Dehr Pwunodki
Tamataman, riei ko. Ei, kitail mihmi nan irair en kasongsong laud, ahpw ma kitail pahn tengedieng nan elen inouo, kitail sohte anahne masak.
I pil men kapatahieng te ahi kadehde ohng padahk kan me sang President Russell M. Nelson and Elder Quentin L. Cook me pid pwung pahrek en koasoandih kan en Presidensi en Pwihn en Wahnpoaron Ehk Riemeno. I ese me kokohp pwukat iei kupwuren Kauno me pahn sewesehda emen emen kitail, peneinei kan, oh Mwomwohdiso en Sises Krais en Souleng en Imwin Rahn Akan.
Pahr kei samwlahro, emen nait serepein me ahpwte pwopwoudla oh ah pwoud o idek reht peidek kesempwal iou. “E mwahu kitail en kaipwihdi seri nan mour apwal oh kamasepwehk wet?”
Met wia kalelapak kesempwal ehu ohng pahpa oh nohno kan me naineki seri me pwopwoud kan ren kin medemedewe. Se kak rong oh kehn ngilen masak ni ngilara oh nan ara mohngiong. Aht pasapeng e inen “Ehng, e mwahu douluhl,” ni atail pahn ehukihong irail poasoan en rongamwahu wet oh dahme kitail kin lelohng kan.
Masepwehk sohte kapw. Werek en Sises Krais kan ni ahr mihmi nan sehd en Galilee, masakada, “kisinieng oh ilok laud kan nihpwongo.1 Nin duwen atail wia werek en Sises Krais kei ansou wet, kitail pil kin masopwehk. Neitail seri me saik pwopwoud kan kin masak pwopwoud. Ekei me pwopwoud kan masak kaipwihdi seri nan mour apwal wet. Misineri kan kin masak soang tohto, ahpw mehlel lokaiahng me irail sohte wehwehki kan. Lihohdi kan masak momour kelehpw. Me pwulopwul kan masak ede sohte me pwungkinirail, seri kan masak tepin rahn en school, tohn sukuhl en university masak alaldi en test kan. Kitail masak dahme sohte pweida kan, emen en soikitaila, nsensuwed, oh me kitail sehse kan. Kitail pil masak melimel de kisinieng oh kisiniei keper kan. Kitail masak kitail de sohte pilipil da de pil pilipil da. Kitail masak ma kitail sohte nohn mwahu. Kitail masak Kauno de sohte ketkihieng kitail kapai. Kitail masak wekdeklahkan, oh kin kapwunodei kitailda. I ndadahr pwon?
Sangete mahs, masopwehk kin irehdi mehn madamadau mwahu kan en Sapwellimen Koht seri kan. I kin pereniki soai pen Elisa nan 2 Nahnmwarkih kan. Nahnmwarki en Siria kadar sounpei kei me “kohdo oh kapelpene kanihmwo.”2 Irail koasonedhi me re pahn kemehla soukohp Elisa. E mahsanih:
“Elisa eri pirda nimenseng o, oh kohieisang nan ihmwo ahpw kilangada karis en sounpei kei me dake oahs oh werennansapw kei. Ah laduo ahpw patohwan, maing kita pahn mehla! Dahme kita pahn wia?”3
Met kasalehda me laduo ahniki masopwehk.
“Elisa ahpw sapeng, patohwan, Ke dehr masak, pwe iangata kan tohtohsang irail.”4
Ahpw e sohte uhdi.
“Elisa kapakap, oh patohwan, Maing Kaun, komw ketin kihpeseng mese pwe en kilang. Kauno eri ketin kihpeseng mesen laduo, ih eri kilangada duwen nahna kan ah direkihla oahs oh weren nansapw kisiniei me kapelpene Elisa.”5
Ele e pahn sohte weretail mehn dakadak de kisiniei me pahn kapel kitail pene, ahpw padahk wet inenen sansal mwahu. Kauno iei iang kitail, kupwkupwurei kitail oh kin ketkihong kitail kapai kan me ih kelehpw kak ketkihdo. Kapakap kelehpw me kak sewesei kitail en kak medemedewe Sises Krais oh doadoahngki Sapwellime tomwo. Kauno mwahngi me ekei pak kitail pahn kin masak. I kehn ehr pil duwehte kumwail, ihme kahrehda pwuhk sarawih kan audaudkihda mahsen en Kauno.
