Sahmo

Sang Brian K. Ashton

Sounsawas Keriau nan Presidensi Lap en Santi Skuhl

Emenemen kitail ahneki kak en duwehla Sahmo. Pwehn wia met, kitail anahne kaudekiong Sahmo ni mwaren Ieroso.

Erein eh mour unsek, ahi pwoud, Melinda, songosongkiehr ah mohngiong unsek en wia emen tohnpadahk pwoson en Sises Krais. Ahpw, tepda sang ni eh pwulopwulo, liho kin medemedewe me e sohte warohng limpoak oh kapai kan en Sahm Nanleng pwehki e sohte wehwehki mwahu duwen kupwuren Koht. Paiamwahu, Melinda dadaurete kosonned akan tetehn pahtou me e ahneki. Sounpar kei samwalahro, liho alehdi irair kei me sewese ih wehwehkihla mwahu kupwuren Koht iangahki Sapwellime limpoak ong Sapwellime seri kan oh Sapwellime kalahngan ong atail sou-itar kan ni atail kin wia Sapwellime doadoahk.

Liho kawehwe duwen mwekido eh sewesedahr ih: “Met I ese me koasoandi en Sahmo me mehlel, Ih me ketin kahrehiong atail pweida, oh E kin ketikihong kitail kaskuhl oh irair kei me kitail anahne pwehn pwurala Reh. I kilang pein ngehi oh mehteikan duwehte en Koht ketin mahsanih kitail. I kak wia nohno men, kasukuhli, oh papah ni limpoak oh souper. I ahneki meleilei oh likilik kaidehn salo oh per. I pehm me I aliahle sawas kaidehn kadeik. Ahi pwoson kehlaila. I kehn limpoak en Koht ong ie laudla, doandoadala oh loalla.”¹

“Wehweki mwahu duwen mour, eripit oh manaman en [Sahm Nanleng]” inenen kesempwal pwehn doadoahngki pwoson me itarehng en kesepwildahng mour soutuk.² Wehwehki mwahu kupwuren Sahm Nanleng kak wekidala mwomwen atail kin kilang pein kitail oh mehteikan oh sewese kitail en wehwehkihla limpoak mwuledek en Koht ong Sapwellime seri kan oh duwen Kupwure kitail en duwehla Ih. Sohte wehwehki Kupwure kak elehieng kitail en medewe me kitail sohte pahn kak pwurala Reh.

Ahi padahk en rahn wet doke padahk kesempwal kan me pid Sahmo me pahn sewese emenemen kitail, ahpw mehlel irail kan me medemedewe ma Koht ketin poakohng irail, pwehn wehwehki mwahu pwungin Sapwellime koasoandi, oh pwoson Ih, Sapwellime Ieroso, oh Sapwellime pilahno ong kitail.

Mour mwohn Mour wet

Nan mour mwohn mour wet, kitial ipwidi ni ngehn ong Pahpa/Nohno en Nanleng oh kin koukousoan Rehra wiahki ehu peneinei.³ Ira mwahngi kitail, kaskuhlih kitail, oh poakong kitail.⁴ Kitail anahne en duwehla Sahm Nanleng. Ahpw, pwehn wia met, kitail esehier me kitail anahne:

1. Ale paliwar me mwakelekel, oh sohte kin mehla;⁵

2. Pwopwoud oh kauwada peneinei me katengtengkihpene manaman en prihsdund;⁶ oh

3. Alehdi marain, manaman, oh mwomw sarawi kan.⁷

Pwehki kitail anahne wia mepwukat, Sahmo kapikadahr koasoandi ehu me pahn mweidehng kitail ni atial kapwaiahdahr irair kei,⁸ ale paliwar kan me sohte kin mehla oh kenkenla ni Iasadaho; pwopwoud oh kauwada peneinei kan nan mour wet de, ong irail me pwoson kan me sohte ahneki ansou mwahu, mwurin mour wet;⁹kekeirda oh unsekla; oh pwurala rehn Samatail/Inatail kan oh kousoanla Rehra oh atail peneinei kan nan irair en kesepwildahng mour soutuk oh popohl poatopoat.¹⁰

