Tengeteng oh loaloapwoat nan ahmw Pwoson Krais

Sang Elder D. Todd Christofferson

En Pwihn en Wahnparon Ehk Riemeno

Pwehn tengediong pwoson Krais kitail anahne en momourki rongamwahu en Sises Krais.

Nan poadoapoad en kadehdeh mering, kitail kin wadek duwen ansou kei me irail serien Israel kan kin wauneki arail inou kan ong Siohwa oh kin pwongih Ih oh pil ansou kan me irail kin manokehla arail inou kan oh kin pwongih sansal takai de me re kin kahdaniki Baalim.¹

Nan mwein Ahab iang wia ehu ansou en mwehi rotorot nan pali mese en kahnihmw en Israel. Ehu ansouo soukohp Elijah mahsanihong Nahnmwarki Ahab en Malipepene mehn Israel koaros iangahki soukohp en Paal kan nin nahna Karmel. Ansou me aramas akan pokonpenehr, Elaisa ahpw patohwaniong irail, “Iahd me kumwail pahn kainenehla amwail lamalam? [de ni ehu mahsen, “iahd me kumwail pahn pilada ehute oh ihte?”] Ma Kaun-o me koht ah kumwail kaudekiong, ahpw ma Paal me koht, ah kumwail kaudekiong. Ahpw aramas akan sohte sapengki mehkot.”² Eri Elaisa ahpw patohwan ren wahdo kouwol riemen ; kihong irail emen pwe re en kemehla oh saptikihpene: oh kihong pohn tuwi kan, ahpw “ieremen saunda kisiniei.”³ Eri, soukohp en Paal kan pahn kapakapiong arail koht, oh I pil pahn kapakapiong Kaun-o. Eri, mehmen me pahn ketin sapeng ni eh pahn ketin kadaredo kisiniei, iei ih me Koht. Aramas akan eri ahpw weriwerki arail pwungki.”⁴

Kumwail pahn tamanda me soukohp kan en Paal wie weriwerki oh katakatairong lao lel mwurin souwas, ahpw sohte pasapeng kohdo, oh sohte ngihl ehu peido.”⁵ Ansoun en Elijah, e tapiada onehda sapahl pei sarawien Kaun-o me olahro, eri e ahpw pwilikihdi tuwi kan pohn pei sarawio, oh saptikihpene kouwolo, oh kidiong pohn tuwi ko, e ahpw patohwan kumwail audehkihda pihl sah pahieu oh wudekidiong pohn meirong oh tuwi kan, kaidehn pak ehute, de riau, ahpw pak siluh. Udahn e sansal me sohte emente rehn ih de pil emen aramas pahn kak kalulahda kisiniei.

“Ni awahn meirong en mwurin souwas, soukohp Elaisa ahpw patohla ni pei sarawio, oh kapakap, maing Kaun-o, Koht en Eipraam, Aisek, oh Seikop, komw ketin kadehdehda rahnwet me komwi me Koht en Israel, oh ngehi me sapwelimomwi ladu me wiadahr mepwukat sang ni omwi mahsen. …

“Kauno ahpw ketin kamwerehdi kisiniei, oh isikada meirongo, tuwi ko, oh pil takai ko, oh karoangehla pwehlo, oh pilen nan warawaro ahpw madada.

“Ni aramas akan ar kilangada met, re ahpw pwupwidiong nanpwel ndahda, “Kauno me Koht! Kauno kelehpw me Koht.⁶

Rahnwet Elaisa kakete nda:

Mwein Koht, Samatail Nahnleng, ieias, de pil kakete soh, ahpw ma E ieias, kaudekiong Ih.
Mwein Sises Krais iei Sapwelimen Koht, Sounkomour iasadahro, de pil kakete soh, ahpw ma iei Ih me Sounkomouro, idawehn Ih.
Mwein Pwuken Mormon wia mahsen en Koht, de pil kakete soh, ahpw ma iei e wia mahsen en Koht, eri “Karaniala Koht sang ni [onopiki oh] momouriki.”⁷
Mwein Joseph Smith kilanga oh koasoaiong Sahm oh Iehroso nan pahr 1820, de e pil sto, ahpw ma e mehlel, idahwehn likou puhpo, iangahki manaman oh mweimwei en katengepene me ngehi, Elaisa, kihongehr Joseph.

