Ong Ih
Esehla ihs oh dahme kahrehda kitail kin papah mehteikan pahn sewesei kitail en wehwehkihla me kasansal en limpoak me keieu laud iei loaloapwoat ong Koht.
Ni pwohng kesemwpwal wet, I men kasalehiong emenemen kumwail riei lih akan ai limpoak oh kaping. Itarete atail sounpar, wasahn kouson, de dahme kitail kin lelohng eh sohte duwepene, kitail pokonpene pwongpwong wet ni miniminpene, ni wen kehlail ehu, ni kahrepe ehu, oh ni kadehde me Samatail Nanleng ketin poakohng kitail oh me kin kahkahluwai kitail; oh atail Sounkomouro, Sises Krais oh atail soukohp ieias, President Russel M. Nelson.
Ni ansou me se pwulopwul, ngehi oh ahi pwoud alehdi pwukoah ehu sang aht pisop sen kohla tuwohng oh sewese penenei ehu me saik pwurala sarawiki sounpar tohto. Mwurin rahn ekei se alehda pwukoah wet oh kohla ni imwarailo. E sansal ong kiht me irail sohte mwauki aramas sang ni Mwomwohdiso en pwarek irail.
Keriau en aht pwurala, se pwarala oh wahla dahl en kukihs ehu, ni aht kamehlele me aht kisakis pahn kak elehieng irail en pwungkin kiht. Ahpw irail sohte men. Pwopwoudo lokaiadohng kiht sang ni wenihmw toko, kasalehiong kiht ni sansal me irail sohte men kasamwoi kiht. Ahpw ni aht pwurala nimwahto, se ahniki pepehm ehu me ma se wahte rice crispy aht pwarek irail pahn pweida.
Pwehki aht ahniki sou itar en madamadau sang ngehno kahrehda pak tohto se song oh pwangada. Sarohdi me inenen soansuwed. Mwurihsang se ahpw tepda pein medmedewe, “Dahme kita wiewia ki met? Iakahrepeta?”
Elder Carl B. Cook ahpw koasoia met: “Papah Mwomwohdiso ... kin kak apwal ma irail kin indahng kitail en wia mehkot me kitail masak, ma kitail kin pwangada papah, de ma irail kin kieng kitail pwukoa me kitail sohte nohn pereniki.”1 Kitail pehmadahr me mehlelo sang ni en Elder Cook mahsen akan ni atail lemedahr kitail en rapahki kaweid sang rehn Mehmeno me sapwellime wehwe laudsang atail wehwehki.
Eri, mwurin aht kin kapakap oh wadawad, se alehdi pasapeng en peidek dahme kahreda aht kin papah. Se alehdi wehwe mwahu, aht mohngiong pil mwuterekdahr, met me wia aht kaudial.2 Sang ni aht rapahki kaweid sang nan pwuhk sarawi kan, Kauno ketin padakiehng kiht mwomwen aht pahn sewese mehteikan ni mengei oh katapan. Ire me se wadek me wekidala aht lamalam oh mwomwen aht pahn apwali aht doadoahk en pweida mahsani me se anahne poakoahng Kauno Koht ni aht mohngiong unsek, ni aht kehl unsek, madamadau unsek oh ni wen aht kak koaros; oh ni mwaren Sises Krais se anahne papah Ih.”3 Itarete ire wet sohte kapwehng kiht ahpw e sansalohng kiht ni mwohmw ehu me e kapw oh kesemwpwal.
Se diarada me se nanantiheng papah peneinei wet oh papah aht pisop, ahpw se anahne peidengki ma se udahn wie papahki ni limpoak ong Kauno. Nanmwarki Benjamin kasalehda ni sansal ni eh mahsanih, “Kilang, I indahiong kumwail me pwehki ahi indahiong kumwailehr me I kin doadoahngki ahi ahnsou kan en papah kumwail, I sohte ahniki ineng en suweiki, pwehki ahi kin wie papahte Koht.”4
Eri ihs me Nahnmwarki Benjamin wie papah? Iei Samatail Nanleng oh Sounkomouro. Esehla ihs oh dahme kahrehda kitail kin papah mehteikan pahn sewesei kitail en wehwehkihla me kasansal en limpoak me keieu laud iei loaloapwoat ong Koht.
