Kaudial me pid Komourlahn me Melahr kan
I kadehdehki me iren kairoir me Presiden Joseph F. Smith alehdi mehlel. I kadehdeki me aramas koaros kak ese me e mehlel.
Riei koa, I kaunopda ahi iren sawas en rahn wet mwohn ahi pwoud, Barbra eh mehla. Ngehi oh ei peneinei kapingkihiong kumwail amwail limpoak oh kadek ohng kiht. I kapakapki me Kauno pahn seweseie ni ei pahn kapwilwei sapwelime mahsen ohng kumwail.
Nan Oaktohpe en 1918, sounpar epwiki samwalahro, Presiden Joseph F. Smith alehdi ehu sansal lingan. Mwurin kerenieng sounpar 65 en ah papah Kauno nan Mwomwohdiso en Sises Krais en Soulen en Imwin Rahn-akan, oh wihk kei mwohn ah kapelsalehdala ni Nohpempe 19, 1918, e mwomwohd nan ah pereho medmedewe tohnmetei en tomw en Krais on wadwadek en Wahnparon Piter ah kawehweh en Sounkomouro ah kalohk nan sapwen ngehn mwurin Sapwellime Kalohpwuhlao.
E ntingiedi me: “Ni ahi wie wadawad I kepingahla mehlel. … Ni ei medemedewe mepwukat … , I patohwan wehwehkihda mehlel, oh Ngehn en Kauno ketin tih pohi, oh I kilangada irail me melahr akan.”1 Audepen kaudialo pwon me audehda Doctrine and Covenments irelaud 138.
I men patohwenda ekei ire pwe kitail en kak wehwehki mwahu uwen reirein en Joseph F ah kaukaunop pwehn ale kaudial kesempwal wet.
Ni eh wia Presiden en Mwomwohdisoht, e pwarek Nauvoo nan 1906 oh tamanda mehkot me wiawi ansou me sounpar limau. E nda, “Iet ih wasa me I kesihnenie ansou me [Joseph, ulepeio, oh ei pahpa, Hyrum] tangodo ie ni ara kohkohlahng imweteng en Kardet. Ni eh sohte doudihsang pohn oahso pahpa pengdisang nan deweho oh pwekiehda sang nan pwehlo. E metik meseie rahnmwahu oh kapwureiehdi oh I kilang ah dodouluhl kohla.”2
Joseph F pwurehng kilang ira ansou me ah nohnou, Mary Fielding, pwekada ih pwehn kilang ohloko irekla wonohn mwurin ara kamakamalahr nan Imweteng en Kardet ni Suhn 27, 1844.
Sounpar riau mwuri, Joseph F., iangahki ah peneinei oh nohno pwosono, Mary Fielding Smith, mweselsang eh wasa nan Nauvoo kohla Winter Quarters. Tetehn e saik lel sounpar walu, Joseph F. idihdieng a katanga kuruma me mahn kin waik sang Montose, Iowa kohla Winter Quarters oh mwuri douluhlahng Salt Lake Valley, lelahng wasau ni eh kerenieng sounpar eisek. I koapworopworiki me kumwail pwutak oh mwahnakapw kan wie rongorong oh pahn diarada uwen pwukoa laud me Joseph F. anahne kapwaiahda ansou me e pwulepwulo.
Sounparte pahieu mwuri, nan 1852, ansou me e sounpar 13, ah nohno kempoakeo mehla—mweselsang Joseph oh rie seri silimen me solahr arail pahpa/nohno.3
Joseph F. malipilipda en wia ah misin nan dekehn Hawaii kan nan pahr 1854 ansou me e sounpar 15. Misin wet me reireiki sounpar silu, me tapiada en ohl menet mour en papah nan Mwomwohdisoht.
