Pwukoahn Pwuhken Mormon ni Weliakapw
Kitail kih-kihpene Isreal ni imwin ansou oh kitail wihwia met ki Pwuhken Mormon, me iei ehu wiepe keiou manaman duwen weliakapw.
Tohtohn aramas rahnwet kin medemedwe ma mehlel mie Koht oh atail pepehm ong Ih. Me tohto me ekis ese de pil sohte douluhl ese duwen Kupwure ong pilahn kesemwpwal en popohl. Sounpar 30 samwalahro, Presiden Ezra Taft Benson kasawiada me “palilaud en … sampah rahnwet soikala padahk mehlel en Sounkomouro. Irail peidek ki duwen kopwuriamwei en Sapwellime ipwidi, Sapwellime mour unsek, oh duwen mehlel en Sapwellime Iasada kesemwpwalo.”1
Nan rahnpwukat, iren peidek kan kin sohte ongete atail Sounkomouro apw pil ong Sapwellime Mwomwohdiso—Mwomwohdiso en Sises Krais en Souleng en Imwin Rahn-akan—me E ketin kapwuredohng kitail sang Soukohp Sosep Smith. Iren peidek pwukat kalapw pid duwen poadoapoad, kaskuhl kan, de tiahk kan en sapwellimen Soukomouro Mowmwohdiso.
Pwuhken Momromon Sewese Kitail en Kalaudehla Atail Kadehde
Nan Preach My Gospel, kitail wadek: “Tamataman me atail wehwehki [Samatail Nanleng oh Sapwellime pilahn en popohl] kohsang irail soukohp en rahn pwukat—Sosep Smith oh iengeh kan me pweidahr oh ale mweimwei—me ale kaudial sang Kauno. Eri, keioun peidek me aramas emen anahne sapeng iei ma Sosep Smith wia soukohp emen, oh e kak sapeng iren peidek wet sang ni ah pahn wadek oh kapakapki Pwuken Mormon.”2
Ahi kadehde ki duwen pwukoa sarawi en Sosep Smith kin kehlaila sang ahi kin kapakapki oh onopki Pwuhken Mormon: Me wia pilehu Kadehde pen Sises Krais. I wiahier dahme Moroni lukehkin kitail en “peki rehn Koht, Samatail Soutuk, ni mwaren Krais,” en ese ni mehlel duwen Pwuhken Mormon.3 I kadehdehki me I ese me e mehlel. Me marain wet kodohngiehier, duwehte ah kak kohwehng rehmwi, “sang ni manaman en Ngehn Sarawi.”4
Ni tepdahn Pwuken Mormon e koasoia: “Koaros me alehdi kadehde sarawi [en pwuhken Mormon] sang Ngehn Sarawi pahn pil esehla me sang ni manaman en Sises Krais iei Sounkomour en sampah, me Sosep Smith me wia Sapwellime soun kihla kaudial oh soukohp ni imwin rahnpwukat, oh Mwomwohdihso en Sises Krais en Souleng en Imwin Rahn-akan iei Sapwellimen Kauno kanihmw me pilehu kokouda pohn sampah, kaukaunop ohng Ketdo Keriau en Mesaia.”5
Ni ahi wia misineri pwulopwul men kaukaunop en kohla Chile, I esehla ehu kaweid me wekidala ahi mour duwen manaman en weliakapwala nan Pwuhken Mormon. Ohl emen—I pahn kieng ede Mr. Gonzales—wihwia pwukoa kesemwpwal ehu nan ah mwomwohdiso ki sounpar ngeder. E ale songen kaskuhl en souleng kei me inenen kaselel, me iangahki kisin likou ehu me kasalehda ah skuhl laud nan pelien mahsen akan en pwuhk sarawi. E kin kalahki wen loaloakong me e ahneki ni ah semenih iren pwuhk sarawi kan. E sansal ong kiht me e wia emen aramas loaloakong en pwuhk sarawi.
E wehwehki duwen misineri kan en Mwomwohdiso en Sises Krais en Souleng en Imwin Rahn-akan arail wia arail pwukoah doadoahk nan wasahn ah kouson nan kanihmw en Lima, nan Peru. E kin men tuwong irail pwe en kak kaskuhlihong irail Pwuhk Sarawi.
Ehu rahno, duwehte kisakis ehu sang nanleng, ni ah medewe, misineri riemen kawuhdi pohn ahlo oh peki ma ira kak kohla tuwong ih ni imweo oh ehukihong duwen iren pwuhk sarawi kan. Met ah ouraman pweidahr! Ah kapakap kan pasapenglahr. Met, e pahn kakehr kainenehla mwahnakapw pwulopwul riemenet. E ahpw indahng ira me e pahn inenen pereniki ira en kohdo reh nimwehu pwe irail en koasoikipene duwen iren pwuhk sarawi kan.
E kasikalahr rahn me ira pahn pwaredo rehu. E onopadahr pwe en doadoahngki pwuhken Paipel pwehn uwong dahme ira kamehlele. E ahneki koapwoaroapwoar me Paipel pahn kamarainiada oh kasalehda mwahu sapwung en nan ara padahk kan. Ninsoutik en rahno lelodo, oh misineri ko letelet ni ah wenihmwo. Ehu soangen ah peren. Rahn me e kaskasiko lelodohr.
