Kokoudahn Poasoahn en Doahk Lap Ehu
Kaskuhl kan me kin wiawi nan imwatail kan, menda ma e tikitik oh mengei, udahn kesempwal ehng momour en rahn pwukat.
Pwehki atail wia peneinei en nan sapwellime wehi, kitail ahneki pwukoa sarawi en atail tuhngoal kowa kan en ahneki peren, marain, oh weweki me mehlel kan en rohngamwahu en Sises Krais. Kakairada seri kan, kitail kin pein wia atail tiahk kan en imwatail oh wiada wiepen wehwepene nan pwungatail. Ni atail kin wia met, kitail anahne kahkelailihiala atail wiewia kan, padahkiheng neitail seri kan wiepe mwahu kan pwehn kak kahkelailih irail en powedi kasongosong kan.
Sounpar tohto ngehi oh ahi peneinei kin pereniki kohla kamp ni nahnahn Uintah palimese en Utah. Se kin alukihla mwail 20 (32 km) alialu pohn ahl takain lau lel nan wahu ieu me inenen kaslelel, nahna kan me ileileile, oh pihl lomwlomwur, mwakelekel. Pahr koaros, Ni aht kin kaskasik en kin kataman kesemwpwal en padahng kan en rohngamwahuo oh kin kaiahnehieng nait seri kan oh nein nait kan, Susan oh ngehi ndahng nait seri kan en kounopada kisin padahk me re pehm pahn wia poasoan kesemwpwal en medemedewe ansou karos nan imwato. Eri mwuri se kin kohpene wasa kis nan imwato oh emen emen kin wia ah kisin padahk.
Pahret, nein nait seri koa seri kan intingidi arail padahngko pohn kisin takai kei, oh sarep irail di, ni arail kairak irail di, wia kilel en poahsoan en ihmw me mie peren. Ehu iren padahk me re intihngi iei. Met me wia kamehlel ieu me Sises Krais me wia takain pwukekeimw en nimwato.
Duwete dahme Aiseia padahngki, “Eri iet me Kauno, Koht masahnih: I pahn kidohng Saion poahsoan teng oh kehleil ehu. I ahpw pahn koasoanehdi takain pwukakeimw tehng ehu.”1 Sises Krais me wia takain pwukakeimw kesemwpwal en poasoahneda sapwelime Saion.Sises Krais ketin kasalehiohng Soukohp Josehp Smith me kitail en dehr pwangada ni atail wia me mwahu kan, pwehki kitail kin iang wiewiada sapwelime poasoahn en doadoahk lapo. Pwe sang ni mehkot tikitik kan kin diar mehkot laud.”2
Kisin padahng kan me se kin wia nan aht peneinei, itarete ah tikitik oh mehngei, udahn kesempwal ohng momour en rahn pwukat. Dahme tikitik oh mengei, ni atail kin wia, pahn kareda mehkot laud nan mour en neitail seri kan?
Presidend Russel M. Nelson me keren padahngki nan Toronto, Canada, oh kataman ohng peneinei kan atail pwukoa sarawi me kitail anehki pwehn kaskuhlih neitail seri kan. Nan pwukoa kesempwal kan me, Presidend Nelson kasalehiohng peneinei kan kitail anahne kaskuhlihki neitail seri kan en wehweki ia kahrepen arail kin ale kamadipw sarawi, kesempwal en inou kak me re kin alehsang, oh kesempwal en kaunopada oh alehdi kapai en patriarch. E kangoangehki peneinei kan en tapiada wadawad nan arail kisin peneinei kan.3 en kapariki neitail seri kan kasuwed pen kasdo suwed kan oh ia mwomwen arail pahn powedi, oh indahng peneinei kan en kin ntingiada kisin likou oh kadarohng neirail seri kan pwehn kehsehkin irail arail limpoak oh pwoson Krais.”4
Nan Pwuhk En Mormon, Enos Koasoiada wen kaping lap me e ahneki me e kehn sang seme nanleng me pein padahk ohng ih, oh pil epwel mwahu kan oh limpoak en samatail Koht. E wiaki kaping laud.5
I inenen kesempwalki sohng tikitik kan me se kin wia nan imwato nan eriein sounpar 35 me ngehi oh ahi pwoud wie pwopwoudki. Pali laud en aht tiahk kan kin tikitik, ahpw me katapan. Ehu karasepe:
-
Ni ansou me I sohte kin mie nimawato, I eseier me nait pwutak laudo kin pein koapwukoahki pein ih, itarete ah sohte me kin ndahng, en kin kounda aht peneinei ansou en wadawa kan oh kapakap kan.6
-
Pil ehu aht tiahk––se sohte kin kohkohlahsang nimwato, de pwil delepwohn, ma se sohte pahn inda, “I Poakpoake iuk.”
-
Nan aht mour diren kapai se kin alehdi sang aht kin pwilikihdi aht ansou pwehn kapeidak nait pwutangko. Nan ehu aht tuhpene ko I idek rehn nait pwutako ia iren ah ineng oh ah kounopadahn wia ah mission. Ni aht koaskosia met, mie ekis asnou e nennenla oh medemedewe, ih eri kilengdohngie inda, “Ipa, ke taman ni ansou me I tikitiko oh ni asnou me kitail tepida wia interpu?” I nda “ehng” “Eri” e inda, “I inokiohng uhk me I pahn wia ahi missiom, oh kowe oh nohno inoukiohng ie me ni asnou me kumwa pahn mahla kumwa pahn wia amwa mission.” I uhdi oh sohla lokaia. “Eri mie mehkot me kapwkapwandei kumwa sang en wia amwa mission—pwe ma mie I kak sawas?” Ni mehlelo, I sehsehla dahme I pahn inda.