Ni eh pwurodo Utah, Joseph F. pwopwouda nan pahr 1859.4 Nan irair en sounpar kei mwure, e kedirepwkihla doadoahk, pwukoahn peneinei, oh misin riau. Ni Suhlai 1, 1866, ni eh sounpar 27, en Joseph F. ah mour kiwekla douluhl ni eh kasarawihong en wiahla emen Wahnparon sang Presiden Brigham Young. Nan Oaktohpe en sounpar mwurio, e douda nan sehr ehu me tehnda nan Kaunsel en meh Ehk-riemeno.5 E wia sounsawas men ong Brigham Young, John Taylor, Wilford Woodruff, oh Lorenzo Snow mwohn eh wiahla Presiden nan pahr 1901.6
Joseph F. oh ah pwoud Julina kasamwohier neira keieun seri, Mercy Josephine, ong nan peneinei.7 Serepeino sounparte riau elep ansou me e kapelsalehdala. Ansou kis mwuri, Joseph F. ntingiedi, “Sounpwong ehute lel aio ansou me nei …serepein Josephine mehla. O! ma I kak kapitala serepeino pwehn keirda wiahla lih emen. I kin loaloidki rahn koaros. … Maing Koht, komw ketin kupwurmahkehng ahi sokoahiek, ma e sapwung ahi poakohng nei seri kan nin duwen ahi poahkong irail.8
Erein ah wie momour, en Presiden Smith ah pahpa, nohno, emen rie ohl oh rie lih riemen, ah pwoud meh riemen, oh seri ehk silimen mehla. E wehwehki duwen pahtou oh luhs sang kempoakepa kan.
Ansou me nah pwutak Alber Jesse mehla, Joseph F. ntingkilahng rie serepein Martha Ann me e pekihier rehn Kauno en doarehla ih oh peidek, “Dahme kahrehda met? O, maing Koht dahme kahrehda soahngwet wiawihki?”9
Tetehn ah kapakap kan ansouo, Joseph F. sohte alehdi pasapengpen ire wet.10 E ndahiong Martha Ann me “nanleng kan [mwoamwen duwelahr] mete me sohte kin sapeng” ire me pid mehla oh sapwen ngehn. Ahpw ah pwosonki en Kauno ah inou poatopotko me teng oh poatopot.
Nin duwen koasondien Kauno pasapeng kan, nsenamwahu oh wehwekihla duwen sapwen ngehn me e rapahkiho pwarehng Presiden Smith sang ni kaudial lingan me e alehdi nan Oaktohpe en pahr 1918.
Pahro wia ansou kamedek ehu ong ih. E pahtoukihla uwen diren me mehla nan Mahwin Laud en Sampa me wie tohtohla lau e daulih aramas miliohn 20 me melahr. Me patehng, pil ehu soumwahu doar me ikiparpesengier nan sampa kemelahr aramas miliohn epwiki kei.
Nan erein pahro, tohn en Presiden Smith peneinei me silimen pil mehla. Elder Hyrum Mack Smith en Pwihn en Wahnparon Ehk-riemeno, nah mesenni pwutak oh ahi pahpakahlap, mehkihla soumwahu en nan kapehde. Presiden Smith ntingiedi:
“I sohte kak lokaiahki ahi nsensuwed! Mohngiongi olahr; oh reprepen mour! … O! I poakepoke ih! I pahn poakepoke ih kohkohlahte. Oh ih duwe met oh pil pahn ong nei pwutak oh serepein koaros, ahpw ih nei pwutak mesenni, me keieun wadohng ie peren oh koapworopwor en kolokol wauwih nan pwungen ohl akan. Sang nan loaleiet I kaping kalahngan ong Koht pwehki ih! Ahpw O! I anahne ih! Kitail koaros anahne pwutako! E inenen katapan ong Mwomwohdisoht. … Oh met … O! dahme I kak wia! O! maing Koht komw sewesei ie!”11
Sounpwong mwurio, en nein Presiden Smith serepein ah pwoud, Alonzo Kesler, mehla nan aksiden.12 Presiden Smith ntingiedi nan nah pwuhko, Aksiden doar, sakanakan oh kansensuwed wet, pil kahrehdahr pahtou laud ong ahi peneinei unsek.”13
Sounpwong isu mwuri, nan Septempe pahr 1918, en nein Presiden Smith pwutak ah pwoud oh ahi nohno kahlap, Ida Bowman Smith, mehla mwurin ah neitikiedi nah kelimmen en seri, ulepei Hyrum.14
Oh eri iei, ni Oaktohpe 3, pahr 1918, ni ah eimwolukilahr melahn aramas milihon kei nan sampa pwehki soumwahu iangahki melahn tohn ah peneinei kan, Presiden Smith alehdi sang nanleng kaudial wet iei “kaudial me pid komourlahn me melahr kan.”