“Ahniki peren, oh dehr masak.”6
“Likih ie; dehr kahmahmki, oh dehr masak.”7
“Kumwail kisin pwihn sihpw kumwail dehr perki mehkot.”8 I kupwurperenki aktikitik en “kisin pwihn en sihpw kan.” Ele tohn Mwomwohdiso wet me malaulau oh sohte nohn pahn wia mehkot kesempwal ohng sampah, ahpw ma kitail pahn tehk mwahu me iei iang kitail me tohto.”9 Silepatail, Sises Krais mahsanih, “Sampah pahn uhwong kumwwail, apw ma amwail mour pahn poahsoanda sang rehi, e pahn sohte arail manaman pohmwail.”10
Masopwehk kak sohrala? Ohng laduo, e keskesihnen limwahn Elisa, soukohp en Koht men. Pil mie kapai wet rehtail. Ni atail pahn rong oh idawehn kaweid kan sang rehn Presiden Russell M. Nelson, kitail iei iang soukohp en Koht. Tamtaman dahme Joseph Smith kosoia: “Oh mwuirn kadehdeh kei me tiengeh, iei met me se pahn kadehdehki: Me e ketin ieias!”11 Sises Krais ieias. Atail limpoak ohng Ih oh Sapwellime rongamwahuo pahn kasohrehla masak.
Atail ineng en “ansou koaros kolokol Ngehno”12 pahn sewesei kitail en kasohrehla masak oh kak kilang kamwahu kan en atail mour. Presiden Nelson kaweidki, “Ehu rahn, e sohte pahn mengei en ahniki kehl en pali ngehn ma sohte kaweid en Ngehn Sarawi.”13
Kauno mahsanih, mendahte kahpwal kan me pahn kipehdi oh kakelwakihala mongiong en me tohto: “Sapwelimei aramas akan pahn kesihnen tengetneg, oh sohte mwekid.”14
Oh mwurin iren kaweid kesempwal wet: “Dehr pwunod, pwe, ansou me soahng pwukat pahn wiawi, kumwail pahn ese me inou kan koaros pahn pweida.”15
Kesihnen wasa me sarawi—ahniki pwoson—oh inou pwukat ahpw pahn pweida. Kitail medemedewe soahng pwukat oh ia mwomwen arail doke atail iren kapwunod kan.
Keiou, tengediong wasa me sarawi. Ni atail pahn tengediong wasa me sarawi–imwatail kan, atail ihmw sarawi kan, oh tehnpas sarawi kan—pahn direki Ngenen Kauno. Kitail kin diar pasapeng pen atail iren kapwunod kan de pepehm iou me kin kasohrehla. Iei met me wia doadoahk en Ngehno. Wasa sarawi pwukat nan wein Koht pohn sampah wet anahne wahu, ohng mehtei kan, pein kitail en momourki rongamwahuo, oh atail pwoson en kasohrehla masak oh rapahki manamen en Sises Krais sang Sapwellime tomwo.
Sohte dowen masopwehk nan wasa sarawih kan en Koht oh nan mohngiong en Sapwellime seri kan. Pwehda? Pwehki limpoak. Koht poakohng kitail—ansou koaros—oh kitail poakohng Ih. Atail limpoak ohng Koht kin kasohrehla masak, oh Sapwellime limpoak kin mihmi wasa me sarawi. Medewe. Ni ansou me kitail kin sohte kin wehwehki atail inou ohng Kauno, pwupw sang nan ahlo, peikasal ki kesempwal patail, oh mweidehng kitail en masak—nsensuwed, lingeringer—Ngehno kin kohkohla oh kitail kin dohsang Kauno. Ma kumwail wehweki soahng wet e wehwehki me kitail sohte anahne mihmi mwo. Ni ansou me kitail kin mihmi wasa me sarawi, kitail kak kehn limpaok en Koht, oh, “limpoak mehlel kin kasohrehla masak.”16
Pil ehu inou iei “Dehr pwunod.”17 Mendahte soahng suwed eh laud sampah wet, inou kohieng kitail ehr me ma kitail pahn pwoson Sises Krais “meleilei en Koht pahn mihmi rehtail.”18 Oh ansou me Krais pahn pwurehng ketdo me suwed koaros pahn sohrala.
Mahs Wanpoaron Paul kopehng Timothy atail ansou: koasoiahng mwahnakapw pwulepwul Timothy:
“Ese, me ni imwin rahn akan me suwed tohto pahn pwarada.
