Lih akan oh Kasukuhl en Rongamwahu en nan Imwen Kouson akan
Sounkomouro me wia keieu karasaras mwahu ong ni mwomwen amwail pahn wia pwukoah kesemwpwal me E ketin kasaledahr pwehn koasonehdi wen kesemwpwal pen kaskuhl en sapwellime rongamwahu ni imwen kouson akan.
Riei kempoakepahi lih akan, I kapingki atail tuhpene. Met e wia ehu ahnsou me kaperen nan Mwomwohdiso en Sises Krais en Souleng en Imwin-rahn akan. Kauno ketin kaskasaledahr eripit kan me pid duwen Sapwellime Mwomwohdiso nin duwen me E inoukidahr me E pahn ketin wia.
Kumwail tamataman ni ansou me E keinemwe ia wen werei en pihl ehu me kin wie kusukus pahn wie samsaminiki? Soangen manaman dah me pahn kak kolehdihsang lahng akan? E pahn apwalehng ohl en sampah men en kadangpeseng peh luwet akan pwehn kauwuhdi pilap en Misori me wiawidahr de en wekidala tangatang en pilapo ong ni pali me e udahn kusang ie pwehn wiahki me mie me kak kawuhdi de kapwandehla Koht sang ni Eh pahn kin ketkihdo Sapwellime eripit kan sang nanleng ohng Sapwellime Souleng en Imwin-rahn akan.1
Met me iangahki Sapwellimen Koht mehn kaweid me pid duwen eripit me E ketkiong kitail iei Sapwellime eripit en me mehlelo ong Sapwellime aramas akan en kak en wewehkihla, maraihnkihla, oh loalehdi ansou mwadang. E kasaledahr ni sansal me Sapwellimen Samatail Nanleng serepein kan me pahn ahniki pwukoah keieu kesempwal en katangahwei mwadang koasondi kopwuriamwei wet. Ehu mehn kasansal me pid duwen kemwekid kopwuriamwei wet iei ni Eh pahn kahluwa Sapwellime soukohp ieias en kasalehda wen kesempwal laud me pid duwen iren kaweid en rongamwahuo ong nan imwen kouson akan oh nan peneinei kan.
Kumwail mweihn pahn idek, “Ia mwomwen soahngo ah pahn wia en lih pwoson akan pwukoah keieu kesempwal en sewese Kauno ketkihdo Sapwellime eripit ohng Sapwellime Souleng kan?” Kauno ketin ketkidohr sapwellime pasapeng nan “Peneinei: Kalohk Ehu Ong Sampah.” Kumwail esehier lepin mahsen akan, ahpw kumwail pahn kak kilang kawehwe kapw oh kak kasawih me Kauno ketin kilangehr wekidekla kaperen pwukat, me wie pwarpwaradahr rahn pwukat. Nan kalohko, E ketkiheng lih akan pwukoah en wia sounpadahk en rongamwahuo nan peneinei nin duwe met: ‘En nohno kan pwukoah keieu kesempwal iei en kakairada neirail serih kan.”2 Met me iangahki keirdahn rongamwahu mehlelo oh mehn kamaraihn kan.
Kalohko pil doulahte oh mahsanih: “Pahpa oh nohno kan ahniki pwukoah en sawaspene ni pahrek.”3 Irail wia pwopwoud pahrek ehu, pahrek nan kekeirdahn pali ngehn oh ni kaskuhl en kamaraihn kan, oh met ma ira kin wiahla ehu sang ni ara kin sawaspene. Ira pahrek nan ara seilok en mour en souleng pwe ira en kak sepwilida ni ara wia ehu. Ni mehlel, ohl akan oh lih akan sohte kak en sepwilida ma irail sohte wia ehu.
Pwe dahme kahrehda, eri, wewehki sapwellimen Koht serepein men ni eh patehngehr oh ahniki pwukoahn pwopwoud pahrek iei ih me udahn pahn ale pwukoah keieu kesempwal en keihrkihda kamaraihn de eripit me keieu kesempwal me koaros pahn anahne ale, me iei kamaraihn de eripit mehlel me pahn sang nanleng? Sang ni dahme I wewehki, iei met me dahme Kauno koasoanehdier sang ni tepin peneinei kan eh kepikpikda pohn sampah.
