Kitail Alehda Mwaren Sises Krais
I kapakap ki me kitail pahn loaloapwoateng kolokol mwaren Sises Krais—sang ni atail pahn kilang duwehte me E ketin mahsani, papah duwehte Ih, oh likih Sapwelime kupwur kalahngan kan.
Riei ohl oh lih akan, ni ei wie medemedewe en Presiden Nelson kehkehlik ong kitail en kin ekeriki mwomwodiso wet udahn ahd me kansansalehng kitailehr, I rapahki nan pwuhk sarawi kan wasa me Sounkomouro kaweidiki mehn Nephi kan duwen eden Mwomwohdisoht.1 Ni ansou me I wadek mahsen en Soukomouro, I kesempwaliki wasa me E mahsanihong irail me “Kumwail anahne alehiong kumwail mwaren Krais.”2 Met kahrehda ahi medewehiong pein ngehi oh idek, “I kin alehda mwaren Sounkomouro nin duwen dahme e kupwuriki ien wia?”3 Rahnwet I pahn ehukihong kumwail ekei madamadau me I alehdi ong pasapengpen ahi peideko.
Keieu, pwehn alehda mwaren Krais wehwehki me kitail en loaloapwoatehng en kilang mehteikan duwehte Koht ah kin mahsani irail.4 Ia mwomwen Koht ah kin kilang? Joseph Smith mahsanih, “Mendahte aramas akan arail kin kapwung oh kin kawe ekei aramas ni soh mahk, Sahm Nanleng kin kilang aramas koaros nin duwen epwel oh limpoak en pahpa oh nohno” pwe “Sapwelime limpoak sohte kin wekila.”5
Sounpar ekei samwalahro riei serepeino mehla. Ah mour udahn apwal. E sohte kehlail nan rongamwahu wet oh sohte kin kalap patehng. Ah pwoudo kohkohlahsang oh pwilikihdi seri pahmen reh pwehn apwalih. Ni soutik en rahn me e pahn mehlahu, e mih nan pere ieu rehn nah seri kan, I kihong kapai pwehn kak komoaldihsang sampah oh pwurala wasa kitail pahn kohla ie mwurin mehla. Ansouwo I diarada me ansou koaros I kin medemedewehte kahpwal kan oh luwet kan nan ah mour. Ansou me I pwilikihdi pehikat pohn moangehu, I ahlehdi peneu laud ehu sang Ngehno. I ahnekihdi madamadau laud ehu duwen mwahu en rieio oh kakala kilang ih duehte Koht ah kin mahsani ih—kaidehn soangen aramas emen me ahneki kahpwal nan rongamwahu wet oh nan ah mour, ahpw aramas emen me anahne powehdi kahpwal laud kei me I sohte lelohng. I kilang ih nin duwen nohno mwahu men me, mendahte kahpwal laud kan, e apwaliadahr seri kaselel, oh masamwahu pahmen. I kilang ih nin duwehn kempoakepahn aht nohnohu me pwilikihdi ah ansou pwehn patehng oh apwalih mwurin aht pahpahu ah mehla.
Erein pwohngo pwon rehn riei serepeino, I kamehlele me Koht ketin kalkalelapak rehi, “Ke sohte kak kilang me aramas koaros wia aramas kesempwal oh sarawi kei?”
Brigham Young padahngki:
“I men padahkihong Souleng kan koaros … e kin kilang mehteikan nin duwehn ihs irail ahpw kaidehn ni duwehn kowe.”6
“E kin kalapw kosoia—‘Soangen aramas duwehte met wia sapwung oh e sohte konehng wia Souleng emen.’ … Kedehr kadeik soangen aramas pwukat pwe ke sehse ia Sapwelimen Kauno koasoandi ong irail … ahpw kanengamah ong irail.”7
Ke kak song medewe ma atail Sounkomouro pahn mweidala en emen emen kitail atail katoutou kan oh sohte pohnese? Sounkomouro mahsani mehn Sameriahu, lien kamwahlo, soun rik daksis o, ohl toktoko, ohl soumwahuo, oh me dipano ki madamadau ehutwe. Irail koaros wia Sapwelimen Semehu seri, Irail koaros kak ale mahkepen diparail kan.
