Nantiheng, Nantiheng, Nantiheng
Sounkomouro ketketikihong Mware nan amwail mohngiong kan. Oh kumwail kekehn limpoak en Krais ong mehteikan oh ong kumwail.
Riei ohl oh lih oko, I ahniki kaping pwehki ahnsou mwahu me I ahniki en koasoieng kumwail. Kapokon wet inenen kakehlaihliehda oh kieng ie kamarain laud. Ngilen koul kan oh mahsen akan me wiawiher saihrehr atail mongiong kan sang ni Ngehn Sarawi. I kapakapki me dahme I pahn indahieng kumwail pahn pil pwulodohng kumwail sang ni Ngehnohte.
Pahr ekei samwalahro, I wia soun sawas keieu ong district presiden nan palimese en wein Amerika. Pahn pak tohto, ni ansou me se kin tangatangalahng ni branch akan en nan aht wehio, e kin indahng ie, “Hal, ansou me ke kin tuhwong aramas emen, apwalih irail ni soangen mwohmw ehu me pahn mwomwen kasalehda me irail mihmi nan kahpwal laud, ke pahn kin mih ni pwung leplaud en ahnsou.” Kaidente e pwung, ahpw I esehier nan pahr teikau me ah iren kapat me kin ekis pwand. Rahnwet, I men kakehlailih kumwail nan kahpwal akan me kumwail kin lelohng.
Atail mour en mour wet wiawihkihda limpoak en Koht pwehn wia mehn kaiahn oh wiepen momour ong emen emen kitail. Kumwail tamataman Sapwellimen Koht mahsen akan me pid duwen Sapwellime serih kan nan ahnsou en Kepikipikdahn sampah: “Kitail pahn kilang ma irail pahn wia soahng koaros me arail Kaun oh Koht pahn mahsanihiong irail en wia.”1
Sangehr ni tapio, mehn kaiahn pwukat sohte mengei. Sang ni paliwar me kitail ahniki, kitail kin lelohng nan kahpwal tohto. Kitail koaros koukouson ni wasahiou me en Satan mahwin en uhwong me mehlelo oh atail insenamwahu wie lalaudla. Sampah wet oh pein kumwail kin kak kalaudehla amwail iren kapwunod kan.
I kadehdehiong kumwail me: Koht me mweidohngehr kumwail en lelohng mehn kaiahn pwukat pil wiadahr ahl ehu me kumwail en kak powehkihdi. Samatail Nanleng udahn poakoahng sampah me E kadarkihdo Sapwellime Ieroso pwehn sewesei kitail.2 Sapwellime Ieros Sises Krais pwoula pwehki kitail. Sises Krais lokolok nan Ketsemeni oh pohn lohpwuo E sapwellimanki katoutou pwehki dipatail kan koaros. E lelohng nan kapahtou kan koaros, medek, oh pwukoahkihdi kalokepen dipatail kan pwe En kak kansanamwauih oh kakehlailih kitail nan ansou me kitail pahn lelong nan kahpwal akan en mour wet.3
Kumwail tamataman me Kauno mahsanihong Sapwellime sounpapah ko:
“Semeio oh Nghei wia ehu. I kin ehuohng Sahmo oh Sahmo kin ketin ehu ohngie; oh ma kumwail pahn aleiehda, kumwail pahn mihmi Rehi oh I pahn ketket rehmwail.
“E mahsanih me E kin ketket seli rehtail, oh Ih me wia sihmwpwul mwahuo oh takai en Isrehl. Ma kitail pahn kawada atail poasoan pohn takai wet kitail sohte pahn pwupwidi.”4
Atail soukohp, Preseden Russel M. Nelson, pil kieng kitailehr kadehde wet. Ni kapatapat, e kawewehda ahl ehu me kitail kak wia en kawada poahson pohn takai wet oh ahniki ineng en idawehn dahme Kauno kupwurki kitail en wia pwehn kahluwai kitail nan atail kahpwal akan.