E ritingada wenihmwo oh luhkelong misineri ko nan imweo. Emen misineri ko ahpw kilahng pwuhk poh mei ehu oh wia ah kadehde sang nan ah mongiong me e ese me pwuhko audaud kihda mahsen en Koht. Keriemen en misinerio ahpw doula oh wia ah kadehde kehlail ki pwuhko, kadehdehki me e kawehwehdier sang emen soukohp en Koht, mwaraniki Sosep Smith, oh e padahngki duwen Krais. Misineri ko ahpw pekihda me ira pahn mweseldahr oh mweselsangehr ni imweo.
Mr. Gonzalez pwonopwonkihda dahme wiawi. Apw e kihpeseng pwuhko oh tepda wadek. E wiewadawadehr kohla oh sohte uhdi lao lel mwurin souwas en rahn mandahsango. E wadekalahr pwuhko pwon oh esehier me e mehlel. E esehier dahme e anahne wia. E ekerla misineri ko, ale padahk kan koaros me e anahne ale, oh pwilikihdi mour en mahso oh wiala emen tohn Mwomwohdihso en Sises Krais en Souleng en Imwin Rahn-akan.
Ohl mwahu menet me wia emen sounpadahk en nan MTC nan Provo, Utah. En Brother Gonzales soai en weliakapwala oh manaman en Pwuhken Mormon udahn wia ehu mehkot laud ong ie.
Ni ahi lela Chile, nait misin presiden, Presiden Royden J. Glade, luhkehiong kiht en wadek en Soukohp Sosep Smith kadehde me ntingdier nan Poadoapoad en Sosep Smith—nan wihk koaros. E padahkiong kiht me kadehde en Keieu en Kairoir pahn wia sawas laud ong atail kadehdeh duwen rongamwahuo oh atail kadehdeh duwen Pwuhken Mormon.
I ale oh doadoahngki luhk wet ni mehlel. I wadekala audepen Keieu en Kairoir; I wadekla Pwuhken Mormon. I kapakapki nin duwen dahme Moroni kaweid ki oh peki: Kauno, Semei Nanleng, ni mwaren Krais”6 ma Pwuhken Mormon mehlel. I kadehdehki rahnwet me I ese me Pwuhken Mormon, nin duwen Soukohp Sosep Smith koasoia, me iei “pwuhk me keieu pwung nan pwuhk koaros pohn sampah, oh poahsoan en kih en atail mwomwohdisoht, oh ohl emen [pahn] karanihala Kauno ni ah pahn audaudkihda ekis ekis, sang ni ekei pwuhk.”7 Soukohp Sosep pil koasoia: “Kihsang Pwuhken Mormon oh kaudial akan, oh ia pahn atail mwomwohdiso? E pahn sohte atail mwomwohdiso.”8
Pein en Emenemen Weliakapwala
Ni atail pahn wehwekihla mwahu ihs kitail oh kahrepen Pwuhken Mormon, atail ineng en weliakapw pahn kehlaila oh wehwehla mwahu. Kitail kehlailki atail inou en kolokol inou sarawi kan me kitail wiahng Koht.
Udahn kahrepen Pwuhken Mormon iei en kihpene Isrehl me salongala kan. Kapokon wet kiong Sapwellimen Koht seri koaros ansou mwahu en pidelong nan ahl en inou sarawi oh, sang ni atail pahn wauneki inou sarawi kan, kitail pahn pwurala mihla rehn Samatailo. Ni atail pahn padahk ki koluhla oh pepdaisla ong irail me alehda oh weliakapwala, kitail kihkihpenehr mehn Isrehl me salongalahr ko.
Pwuhken Mormon audaudkihda iren sawas 108 ong keinek en Isrehl. Ni tepin Pwuhk en Mormon, Nihpai padahngki, “Pwe udahn kahrepen ahi wia met iei I en kak katamaniki aramas akan en kohdo rehn Koht en Eipraam, oh Koht en Aisek, oh Koht en Seikop, oh komourla.”9Koht en Eipraam, Aisek, oh Seikop iei Sises Krais, Koht en Kadehde Mering. Kitail komourla ni atail kohdo rehn Krais sang ni momouriki Sapwellime rongamwahuo.