Nan Kapokon Lap me ahpwte wiawio, Presiden Russel M. Nelson mahsanih, “Kumwail sohte anahne en medemedewe dahme pwung [tehk Moroni 10:5]. Kumwail sohte anahne en medemedewe isime kumwail pahn koapwoaroapwoariki. Sang ni kaudiahl me ke kin pein alehdi, ke kak alehdi ahmw kedehdeh me Pwuken Mormon wia mahsen en Koht, me Joseph Smith iei soukohp men, oh me iei sapwelimen Kauno mwomwohdiso met. Mendahte dahme mehteikan pahn inda de wia, sohte emen kak kihsang kadehde me mih nan ahmw mohngiong oh madamadau me pid dahme mehlelo.”⁸

Ansou me Seims inoukihdi me Koht “me kupwur sapahn oh kalahngan ong aramas koaruhsie” me kin rapahki Sapwelime erepit,⁹ e pil kaparkin kitail:

“Ahpw kumwail udahn pahn kapakap ni pwoson oh sohte peikasal; pwe me kin peikasal rasohng ilok en nan madau kan me kin pwungupwungudekiseli kisinieng.

“Eri en dehr lemehiong me e pahn kak ale mehkot sang rehn Kaun-o.

“Aramas me ahneki madamadau riau kin kohwei kohdo ni eh mwekid koaros.”¹⁰

Atail Soukomouro, pil, wia karasaras mwahu ong mehleliong. E mahsanih, “Sahmo sohte kin likidmelieiehla, pwehki ei poaden wiewia mehkan me e kin ketin kupwurehkinie.”¹¹ Medewe iren kaweid pwukat sang nan pwuhk sarawi ong ohl oh lih akan me, duwehte sounkomouro, me kin tengedi oh loaloapwoat:

Irail “weliakapw ong rongamwahu unseko; oh irail sohte kak pwursang, pwe irail tengedi, oh loaloapwoat, oh sohte kak mwokid, irail wia arail kak koaros en kapwaiada kosonned en Kauno”¹²

“Arail madamadau kan teng, oh irail kin koapwoaroapwoariki Koht kohkohlahte.”¹³

“Oh kilang, kumwail ese ong pein kumwail, pwe kumwail kilangehr, me koaros me esehla duwen mehlelo, … irail tengedi oh loaloapwoat nan arail pwoson, oh ni me kihong irail en saledekla.”¹⁴

“Oh irail wenlahte ni loaloapwoat nan padahk mehlel’ oh ehupene, oh kin lopukpene pilawa, oh kin kapakap.”¹⁵

Pwehn kakairada tengedi oh loaloapwoat nan pwoson Krais e anahne aramas emen en wiahki rongahmwahu wet kisehn ah mour, me wehwehki me rongamwahu wet pahn wiahla kisehn ah mour oh wiewia me keieu kesempwal, ahpw kaidehn en wia ehu kisehn mwomwen momour tohto teikan. Kauno mahsanih:

“I pahn kihong kumwail mohngiong kapw ehu oh ngehn kapw ehu: I pahn ketikihsang kumwail mohngiong keptakai oh ketikihong kumwail mohngiong peik.

“I pahn audehkin kumwail ngeniet, oh mwasahn pwe kumwail en kin idawehn ei kosonned kan oh kapwaiada mahsen koaros me I ketikihong kumwailehr.

“Oh … kumwail pahn wia nei aramas, oh ngehi amwail Koht.”¹⁶

Mepwukat iei inou kan me kitail wiahda sang ni atail pepdais oh tiahk sarawi kan nan tehpas sarawi. Ahpw ekei kitail saikinte udahn alehda rongamwahu en Sises Krais ni unsek nan arail mour. Ahpw, ni duwehn dahme Paul mahsani, irail “iang [Krais] Seridi ni pepdais,” irail pil saikinte alehda ire me pid “duwehte Krais ah iasada sang mehla … , pil pahn duwen kitail… , en weid nan ahl en mour kapw.”¹⁷ Rongamwahu wet saikinte pil pwungehng irail. Irail saikinte ahneki madamada en Souleng mehlel men. Irail kin lipilipilki mehnia padahk de kosonned me irail en idawehn oh iahd me irail pahn iang papah nan mwomwohdiso wet. Me wekisang met, irail akan me kin kolokol arail inou kan ni pwung oh irail aramas pilipil kan nin duwehn inouo”¹⁸ kin soikala kasongsong kan oh kin tengedi nan arail pwoson Krais.