E mahsanih: “Kumwail kan me solahr amwail koapwoaroapwoar, tamataman, me mour wet sohte mengei. Kitail udahn pahn lelong nan kahpwal akan oh pahn kin ahniki insensued nan mour wet. Ni amwail pahn tamataman me ‘sohte mehkot ahpwal rehn Koht’ (Luke 1:37), kumwail tamataman me Ih me Samwamwail. Kumwail wia sapwellime pwutak de serepein me kepikpikda sang nin Lime, pilipilda sang ni amwail warohng en ale kaudiahl pwehn sewese amwail wiewia mwau kan. Kumwail kak kolokol mwahr sarawi en Kauno. Kumwail pahn kak warohng en koasoi ni mwahr sarawi en Koht (tehk D&C 1:20).”5
En Preseden Nelson mahsen katamakin kitail inou me mih nan kapakap en kamadipw sarawi, inou ehu me pweidahr sang Samatail Nanleng ma kitail pahn wia dahme kitail inoukidahr.
Rong mwau lepin mahsen puwkat: “Maing Koht, Sahm Soutuk, se peki ni mwaren Sapwellimwomwi Ieroso, Sises Krais, en kapaiada oh kasarawiala pilawa wet ong irail kan me pahn tungoale, pwe ni arail pahn tungoale irail en kak tamataman kahlepen Sapwellimwomwi Ieroso, oh kadehdehiong komwi, maing Koht, Sahm Soutuk, me irail pahn alehda mwaren sapwellimwomwi Ieroso, oh tamataman ih ansou koaros oh kolokol sapwellime kosoned akan koaros me e ketkihong irailehr; oh Ngehno en kak ketket rehrail ansou koaros. Ahmen.”6
Ni ehu ehu ahnsou me kitail kin inda amen ni ansou me kapakapo kin wiawi pwehki kitail, kitail inoukihda me sang ni atail tungoale pilawa kitail pahn alehda mwaren Sises Krais, tamataman Ih ansou koaros, oh kapwaiahda Sapwellime kosonned akan. Ma kitail pahn wia me pwukat, inouo wiawihiongehr kitail me Sapwellime Ngehno pahn ketket rehtail ansou koaros. Pwehki inou pwukat, Sounkomouro me wia takai me kitail pahn kak kesinenda oh sohte ahniki masepwehk nan kahpwal akan koaros me kitail pahn lelohng.
Ni ai medemedewehier mahsen en inou kan oh kapai kan me iangedo inouo, I ahniki madamadau en ia pahn wewehn kitail en alehda mwaren Sises Krais.
Preseden Dallin H. Oaks kaweweh me: “E sansal me ni ansou me kitail kin tungoale kamadipw sarawio kitail sohte kin kadehde me kitail alehda mwaren Sises Krais. Kitail kadehdehki me kitail udahn inengieng en alehda (Tehk D&C 20:77.) Ni mehlel me kitail kadehdehkihte atail inengo me kasalehda me miehte mehkot me pahn wiawi me pahn inenen kesempwal mwohn atail pahn alehda mware me sarawi.”7
Lepin padahk me kitail “inengieng en alehda” Mware indahng kitail me ni ansou me kitail tepin alehda mwaren Sounkomouro ni ansou me kitail pepdaisla, alehda Mwareu sohte unsekla ansouhn pepdaiso. Kitail anahne pousehla wie doadoahk oh kolokol Mware nan ereihn atail mour, patehng ansou me kitail kin pwurehng kataman atail inou kan ni tehpel en kamadipw sarawio oh atail inou kan me kitail wia nan Sapwellimen Kauno tehnpas sarawi.
Iren kalalapak kesemwpal riau ong emen emen kitail “Dahme I anahne wihwia pwe ien kolokol Mware?” oh “Ia mwomwen ai pahn ese me I wie kekeirda?”
En Preseden Nelson iren padahko kasalehdahr pasapeng kaselel ehu. E koasoia me kitail kak alehda mwaren Sounkomouro oh kitail kak koasoia duwen Ih. Ni ansou me kitail pahn koasoia Ih, kitail papah Ih. Ohl emen sohte kak ese ah kaun me e saikinte papah, me wia aramas en likih men ohng ih, oh me dohsang ah lamalam akan oh pepehm akan en ah mongiong?”8
Pwehn koasoia Ih kitail anahne kapakap ni pwoson. E anahne kapakap ngidingid ong Samatail Nanleng en esehla lepin padahk kan me kitail kak koasoiki pwehn kak sewese Sapwellimen Sounkomouro doadoahk. Kitail anahne warohng inouo me kohieng kitail ni ansou me Kauno mahsanih me menda ma sang ni peihn Ngile de sang ni ngilen Sapwellime sounpapah kan, e duwepenehte.”9
Ahpw, kaidehn koasoakoasoaikihte duwen Ih me pahn wiawi pwehn alehda Mware. Mie pepehm kan nan atail mongiong kan me kitail anahne ahniki pwe kitail en warohng wia Sapwellime sounpapah kei.
