Atail Kisiniei en Pwoson
Ong irail akan me kin rapahki, mweidada, oh mourki, pwoson en miehda, ekei ahnsou pahn ekis ekis kohdo de pil kak pwuredo.
Riei ohl oh lih akan, e sou wia mehkot kaselel ni atail kin aliahle kaudial sang nanleng rehn Presiden Russell M. Nelson oh kaun kan en Mwomwohdiso me kin luke kitail en momourki mour kapw oh sarawi,1 nan imwatail oh nan mwomwohdiso, ni atail mohngiong, lamalam oh kehl unsek?
Mie ansou me ke anahne wia mehkot me ke sohte onopada de sohte warohng ahpw ke ale kapai sang ni amw song en wia?
Meh wet wiawihong ie. Iet karasepe ieu.
Sounpar kei samwalahr, Elder Richard G. Scott, emen tohn Pwihn en Wahnpoaron Ehk-riemeno, ahpw luke ie, “Gerrit, ke men iang ie mahlen?”
Elder Scott nda me mahlen kin sewese ih en kilang mwahu oh kapikada mehkot. Ohlo ntingedier, “Song en kapikada, menda ma e sais mwahu. … Kapikipik kak katikada madmadau en kaping kalahnganki mour oh mehkan me Kauno ketkihongehr nan atail mour. … Ma ke wia pilipil me pwung, e sohte pahn kawehla ahmw ansou.”2
Presiden Henry B. Eyring kawehwe duwen ah madmadau me kin miehda “sang ni ah kehn limpoak” iangahki “limpoak en Soun Kapikipiko me kin kasik Sapwellime seri kan en duwehla Ih—pwehn kin kapikada oh kauwada.”3 En Presiden Eyring doadoahk en kapikipiko kin elehda ehu “kaweid en ngehno ong atail kadehde oh pwoson.”4
En Presiden Boyd K. Packer ah mahlen kan kin kasalehda ehu padahk en rongamwahuo: “Koht me ketin wia Sounkapikipik en lahng kan oh sampa oh audepara kan koaros, oh kapikipik pwukat kin kadehde duwen manaman en kepikipiko, oh me mie ehupene unsek ehu nanpwungen sampah, sains, oh rongamwahu en Sises Krais.”5
Alma kadehde me “Mehkoaros kin kasalehda ieias en Koht.”6 Neitail Seri kan en praimeri kin koulki, “Ni ei kin rong ngilen menpihr de kilang nanleng, … I kin perenki ahi wie momour pohn sampah lingan wet me Sahm Nanleng kapikada ong ie.”7 Sounnting Victo Hugo kapingki duwen “manaman me kin kolpene aramas, mahn oh mehkan me sohte kin nekla sang ketipino lel mahn me keieu tikitik. … Mahnpihr me kin pipihr kin kolokol manaman en Koht. …Pwonopwon en usuhn pahnlahng kan duwehte pesen kakiles ehu.”8
Oh lepin kahso kapwureikitaillahng en Elder Scott ah luhko.
I sapengki “Elder Scott, I men esehla I en kak kilang mwahu oh kapikipik. I perenkihda ahi medewe Sahm Nanleng eh kin ketin mahlenki depwek kan oh pohn nanleng oh pihl kan. “Ahpw,” I nennenla ansou kis, oh nda “Elder Scott,” I sohte ese mahlen. I masak pwe I de kansensuwedihukada ni ahmw pahn songen kasukuhlihie.”
Elder Scott pohkoamwokomw oh kaunopada aht pahn tuhpene. Ni rahn me tuhpeneho, e kaunopada doropwe, litepw, oh purohs. E tapiada mahleno oh sewese ie kausekeseke doropweo.
Se alasang ah mahlen kaselel ehu me adaneki Campfire at Sunset [mahlen en ohl emen keskesihnen limwahn kisiniei ehu kilkilengieilahng ketipino ah kikihrla]. Ni aht wie mahmahlen, se koaskosoia duwen pwoson—ni atail kin sohpai marain oh karakar en ehu kisiniei, kitail kin pidohisang nan rotorot oh me soh sansal kan—ekei ansou nihpwong reirei kalaloid kan, marain oh karakar en atail pwoson kin kiong kitail koapworopwor oh meleilei. Oh ni wasa rahnehr. Atail kisiniei en pwoson, atail mehn ketemen kan, irair kan, oh sohso en pwoson nan sapwellimen Koht mahk oh kalahngan nan atail mour—me kakehlakai kitail nihpwongo.