Pwuhk sarawi kahdaneki met koasoandi en komour.¹¹ Uwen atail kalahnganiki koasoandi wet kitail werwerki atail peren ansou me koasoandio kasansalehng kitail.¹² Emenemen kitail pwungkilahr ire kan en koasoandi wet iangahki irair kan oh kasongsong kan en nan mour wet me kin sewesei kitail koadoahkiada wiewia mwahu kan.¹³

Mour Wet

Erein mour wet, Sahm Nanleng ketikihong kitail ire kan me kitail anahne pwehn keirda nan Sapwellime koasoandio. Sahmo wiahda Sises Krais ni uduk¹⁴ oh ketikihong Ih sawas sarawi en kapwaiahda Sapwellime doadoahko. Sahm Nanleng pahn pil sewese emenemen kitail ma kitail pahn nantihong kapwaiahda Sapwellime kosonned akan.¹⁵ Sahmo ketkihong kitail saledek en pilipil.¹⁶ Atail mour kan patpato nan Lime kan oh atail “rahn akan dehdeier” oh “sohte pahn malaulaula.”¹⁷ Oh E koasoanedier me mehkoaros pahn wia kamwauhpen irail me kin poakohng Ih.¹⁸

Iei Sahm Nanleng me ketikihong kitail atail tungoal,¹⁹ me iangahki kisin mwenge me kitail kin kang oh roson me kitail anahne pwehn kapwaiahda Sapwellime kosonned akan.²⁰ Sahmo kin ketkihda kisakis mwahu kan.²¹ E ketin karonge oh sapeng atail kapakap kan.²² Ni atail mweidehng Ih Sahm Nanleng kin ketin doarei kitail sang tepelo.²³ E kin ketin mwahieikin kitail nan atail kahpwal.²⁴ Atail kapai koaros kin pwilsang Sahmo.²⁵

Sahm Nanleng kin ketin kahluwai kitail oh ketikihong kitail irair kan me kitail anahne nin duwen atail kehl, luwet, oh pilipil kan pwe kitail en kak kihda wah mwahu.²⁶ Sahmo kin ketin panauwih kitail ansou me konehng pwehki E ketin poakohng kitail.²⁷ E wia “Ohl en Kaweid” men,”²⁸ me kin kaweid kitail ma kitail kin peki.²⁹

Iei Sahm Nanleng me ketin kadarodo manaman oh kisakis en Ngehn Sarawi nan atail mour kan.³⁰ Pwehki kisakis en Ngehn Sarawi, kilohri—de loaloakong, marain, oh manaman—en Sahmo kin kak mihmi nan loalatail.³¹ Ma kitail pahn nantihong kekeirda nan marain oh mehlel lau kitail kilekilenglahngte kilohri en Koht, Sahm Nanleng pahn ketin kadaredo Ngehn Sarawi pwehn katengeikitaildi ong mour soutuko kasalehiong kitail Kahlepe—ma nan mour wet de me kohkohdou.³²

Mour Mwurin Mour Wet

Nan sapwen ngehn mwurin mour wet, Sahm Nanleng ketin doudoulahte kapwilodo Ngehn Sarawi oh kadar mesneri kan ong irail me anahne rongamwahuo. E ketin sapeng kapakap kan oh sewese irail me saikinte alehdi kapai en tiahk sarawi kan.³³

Sahmo ketin kaiasada Sises Krais oh ketikihong Ih manaman en tapiada Iasadao,³⁴ me wia elen atail kak alehdi mour poatopoat. En Sounkomouro Poadoandoaro oh Iasadao me kapwurei kitaillang mwohn silahngin Sahmo, wasa me kitail pahn ale kadeik sang Sises Krais.³⁵

Irail kan me kin kehlki “wiewia mwahu kan, oh mahk, oh kalahngan en Mesaia Sarawio”³⁶ pahn ale paliwar kaselel duwehte Sahmo³⁷ oh kousoanla Reh “nan irair en popohl poatopoat.”³⁸ Wasao, Sahmo pahn irisasang pilenmas akan³⁹ oh sewesei kitail en wenla mwowe nan atail seiloak en duwehla Ih.