Soukohp Mormon kawewehda duwen pepehm kan me kak kieng kitail en warohng oh sewesei kitail en alehda Mware. Pepehm pwukat iei pwoson, koapwoaroapwoar, oh limpoak mehlel, iei limpoak mehlel en Krais.
Mormon kaweweh me:
“I kin teneki me kumwail kin pwoson Krais pwehki amwail ohpampap akan; pwe ma sohte amwail pwoson eri kumwail sohte warohng iang mihmi rehn aramas akan en Sapwellime mwomwohdiso.
“Oh pil riei kempoakepahi kan, I pahn koasoia duwen koapwoaroapwoar. Ia duwen amwail en kak alehiong kumwail pwoson, kaidehn ihte ma sang ni amwail ahniki koapwoaroapwoar?
“Oh dahme kumwail en kin koapwoaroapwoarki? Kilang, I ndahiong kumwial me kumwail pahn koapwoaroapwoar sang ni Tomwpen Krais oh manaman en Sapwellime iasadao, pwe kumwail en iasada ong ni mour soutuk, oh met pwehki amwail pwosonlahr Ih nin duwen inouo.
“Eri, ma aramas emen ahniki pwoson e udahn pahn ahniki koapwoaroapwoar; pwe ma sohte pwoson koapwoaroapwoar sohte kak mih reh.
“Oh kilang, I ndahiong kumwail me e sohte kak ahniki pwoson oh koapwoaroapwoar, ihte ma e pahn ohpampapla oh karkarahkla nan eh mohngiong.
“Ma mehlel, eh pwoson oh koapwoaroapwoar pahn sohte katepe, pwe sohte mehmen me kin warohng mwohn Koht, ihte irail akan me kin ohpampap oh me nan mohngiong karkarahk kan; Oh ma mehmen pahn kin ohpampap oh nan mohngiong karkarahk, oh wehkada sang ni manaman en Ngehn Sarawi me Sises iei Krais, e kin udahn ahniki limpoak unsek; pwe ma e sohte ahniki limpoak unsek sohte ih mehkot, ihme kahreda e udahn anahne ahniki limpoak unsek.”
Mwurin ah kaweweh duwen limpoak mehlel, Mormon doulahte oh koasoia:
“Ahpw limpoak unsek iei limpoak mehlel en Krais, oh e kin mihmi kohkohlahte, oh mehmen me kin kolokol lao lel ni imwin rahno, e pahn kin mwahu ohng ih.
“Eri, riei kempoake kan, kapakapehng Sahmo sang ni kehl en amwial mongiong kan koaros, pwe kumwail en kak audaudkihda limpoak wet, me E ketkihengehr pohn koaros me kin idawehn mehlel Sapwellime Ieroso, Sises Krais, pwe kumwail en kak wiahla sapwellimen Koht seri kan;pwe ni ansou me E pahn ketdo kitail pahn duwehla ih, pwe kitail pahn kak kilang Ih nin duwen Ih, pwe kitail en kak ahniki koapwoaroapwoar wet; pwe kitail en kak mwakelekela duwehte Ih me mwakelekel. Ahmen.”10
Ai kadehde iei me Sounkomour ketkihdihengehr mware nan amwail mongiong kan. Me tohto kumwail, amwail pwoson Ih wie lalaudla. Kumwail kak kehn me amwail koapwoaroapwoar oh kamehlele pil tehlapala. Oh kumwail kehn duwen limpoak mehlel en Krais ong mehteikan oh ong peihn kumwail.
I kilang limpoak wet rehn irail misineri kan me kin wie papah seli nan sampah. I kilang met rehn toweh kan arail kin koaskoasoieng kempoakepahrail kan oh arail peneinei kan duwen Mwomwohdisohn Sises Krais en Souleng en Imwin-rahn akan. Ohl, lih, me pwulopwul, oh pil serih kan kin wihwia sounpapah de sounsawas pwehki sang ni limpoak me irail ahniki ohng Sounkomouro oh ong mehn imperail kan.
