Doadoahk en Kapwungpene Nanpwungen Aramas
Sises ketin pekpeki kitail en wia doadoahk en Sapwellime Kalahngan, pwe en iang Ih doadoahk nan doadoahk apwal en soun kamwahuwihala nanpwungen aramas nan sampah.
Nan Eiprel samwalahro, Presiden Russell M. Nelson patohwanda duwen padahk en sawaspene iei ehu mehn kapwaiada kosonned me keieu kesempwalo en poakohng Koht oh poakpene.1 Doulahte nan amwail doadoahk mwahu me kumwail tapiadahr ni amwail idawehn atail soukohp, oh dehr awih kaweid en dahme ke pahn wia. Sewesehda irail akan me anahne sawas. Dehr pweiekla oh medemedewe ma ke pahn wia de soh soangen sawas dah me ke pahn kak wia. Ma kitail pahn idawehn padahk kesempwal akan me sansalehr, mour en kainenehieng kih en prisduhd kan oh peki Ngehn Sarawi en kaweid kitail, kitail pahn pweida.
Nimenseng wet I men kosoia duwen soangen doadoahk en papah me aramas sohte pahn kihong uhk en wia, e sohte pahn nting pohn calendar, oh sohte me ke pahn ndahiong me ke wia likin Koht. Iet ehu karasape.
Grant Morrell Bowen wia ohl pwersek men, ohl loalopwoat rehn ah werek oh eh peneinei, e duwehte pali laud en aramas me kin doadoahk en sahpw, e lelohng apwal, ahnsou me mwaht en pedehde sohte nohn pweida. Ih oh ah werek, Norma, kohla repen doadoahk, karehiong ira kesoula ni ehu kahnihmw, oh tepda pwurehng aliale mwohni itar en apwaliala arail anahn akan. Ahpw Brother Bowen inenen medekla nan irair kansensuwed, ansou en kapeidek pwehn alehda nah kisinlikou en mweimwei en pidelong nan tehnpas sarawi, pisopo sohte kamehlele me e kin pwain ah meirong koaros.
I sohte ese ihs nanpwungen ohl riemenet me pwung rahno, ahpw dahme I ese me Sister Bowen pidohi sang nan ohpiso alehdi nah kisinlikou en mweimwei en pidelong nan tehnpas sarawi, ahpw Brother Bowen pidohi ni lingeringer me kahrehda e sohkihla sarawi erein sounpar 15.
Mehndahte ihs me pwung duwen meirongo, e sansal me ira koaros, Morrell oh pisop manokehla Sapwellimen Sounkomouro kaweid me mahsanih “kapwungala mahs nanpwungamwa”2 oh en Pohl kaweid “dehr mweidehng ketipin en kihrla a ke wie kolokolte ahmw lingernger.”3 Ira sohte pwungpene a ketipin ahpw kihrlahr ah Brother Bowen wie kolokolte ah lingeringer rahn ekei, lella wihk kei, pil pahr kei, me kasalehda pwung en ohl loalokong en mahs sang Rom me dene, “Ma aramas sohte kanengamah, lipwen lingeringer kin kalapw [suwed] sang dahme tapiada lingeringero.”4 Ahpw manaman en kapwungpene kak wiawi ahnsou koaros, oh pwehki e poakohng eh peneinei oh e ese me Mwomwohdio wet mehlel, Morrell Bowen pwurala sarawi. I pahn koasoaia dahme wiawi.
Nein brother Bowen pwutak, Brad kempoakepaht men oh towe en Isiakan en Eria loalopwoat men kin papah nan Idaho. Brad sounpar 11 ahnsou me soang wet wiawi, oh e kilikilangehr sounpar 15 ah pahpau eh wie luhluwetla nan mwomwohdiso, oh dehdehki me wahn lingeringer oh sawehwe. Mie mehkot me anahne wiawi. Eri ni ahnsoun Thanksgiving kerendohr nan pahr 1977, Brad, sounpahr 26 ansouo oh kin skuhl Brigham Young University; eh pwoud, Valerie; oh neira kisin pwutak, Mic, douhda nan wararail sidohsa oh mendahte mesenleng sohte mwahu, re ahpw tepda tang kohla Billings, Montana. Mendahte wararail sdohsa kirislongala nan sinoh ni keilan ahl kerenih Palikapi en Yellowstone, e sohte kawuhdi meh silimeno sang ar pahn kolahn sewese Brother Bowen Sr.