Ni karasepe, Eve me alehdi eripit me Adam anahne kang wahntuhkeu pwe ira en kak ahniki eripit en kolokol sapwellimen Koht kosoned akan oh ira en kak wiahda ara peneinei. I sohte ese dahme kahrehda eripit wet kohieng Eve mahs, ahpw Adam oh Eve ira unsek ni ara wia ehu ni ahnsou me eripit wet kohiengehr Adam.
Ehu karasaras me Kauno doadoahngki ong ni kisakis en kekeirdahn lih akan iei ni ehu ahnsou me E kakehlaka neihn Helaman pwutang kan. E saihr ie ni ahnsou me I wadek soiepe oh tamanda en ei nohno eh koasoai ni ansou me I mweselahng nan pwukoahn doadoahk en sounpei.
Helaman ahpw intingihdi:
“Irail kaskuhlsangehr arail nohno kan me ma irail pahn sohte ahniki peikasal, Koht pahn ketin ketket rehrail oh pahn ketin kapit iraila.
“Irail ahpw indahngiehier dahme arail nohno kau indahng irailehr, me mahsanih me irail sohte ahniki peikasal me arail nohno kau esehier.”4
Ni ei sohte wewehki kahrepeh kan koaros me Kauno kihengki pwukoah kesempwal en keihrdahn nan peneinei ong lih loaloapwoat kan, I kamehlele me e poahsoandahsang ni limpoak mwuledek me mihmi rehn kumwail lih akan. E kin anahne wen limpoak laud ehu pwehn kak pehmada anahn en mehteikan sang ni peihn amwail anahn. Iei met me wia limpoak mehlel en Krais ong aramas akan me kumwail apwalih. Pepehm en limpoak mehlel wet kin kohsang rehn aramas akan me kin pilipildahr pwehn wia soun epwelpen aramas me warohng en wia kisehn Tomw en Sises Krais. Lepin mahsen me kin oarelape Relief Society me peihn ai nohno kin karasahki me kin kakehlaihlie: “Limpoak mehlel, Sohte Imwi.”
Ni amwail wia sapwellimen Koht serepein kei, kumwail ahnikier pepehmo en kak kehn anahn en mehteikan oh ahniki limpoak. Sang ni mwo, me kak elehda kumwail en kak rong kisin ngihl tikitik me kin peido sang Ngehno. Ngehno ahpw pahn kak en kahluwa dahme kumwail kin medewe, dahme kumwail kin inda, oh dahme kumwail pahn wia pwehn apwalihki aramas akan pwe Kauno en kak kapwulodo eripit, mehlelo, oh eimah pohrail.
Kumwail lih akan me rongorong padahk wet emenemen kumwail mihmi ni wasa ehu me weksang en mehteikan ni amwail seiseilok kohwei nan mour wet. Ekei wia kisin serepein kei me ahpwtehn iang towehda tiepene lap en kapokon lap en lih akan. Ekei wia serepein pwulopwul kei me onohnopehng en wia soun sawas kei me Koht kupwurki irail en wia. Ekei ahpwtehn kapwopwoudla ahpw saikinte mie neirail seri; ekei wia nohno pwulopwul kei me nainiki seri emen de pil tohtohsang. Ekei wia nohnohn me pwulopwul kan oh ekei me nainiki seri me mihmi nan misin. Ekei nainiki seri me arail pwoson tikitiklahr nan rongamwahu wet oh dohsang nimwarail kan. Ekei kin kelekelehpw sohte kempoakepahrail me ahniki pwoson. Ekei wia nohno kahlap.
Ahpw sohte lipilipil soangen mour da me kumwail ahniki, kumwail wia kisehn—me keieu kesempwalehng—peneinei en Koht oh peihn amwail peneinei, nan rahn me kokohdoh kan, nan sampah wet, de pil nan sapwen ngehn. Amwail pwukoah sang Koht iei en kakairada wen totohn Sapwellime oh amwail peneinei kan ni uwen me kumwail kak ki amwail limpoak oh pwoson Kaun Sises Krais.
