Ih Ahnsouo Met
Ma mie mehkot nan amwail mour me kumwail anahne tehkada, ih ahnsouo met.
Pahr kei samwalahro, ni ai onohnopehng ehu ai seiloak en doadoahk, I tepda kehn medek nan mwaremwareie. Pwehki ai pwoud ah kin nsenohki ai soumwahu e iang ie seiloak. Ni keieu en sohnpihr me pahn kokolahng wasa me I pahn seiloaklahng ie, medeko lalaudla karehieng ai sohla kak esingek mwahu. Ni ahnsou me se peidi, se mweselsang ni wasahn sohnpihro kokohla ni ehu imwen wini wasa me doahkte kan kasawihehier oh ndahng ie me I kakehr pil ehu mwesel.
Se pwuralahng ni wasahn sohnpihro oh iangada kokohla wasa me uhdahn I kohkolahng ie. Ni ahnsou me se pipihr kohdieng wasa me se kokolahng ie, a paileto ahpw lokaiahda nan rehdio oh pekihda ien kasalehda ni sansal wasa me I mwohmwohd ie. Sounsawas en nan sohnpihro ahpw aluhdo rehi oh ndahng ie me irail alehdi pakair karuaru ehu nan delepwohn me mie ampalans awiawih kiht pwehn idankihtala ni imwen wini.
Se iangada ampalanso oh karuaruhla nimwen wini. Wasahu, se tuhwong doahkte riemen me mesen saloh oh kawewehieng kiht me kesou me I ale wasa I tepin peidi ie sapwung oh dahme I ahniki iei soumwau keper ehu me sang ni nta ponla nan ai ngoalngoal oh epwelipe me inenen karuaru mehlel. Doahkte kan ndahng kiht me me tohto soangen soumwahu ka kin sohte kak mourla. Ni aht ese me se dohsang nihmwat oh se sohte nohn ese ma se onopehng soangen wekideklahn mour me se mihmi loale, doahkte kan ahpw nda ma mie mehkot nan aht mour me se anahne tehkada ah ih ahnsou mwau met.
I tamataman ni ahnsouohte ai lamalam koaros kerenieng wekila nan ahnsou kapwunod duwehte mwo. Dahme mwomwen kesemwpwal ahnsou kis samwalahro solahr mwomwen me e uhdahn kesempwal. Ai lamalam akan wekilahr sang ni momour en sampah ong ni madamadau unsek—madamadau en peneinei, seri kan, ai pwoud, oh mehlel ia mwomwen pein ei mour ni ei kin momour.
Ia mwomwen atail kin wiewia ni atail wia peneinei ehu oh pein kitail? Kitail kin momourki inou kan me kitail wiadahr oh dahme Kauno kin kasik sang kitail, de kitail kin mweidohng momour en sampah wet en kasalongeikitailsang ni soahng kan me keieu kesempwal ong kitail?
I men lukei kumwail en tehk ire kesempwal me kumwail esehla sang ni kemwekid wet: uhdihsang medemedewehte pwunod en sampah wet oh kasawih ahmw mour. De duwehte me doahkte kan nda, ma mie mehkot nan amwail mour me kumwail anahne tehkada, iei ahnsouo met.
Kasawih Atail Mour kan
Kitail koukousoan nan sampah ehu me direkihlahr soangen kemwekid tohto, me wie lalaudpesengehr pahn me suwed akan, kemwekid kan me karehdahr apwal en kak wehwehki pingiping kan en mour wet oh atail kak en kilanglahng ire kesempwal akan en mour soutuk. Nan atail momour en ehu ehu rahn akan kitail kalapw wadek rohng kapwuriamwei kan me kin sansalohng kitail sang ni dipwisou en wai kan me wie totohlahr.
Ihte ma kitail pahn ahniki ahnsou en medemedewe, kitail pahn mwein sohte kilang dahme pahn lelohng atail mour nan wasa me kediropw wie tohtohlahr oh pilipil kan me kitail wiahda. Kitail kak kilang me atail mour direkihlahr kisin ire tohto kan me kin pwarada sang emen emen aramas, ni kasdo, oh lepin kahs akan me kitail kin ngoangkihla. Pwehki e kaperen oh wia mehn kemweit, mepwukat koaros sohte wia mehkot laud ong atail kekeirdahn mour soutuk, oh pil ni ahnsouohte irail kawehla mwomwen atail kin medewe duwen kemwekid kan me kitail ahniki nan mour mwet.
