Popohl Sang Ni Papah Mehlel
Kitail inoukiengehr Samatail Nanleng me kitail pahn papah ih oh mehteikan oh wia kupwure ni mehkoaros.
Kapokon Lap nekiero, aramas tohto kin kohdo idek rehi: “Sehr ko kansenamwahu?” Ahi pasepengo kin duwduwehte: “Sehr ko udahn kansenamwahu ma ke sohte pahn iang padahk.” Met mehlel, kaidehng? Ahi sehr o sohte nohn kansenamwahu met, ahpw I kapingki kapai oh ansou mwahu me I ahniki pwehn padahk ong kumwail soutik wet.
Ekei pak, ni atail kin papah, atail pwukoah kan kin wekpeseng. Ekei kin kansenamwahu ah ekei soh, ahpw kitail inoukihieng ehr Samatail Nanleng me kitail pahn papah ih oh mehteikan oh wia kupwure ni meh koaros.
Pahr kei samwalahro, me pwulopwul en Mwomwohdiso wet esehla me “ni ansou me kitail pahn iang papah Koht, [Doctrine and Covenants 4:2], kitail ieiang seiloak me keieu mwahu. Ke sewsewese Koht kadaiala Sapwellime doadoahk, oh e wia mehn kasukuhl kaperen oh mwahu ehu.”1 Seilok wet ong koaros—oh ihme pahn kahluwai kitail lahng nan ahl me atail soukohp mahsanih me iei “ahl en inou.”2
Ahpw, pwehki atail mihmi nan mwein pohnmwahso wasa me aramas kin kalapw idek, “Dahme e pahn wadohngie?” ahpw kaidehn, “Ihs me I kak sewese rahnwet?” de “Ia mwomwen ei kak papah Kauno nan ei pwukoah?” de “I mweidehng Kauno mehkoaros?”
Ehu karasaras keiou mwahu me I kilang nan ahi mour me pid papah iei Sister Victoria Antoniette: Victoria wia emen sounpadahk en priaimeri nan ahi branch en Argentina ni ahi tikitik. E kin wahdo cake me chocolate niare koaros me praimeri kin kohpene. Koaros iouki cake o—koaros likin ngehi. I sohte iouki cake chocolate! Menda ma e kin song en ehukihiong ie cake o, I kin kahng ansou koaros.
Ehu rahno ni eh ehukihiongehr seri teiko cake o, I idek re, “Dahme ke sohte kin wahkihdo ehu soangen wiepe—soangen orange de vanilla?”
E kouruhr, ih ahpw idek rehi, “Ah ke sou song ekis? Cake wet wiawihkihda mehn dol kaselel ehu, oh I inoukihwei me ma ke pahn song ke pahn iouki!”
I kilengseli oh ngehi diarada me koaruhsieh pwungki cake o. Eri I pwungkihda ien song. Ke kak ndahda dahme wiawi? I ioukihda! Ih tepin ansou me I ioukihda chocolate cake.
E stu lel sounpar kei, ni ei diarada soangen mehn dol da me Sister Antoniette doadoahngkihieng nan cake chocolate o. Ngehi oh nei seri ko kin pwarek ahi nohnohu wihk koaros. Ehu ansou o, se wie kangkang cake chocolate, ngehi eri padahkihieng mwomwen ei ioukihla cake o. Ih eri uhd kawehwehda pwungin soai wet.
Ahi nohnou nda: “Cris ke kilang, Victoria oh ah peneinei sohte paiamwahu, oh wihk koaros e kin pilada ma e pahn pwain pwoas pwe ih oh nah seri pahmeno en kohla Primary de pwainda mehn wiahda cake chocolate ong Primary kan. E kin pilada wiahda cake chocolate o ansou koaros, menda ma ih oh nah seri ko pahn aluhki mwail riahu[3 km], kohla pwur mehndahte ma ketipin de ketou”
Rahn o kahrehda ei pwungkihla douluhl ah cake chocolate o. Me kesempwalo, I esehla me ihme wia en Victoria mehn dol iei, ah limpoak oh tohnmetei me e kin wiahieng kiht.
Ni ei kin medewehda en Victoria cake o e sewesehkin ie ien tamataman papah en tohnmetei me Kauno wia ni eh ketla wasahn meirong en tehnpas sarawio. Kumwail ese soai en Elder James E. Talmage ni eh padahngki duwen kohpwa 13, oh aramas ako kin kohla kesehdi arail meirong kan ni soangen kahrepeh kei. Sises mahsaniada me ehu ehu apehkoa, wiawihda ohng soangsoangen aramas. Ekei kin kihla ni karakarahk oh mie kahrepe ah ekei kin kihdi me laud pwe aramas en kepingeirail.