E inenen sansal, me Sahm Nanleng kin kalap ieiang kitail.⁴⁰

Kupwuren Sahmo

Pwehn duwehla Sahmo, kitail anahne doadoahngki Kupwure. Iet akan kupwuren Sahm Nanleng oh sapwellime mwohmw unsek mepwukat:

• Sahmo me ketin “Poatopoat oh sohte Imwi.”⁴¹

• Ih me ketin unsek, pwung, kalahngan, kadek, kanengamah, oh kupwurkihte dahme mwahu ong kitail.⁴²

• Sahm Nanleng iei limpoak.⁴³

• E ketin kapwaiahda Sapwellime inou kan.⁴⁴

• E sohte kin ketin wekila.⁴⁵

• E sohte kin ketin likamw.⁴⁶

• Sahmo sohte kin ketin lipilipilki aramas.⁴⁷

• E mwahngi mehkoaros—mehn mahs, met, oh mwuhr—sangete ni tapio.⁴⁸

• Sahm Nanleng ketin loalokoang⁴⁹ sang kitail koaros.⁵⁰

• Sahmo sapwellimaniki manaman koaros⁵¹ oh kin ketin wia mehkoaros me E ketin kupwurki en wia.⁵²

Riei ohl oh lih akan, kitail kak liki oh kehlki Sahmo. Pwehki E sapwellimaniki marain poatopoat, Sahm Nanleng kak mahsanih dahme kitail sohte kak. Sapwellime popohl, doadoahk, oh kilohri iei me pahn elehda atail mour soutuk oh lapalapala.⁵³ E ketin wia mehkoaros pwehki kamwahupatail. E ketin “kupwurki [atail] peren soutuk laudsang [atail] anahne.”⁵⁴ Oh E “sohte kupwurki [kitail] en lelohng nan kahpwal me uksang dahme anahnepe mie pwehn wia [kamwahupatail] de ong irail kan me [kitail] poakohng.”⁵⁵ E kupwurki sewesei kitail en keirda, kaidehn en kadeik oh kaweikitailla.⁵⁶

Duwehla Samatailo

Ni atail wia sapwellimen Koht pwutak oh serepein kei ni ngehn, emenemen kitail kak en duwehla Sahmo. Pwehn wia met, kitail anahne kaudokiong Sahmo ni mwaren Ieroso.⁵⁷ Kitail kin wia met ni atail nannantiong en peikiong kupwuren Sahmo duwehte Sounkomouro,⁵⁸ oh wie kolkoluhla.⁵⁹ Ni atail wia mepwukat, kitail kin “ale kapai koaros” lao kitail ale mehkoaros sang Sahmo⁶⁰ oh kapaikihda “sapwellime kupwur reseulap, unsek, oh mwomwe kan.”⁶¹

Pwehki wekpeseng en nanpwungen kitail aramas akan oh dahme Sahm Nanleng ketin wialahr, e sohte kapwuriamwei ekei kin medewe me duwehla Sahmo sohte kak wiawi. Ahpw, irehn pwuhk sarawi me sansal. Ma kitail pahn tengedi ni pwoson Krais, koluhla, oh rapahki en Koht kalahngan pwehki peik, kedekedeo kitail pahn duwehla Sahmo. I kaping kalahnganki ahi ese me irail me kin nanantiong en peik pahn “ale kalahngan poatopoat” oh ni imwi “ale sapwellime kan ni unsek.”⁶² Karasepe, kitail sohte kak pein duwehla Sahmo.⁶³ Ahpw e pahn pweida sang ni kisakis en kalahngan, ekei laud ahpw me tohto tikitik, me kin wie kohkohpene ehu mwurin ehu lao kitail ale me unseko. Ahpw rieiko e pahn pweida!