Palilaud en kitail ansouwet mihmiseli wasahkis nan pwungen soahng riau, ehu iei souleng men me kin sohte nohn pereniki kemwekid kan en rongamwahu wet ahpw kin pwungki kemwekid teikan, oh souleng men me kin udahn pereniki rongamwahu wet kin mehleliong kupwuren Koht. Wasahkis nan pwungen soahng riau wet, kaweid en rongamwahu en Krais kin sair atail mohgniong kan oh kin powehdi palingenitail kan. E sohte pahn mwadangete wiawi, ahpw kitail koaros anahne en wenlahte mwowe ong kapai kan.

E kin apwal ahpw pil konehng en kin tengediong oh kin kehlail ansou me kitail kin lel nan “irair en kahpwal kan,”¹⁹ de mehkot me kin lelohng kitail ehu ansou nan mour wet. Ma sohte Koht, soahng pwukat kin kahrehda soukoapwoaroapwoar, insensuwed, oh pil lingeringer. Ahpw rehn Koht, insenamwahu kin weliandi medek, meleilei kin weliandi kepingiping, oh koapwoaroapwoar kin weliandi pahtou.²⁰ Tengedi ni pwoson Krais kin wahdo Sapwelime limpoak oh utuht oh kin wekidsang kahpwal ong kapai.²¹

I pahn sawasiki karasaras siluh mei wehwehki:

Mie Lih emen me ahneki soumwahu laud, oh luet me anahne sawas en imwen wini, kapai en Prihsdud, oh kaisihsol oh kapakap. Ahpw, ah pwoson manaman en kapakap oh mehlel en Sapwelimen Koht limpoak ong ih udahn karehda likamw e sto soumwahu. E doulahte rahn koaros (oh ekei pak nan pwungen awa koaros) kin wie papah ni uwen ah kak koaros. Ah limpoak ong mehteikan uhdahn wia mehkot kesempwal ong ih oh kin kehlaila sang pein ah lokolok kan, oh e pil kin kalapw manokehla pein ih oh kin sewese mehteikan. E wenlahte oh loaloapwoat, oh aramas akan kin peren ma re kin mih reh.

Mie ohl emen me tikida nan mwomwohdiso wet, wia misineri men, oh pwoudikihla lih mwahu men udahn pwuriamweila ansou me ekei rie kan tepida kawe mwomwohdisoht oh soukohp Joseph Smith. Mwurin ansou kis irail sohla iang mwomwohdisoht oh song pwe en iang irailla. Me kin kalapw wiawi nan soangen irair pwukat, irail kin songki ih koasoai ni nting, koasoi me rekohtdi kan, kasdo kan me kin kohsang irail me kin uhong kan, me palilaud irail akan me wia tohn mwowmohdiso mahso ahpw kin mwehlda oh sohla iang. Rie kan kawe ah mwomwohdihsohu, oh kin indahng me e pweipweilahr oh aramas pitiedier. E sohte ahneki pasapeng ong arail ire kan oh ah pwoson tepida luwetala sang ni arail kaweid sohte mwahu kan. E medehwehda ma e pahn sohla iang sarawi. E lokaiahng ah pwoudo. E lokaiahng irail akan me e kin kaopwoaroapwoariki. E kapakap. Ni ansou me e wie medemedewe nan ansou apwal wet, e tamanda ansou kan me e kehn Ngehn Sarawi me kaweidiki me mehlelo. E kaimwsekala, oh nda, Ni mehlelo, I pahn ndahda ni mehlel me Ngehno sairiehier pak tohto oh kadehdehn Ngehno kin mehlel.” Mie ehu pepehm en peren kapw me pil kohsang rehn ah pwoud oh nah serih kan.