Ahi kadehde—ong irail me kin rapahki, mweidada, oh mourki pwoson, me ekei ansou pahn ekis ekis kohdo de pil kak pwuredo. Maraino pahn mie ni atail kin inengieng rapahki, ni kanengamah oh peikiong kosonned en Koht kan, ni atail kin ale sapwellimen Koht kalahngan, kakehlail oh inou kan.
Ni aht tepida mahlen, Elder Scott kangoangeie, “Gerrit, tetehn mahlen ehute me ke pahn sukuhlki ke pahn mahleniedi mehkot me ke pahn men kolokol oh tamataman.” Elder Scott pwung, pwe I kesempwalkihte mahlen en kamarain sang kisiniei me Elder Scott sewesehkinie ien mahleniedi. Ei kak oh ese mahlen sohte laud, ahpw ketemenpen atail kamarain en pwoson kak koangoangeikitail nan ire limau pwukat.
Keieu, atail kamarain en pwoson kak kahluwai kitail en diar peren nan doadoahk en kepikipik.
Peren kin dierek nan madmadau, kaskasukuhl, wiewia mehkot kapw oh katapan. Met me mehlel ni atail kin kaloalehla atail pwoson oh liki Sahm Nanleng oh Sapwellime Iehros Sises Krais. Kitail sohte kak poakehng kitail pwe kitail en doareikitailla. Ahpw Sahm Nanleng ketin poakohng oh mwahngih kitail laudsang atail kin poakehng pein kitail. Kitail kak liki Kauno oh dehr koapworopworiki mehkan me ke pein lemeleme me ke ese.9
Mie pak me kumwailte kelehpw me sohte iang luklahng ni en emen ah ipwidi?
Mie pak me kumwail me pilipilda keieu mwuhr de sohte iang meteikan pilipilda?
Mie pak me kumwail kaunopehng sikeng en sukuhl, kapeidek en doadoahk, de katiasang ansou mwahu ehu—oh kumwail ahpw medemedewe me kumwail sohte pweida?
Mie pak me kumwail kapakapki ehupene ehu me, pwehki kahrepe, sohte pweida?
Mie pak me kuwmail ahneki soumwahu doar, de amwail pwoud kan ahpw solahr apwali kumwail oh amwail peneinei?
Atail Sounkomour ketin mwahngih irair en mouratail kan. Ni atail kin doadoahngki saledek en pilipil me Koht ketkihdo oh wia uwen atail kak en karakarahk oh pwoson, atail Sounkomour, Sises Krais, e kak sewesei kitail en powehdi kahpwal en mour oh diar peren. Pwoson iei inengieng oh pilada en kamehlele. Pwoson pil kin miehda sang ni atail kapwaiada kosonned en Koht kan pwehn kapai kitail, ni atail kin idawehn Sapwellime inou.
Ni ahnsou me kitail kin peikasal, kelkelehpw, pwunod, lingeringer, kamwamwahlla, nsensuwed, de dohsangehr Koht oh Sapwellime Mwomwohdiso kapwurpwurdohu, e pahn anahne doadoahk laud oh pwoson pwehn sapahldo nan Sapwellime inouo. Ahpw mie katepe! Menlau kohdo, de pwurodo, rehn Sises Krais! Limpoak en Koht kehlail sang ahden mehla—ni paliwar de palingehn.10 Tomw en atail Sounkomouro me poatopoat. Emenemen kitail kin ahneki peikasal oh sapwungala. Kitail kak ekei ansou salongala. Koht ketin kamelelehiong kitail, me sohte lipilipil wasa kitail mih ie de dahme kitail wiahdahr, oh solahr atail koapworopwor, E ketin onopada awiawi pwehn komourkitailla.11
Keriau, atail kamarain en pwoson kak koangoangei kitail en sawas ni soangen mwohmw kaselel kan me ile, oh sarawi.