Mwuri, Nihpai ahpw ntingihdi:
“Iei, ahi pahpao koasoia duwen Mehn Liki kan, oh pil duwen peneinei en Israel, me irail pahn rasohng tuhkehn olihp pwoat, me rah kan pahn tipwasang oh pahn kamwermwerpeseng wasa koaros ni sampah. …
“Oh mwurin peneinei en Israel ar pahn kamwermwerpeseng irail pahn pwurehng kopwurpwurpene; de, ni oarelap, mwurin Mehn Liki kan arail pahn alehdi rongamwahuo ni unsek, uhdaken rahn tuhkehn olihpo, de luhwen peneinei en Israel kan, pahn pwurehng poadehng tuhkehu, de wewehkihda udahn Mesaiao, arail Kaun oh Soundor.”10
Duwehte, ni keimwseklahn nan Pwuhken Mormon, soukohp Moroni katamankihong kitail atail inou sarawi kan ni ah koasoia me, kitail solahr pahn ahniki saweweh laud ki inou sarawi kan en Samatail Soutuk me e ketin kaunopadahngehr peneinei en Isrehl me e pahn pweida.”11
Inou Sarawi kan en Samatail Soutuk
Iangeh kan “inou sarawi kan en Samatail Soutuk” me Moroni koskoasoia? Kitail wadekehr nan Pwuhk en Eipraam:
Kauno ketin mahsanihong Eipraam me Mware iei Siohwa, oh me E mwahngih ni imwio sang ni tapio oh Limehkan pahn ketket rehn Eipraam.
Oh me E pahn ketin wiahda keinek en Eipraam en wia wehi laud ehu, oh E pahn ketin kapaiada ih, oh wiahng ede en sansal mwohn wehi tohto, oh e pahn wia kapai ong keinek koaros, me pehrail kan irail pahn apwalihki mwomwohdiso oh Prihstuhd ong wehi teikan.12
Presiden Russell M. Nelson padahngki nan prohdkahs en kapokon laud me keren me “met mehlel wia imwin rahnoko, Kauno kamwkamwadangalahr Sapwelime doadoahk en kihpene Isrehl. Kapokon wet ihme keiou kesemwpwal me pahn wiawi pohn sampah rahnwet. Sohte mehkot kak karasahieng me pahn kak daulih, sohte me kesemwpwal sang, sohte me wahu sang. Eri ma ke pilada, ma ke men iang, ke kak iang wia towe. Ke kak iang towe mehkot laud, mehkot kesemwpwal, mehkot wahu!
“Ni atail kin koasoia duwen kapokonepene, kitail ndinda mehkot me udahn mehlel: koaruhsien me wia Sapwellimen Samatail Nanleng seri kan, me mih pali koaros en veil o, udahn anahne rong rongamwahu wet me wia rongamwahu kapwurupwurdohn Sises Krais. Irail kin pein pilada ma re men esehla mwahu.”13
Ih met me kitail wihwia ni atail wia tohn Mwomwohdiso en Sises Krais en Souleng en Imwin Rahnakan: kitail kin raparapahki en kapwurehdo sampah en kak wehwehkihla—oh welikapwala—ong rongamwahu en Sises Krais. Kitail me wia “towe kan en imwin rahn akan.”14 Atail misin me inenen sansal. Riei ohl oh lih akan, kitail anahne sansalki dahme Moroni inou kidier sang nan ah mohngiong, kapakapki oh aleier pasapeng en esehla ma Pwuhken Mormon mehlel, oh ehukiong marain wet mehteikan ni kaosoai oh, me keiou kesempwal, ni mwohmw.
Pwuhken Mormon ni Pwukoahn Weliakapw
Pwuhken Mormon audaudkihda rongamwahu unsek en Sises Krais.15 E kaweid kiong kitail inou sarawi kan sang Samatailo, me ma kitail pahn kolokolete E ketin inou kiong kitail Sapwellime kisakis me keiou kesemwpwal—mour soutuk.16 Pwuhken Mormon me wia paohson en kih en weliakapwala ong Sapwellimen Samatail Nanleng seri kan.
Iren kataman sang Presiden Nelson: “Ni ahmw … wadek rahn koaros Pwuhken Mormon, ke pahn esehla iren kaudial en pokonpene wet, duwen mehlel en Sises Krais, Sapwellime Tomw, oh Sapwellime rongamwahu unsek me sohte sansal nan Paipel. Pwuhken Mormon me wia poahson en kapokonepenehn Isrehl. Mehlel, ma sohte Pwuhken Mormon, inou en kapokonepenehn Isrehl sohte pahn wiawi.”17
Pwe ien keimwsekihla mahsen sang Sounkomouro ni Ah ketin padahngkiong irail tohn Nihpai ko duwen inou en kapaio: “Kumwail me wia serihn soukohpoko; oh kumwail me wia tohn peneinei en Isrehl; oh kumwail me wia inou sarawi me Semei wiahng atail pahpa ko, me mahseniong Eipraam: Oh noumw seri kan me pahn wia kapai en dih koaros pohn sampah.”18
I kadehde ki me kitail wia Sapwellimen Kauno pwutak oh serepein kei, wahn Eipraam, peneinei en Isrehl. Kitail kihkipene Isrehl ni imwin ansouo oh wia me pwukat ki sang ni Pwuhken Mormon—Pwuhk ehu me audaudki Ngehn Sarawi en Koht, me wia manaman keiou en welikapwala. Kitail ale kaweid sang soukohp en Koht, Presiden Russel M. Nelson, me kaukaweid kapokonpenehn Isrehl rahnwet. Pwuhken Mormon mehlel. E wekidala ahi mour. I inoukihong kumwail, duwehte dahme Moroni oh soukohp tohto erein sounpar ngeder kei samwalahro, me e kak wekidkumwailla.19 Ni mwaren Sises Krais, ahmen.