Ni aht madamadau ah wekila, pil duwete aht kapakap. Se tepda kin kasikasik ahnsou me se pahn kin pwarek penenei wet pwehki sang ni aht limpoak ong Kauno.5 Se wia met pwehki Ih. E ketin maliela aht kapwal kan koaros. Mwurin sounpwohng kei me se kin kesihnente ni arail wenihmw oh koasoi ong irail, peneineio tepida mweidohng kiht en pidolong nan imwarailo. Se kakehr kin kapakap pene oh koasoakoasoikipene rongamwahuo. Se wiahla kempoakepahrail. Se kin pwohngih oh poakoahng Ih sang ni aht kin poakoahng Sapwellime seri kan.
Kumwail kak medewehla ehu ansou me sang ni limpoak kumwail sewesehda aramas emen me ananane amwail sawas oh kumwail kehn me amwail sawaso sohte me pohnese de pereniki de sohte katepe? Nan ansouo, kumwail kin ahniki kilelen peidek ma amwail sawaso mie katape? Ma iei, mahsen kan en Nahnmwarki Benjamin en wekidala amwail peikasal oh medek me kumwail ahniki: “Kumwail wiahte pwehn papah amwail Koht.”6
Ieremen ahngada upene nan pwungatail, ahpw kitail en kalaudehla, sang ni sawas de papah, atail ehuwohng Samatail Nanleng en tehlapala ni unsek. Atail limpoak oh loaloapwoat ong Ih pahn kin doarei kitail sang nan anahn en men kin sansal de kasik kaping sang aramas akan oh mweidohng Sapwellime limpoak en mwerodohng kitail.
Ekeipak kitail kin papah pwehki sang ni pwukoah de kehkehlik me kitail ahniki, ahpw soangen papah wet kin kak kahrehiong kitail en doadoahngki ni mehkot laud ehu ong kitail, kaweidkiong kitail en papah “ni ehu ahl kaselel”7—me duwehte en Presidend Nelson ah luke kitail ong ni “wiepe kapw, sarawi en apwalih oh papah mehtei kan.”8
Ni ansou me kitail kin kilkilangehr soang kan koaros me Koht ketin wiahng kitailehr, atail ineng en papah kin kehlaila sang ni kaping kan. Ni ansou me kitail kin sohte nohn medewe ia mwomwen atail pwukoahn papah ah pahn sewesei kitail, kitail diarada me kesempwalpen atail pwukoahn papah Koht mwohn mehkoaros.9
Preseden M. Russell Ballard padahngki, “Ihte ni ansou me kitail kin poakoahng Koht oh Krais nan atail mohngiong unsek, ngehnitail unsek, oh lamalam unsek me kitail kak en ehukieng mehn impetail kan limpoak wet sang ni atail wiewiahn kadek oh papah.”10
Keieu en Kosoned Eiseko pil kapwurehieng ire wet: “Ngehi me Kauno amwail Koht. … Kumwail sohte pahn ahneki emen koht tohrohr mwohi.”11 Iren kosoned wet sewesei kitail en wewehki me ma kitail pahn kihdo Koht mwohn mehkoaros, a soang koaros pahn weweh mwahu—pil duwehte atail pahn papah mehteikan. Ni ansou me E ketkihda pwukoah kesemwpal wet nan atail mour sang ni atail pilipil mwahu, eri E pahn kak kapaiada atail wiewiah kan ohng kamwaupatail oh ohng kamwaupen mehtei kan.
Kauno ketin kaweihdkiermahsanih, “Kumwail sohpeidohngie ni madamadau koaros.”12 Nan wihk koaros kitail inoukidahr me kitail pahn kin wihwia met—en “kin tamataman ih ansou koaros.”13 Kitail pahn kak en ahniki soangen madamadau wet ni soahng kan koaros me kitail kin wia? Pwukoah doadoahk en kaliduh pahn kak en wia ehu karasaras en kasalehda atail limpoak oh loaloapwoat ohng Ih? I kamehlele me e kak.
Kitail kak wiahdi ehu ehu pwukoah kan nan atail irekdien pwukoah doadoahk kan en wia ehu wiepen atail pahn kin kapingahki Ih. Kitail kak alehda ehu ehu pwukoah pwe en wia ehu ahnsou mwahu en papah Ih, itarete ma mie ehu doadoahk kesempwal me anahne kanekehla, de wihwiahte pwukoa teikan, de welian en seri daiper ape.
