kaselel kan en Canada, oh mengein kilang kahrehda aramas tohto pahn kak kilang ni arail pahn kin daulih.
Se kasalehda kilel kan oh mwomwen wasahu nan ehu aht tuhpene en palien Tehnpas Sarawi oh wie ihmw kan. Presiden Hinckley mweidadahr sen wiahda pekipek ehu en pwainda wasahu oh pil song en kanekehla aht ropirop en sahpwo pwehn kak ese me wasahu pahn udahn mwahueng tehnpas sarawi en kokouda loale. Nan Tihsempe en pahro, se pakairki me ropirop en sahpwo nekier, oh se anahne mweimwei en doula oh pwainda. Mwurin ah rong aht repwohto, Presiden Hinckley kosoia, “I kehn me I anahne kilang wasakiset.”
Nan sounpwongo, rahn riau mwurin Kirismas, se ahpw kohla Vencouver iangih Presiden Hinckley; Presiden Thomas S. Monson, oh Bill Williams, me wia soun wiahda mwomwen tehnpas sarawio. Se tuhong Paul Christensen, me wia Stake presiden en wasahu, me waikitla wasahu. E ekis wisekesek oh edied rahno, ahpw Presiden Hinckley mwadangete douieisang nan sdohsahu oh tepida alu seli wasahu pwon.
Mwurin ansou kis, I idek rehn Presiden Hinckley ma e men kilang wasa teikan me se pil medemedewe. E nda ei, e men kilang. Kumwail kilang, sang ni aht kilang wasa teikan, se kak kilangada kamwahupen wasa kau koaros.
Se pidakih Vancouver oh kilkilang wasa teikan, oh pil pwurodohng udahn wasa me se tepin kilango. Presiden Hinckley mahsanih, “Wasakiset udahn kaselel.” Ih ahpw idek, “Kitail kak kohla ni ehu imwen sarawi en mwomwohdisoht me karanihte wasaht?”
“Se sapengki, Ei maing Presiden.”
Se ahpw douda nan sdohsahu kiht tangala ni imwen sarawio. Ansou me se lel mwo, Presiden Hinckley nda sen, “wetila pali soakoahiek.” Se sopila mwo kiht idawehnla ahlo. Alo tepida ekis ukada.
NI ansou me sdohsahu lel wasa keieu ileilehu, presiden Hinckley nda, Uhdi, uhdi.” Ih eri idilahng pali koahiek en sahpwo ih idek, “Ah wasaht? Ih wasa me tehnpas sarawio anahne kokouda ie met. Ih wasaht me Kauno kupwure tehnpas sarawi en mihie. Kumwail kak pwainda?”
Se saikinte kilang wasahu. E ekis doh oh dohsang ahl laudo, oh e sohte pil iang kileledi nan sahpw me pahn netila kan. Ansou me se sapengki me se sehse, Presiden Hinckley pwurehng idilahng sahpwo oh nda, “Ih wasaht me tehnpas sarawio pahn mihie.” Se mihmi mwurin ansou kis se ahpw pwurala ni wasahn sounpihro pwe sen samwalahr ni imwat akan.
Mwurin Rahno, Presiden Hinckley ahpw lukehiong ngehi Williams nan ah ohpis. E mahleniadahr pilahn en ihmmwo nan kisin tehn doaropwe kis: ahl akan, ihmwsarawio, sopla pali soakoahiek, ih eri ntingiedi X pohn wasa me tehnpas sarawio pahn kokouda ie. E idek dahme se diaradahr. Se ndahng me e pilada wasa apwal ehu. Aramas silimen me sapweniki wasahu: emen sang Canada, emen sang India, oh emen sang China. Oh wasahu sohte koasoandiong wasahn kauwada ihmw sarawih kan.
“Eri, e sapengki, kumwa nantihong amwa kak koaros en alehdi.”