I luke kumwail en liki me Sahm Nanleng mwahngi mwomwen kakesepwilkumwailda; rapahki rahn koaros Sapwellime sawas; oh wenla mwowe ni pwoson Krais tetehn kumwail sohte kin pehm limpoak en Koht.

Soahng tohto me kitail sohte wehwehki me pid duwehla Sahmo.⁶⁴ Ahpw I kak kadehde ni mehlel me atail nantihong en duwehla Sahmo wia tohnmetei katapan ehu.⁶⁵ Tohnmetei kan me kitail wia nan mour wet, sohte lipilipil uwen eh laud sohte kak pahrekiong popohl mwuledek, peren oh limpoak me kitail pahn ale mwohn silangin Koht.⁶⁶ Ma kumwail nannantihong en kamehlele me tohnmetei kan me kumwail likiweriong en wia, Sounkomouro ekehker kumwail ndinda “Kumwail saikinte wehwehki uwen kapai kan me Sahmo … kaunopadahngehr kumwail: … kumwail sohte kak ale mehkoaros met; ahpw, kumwail perenda, pwe I pahn kahluwai kumwail. ”⁶⁷

I kadehde me Samamwail Nanleng ketin poakohng kumwail oh kupwurki kumwail en pwurehng kousoanla Reh. Ni mwaren Sises Krais, amen.

Ireh kan

1. Ireh kan me mihmi rehn sounntingo; pil tehk D. Melinda Ashton, “The Holy Ghost: Direction, Correction, and Warning ” (Brigham Young University Women’s Conference, Eiprel. 28, 2016), byutv.org.

2. Lectures on Faith (1985), 38.

3. Tehk “The Family: A Proclamation to the World,” Liahona, Mei 2017, 145; “Mother in Heaven,” Gospel Topics, topics.lds.org.

4. Wahnpoaron Pohl koasoia me atail wehwehki Sahmo inenen mwahu kahrehda kitail pil anahnete likwerihki ih Abba, me wehwehki “Ipa” ahd ehu me kin wiawihong pahpa kan me kitail inenen ahn (tehk Rom 8:15).

5. Tehk Doctrine and Covenants 130:22.

6. Tehk Doctrine and Covenants 132:19–20.

7. Tehk Matdiu 5:48; pil tehk 2 Piter 1:3–8.

8. Koasoandi pwukat iangahki kolokol atail tepin sohso (tehk Eipraam 3:26) oh nan mour wet pwoson Sises Krais oh Sapwellime Tomwo, koluhla, pepdaisla ni atail koduhdi sang mehmen me kolokol manaman en prihsduhd en Koht, ale kisakis en Ngehn Sarawi, oh dadaurete lel ni imwi (tehk 3 Nephi 27:16–20).

9. President Dallin H. Oaks padahngkiher me: “Ekei me wie rongorong padahk wet ele kak nda, ‘A iaduwen ngehi?’ Kitail ese me tohto Souleng en Imwin Rahn-akan me warehng oh kaselel ahpw sohte ahneki ansou mwahu kan oh soahng kan me kak sewese irail en keirda. Kiripw, depwen, mehla, oh mweisang ahr pwoud kin kasapwungehla wiewia mwahu kan oh kapwandala alahldien kapai kan me inoupe miehier. … Ahpw sapwung pwukat sohte kin poatopoat. Kauno inoukiher me nan mour poatopoato sohte kapai ehu pahn kolkoldihsang sapwellime ohl oh lih akan me kin kapwaiada kosonned akan, oh kin mehlelieng arail inou kan, oh kin inengieng wia me pwung” (“The Great Plan of Happiness,” Ensign, Nohpempe 1993, 75).