Ke kak song medewe Eh pahn sohpeiasang aramas emen me ahneki kahpwal en pwunod laud, songosong en powehdi kahpwal en men pwopwoud en ohl oh lih, de me ahneki kahpwal ehu me e sohte kakasang oh dihp?8 I sohte kak. Ong Krais, ehu ehu paliwar udahn kesempwal. Sohte emen me kepikipikda pwehn sohte pweida. Mour soutuk kak kohieng aramas koaros.9
Sang ni peneu en Ngehno limwahn dewen riei serepeino, I koledi kaweid laud ehu: me ma kitail pahn kilang mehteikan duwehte Koht ah kin mahsani irail, kitail pahn alehdi soangen ouremen riau—Komourlahn irail akan me kitail sewese oh pein kitail.
Keriau, pwehn alehiong kitail mwaren Krais, kitail sohte pahn kilangete mehteikan duwehte Koht ah kin mahsani irail, ahpw kitail pil anahne wia Sapwelime doadoahk oh papah duwehte Ih. Kitail sohpeisang sampah, sohpeiong kupwuren Koht, kapokonepene mehn Israel koaros, oh wiahda “karasaras mwahu ong koaros.”10 Kitail alehda oh momouriki tiahk oh inou sarawih kan en Sapwelime rongamwahu me kowpurpwurdohr.11 Ma kitail pahn wia met, Koht kin ketikihong kitail manaman en kapaiada pein kitail, atail peneinei, oh mehteikan.12 Pein idek rehmw, “Mie aramas emen me I ese me sohte anahne manaman en nanleng nan arail mour?”
Kauno pahn wia doahdoahk kopwuriamwei tohto ong kitail ma kitail pahn kasarawiala pein kitail.13 Kitail kin kasarawiala pein kitail sang ni atail kin kamwakelehda atail mohngiong kan.14 Kitail kin kamwakelehda atail mohngiong kan sang ni atail kin karonge Ih,15 koluhkihla dipatail kan,16 weliakapwla,17 oh ahniki limpoak duwehte Ih.18 Sounkomouro peki rehtail, “Pwe ma ke pahn poakohng, soangen kapaida me ke pahn ale?”19
Me keren I esehla duwen mour en Elder James E. Talmage me kahrehiongie en udi oh medemedewe mwomwen ahi limpoak oh kin papah mehn impei kan. Nin duwen eh wia sounpadahk pwulopwul men, mwohn eh wiahla emen Wahnpoaron oh nan ansou me soumwahu laud en diphtheria udahn kehlail nan 1892 Elder Talmage diarada peneinei ehu me kin koukousoan limwah me ahneki kahpwal en soumwahu wet. Sohte emen men mweidala pein irail oh doulongala nan ihmw me soumwahu mih laolehu. Elder Talmage mwadangete kohla ni ihmwo. E diarada seri pahmen nanihmwo: emen sounpar riau elep melahr nan deweho; me sounpar limau oh eisek me ahneki medek laud; oh serepein men me sounpar eisek siluh me udahn luwetalahr. Arail pahpa nohno udahn ahneki insensuwed oh tihwohla.
Elder Talmage apwaliada seri melahro oh me momour kan, koakoahkehda nan ihmwo, wahieisang likou samin kan nan ihmwo, oh isikala soahng koaros me saminkilahr soumwahuo. E doadoahngkihla rahno pwon oh pwurala mandahsango. Seri me sounpar eiseko mehla pwohngo. E pwokada oh koledi me sounpar limauo. E kopokopkihla inta laud pohn mesehu oh ah likou kan. E intingiedi, “I sohte kak pwilikihdi kisin serepeino,” oh e ahpw kolokol lau serio mehla nan peh kan. E sewese sarepedi seri silimeno koaros oh iang sewese kaunopada mwenge oh likou mwakelekel ong penieneio. Ni ah pwurupwur kohla ni imwehu, Elder Talmage kesehla ah likau saminlahr kan, oh kamwakelehda ih, oh katohrehsang ih rehn ah peneinei kan, oh ahpw lokolok ki laud soumwahuo.20
Mour tohto limwahtail me ahneki kahpwal. Souleng kan kin alehda mwaren Sounkomouro sang ni arail kin weliakapwala oh kin sewese aramas koaros mendahte iawasa oh ia mwomwen arail mour—Mour tohto pahn pitila ma kitail pahn wia mepwukat koaros.21
Keimwsekla, I kamehlele me ma kitail en alehda Mware kitail anahne en likih Ih. Mie ehu mihting en rahn sarawi me I iang towehda, serepein pwulopwul men kalelapak mehkot me duwehte met: “Ngehi oh ahi kahso ahpwte sohla koasoaipene, eri e pilada en sohla iang mwomwohdisoht. E ndahiongie me e sohte kin ahneki soangen peren me e ahneki met. Dahme kahrehda soahng wet kak wiawi?