Mwuri manaman kapwuriamwei kei ahpw wiawi. Mwurin sounpwong kei se sapwenikilahr wasahu, oh mwurihsang kanihmw en Langley, British Columbia, mweidadahr tehnpas sarawi en kokouda.
Ni ei kin medewe irair wet, I ahnekihla karakarahk pwehki ahi diarada me ngehi oh Williams ale kasukuhl laud oh doadoahngkihier sounpar kei nan palien sahpw oh wiepen tehnpas sarawi, Presiden Hinckley sohte iang ale soangen kasukuhl pwukat, ahpw mie mehkot me udahn laudsang mepwukat--- iei kisakis en sounkokohp. E kak kilangada wasa me Sapwelimen Koht tehnpas sarawi kan konehng en kokouda ie.
Ansou me Kauno mahsanihong irail souleng en mwomwohdisoht nan ansou pwukat en kawada tehnpas sarawi, E mahsanih:
Ahpw kawada ehu ihmw ni mwarei ni mwomwen wiepe me I pahn kasalehiong irail.
Oh ma nei aramas akan sohte pahn kawada ni wiepe me I pahn kasalehiong irail … , I sohte pahn mweidada (tehk Doctrine and Covenants 115:14–15).
Duwehte dahme wiawihong irail souleng en mahsoko, e pil pahn lelohng kitail rahnwet: Kauno doulahte oh kin kaweidiki presiden kan en Mwomwohdisoht wiepe kan en mwomwen wein Koht eh pahn kokouda nan atail ansou. Oh, ong pein kitail, E kaunopada kaweid pwehn sewesei kitail kaweid atail our, pwe atail mwekid en pil alahlda Rehn Kauno.
Nan Epreil 2013 I kosoia duwen kaunopda kan me kin wiawihong kokoudahn poahsoan en tehnpas sarawi kan pwehn kak kehlail nan ansoun melimel oh ohlahn sahpw me pahn kin wiawi. Ahpw poasoano wiahte tapi. Tehnpas sarawi kan kin audaudkihda pali tohto kei, oh kin wiawihda nin duwen wiepe me koasoandier kan. Ma atail mour wiahla tehnpas sarawi kei emen emen kitail pahn nantihong en kawada duwehte dahme Kauno padahkihier (tehk 1 Korint 3:16–17), Kitail kak pil idek rehtail, “Soangen takai en ihmw da me kitail en kihong nan atail mour pwehn kak kaselel, lingan, oh kehlail en powehdi melimel kan en sampah?”
Kitail kak diar pasapengpen peidek wet nan Pwuken Mormon. Me pid Pwuken Mormon, soukohp Joseph Smith kosoia, “I indahiong riei kan me Pwuken Mormon me keieu pwung nan sampah oh iei me wia poahsoan en atail lamalam, oh aramas pahn kin keieu karanih Koht sang ni momouriki kosonned akan me mih loale sang pwuhk kan koaros” (Mehn Kapehsehn Pwuken Mormon). Nan mehn kapehseh en Pwuken Mormon, kitail esehla me irail akan me kin alehda kadehdeh mehlel sang Ngehn Sarawio me Pwuken Mormon wia mahsen en Koht pil pahn esehla sang ni manamanohte me Sises Krais iei Sounkomourpen sampah, me Joseph Smith wia sapwelime sounkihdakaudiahl oh soukohp en kopwurpwurdohn rongamwahuo, oh me Mowmwohdiso en Sises Krais en Souleng en Imwin Rahn Akan iei Sapwelimen Kauno wehi me pwurehngehr kokouda pohn sampah wet.
Iet mehkan me konehng en wia takain ihmw kan en atail pwoson oh kadehdeh:
-
Sises Krais wia Sounkomourpen sampah.
-
Pwuken Mormon wia mahsen en Koht.
-
Mwomwohdiso en Sises Krais en Souleng en Imwin Rahn Akan iei wehin Koht pohn sampah.
-
Joseph Smith wia soukohp men, oh mie soukohp ieias rahnpwukat.