Duwehte me Ammon mahsanih: “Ehi, I ese me sohte ngehi mehkot; sang ni kehlail me I kin luwetkihla; I sohte kin kalahki pein ngehi, ahpw I kin kalahki ahi Koht, pwehki I kin kak wia mehkoaros sang ni Sapwellime kehl.”14
Ni ansou me kitail kin papah atail Koht e kin wiahla atail pwukoah kesemwpwal nan atail mour, kitail kin sesehla pein kitail, oh mwurin ansou kis kitail kin esehla mehlel pein kitail.15
Sounkomouro padahngki ire wet ni mengei oh inen: “Eri amwail marain en kin sansal mwohn aramas pwukat, pwe irail en kak kilang amwail doadoahk mwahu oh kapingahki Samamwail me kin ketket Nanleng.”16
I men ehukiehng kumwail iren mahsen en kamarain kei me dierek pohn dihd en wasa ehu me seri sopwoupwou kan kin kouson ie nan Calcutta, India: “Ma kumwail kadek, aramas pahn indahki me mie mehkot me ke mwahuki. Ahpw ke en kadekte. Dahme kumwail kin nantiheng sounpar kei kawkawada, aramas emen kak kawehkihla pwohng ehu. Ahpw itar doulahte mwowe oh kawada. Dahme mwahu me kumwail wiahda rahnwet, aramas kin mwadangete manokehla mandahsango. Ahpw kumwail dehr uhdisang wiewia mwahu. Kieng sampah wen amwail kak koaros, oh mwein e sohte pahn itar. Ahpw wia wen amwail kak koaros ong sampah. Kumwail kilang, pwe ni imwilahu, dahme pahn keieu kesemwpwal iei nan pwungen kowe oh Koht … ihte.”17
Riei lih ako, e kin nan pwungen kitail oh Kauno. Presided James E Faust koasoia: “‘Dahme sampah keieu anahne?’ … ‘Kaidehn ihme sampah keieu anahne aramas emen en ehuieng Sounkomouro nan ah mour rahn koaros?’ Soangen ehupene wet kak en kasalehda atail lamalam en souleng me mihmi rehtail, oh sohte mehkot pahn kak kasalehda wekidekla laud en nan atail mour ihte ma kitail pahn esehla oh wewehkihla atail mour ong Koht.”18
Me pil duwete, Alma kawewehiong nah pwutako, “Ehi, ahmw wiewiah kan koaros, ke pahn wia ong Kauno, oh wasa koaros me ke pahn kin kohla ie ke pahn kin ehuieng Kauno; ke pahn kin anahne loaloapwoat ong Kauno nan ahmw madamadau kan, oh kainenelahng ahmw limpoak ong Kauno kohkohlahte.”19
Oh Presiden Russell M. Nelson pil ni soangen mwohmwohte padahngki, “Ni ansou me kitail pahn wewehkihla Sapwellime Tomwo, atail tohnmetei kin uhd audaudkihla kaping pwehki atail kin papah Ih.”20
Riei lih ako, I kadedehki me ni ansou me Sises Krais, sang ni manaman en Sapwellime Tomwo, kin doadoahk rehtail oh loaletailkan, E ketin tapiadahr doadoahngkin kitail pwehn kapaiada mehtei kan. Kitail papah irail, ahpw kitail wia met sang ni atail limpoakohng oh men papah Ih. Kitail duwelahr dahme iren pwuhk sarawio kaweweh: emen emen ohl oh lih kin raparapahki dahme mehn mperail kan kin pereniki, oh kin wia mehkoaros ongete ni kalinganpen Koht.21
Mwein aht pisopo ese me ih padahk me ngehi oh ahi pwoud anahne esehla sang ni ahnsou kau, me sohte nohn unsek, ni uwen aht kak koaros en papah Sapwellimen Koht serih kan. I kadehdehki ni ei pein ese oh kamehlele Sapwellime mwahu oh limpoak me E ehukiong kitail pil ni ansou me kitail kin nantieng papah Ih. Ni lengleng sarawi en Sises Krais, ahmen.