Sounkomouro sapengala peidek wet ansou me E mahsanihong mehn Nephi kan, “Ahpw ma ke sohte pahn momourki Sapwelimei rongamwahuo, ahpw kin rong ngilen aramas akan, oh kin pereniki doadoahk en tepelo, kilang I ndahieng uhk me ke pahn ahniki peren ahpw kisin ansou kiste.”22 Met wehweki me ke sohte kak diar peren soutuk ma sohte rongamwahu en Sises Krais.
Ahpw ni mihtingo i medewehla irail aramas tohto teikan me I ese me ahneki kahpwal laud oh katoutotu kan. I idek rehi, “Soahng da me Sounkomouro pil kak mahsanihiong irail?”23 I kamehlele me E pahn Kalelapak, “Ke likih ie?”24 E mahsanihiong me me ahniki soumwahu en nta pwiliwpil, “Omw pwoson kamwahuihiukalahr, kohwei ni meleilei.”25
Ehu iren pwuhk sarawi me I kin leliki iei Sohn 4:4, me mahsanih, “Eri ni eh ketket kohla, e udahn pahn kotehla Sameria.”
Dahme i lelikihiki ire wet? Pwehki Sises sohte anahne kohla Sameria. Mehn Suhs kan nan Ah ansouo kin uhong mehn Sameria kan oh kin seiloak likin Sameria. Ahpw Sises pilada en kohla wasahu pwehn kasalehiong sampa unsek me Ihme wia Mesaia en inouo. Ong ire wet, E sohte piladahte irail mehn liki kan, ahpw e pil pilada lih emen—kaidehnte lih sohte lipilipil ahpw lih emen me dipan—Aramas emen me ni ansouo wia aramas keioun sakanakan. I kamehlele me Sounkomouro wia met pwehn kasalehiong kitail me Sapwelime limpoak me laudsang atail masopwehk kan, mehkot me kitail sohte kakasang kan, atail peikasal kan, kasongsong kan, dihp kan, atail peneinei me ohla kan, atail kapwunod oh kediropw kan, sohte atail wasahn kousoan, pwopwoudin nan pwungen ohl de lih, atail soumwahu keper kan, atail paisuwed, atail sohte kanaiehng kan, oh atail pahtou kan.26 E men kitail koaros en ese me sohte mehkot oh sohte emen me e sohte kak kamwahuihla oh kiheng peren soutuk.27
Sapwelime mahk me wohkian.28 Ih kelehpw pwokada soahng koaros. Manaman en Sapwelime Tomwo wia manaman en powehdi katoutou koaros nan atail mour.29 Iren kaweid me pid Lih me mih ni pwarero kasalehda me E ese atail kahpwal kan30 oh me kitail kak ansou koaros iang Ih mendahte iawasa kitail mihie. Ong liho oh pwehn padahkihong kitail, E mahsanih, “Ahpw mehmen me nimpil sang pihl wet me i pahn kihong solahr pahn pwurehng men nimpilda kohkohlahte. Pihlo pahn poad loale oh wiahla pwepwengkdahn pihl me pahn kuskusdahng mour soutuk.”31
Nan seiloak koaros en mour wet dahme kahrehda ahmw pahn sohpeisang Sounkomourohte me ahneki manaman en kamwahuiala oh kapitala? Soangen pweipwei koaros me ke pahn kihong pwehn kak koapwoaroapwoarki Ih pahn mie katepe. Riei kan koaros, kitail pilada en kalaudehla atail pwoson Sahm Nanleng oh Sounkomour, Sises Krais.
I kadehde sang nan pahson en ahi mour me Mwomwohdiso en Sises Krais en Souleng en Imwin Rahn akan iei Sapwelimen Sounkomouro mwomwohdiso, me kin ale kaweid sang Krais me ieias oh sang soukohp ieias kan. I kapakapiki me kitail pahn alehda ni mehlel Mwaren Krais—sang ni atail pahn kilang duwehte Ah kin mahsani, sang ni atail pahn papah duwehte Ih, oh sang ni koapwoaroapwoariki me Sapwelime Mahk kak kapwurei kitail la reh oh peren soutuk. Ni mwaren Sises Krais, amen.