Sounpwong kei me ahpwte nekila, I rongehr padahk kan koaros me Presiden Nelson wia nan kapokon lap kan sang ansou me e tepin wiahla Wahnpoaron emen lel met. Met wekidala ahi mour. NI ei onopikihier oh medemedewehier en Presiden Nelson kaweid mwahu kan erein sounpar 34 oaroalap sansal oh kin duhduehte ekei kohsang nan ah padahk kan. Ehu ehu oaroalap pwukat, pil rasehng takai en ihmw kan me I kasaledahr de pil wia ehu kih en takai en ihmw ong pein kitail. Re iangahki Pwoson Kauno Sises Krais; koluhla; pepdais ong mahkepen dihp, kisakis en Ngehn Sarawi, komourlahn me melahr akan oh doadoahk en nan tehnpas sarawi, wawauneki rahnen Sapad, tapiada ki imwila nan ahmw madamadau, mihmihte nan ahl en inouo. Presiden Nelson padahkihier mepwukat ki limpoak oh loaloapwoat.
Takain pwukokeimw oh takai en ihmw kan en mwomwohdisoht oh ong atail mour iei Sises Krais. Sapwelime Mowmwohdiso met. Presiden Nelson wia Sapwelime soukohp. Padahk kan sang Presiden Nelson kin kasalehda mour oh tiahk kan en Sises Krais ong kamwahupatail. E kin padahki limpoak oh ese mwomwen Sounkomouro oh Sapwelime doadoahk. E pil kalap kadehdehki ni limpaok duwen pwukoah en soukohp ieias kan---Presiden kan en Mwomwohdisoht---me e pil papahier.
Met, rahnwet, atail ansou mwahu en utungada ih nin duwen soukohp en Kauno pohn sampah rahnwet. Kitail esehier utungada kaun akan en Mwomwohdisoht sang ni atail kin kawada pehtail kan pwehn kasalehda atail utuht oh sawas. Kitail wia met minit kei samwalahro. Ahpw utuht mehlel laudsang kawadahte peh. Nin duwen dahme kileledier nan Doctrine and Covenants 107:22, Presidensi Keieu anahne en uthutda sang ni koapwoaroapwoar, pwoson, oh kapakap en mwomwohdisoht. Kitail kin utungadah soukohp ni unsek ansou me kitail kin idawehn ah mahsen kan, ahneki pwoson en kapwaiada, oh kin kapakapki Sapwelimen Kauno kapai en kin mihmi reh kohkohlahte.
Ansou me I kin medewe Presiden Russell M. Nelson, I kin kehn meleilei sang ni dahme Sounkomouro mahsani, “Oh ma nei aramas akan pahn rong ngilei, oh irail nei sounpapah kan me I piladahr en kaweid nei aramas akan, kilang, I ndahiong kumwail, irail sohte pahn kohsang nan dewarail” (Doctrine and Covenants 124:45).
Rongorong oh doandoaropwe mwahu irail soukohp ieias kan pahn kamwahuiala, oh pil kak wekidala atail mour. Kitail pahn kakehlailda. Kitail pahn ahnekihla koapwoaroapwoar. Kitail pahn rong ngilen Kauno. Kitail pahn kehn Sapwelime limpoak. Kitail pahn ese ia mwomwen atail pahn ahneki mour me mie kahrepe.
I poakpoake oh pil utung Presiden Russell M. Nelson oh irail akan me pilipildahr en wia soukohp, ohl sarawi oh sounkihla kaudiahl kan. I kadehdehki me e kolokol kisakis kan me Kauno ketikihongehr, oh I kadehdehki me ma kitail pahn kakehlailiala rong oh idawehn ngilen soukohp kan, atail mour kan pahn kokouda nin duwen wiepe me Kauno kaunopadahr ong kitail, oh kitail pahn alehdi kapai unsek kan me inoupe miehier. Luhk wet ong koaros. Kohdo, rong ngilen soukohp kan. Ni mwaren Sises Krais, amen.