E koasoiahki kaudial wet ni rahno nan tiepene me langahda kapokon lap en Oaktohpe o. Tetehn Presiden Smith luhluwetala, ahpw e wiah ah kapahrek mwoatomwot. “I sohte pahn, I sohte kak, song en sair ire tohto kan me mihmi nan mongeiet ni menseng wet, oh I pahn kasauwala ong ehu ansou mwuhr, ma Kauno ketin kupwurki, ni ei pahn saong ndahiong kumwail ekei irehkan me mihmi nan mongei, oh me patpato nan ahi mohngiong. I sohte kelkelehpw nan irair en sounpwong limau samwalahro. I patpatohier nan irair en kapakap ni ngehn, peksawas, pwoson oh poadidi; oh I wie likilikweriong Ngehn en Kauno sohte uhdi.”15
Kaudial me ohlo ale ni Oaktohpe 3 kansenamwahuwiedi mohngiongi oh kiong pasapengpen ah peidek kan. Kitail pil kak ale kansenamwahu oh esehla dahme mihmi mwohtail ni atail mehla oh kohla nan sapwen ngehn sang ni kasukuhlki kaudial oh medmedewe kesempwalpe kan nan atail mour kan rahn koaros.
Nan pwunen soahng tohto kan me Preside Smith kilang iei en Sounkomouro ah ketla rehn me pwoson kan nan sapwen ngehn mwurin Sapwellime pwoulao pohn lopwuo. Mepwukat sang kaudialo:
“Ahpw kilang, nan pwungen me pwung kan, e ketkipenehr sapwellime sounpei kan oh idiada meninkedehr kan, alehier manaman oh mweimwei, oh kepwuoahkin irail en kohla oh wahla marain en rongamwahuo ong irail kan me mihmi nan rotorot, ngehn en ohl koaros [oh lih];16 oh rongamwahuo eri kalohk ong me melahr akan. …
“Irail ale kasukuhl duwen pwoson Koht, koluhla sang dihp, pepdais en kaduhdi pwehn widensang dihp, kisakis en Ngehn Sarawi sang pwildi en peh kan,
“Oh padahk teikan koaros en rongamwahuo me kesempwalehng irail en ese pwe irail en warehng iang ale kadeik duwehte aramas ni paliwar, ahpw wie momour rehn Koht ni palingehn. …
“Pwe me melahr kan wiahki me katoutou iou ni arail sohte kehn palingenarailki ansou reirei.
“Kauno padahkihong irail, oh ketkihong irail manaman en kohdo pwehn pedelong nan wehin Semeo, wasa me irail pahn sohsohki mour poatopot oh sohte imwi, mwurin sapwellime iasadao sang mehla.
“Oh peusehla arail doadoahk nin duwen inou me Kauno wiadahr, oh iang ale kapai kan koaros me kaunopadahr oh wie kolokol ong irail me poakohng ih.”17
Nan kaudialo, Presiden Smith kilang ah pahpao, Hyrum oh Soukohp Joseph Smith. E lelehr sounpar 74 mwurin eh kilang ira ansou me e wia ksisn pwutak nan Nauvoo. Kitail kak medewehte uwen peren me ohlo ahneki ni eh kilangada ah pahpau oh ulepeo. Ele e marainkihda oh perenkihda ah esehda me ngehn koaros kin kolokolte mwomwerail ni arial momour oh irail kin awiawi rahn me irail pahn iasada me inoupe wiawiher. Kaudialo kasalehda ni mehlel oaritikpen koasondi en Sahm Nanleng ong Sapwellime serih kan oh en Krais limpoak en komour oh manaman soh pelie en Sapwellime Tomwo.18
Ni ke-epwikihn ketemen tohrohr wet, I luke kumwail en wadek mwahu kaudial wet. Ni amwail wia met, Kauno en ketin kapaikumwailda pwehn wehwehki oh kamehlele limpoak en Koht Sapwellime koasondi en komour oh popohl ong Sapwellime serihkan,
I kadehde me kaudial me Presiden Joseph F. Smith alehiero me mehlel. I pil kadehde me aramas koaros kak wadek oh ese me e mehlel. Irail kan me sohte ale kamarain wet nan mour wet pahn uhdahn esehla duwen me mehlel wet ansou me koruhsien pahn lella nan sapwen ngehn. Wasao, koaros pahn poakohng oh kepinga Koht oh Kauno Sises Krais pwehki koasondi lap en komour oh kapai en iasada me inoupe miehier ansou me paliwar oh palingehn pahn pwurehng patpene oh sohte pahn pwurehng katohrohrpeseng.19
Riei ohl oh lih akan, I kapakapki me kitail koaros pahn “tengedi koapworopworki iasada lingano pwehki kalahngan en Koht Sahmo oh sapwellime Ieroso, Sises Krais.”20 Ni mwaren Sises Krais, amen.