“Nan pwungen irail koaros mie lih ohdi men, me … meirongki sent riahu; ah meirong o sohte lel sent ehu ohng mwohni en America. Sises ahpw malipepene Sapwellime tohnpadahk ko oh mahsanihiong irail, “I men kumwail en ese lihohdi menet eh meirong inenen laud sang en koaros. Pwe mehteiko kesediong nair mwohni nan dowen meirong o sang nan ahr pai; a lihohdi menet nan eh paisuwed e kihdi mehkoaros me e ahniki oh kin momourki.” [Mark 12:43–44].”3
Lihohdi menet sohte kin sansal mwohn aramas nan ah wasao. E kasalehda mehkot kesempwal: e ahniki mour mwakelekel, oh e kihla mehkoaros me e ahniki. Mwein e kihla me tikitik sang mehteikan, sohte sansal mwohn mesen aramas, oh weksang mehteikan. Ong ekei e soh wad, ahpw ong Sounkomouro, “sang nan ah madamadau oh mohngiong unsek”4 e kihla mehkoaros me e ahniki.
Riei lih ako, kitail kin kihla atail mehkoaros ong Kauno ni soh peikasalpe? Kitail wihwia papah en tohnmetei ong dih en mwuhr kan pwe ren kak esehla poakohng Kauno oh kapwaiada Sapwellime kosonned kan? Kitail wihwia papah en tohnmetei ong aramas kan me kitail pahn apwalih ni ngoang—tohnmeteikihla ansou oh kehl me kak doadoahk ni ehu soangen ahl? Kitail wie momourki koasonned riau me keiu laud—en poakohng Kauno oh Sapwellime seri kan?5 Pak tohto limpoak wet kin sansalda sang ni atail pahn papah.
Presiden Dallin H. Oaks padahngki: “Atail Soukomouro meirongkihla pein ih. E padahkiong kitail en manokehla pein kitail oh papah mehtei kan nin duwen me e wiahier.”
E doulahte:
“Ehu karasaras mwahu en manokehla pein kitail ohng ni doadoahk en papah … iei tohnmetei en pahpa nohno ohng neirail seri kan. Nohno kan kin pwilikihdi arail peren oh ansou pwehn kak kaipwihdi oh kakairada seri kan. Pahpah kan kin anahne doadoahk laud pwehn sewesehki ah peneinei. …
“… Se pil kaping ki irail akan me kin sewese me anahn tohrohr oh me mah kan nan peneinei. Soangen papah pwukat sohte me kin idek, “dahme e pahn wadohngie?” Ahpw koaros kin manokehla pein irail oh papah ni tohnmetei. …
“[Oh] soahng pwukat koaros kasalehda me kitail pahn ahniki peren oh pweida ma kitail pahn papah ki ohng dahme kitail kihla ahpw kaidehn dahme kitail pahn ale.
“Atail Sounkomouro padahngki kitail en idawehn ih sang ni atail pahn manokehla pein kitail oh papah ni tohnmetei ohng mehtei kan.”6
Presiden Thomas S. monson pil padahngki me “mwein ni atail pahn uh mwohn atail Sounkepikipiko, e sohte pahn idek, ‘Pwukoah depe me ke ahniki?’ ahpw, ‘Aramas depe me ke sewese?’ Ni mehlelo, ke sohte kak kasalehieng kauno me ke poakohng lau koh papah Sapwelime aramas kan.”7
Riei lih ako, met wehwehki, sohte katepen ma kitail mwohd nan sehr kansenamwahu de ma kitail solahr kakehng kanekehkihla mihting wet pwehki kasoansuwed en sehr mering en nan mwurihko. E sohte pahn wiahda mehkot, ma kitail pil doukihiei sang mihting iu pwehn kansenamwahuihla seri men. Ihme keiu kesempwal kihtail en kohkihdo ineng mehlel en papah, oh kasamwo irail kan me kitail kin papah, oh kapehse ohng irail kan me mwohd mpatail—ehu ohng mehtei kan menda ma kaidehn irail me kitail pahn pwukoahki. Oh e udahn pahn wiahda mehkot ma kitail pahn wia uhwen atail kak koaros en papah sang ni limpoak oh tohnmetei.
I esehla me kitail sohte anahne wiahda cake chocolate pwehn pweida de wia sounpadahk en Primary poadidi men, pwe kaidehn cake o me kesempwal. Limpoak me kahrehda kemwekido.
I kadehdehki me limpoak kohsang ni tohnmetei—tohnmetei en sounpadahk men oh mehlel sang ni tohnmetei en Sapwellimen Koht Ieros. I kadehdehki me e ketin ieias! I poakohng ih oh pahn manokehla pein ngehi pwe ien kak ahniki limpoak oh papah nin duwen dahme E ketin wia. Ni mwaren Sises Krais, ahmen.