“Me aramas pahn poakehng te pein irail, nahrok, pohnmwahso, sapeik ehng nohno pahpa, sohte kin kaping, oh samin. …
“… poakehng pein nsenarail laud sang Kauno.”19
Tamataman, “irail kan me pahn iang kitail” sang palihkan koaros en kehlo, me poakohng Kauno ki arail mohngiong, kehl, oh madamadau unsek, “dir sang me sohte pahn iang kitail.”20 Ma kitail pahn likih Kauno oh Sapwellime wihwiah kan, poadidieng Sapwellime doadoahk, kitail sohte pahn masak kasongsongen sampah kan de pil wiahki atail iren kapwunod. I peki rehmwail kumwail en pwilikihdi ineng en sampah kan oh rapahki kamwau en pali ngehn kan. Poakehng dahme Kauno poakehng, me iei, Sapwellime kosoned kan, Tehnpas sarawi kan, atail inou sarawi kan, kamadipw sarawi, kapakap, ah kitail pahn nsenamwahu.
Keimwseklahn ahi iren kaweid iei, likih Kauno ah Sapwellime inou kan. I ese me Sapwellime inou koaros pahn pweida. I ese douluhl rasehng ei uh mwomwail ansou kiset nin duwen souleng men me kin rapahki Kauno oh Sapwellime kapai kan.
Kauno kasaledahr: “Irail akan me marain oh alehda mehlelo, oh Ngehn Sarawi en wia arail soun kaweid, oh sohte kin pwopwidi—I ndahiong kumwail, irail sohte pahn lekdekla, ahpw pahn komourla ni imwin rahno.”21
Ihme kahrehda kitail sohte anahne pwunod ki iren sawehweh kan, me sang rehn mehtei kan me sohte kin mehlel ohng momour oh papah Kaun Sises Krais. Kehl oh limpoak kin sang mohngiong me sohte kin pwunod ki kahpwal en sampah kan. Presiden Nelson me “ahniki koapwoaroapwoar ohng mehkot mwahu kan me pahn wiawi” katamankin kitail me, “ma kitail koapwoaroapwoar en powehdi ngihl kamedek kan en aramas kan me kin uhwongada me mehlelo, kitail anahne esehla mwomwen atail pahn kin alehdi kaweid.”22
Pwen alehdi kaudiahl kan, kitail anahne momourki rongamwahuo oh koangoangoahki mehtei kan oh pein kitail en ahniki pwoson kehlail en pali ngehn.
Spencer W. Kimball wia soukohp emen ansou me I wia pwutak pwulopwul men. Pahr kei samwalahro, mwurin ei wialahr emen Wahnpoaron, I diarada kaweid mwahu sang nan eh padahk en kapokon lap en Oakotohpe 1943. I perenki ah pwukoah. I ese mwomwen pepehmo. Elder Kimball koasoia: “I ahniki ansou laud en madamadau, kapakap, oh kaisihsol. Songen kahpwal tohto I kin medewehda me kin nda: ‘Ke sohte kak wia. Ke sohte warohng. Ke sohte koahiek ehng—oh mwuri madamadau kaselel ehu nda: ‘ke anahne wia pwukoah wet—ke anahne kakohng oh warohng.’ E sohte pahn mengeila ahpw nantihieng.”23
I alehdi kaweid mwahu sang Wahnpoaron menet me wia ke 12 en Presiden en Mwomwohdiso wet. E diarada me e anahne manokehla ah iren peikasal kan en “wia pwukoah wet” oh likih Kauno pwehn “kakohng oh warohng.” Kitail pil kak. E sohte pahn mengeila, ahpw kitail pahn kakohng sang ni kaweid en Ngenen Kauno. Kitail sohte pahn ahniki pwunod pwehki ansou me kitail kin karanih Kauno oh momourki Sapwellime kosonned oh koasoandi kan, kitail keskesihnen wasa me sarawi.
Eri, epahn ia mwomwen kalelapak en nei serepeino oh ah pwoud me ira wia pahr kei samwalahro? Ira medmedewe aht koaskoasoai peneu nihpwongo, ira eri kapakap oh kaisihsol ki oh ira pil alehdi pein ara pasapeng. Met kiht koaros peren, oh ira kapaikihda seri isimen sang ni ara ahniki pwoson oh limpoak.
Tamataman oh doadoahngki riei koa. Mehlel me kitail mihmi nan ansou apwal, ahpw ni atail pahn tengediong mehlelo, kitail sohte pahn masak. I kapaiada kumwail pwe ni amwail pahn wia met, kumwail sohte pahn pwunodki kahpwal kan me kitail mihmi loale ansou wet. I kapaiada kumwail en tengedieng wasa me sarawi kan oh dehr mwekid. I kapaiada kumwail en kamehlele inou kan en Sises Krais, me E ieias, oh ketin mwangih kumwail, oh ketin iei iang kitail. Ni mwaren Kaun oh Sounkomour, Sises Krais, amen.