Soangen sawas pwukat kin katikada manaman oh kapai kan en atail kin ehukihpene inou kan—ansou me kitail kin kehn limpoak en Koht oh kin men sewese meteikan.
Ngehi oh Sister Gong apwtehn pehsehiong pahpa men oh peneinei me diarehr kapai sang emen prihsduhd me pein tuhong arail pisopo oh peki ma e kak patehng pahpao pwehn wia pwukoahn kalohk ong peneinei. Pahpao sohte kin kalap sarawi oh sohte men wia pwukoahn kalohk ong peneinei. Ahpw ni en eh mohngiongo wekidekla, pahpao oh ienge prihsduhdo tepda kalkalohk ong ara peneinei kan. Mwurin ehu ara kalohko, ah pwoudo—me sohte kin ieiang sarawi—peidek rehn ah pwoud ia iren ara kalohko. Pahpao wehkada, “mwein mie mehkot I kehn”—ih eri aluhla nan perehn mwengeo oh ale nime pihru.12
Ahpw mwurin ansou ieu: loiloi tikitik en ngehno, doadoahk en papah oh sawas, wekdeklahn mohngiong kan, kaunopong kohla nan tehnpas sarawi, pwurala sarawi, oh katengtengpenehn peneinei nan tehnpas sarawi. Medewe uwen kaping kalahngan me seri ko oh neirail serikan ahneki ong arail pahpao oh nohno oh pil ong ohlo me kin papah irail me wialahr kempoakeparail oh iengen arail pahpao wia pwukoahn papah ong meteikan ni limpoak.
Kesiluhn kaweid sang kamarain en pwoson: kitail kin perenkihla rongamwahuo oh ale kapai ni atail kin rapahki oh poakehng Kauno oh meteikan sang ni atail mour oh mohngiong unsek.
Pwuhk sarawi kan lukei kitail en poakehng oh papahki meteikan pein kitail oh atail kak koaros. Nan Kadehde Mering, Deuderonomi kaweidkinkitail en poakohng KAUN-O omw Koht sang nan mohngiongomw unsek, ni ngenomw unsek, oh ni omw kehl koaros.13 Sosuwa koasoia, “Limpoak ong Kauno amwail Koht,…kapwaiada kupwure,…peikiong sapwellime kosonned akan,…oh loalopwoatohng ih oh papah ih sang nan kapehdomwail oh ngenamwail unsek.”14
Nan Kadehde Kapw, atail Sounkomouro mahsanih kosonned riau me keieu laud: “Ke en poakohng Kauno omw Koht, sang nan kapehdomw unsek, ni ngenomw unsek, ni omw kehl unsek; … oh ke en poakohng mehn mpomw duwen omw kin poakohng pein uhk.”15
Nan Pwuken Mormon, Pil Ehu Kadehdepen Sises Krais, Nanmwarki Pensamin ni eh wie doadoahngki “uwen kehlail en paliwere oh palingene koaros” kauwadahr meleilei nan wehio.16 Nan Doctrine and Covenants, me misineri koaros wehwehki, Kauno ketin peki kitail en papah Ih ki atail “mohngiong, kak, lamalam oh kehl unsek.”17 Ni en Souleng kan arail pidelong nan Jackson County, Kauno ketin koangoange irail en kasarawi rahn en Sapad ni arail kin poakohng “Kauno arail Koht sang nan arail mohngiong unsek, kak, lamalam, oh kehl unsek; oh ni mwaren Sises Krais me kumwail pahn papah.”18
Kitail kin perenki luhk wet en katohrehla ngenatail unsek en doadoahngki limpoak mwuledek ong Koht oh mehn mpatail, oh kakehlailih atail pwoson Sahm Nanleng oh Sises Krais nan atail mohngiong kan oh nan imwaitail kan oh nan mwomwohdiso.
Kapahieu, atail kamarain en pwoson kin kaweid kitail en koasoanehdi wiepe kan en momourki me pwung me kin kaloaliala pwoson oh palingehn.