10. Tehk Mosiah 2:41.

11. Tehk Alma 42:5; met kahdaniki koasoandi en komour (tehk, ni karasepe, Jacob 6:8) oh koasoandi en popohl (tehk Alma 42:8, 16).

12. Tehk Job 38:4–7.

13. Tehk ni karasepe, Ipru 5:8; 12:11; Ether 12:27 Keieu pah ni tapio, ekei kasongsong kan me kitail kin sohpai nan mour wet pwehki atail sawehwe likamwete kak perehsang kitail en alehdi ekei kapai me inoupe miehier me kitail kin koapworopworiki. Tetehn mepwukat mwomwen peiaida, Koht pahn ketikihong kitail kapai koaros me inoupe miehier ma kitail kolokol atail pwoson,

14. Tehk Luhk 1:31–35; Sohn 1:14; 1 Nephi 11:18–21; Guide to the Scriptures, “Jesus Christ,” scriptures.lds.org.

15. Tehk Doctrine and Covenants 93:4–5, 16–17, 19–20.

16. Tehk Moses 7:32.

17. Tehk Doctrine and Covenants 122:9.

18. Tehk Rom 8:28.

19. Tehk Madiu 6:11.

20. Tehk N. Eldon Tanner, “The Importance of Prayer,” Ensign, Mei 1974, 50–53.

21. Tehk Luhk 11:10–13; Seims 1:17.

22. Tehk Luhk 11:5–10; Joseph Smith Translation, Luhk 11:5–6 (in Luhk 11:5, footnote a); 3 Nephi 13:6.

23. Tehk Madiu 6:13.

24. Tehk Moses 7:31–40.

25. Tehk Seims 1:17.

26. Tehk Sohn 15:1–2; Doctrine and Covenants 122:6–7.

27. Tehk Ipru 12:5–11; Doctrine and Covenants 95:1.

28. Tehk Moses 7:35.

29. Tehk Alma 37:12, 37.

30. Tehk Sohn 14:26; 2 Nephi 31:12.

31. Tehk Sohn 17:21–23, 26; Doctrine and Covenants 93:36.

32. Tehk Doctrine and Covenants 76:53; 88:67–68.

33. Tehk 1 Peter 4:6. Elder Melvin J. Ballard me pid kahrepen en ohl me e pepdaisialao mwurin eh iangala Mwomwohdisoht, nda, “E kasansalehng ie me ah pahpa/nohno kahlapoko nan sapwen ngehn aledahr Rongamwahuo sounpar kei samwalahro oh wie kapakapkiher me emen arail peneinei pohn sampah en wia tiahk sarawi kan me pahn langahieng irail wenihmwo, oh arail kapakap kan pasapenglahr oh Kauno ketin kahluwalahr mesneri ko ong ni imwen ohlo” (in Melvin R. Ballard, Melvin J. Ballard, Crusader for Righteousness [1966], 250).

34. Tehk Mormon 7:5–6; pil tehk Sohn 5:21, 26; 1 Korint 6:14; 2 Nephi 9:11–12; Alma 40:2–3; 3 Nephi 27:14.

35. Tehk Sohn 5:22; Jacob 6:9; Alma 11:44; Helaman 14:15–18. Tomw en Krais kalowehdier kasuwedpehkan en Pwupwlahn Adam, iangahki melahn paliwar oh palingehn, mepwukat koaros kitail anahne powehdi pwehn kak pwurala rehn Samatail Nanleng. Irail kan me koluhkilahr diparail kan pahn kousoanla rehn Sahmo oh Ieroso kohkohlahte. Ahpw, irail kan me sohte koluhla pahn ale lokolok en mehla keriau, me wiawi pwehki diparail kan (tehk Helaman 14:15–18).