Ni arail peidi, Brad oh rie serepein Pam peki ma re kak kelehpwla mahs rehn ara pahpa. Brad apw tepda kosoi ni ekis ngilen pahtou nda, “Ke wia aht pahpa mwahu men oh se kin ese ia uwen ahmw poakohng kiht. Ahpw mie mehkot me sapwsapwung, oh e wihwiawier wereilahr. Pwehki ahmw medekla rahnteio, atail peneineiet pwon pil iang medekla sounparehr. Peneinei wet pil iang ohla, oh kowe kelehpw me kak kamwahuwihala. Menlau, soangen werei et, ke kak menlau pwilikihdi irair kansensuwedo rehn pisop oh kahluwa peneinei wet nan rongamwahu duwehte ahmw kin wia mahs?”
Meleilei ahpw kipehdi nan ihmwo. Mwuri Brother Bowen kilenglahng rehn meh riemenet, me wahn tih oh wahn uduke,5 oh sapeng ni ngihl tikitik, “Ehng. Ehng, I pahn.”
Re peren ahpw pil pwuriamweiki pasepeng me re sohte kasik, Brad Bowen oh ah peneinei kilang ohl pwopwoud men oh pahpa men pein piserla rehn ah pisop oh kapwungla sapwung kan nan ah mour. Pisopo me sohte douluhl kasik ohlo en pwarada, me kin wie pekpekih rehn Brother Bowen en pwurala sarawi pak tohto, ahpw pwoalehdi Morrell ansou reirei.
Mwurinte wihk kei, Brother Bowen kehlaila nan Mwomwohdiso oh e koasoanehdi eh mour en warohng en pwurala ni tehnpas sarawi. Mwurihsang e ahpw alehdi malipilip en wiahla kaun en kisin prahns en aramas 25 oh e ahpw kakehlakada lao tohn sarawio daulih aramas 100 samwa. Soahng pwukat wiawiher kereniong sounpahr limeisek samwalahro, ahpw lipwen pekipek en pwutak emen oh serepein emen ong ara pahpao oh en ohlo eh ineng en mahk oh wenlahte mwowe mendahte souitar en mehteikan e kin kapkapaiadahte peneinei en Bowen.
Riei ohl oh lih ako, Sises ketin peki me kitail “en kin miniminpene ni limpoak”6 ni sohte pingiping nanpwungemwail.”7 “E mahsaniong mehn Nihpai ko, “Mehmen me kin ahniki ngehn en akamai sohte kin pwilsang rehi.”8 Iehi, uwen kehlail en atail miniminiong Krais pahn pweida—de pahn sansal—sang ni atail miniminpene nanpwungetail.
E ketin mahsanih, “Ma ke … men kohdo rehi, a taman duwen riomwo me nsensuwed pahmw—
“Kohla rehn riomwo, oh kapwungala nanpwungamwa, oh ke ahpw kak kohdo rehi ni mohngiong mehlel, oh I apw pahn kasamwohi uhk.”9
Mehlel emenemen kitail kak kosoiahada soangsoangen lipwen ohla kan sang mahs oh kataman kamedek oh kansensuwed kan me leledo ahnsou wet wie kalkaluwete meleilei en nan mohngiong en ekei de peneinei de mehn mpatail kan. Ma kitail me karehda arail medek de kitail me nsensuwedla, ohla pwukat anahne kamwahula pwe mour en kak pweida nin duwen me Koht pahn ketin kupwurki. Duwehte mwonge me kin wie neknek nan aispoks me noumw seri kan kin tehk pwe ren ese ma mie kenemwail mwenge, mehn kansensuwed en mahs akan konehng en koskosla. Menlau dehr mweidehng soahng wet en wiawiong uhk. Prospero ndahiong Alanso me nsensuwed nan soai en Melimelo, Kitail sohte anahne insensuwedki dahme nekier.”10