Tiahk sarawi oh wiewia pwung pwukat, de koasondi waun pwukat kak iangahki kapakap, wadek pwuhk sarawi, kaisihsol, tamataman atail Sounkomour oh inou kan ni kamadipw sarawi, ehukipene kapai kan en rongamwahuo nan doadoahk en misineri, tehnpas sarawi oh poadopod en peneinei, oh papah teikan, ntingiedi nan ehu pwuhk mwekid oh atail madamadau kan oh soahng teikan.
Ni en mwekid pwung kan oh ngehno kin dokpene, ansou mwahu oh mour soutuk kin pweida. Marain oh momourki ngehno kin miehda ansou me doadoahk sarawi en kaudok kin kakaranikitailla ong Sahm Nanleng oh atail Sounkomour Sises Krais. Ni atail kin poakohng ngehno nin duwen kosonnedo, mour poatopoat kin kak mweredihdo sang powe ong ngenatail kan duwehte pwoik en lahng.19 Ni atail kin peik oh aliahle pihl momour rahn koaros, kitail pahn diar pasapeng kan, pwoson, oh kehlail en powehdi kahpwal kan oh ansou mwahu en ale kanengamah, wehwe oh popohl en rongamwahuo.
Kelimau, ni atail kin kolokol mwekid me keieu mwahu kan oh raparapahki wiepe kapw oh sarawi kan pwehn poakohng Koht oh sewese kitail oh meteikan en kaunopadahng tuhwong Ih, atail kamarain en pwoson kak kaweid kitail en tamataman me Krais me ketin unsek, kaidehn kitail de mwekid kan en sampah.
Sapwellimen Koht luhk kan kin direki limpoak oh pweida pwe Sises Krais me “ahl, mehlel oh mour.”20 E ketin luke koaros me toutoulahr, “Kumwail kohdo rehi,” oh ong koaros me kohdo Reh, E ketin inouki, “I ahpw pahn kommoaleikumwailla.”21 “Kohdo rehn Krais, oh en unsekala reh,…poakohng Koht sang ni amwail kak unsek, lamalam unsek, oh kehl unsek, eri sapwellime kalahngano en kin konehng kumwail, pwe sang ni sapwellime kalahngan me kumwail en unsekla rehn Krais.”22
Nan inou wet “pwe sang ni sapwellime kalahngan me kumwail en usekla rehn Krais” pil wia iren kansenamwahu, meleilei oh inou me kitail kak doula nan pwoson oh liki Kauno, tetehn dahme kitail kin kasik oh koapworopworiki me kitail konehng ale sohte pweida, ni kaidehn atail sapwung, mwurin atail wiahier atail kak koaros.
Nan ekei ansou oh wiepe kan, kitail koaros kin mwarosala, peikasal oh ele souwar. Ahpw ni atail kin poaden poakohng Koht oh kin sewese mehn mpatail kan, kitail kak kehn en Koht limpoak oh anahne kamarain en men mpatail oh atail mour kan nan mwekid kapw oh mwakelekel kan.
Ni limpoak, atail Sounkomouro koangoange oh inouki me kitail kak “nantihla mwowe ni amwail tengedihong rehn Krais, sang ni koaporopwor unsek, oh poakehng Koht oh aramas koaros.”23 Padahk en Krais, Tomw en atail Sounkomouro, oh atail peikiong ni unsek Sapwellime inou kak sewesei kitail en ese Sapwellime mehlel kan oh kasaledek kitailla.24
I kadehde me Sapwellime rongamwahuo oh Sapwellime pilahn en popohl kapwurpwurdohr oh kin wie padpadahk nan Mwomwohdiso en Sises Krais en Souleng en Imwin Rahn-akan, nan pwuhk sarawi, oh sang soukohp kan sangete Soukohp Joseph Smith lel Presiden Russell M. Nelson rahn wet. I kadehde me Sapwellime inou kin wahdo kisakis me keieu laud sang Samatail Nanleng limpoako: “Kumwail pahn ahneki mour soutuk.”25
I koapworopworiki me Sapwellime kapai kan oh popohl poatopoat pahn wiahla atail ni atail kakehlailiala atail mohngiong kan oh koapworopwoar oh inou ni atail kisiniei en pwoson, I kapakapki ni lengileng kapai oh sarawi en Sises Krais, amen.