Ni ansou me kitail kin tepin rongada rohng kan en kahpwal akan me kin wiawi seli nan sampah, toweh kan kin wiadahr pilahn akan en iang sawas, ekei pak kin kotehla sehd akan, ni ah sohte me kin peki rehrail. Ekei pak irail kin apwaliki awiawih ansou me wasa me anahne arail sawas en kak aleirailda.
I mwur medewe me ekei kumwail me wie rongorong rahnwet kin kehn me amwail kahpwal kan kin powehdi amwail pwoson oh koapwoaroapwoar. Oh kumwail kin mentehno kehn limpoak.
Riei ohl oh lih akan, Kauno ahniki ahnsou mwahu ohng kumwail en kehn oh ehukipene Sapwellime limpoak. Kumwail kak kapakap oh kamehlele me Kauno pahn kahluwai kumwail en poakoahng emen aramas pwehki Ih. E kin sapeng kapakap akan en irail akan me aktikitik duwehte kumwail. Kumwail pahn kehn limpoak en Koht ong kumwail oh ong aramas me kumwail papah pwehki Ih. Ni amwail pahn sewese seri en Koht akan nan arail kahpwal akan, peihn amwail kahpwal akan pahn marahrahda. Amwail pwoson oh koapwoaroapwoar pahn kehlaila.
I kilangehr karasaras akan en me mehlelo. Nan ei mour, ai pwoud koaskoasoiki Kauno oh papah aramas akan pwehki Ih. Ni ei koasoiahier emen aht pisop ahpw indahng ie, “I kapingki. Ansou koaros me I kin rong me emen aramas nan atail ward kin lelehng nan kahpwal, ansouohte I kin kohla sawas. Ahpw ni ansou me I kin lela mwo, amw pwoudo mihier mwo.” Met me mehlel ni wasa koaros me se kousoniehier nan ereihn pahr 56.
Met e kin koasoaikihte lepin koasoite depe nan ehu rahn. Aramas akan me e poakoahng pwehki Kauno me kin pwarek ih. Nihpwong oh nimenseng koaros I kin koulkiheng koul en nan pwuken koul sarawi oh kiht kin kapakap. I kin ngihl laud nan aht kapakap oh koul kan. Ekei pak I kin kilang kilin ewe eh kin kokoulki koul kan. E kin mwauki koul en seri kan. Irehkan me e kin keieu pereniki me kin mih nan koulo “I Songosong ien Duwehte Sises.”11
Rahn teio, mwurin aht kokoulki lepin lokaiah kan en: “Poakoahng mehteikan duwehte Sises ah poakoahng uhk. Nantieng en kasalehda kadek nan soang koaros me ke wia,” e ahpw inda ni ngil tikitik ahp ni sansal, “Nantiheng, nantiheng, nantiheng.” I medemedewe me e pahn diar, ni ansou me e pahn kilang Ih, me atail Sounkomouro pwilikihdier Mware nan ah mongiong oh e duwehlahr Ih. E wie sewesewe ih nan ah kahpwal akan met duwehte E wie sewseweseiuk nan amwail kahpwal akan.
I kadehdehieng kumwail me Sounkomouro mwahngi oh poakoahng kumwail. E mwahngih edemwail kan duwehte amwail ese Mware. E mwahngi amwail kahpwal akan. E ketin mwahngiher mepwukat. Sang ni Sapwellime Tomw, E powehdi sampah. Sang ni amwail inengieng oh alehda Mware, kumwail pahn kamarahrahda katoutou kan en aramas teikan. Oh kumwail pahn diar ahnsou me kumwail pahn eselahr Sounkomouro oh amwail limpoakoahng pahn laudla. Mware pahn ketket nan amwail mongiong kan oh e pahn mihla nan amwail madamadau kan. Iei lengileng wet me kumwail pahn mwarenki. I kadehdehki sang ni sapwellime limpoak kadek ohng ie, ohng ei mwohn limpoak kan, oh ohng kumwail, ni mwaren Sises Krais, ahmen.