Amwail pwukoah met iei kumwail en esehla ihs me kumwail pahn sewese, ia pahn mwomwe, oh ahnsou da. Kumwail anahne en Kauno sawas. E ese en mehteikan mongiong, oh E ese ahnsou da me irail pahn onopada en alehda amwail sawas. Amwail kapakap en pwoson me pahn wia inondehn amwail pweida. Kumwail kak idawehn sang ni amwail pahn kin alehda Sapwellime kaweihd.
E ketkihdo mehn kangoang wet pwe ma kitail pahn peki rehn Samatail ni Mware sang ni pwoson kamehlele me kitail pahn ale, kitail pahn udahn ahniki Ngehn Sarawi me kin ketin kasalehda mehkoaros me mwahu.5
Pwehn patehng kapakap, onopki pwuhk sarawi kan inenen kesempwal en wia kisehn kalaudpen amwail keirda nan pwukoahn wia epwelpen aramas. Iei met me wia inou ehu, Kauno ketin mahsanih: “kitail en dehr madmadau laud ki dahme kitail pahn inda. Kitail en pousehla kadirehkihla atail lamalam akan mahsen en mour oh atail ahnsou ahpw pahn kohieng kitail ni ahnsou me kitail pahn anahne.”6
Eri kumwail pahn ahniki ahnsou tohto en kin kapakap, medemedewe, oh medewe mwahu anahn akan en pali ngehn. Kumwail pahn ahniki eripit en me mehlelo kohieng kumwail oh kalaudehla amwail kehlail en kakairada mehteikan nan amwail peneinei.
E pahn mie ahnsou kan me kumwail pahn pehm me amwail kekeirda en esehla mwomwen amwail pahn kadaiala amwail pwukoahn wia soun apwalih men me pwand. E anahne pwoson pwe en kak doudoulahte mwowe. Sounkomouro ketkidohng kumwail mehn kangoang wet:
Kitail en dehr pwangahkihda atail wia doadoahk mwahu kan, pwe kitail wie wihwiahda poahsoan en doadoahk kaselel ehu. Me wia kemwekid kaselel ehu me tepsang mehkot tikitik kan.
Kauno, sang ni Ah doadoahngki Soukohp Joseph Smith, mahsanih me e anahne mongiong oh ineng en madamadau oh me inengo oh peihk en kak tungoale kamwahu en sapwen Zion ni imwin rahn akan.7
Amwail patedo pwongpwong wet kasalehda me kumwail inengieng en alehda en Kauno luhk ohng wiahla soun epwelpen mehteikan. Met me mehlel pil ohng irail me pwulopwul kan pwongpwong wet. Kumwail kak ese ihs me kumwail pahn apwalih nan amwail peneinei. Ma kumwail pahn kapakapki sang ni ineng mehlel ah ahd de mesen aramaso pahn sansalehng kumwail nan amwail madamadau. Ma kumwail pahn kapakapki en ese dahme kumwail pahn wia de inda, kumwail pahn kehn pasapengpe. Ni ehu ehu ahnsou me kumwail pahn peihkiong, amwail kehl en epwel pahn lalaudla. Kumwail pahn onopehng ahnsou me kumwail pahn peihn apwali peihn noumwail serih kan.
Nohnohn me pwulopwul kan kak kapakapki en esehla ia mwomwen arail pahn kakairda neirail pwutak de serepein kan me soukautihieng ese duwen sewese aramas. Kumwail kak kapakapki en esehla ihs me ahniki ngehn sarawio me kak sewese en noumwail serio anahn akan oh alehda ah kaweid. Koht kin karonge oh sapeng en nohno kan arail kapapak ngidingid oh E kin ketin ketkihiong irail sawas.
Oh pil, nohno kahlap men pwongpwong wet kak kehn medek en mongiong sang ni pwunod oh kahpwal akan en nah serih kan oh neihn nah serih kan. Kumwail kak ale kakehlailpemwail oh kaweid sang nan koasoiepen peneinei kan me mih nan pwuhk sarawi kan.
Sang nan mweihn Eve oh Adam, sang ni Pahpahn Isrehl, oh ong peneinei koaros nan Pwuhk en Mormon, ehute iren padahk duwen dahme pahn wiawi ong irail serih kan me kin pahtoulahr kan iei: dehr uhdihsang ahniki limpoak.