Patpenehn peneinei ni kapakap, wadawad, soutik en peneinei, oh kohla iang sarawi, kin mwomwen me mehkot tikitik, ahpw e kin kahrehda limpoak, wahu, ehupene, oh insenamwhau. Pwehki ngoahng en kakehlailiala pali ngehn, neitail seri kan pahn kin kak powehdi kasongosong kan me kin lelohng irail rahn pwukat.
E kin kataman ohng kitail kaweid me Helman kiheng nah pwutak kan me kitail kin anahne poasoahn kihda atail mour Sounkomouro, me iei Kraise, sapwelimen Koht Ieros, pwe ni ansou me ngehn saouto pahn kadardo kisnieng ah kehl en suwed kan, e pahn sohte alehdi manaman en powei kitail di pwehki atail poasoahn kihda Sounkomouro. Pwe poasoahn wet me kehlail.7
Pahrekei samwalahro, Ni asnou me I wia pisop pwulepwul men, ohl emen me mah sang ie peki rehi ma I kak tuweng. E koasoiahieng ie mwomwen ah kohkolahsahng Mwomwohdiso wet oh sohla kin wia soahng kan me ah peneinei kin wia ni asnou me e pwulepwulo. E kapisetiki iong ie mwomwen ah alehdi apwal kan ni a wia sohngo, pwehki ah kin sohng en rapaki peren en sampah. Met, nan rahn pwukat, e kin koasoia wen mwahu, kisin ngihl tikitik me kin kalapw lelohng sang ngehn sarawi me kin kaweid ki ih en pwurehng rong padahng kan, wiepeh kan, pepehm kan, oh poadoandoar en ngehn sarawi me duwete ansou me e serio. E kapingkihiong ah pahpa nohno, me duwete dahme Enos padahngki: “oh meid pai ni mwaren kauno pwehki met.”
Nin duwen ei wehwehki, Ohl menet duwehte irail me tohtoie me pwurodohng ehr rohngamwahuo me kohkohlashang ni kisin lepin ansou, pwehn pwurodo oh pwurehng wia sohng kan me e kaskulki ni ah serio. Nan songen ansouo kitail kin taman kaweid me kohsang nan lepin padak me indahng peneinei kan, “padakiehng kisin seri men duwen ah pahn momour, eri e pahn tamataman erein ah mour.”8
Pahpa oh nohno koaros kin pwangada nan irair en kairada seri men. Ahpw, ma peneinei kan kin doadoahngki pwoson ni ansou me irail pahn kairada seri men ansou karos, ni mehlel limpoak oh wia wen arail kak koaros pwehn sewese irail, re pahn alehdi koapwoaroapwoar lap me dahme irail padokedi pahn ehu rahn osada nan arail mohngiong oh madamada ehu rahn.
Moses wehwehki kesempwal en padahk rahn koaros. Ni ah kosoia, “Padahkiehng noumwail seri kan. Kataman kin irail ahnsou me kumwail kin mihmi nan imwamwail oh pil ni ansou me kumwail kin mihmi seli ekis wasa tohrohr, oh ni ansou me kumwail kin komoahl oh ni ansou me kumwail kin wia ahmwail doadoahk kan.”9
Kitail en kin iang neitail seri kan oh keipwek di kapakap ansoun kapakap kan, kitail kin anahne patehng irail oh kasalehda ineng en onopki pwuhk sarawi kan, kitail kin kanengmah, oh limpoak ohng irail ni soutik en peneinei kan, kitail kin kasaleiohng irail me kitail kin katapakin irail ansoun kapakap, pwe kitail men neitail seri kan en alehda padahk pwung kan me kitail kin kaskuhliehng irail.
I kamehlel me e sohte anahne insensuwedki ma neital seri kan sohte kin wehweki atail padahng kan, me kapwal en wadewad de iang soutik en peneinei de wiewia duty to god de young women recongition. Kitail sohte anahne insensuwedki ma sohte wehwehki ia kesempwal en kemwekid pwukat ahpw en tehk mwahu, ma ni atail wia pahpa de nohno, kitail kin doaddoahngki atail pwoson en idawehn Sapwelimen Koht padahng kan me iei wia wen atail kak koaros en momourki, padahngki, oh kasalehda karesepe mwahu––me ehu rahn dahme kitail kiehng irail pahn keirda nan arail mohngiong kan.
Sohng karos me kitail kin koasoia, sohng koaros me kitail kin padahngki kin kasalehda dahme pahn wiawiohng kitail. Ma kitail pahn kin alehda taihk en Koht oh Sapwellime padahng kan, Ngehn Sarawi pahn kadedeiohng kitail mehlelen Sapwelime padahng kan oh kairada weren tuhke mwahu kan me poadediohng ehr nan atail mohngiong kan, I kadede ki ni mwaren Sises Krais, amen.