36. 2 Nephi 2:8.

37. Tehk Doctrine and Covenants 76:56; 88:28–29.

38. Mosiah 2:41.

39. Tehk Kaudial 7:17.

40. TehkMoses 7:30. Sahm Nanleng kin poaden mwasmwasahn oh apwahpwali irail kan me patpato nan wehin terrestrial sang ni sawas kan sang Sises Krais oh irail tonleng kan (tehk Doctrine and Covenants 76:77, 87)oh ong irail kan me patpato nan wehin telestial pwehki sang ni sawas kan sang Ngehn Sarawi oh tonleng kan (tehk Doctrine and Covenants 76:86, 88).

41. Moses 7:35; pil tehk Melkahka 90:2.

42. Tehk Melkahka 103:6–8; Luhk 6:36; Moses 7:30.

43. Tehk 1 Sohn 4:16.

44. Tehk Doctrine and Covenants 84:40.

45. Tehk Seims 1:17.

46. Tehk Nempe kan 23:19.

47. Tehk Wiewia 10:34–35.

48. Tehk 1 Nephi 9:6; Doctrine and Covenants 130:7.

49. Dictionary.com kawehwe eripit iei “ahneki kak en esehla, medmedewe, wehwehkihla, oh koahiengki doadoahngki wiepen madmadau teikan, kak en wehwehki me mehlel kan, ehupene kan, ire mehlel kan, wehweh kan, mehteikan, oh loaloakeng.

50. Tehk Eipraam 3:19. Sises Krais wia aramas kaselel, unsek oh eripit sang kitail koaros.

51. Tehk Kaudial 21:22.

52. Tehk Eipraam 3:17.

53. Tehk Moses 1:39.

54. Richard G. Scott, “Trust in the Lord,” Ensign, Nohpempe 1995, 17.

55. Richard G. Scott, “Trust in the Lord,” 17.

56. Tehk Sohn 5:22; Moses 1:39. Iei Sehdan oh pein kitail me kin kamwamwahlihkitailla (tehk Kaudial 12:10; Alma 12:14).

57. Tehk Sohn 4:23; Doctrine and Covenants 18:40; 20:29.

58. Tehk 3 Nephi 11:11; Doctrine and Covenants 93:11–19.

59. Koluhla iei wiepe ehu me kitail kin wekidala atail mour pwe kitail en duwehla Koht. Eri kitail anahne poaden kolkoluhla, kaiden ansou kan te me kitail kin “wiahda me sapwung”.

60. Tehk Doctrine and Covenants 93:19–20.

61. Lectures on Faith, 38; pil tehk Moroni 7:48; 10:32–33; Doctrine and Covenants 76:56, 94–95; 84:33–38.

62. Tehk Doctrine and Covenants 93:20; lipw tohrohr patehng.

63. Tehk Moroni 10:32–33; Doctrine and Covenants 76:69, 94–95.

64. Dahme kahrehda Koht sohte kak de sohte kin kasalehda duwen atail kak duwehla Ih? Mehlel I sohte ese kahrepe kan koaros. Ahpw mie ire riau me I wehwehki. Keieu kitail sohte kin kak wehwehki ekei mwekid kan nan mour wet. (tehk Doctrine and Covenants 78:17). E kak duwehte atail kawehwe mwomwen Internet ong irail tohn Keilahn Aio kan. Pwe dahme mie ansouo oh rahnwet uhdahn wekpeseng. Keriau iei kisakis en kalahngan kan kin kalap leldong kitail pwehki kitail anahne lokolongki oh nantihong sang ni atail sohte kin ese.

65. Tohnmetei kan me kitail anahne wia ele mie anahnepe pwe kitail en kak unsekla (tehk Joseph Smith Trasnslation, Ipru 11:40 [in Ipru 11:40, footnote a]).

66. Tehk Rom 8:18.

67. Tehk Doctrine and Covenants 78:17–18.