Kitail ahniki karasaras mwahu en Sounkomouro ni ahnsou me E apwaliada seri ngehn sapeik akan en Seme Sahm Nanleng. Pil mendahte ni ahnsou me irail oh kitail kin kahrehieng medek, Sounkomouro pahn ketin kapahweite lime.8 E mahsani nan pwuhken 3 Nephi duwen Rie serepein oh pwutak ngehn akan me E song en nantieng apwalih irail ahpw sohte pweida. “I kihkumwail pene, duwehte litok emen me kin pwolepene nah kisin pwurok akan pahn peh, oh ia uwen ahnsou E kin apwahpwalih kumwail, oh ia uwen ahnsou me E kin kihkumwail pene rasong litok emen ah kin kihpene nah kisin pwurok akan pahn peh kan.”9
Ohng riei lih akan nan ehu ehu kahk en nan amwail seilok en mour, nan ehu ehu kemwekid en peneinei kan, oh wasa koaros nan pelien tiahk, Sounkomouro me wia amwail karasaras mwau ong ia mwomwen amwail pahn katangahwei amwail pwukoa doahdoahk kesempwal nan Sapwellime wasa me kesempwaliki kaskuhl en rongamwahuo nan imwen kouson akan oh peneinei.
Kumwail pahn wahdo amwail pepehm en limpoak ni wekdeklah kan me pahn pwarada nan kemwekid kan oh wiewiah kan en nan amwail peneinei. Iei met me pahn kalaudehla kekeirdahn pali ngehn. Ni ahnsou me kumwail pahn ehupene kapakapene oh kapakapki tohn amwail peneinei kan, kumwail pahn kak kehn amwail oh en Sounkomouro limpoak ong irail. Met me pahn kiheng kumwail kisakis en pali ngehn laud ansou me kumwail pahn kin rapahki. Tohn amwail peneinei kan pahn kin kehn amwail limpoak ni ansou me kumwail pahn kin kapakap ni pwoson laud.
Ni ansou me peneinei kin pokonpene wadek iren pwuhk sarawih ni ngihl laud, kumwail pahn kin wadekehr oh kapakapki ire pwukat pwehn sewese kaunop kumwailda. Kumwail pahn kin diar ahnsou kan en kin kapakapki Ngehno en kamaraihni amwail madamadau. Oh ni ansou me e pahn uhd amwail ahnsou en wadawad, peneinei kan pahn kehn amwail limpoak ong Koht oh Sapwellime mahsen. Irail pahn audaudkihda Ih oh Sapwellime Ngehno.
Soangen kaweid wet kak kohieng peneinei sohte lipilipil ni ansou en ehupene kan ma kumwail pahn kin kapakap oh kaunopada. E pahn kin anahne ngoang oh ahnsou, ahpw e pahn kin kasalehda manaman kopwuriamwei kan. I tamanda iren padahk ehu me ai nohno padahkieng ie ni ansou me I tikitik. I kak kilang nan ai madamadau kolor en map me e wiada sang ni wasah kan me Wahnpoaron Paul seilok seli ie. I men ese ia mwomwen ah kak diar ah ahnsou oh kehl en wiahda mwo. Oh met I alehdi kapai ki ah limpoak ong Wahnpoaron pwoson menet.
Emen emen kumwail pahn diar ahl ehu me kumwail en kak iang sawasiki kalaudehla eripit en me mehlelo nan amwail peneinei kan nan sapwellimen Koht Mwomwohdiso kopwurupwurdoh. Emen emen kumwail pahn kapakap, onop, oh medemedewe en esehla dahme emen emen kumwail kak sawaski. Ahpw met I ese: ma emen emen kumwail pahn patehng Sapwellimen Koht pwutak kan ni pahrek, e pahn wia lapalahn kemwekid manaman ehu ong ni kaskuhl oh momourki rongamwahuo ni eh pahn kamwadangahla kapokonpenehn mehn Isrehl kan oh pahn kaunopada sapwellimen Koht peneinei ong ni ketdo lap en Kaun Sises Krais. Ni mwahr sarawi en Sises Krais, ahmen.