“Mahkohng meteikan pwe Koht en ketin mahkohng kumwail,”11 iei me Krais mahsanih ni e ketin kapahrek pohn dohlo. A rahnpwukat Kauno mahsanih, “Ngehi, Kauno, pahn mahkohng ihs me I pahn mahkohng, apw kowe ke anahne mahkohng aramas koaros.”12 Ahpw, e kesempwal ong kumwail me kin momourki nsensuwed laud en kasawihda dahme E sohte mahsanih. E sohte ketin masahnih, “Ke sohte mweimwei en kehn mehlel en medek de mehlel en weikek sang ni mwoarosala.” E pil sohte ketin mahsanih, “Pwe ke en kak mahk mehlel ke anahne pwurala rehn aramas me sohte mwahu de nan irair me kamedek de kansensuwed.” Ahpw mehndahte ma ngihl kamedek me pahn lelohng kitail, kitail kak powehdi atail medek ahnsou me kitail pahn keid nan ahl en kamwahula. Ahlo iei ahl en mahk me Sises mehn Nahsared ketin keid ie, me kin mahsanihong emenemen kitail en, “Kohdo idawehniehla.”13
Nan soangen luhk wet en wia Sapwellime tohnpadahk oh song en wia dahme E ketin wiahier, Sises ketin pekpeki kitail en wia doadoahk en Sapwellime Kalahngan—en wia “weliepen Krais” nan doadoahk en kamwahula nanpwungen aramas,”14 duwehte Pohl ah kawewehiong mehn Korint ko. Soun kamwahuwiala ohla koaros, Ih me kin kapwungala sapwung koaros, peki rehtail en iang Ih doadoahk nan doadoahk apwal en soun kamwahuwihala nanpwungen aramas nan sampah me kin apwal en diar meleilei.
Nin duwen dahme Phillips Brooks ntingiadahr,: “Kumwail akan me kin mweidehng katoutou en sawehwe en wie doudoulahte nan pahr akan, apw inengieng en kapwungala ehu rahn; kumwail akan me kin wie akahkamaite pwehki ahmw sohte kak uhdisang pein medewe me e lelehr ahnsou en meirongkihla ahmw pwohnmwahso oh pwilikihdi; kumwail akan me kin alialu daulih aramas ahpw mwemwehlte, kahng lokaiaiong irail pwehki ahmw mwehl … ; kumwail akan me kin mweidehng … aramas me kin inangih rong lokaiahn kalahngan de koaloalomwahu en wie lokolongki, me kumwail pilipilahn en nda … ehu rahn, … kumwail kohwei oh wia dahme kumwail anahne wia pwe kumwail en dehr katiasang amwail ahnsou mwahu en wia.”15
Riei kempoakepahiko, I kadehde me mahk oh sohpeisang sapwung kan, me wereilahr de me kapw, me keiou kesempwal ong kalahngan lap en Tomwpen Sises Krais. I kadehde me nan soangen kamwahulahn ni pali ngehn me kin kohsangete atail Soundoaro, me kin mwadang en kohdohn sewese kitail pwehn “kamwahuwikitailla.”16 Kitail kalahnganki Ih, oh Samatail Nanleng me ketin kadaredo Ih, pwe mour kahpw oh ihpwsapahl, mour saladek sang kansensuwed oh sapwung en mahs akan, kak wiawi oh e pweipweidier sang ni ntahn Simpwulo.
Sang ni manaman en wahnpoaron me kohieng ie sang Sounkomour en Sampah, I kadehde duwen meleilei me kin kohieng aramas me kapwungpwungala rehn Koht oh rehn aramas teikan ma kitail pahn karakarahkala oh ngoangki kapwungala. “Tokedihsang uhpene nanpwungamwail.”17 Ma ke ese duwen ohlahn mahso, kamwahuwiala. Kumwail en ehupene ni limpoak.
Kempoakepahi ko, nan atail doadoahkpene en kamwahu pene I peki rehmwail en wia soun koaloaloamwahu. I wia ahi pekpek ni mwaren Nanmwarki en Popohl, me ketin mwahngih mehkoaros duwen “medekla nan imwen kempoakepah kan,”18 ahpw me kin mahk oh manokehla—oh ih me e pahn ketin wia ahnsou koaros, iei Kauno Sises Krais, ahmen.