Ohl emen oh lih emen me kin mehleliong oh kin idawehn kaweid en wahnparon kan nan ara mour ahneki pahtou pwehki ara sohte naineki seri. Ira doadoahngkihla lapalahn mwohni pwehn doadoahkiong irail semen en imwen wini kan oh, mwurin ansou kis ira kapaikihda kisin pwutak men. Me kainsensuwed, oh, mwurinte sounpar ehu, serio lelohng kahpwal en aksiden ehu me kaidehn en emen sapwung ahpw me kahrehiong serio ah sohla kak mwokid, oh ah mwahliel ohla. E alehdi soangen sawas me keiuhn mwahu ahpw irail toahkte kan sohte wehwehki dahme pahn wiawi ehu rahn. Seri menet me pwopwoudo doadoahk laudki pwehn kaipwihdi sampah wet mwomwen pil kopwurpwursang ira, oh ira sohte wehwehki ma e pahn kak pwurodo rehra. Ira ahniki kahpwal pwehki ara kin nantihong en apwalih soumwahu en serio, oh pil iangahki ara pwukoah teikan. Nan erein ansou apwal wet, ira sohpeilahng Kauno. Ira kin kehliki kisin tungoal me kohsang Sahmo. Ira pil kempoakepahneki aramas mwahu tohto oh peneinei oh pil kin kehlailihkihda kapai en prihsdud. Ira pil karaniala emen emen, arail ehupene ansouwet mwein laudsang oh unsek sang rahnteio.

Ni Sulai 23, 1837, Kauno kaweidki kaudiahl ehu ohng Thomas B. Marsh, Presiden en Wahnpoaron Ehk Riemeno. Met me iangahki:

“Oh kapakapki iengomw wahnparon teikan. Kaweid irail ni inen sang ni mwarei, oh mweidehng irail en uhdisang diparail koaros, oh ahneki loaloapwoat mwohi ni mwarei.

“Oh mwurin arail kasongsong kan, oh kahpwal kan, ehi, Ngehi Kauno, pahn seweseirail, oh ma irail pahn ahneki mohngiong karakarahk, oh sohte kin aklapalap ongie, irail pahn weliakapwla, oh I pahn kamwahuihraila.”²²

I kamehlele me iren kaweid kan en nan iren pwuhk pwukat pil dokdokei kitail. Kaphpwal kan oh kasongsong kan me kitail kin lelohng, iangahki kasongsong kan me Kauno kupwuriki kitail en lelohng, kak sewese kitail en weliakapwla oh mwahula. Ahpw met pahn wiawi ihte, oh ihte, ma kitail ahneki mohngiong karakarahk oh sohte kin uhong Ih. Ansou me kitail kin tengedi oh loaloapwoat, mendahte dahme kin pwarada, kitail kin alehdi weliakapw me Sounkomouro mahsanihong Pihter, “Ansou me ke pahn weliakapwla, kakehlailih riomw ohl teikan,”²³ weliakapw ehu me unsek me sohte kak sohte wiawi. Inouo iei kamwakeldahn oh kasarawihlahn ngenitail dipan akan, ong kitail en sarawihla.

I tamanda en atail nohno kan kaweid me nda: “kang kenomw wahn tuhkeh kan pwe e pahn mwahueng uhk.” Atail nohno kau pwung, oh me pid loaloapwoat nan rongamwahu wet, “pwehn kang kenatail wahn tuhkehkan” wehwehki en kin poaden kapakap, wadek pwuhk sarawi, papah oh kaudek nan mwomwohdisoht, warohng en ale kamadipw sarawi nan wihk kaoros, poakohng mehn mpomw kan, oh kapaikada ahmw lohpwu oh peikong Koht Rahn koaros.²⁴

Tamataman ansou koaros inou en kapai koaros me pahn kohdo, ohng met oh pil mwuhr, ong irail akan me kin tengedi oh kin loaloapwoat nan arail pwoson Krais. Tamataman “Mour soutuk oh peren en Irail souleng kan en imwin rahno,”²⁵ “O irail kan me kin ahneki mongiong mwakelekel, sarada oh alehda mahsen kaperen sang Koht, oh perepereniki Sapwelime limpoak, pwehki komw kak, ma omwi mohngiong tengeteng, kohkohlahte.”²⁶ Ni mwaren Sises Krais, amen.