Kemwekid pwukat duwehte en Lehi ah ouraman. Ni atail pahn wie nannantihla mwowe pohn ahl en inouo oh kolokol teng reilo, kitail rong oh kilang irail kan me kin “kepikepitiki oh idihdihki sendipehrail kan” sang ni ihmw lapala oh tehlap ehu (1 Nephi 8:27). Mwein kaidehn sang loaletail me kitail kin men wia met, ahpw ekei pak kitail kin uhdi oh kilengla, pwe kitail en kilang dahme wihwiawi mwo. Ekei kitail kin kadarala reilo oh keila ekis pwe kitail en kak kilang mwahu. Ekei kin kak pwupwila douluhl “pwehki irail akan me kin kepikepitkinirail” (1 Nephi 8:28).
Sounkomouro ketin kaunopehng kitail en “pein mwasamwasahn … dehr kedirepwehkin kumwail … pwunod kan en sampah wet” (Luke 21:34). Nan kaudiahl en ahnsou wet katamankin kitail me me tohto me ale pwukoah ahpw me malaulau me pilipildahr. Irail sohte pilipilda pwehki arail mohngiong kan koasoandiengehr ong ni dipwisou en sampah oh sang ni lapalapkihla pwehki aramas. (Doctrine and Covenants 121:35; pil tehk verse 34) Kasawih mahs atail mour pwehn kiheng kitail ahnsou en uhdisang medemedewen sampah, medewe mahs oh teneki iawasa kitail keskesihnen ie pohn ahl en inouo, oh, ma kak, nantieng kapwungala oh kolokol teng and nantihla mwowe.
Ahnsou kis samwalahro, nan ehu kapokon en me pwulopwul kan nan sampah, Preseden Russell M. Nelson luke irail me pwulopwul kan en uhdihsang medemedewehte kemwekid kan me wihwiawi nan sampah oh uhdisang doadoahngki mehn kaihr kan oh kaisihsolki rahn isuh. Oh e ahpw mahsanihong irail en ahpw tehk ia pahn wekpesengih sang ni mwomwen arail pepehm, dahme arail madamadau, oh ia mwomwen arail madamadau. Ih eri ahpw pil lukehieng irail en “kasawih mwahu mwomwen arail mour ong Kauno … pwe irail en kak ese ma irail wiwia soahng koaros me irail anahne wia ong inou kan me irail wiadahr. E koangoangehkin irail me ma mie mehkot nan arail mour me irail anahne kapwungala “rahnwet, iei ahnsou mwahu en kapwungala.”1
Ni atail pahn kasawih dahme kitail anahne en wekidala nan atail mour, kitail kak idek rehtail iren kalelapak wet: ia mwomwen atail pahn powehdi kemwekid kan en sampah oh nantihengete medemedewe kairoir en mour soutuk me mih mwohtail?
Nan kapokon lap en 2007 padahk ehu me koasoia “Mwahu, Uhdahn Mwahu, Mwahu Douhlul,” sang Preseden Dallin H. Oaks me kaskuhlki ia mwomwen atail pahn kairekehla oh idawehn mehnia me keieu kesempwal nan atail pilipil kan nanpwungen kemwekid kasapwurupwur kan en sampah. E kaweidki, “Kitail anahne dehr wia de mweidala soang kei me mwahu kan pwe kitail en kak pilada soahng kei me uhdahn mwahu de me pahn mwahu douluhl pwehki irail kin koadoakihada pwoson Kaun Sises Krais oh kakehlakahla peneinei kan.”2
I men koasoia me soahng kan koaros me keieu mwahu douluhl nan mour wet mihmi rehn Sises Krais oh wewehkihla me mehlel kan koaros duwen Ih oh ihs kitail Reh.
Rapahki me Mehlelo
Ni atail pahn rapahki en esehla Sounkomouro, kitail sohte pahn pohnsehse poahsoan en me mehlelo me pid ihs kitail oh dahme kahrehda kitail mihmihki me. Amulek katamankin kitail me “mour wet iei ahnsouo … en onopada en tuhwong Koht,” ahnsou me “e ketkieng kitail en kaunopada ong mour soutuk” (Alma 34:32–33). Duwehte lepin kahso me katamankieng kitail, “Kitail sohte wia aramas ekei me ahniki pepehm en ngehno. Kitail wia ngehn ekei me ahniki pepehm en aramas.”3
Wewehki tepin atail mour en souleng inenen kesempwal ong atail kekeirdahn mour soutuk oh kak kapitkitaila sang nan kahpwal akan en mour wet. Sounkomouro ahpw mahsanih:
“Ma kumwail pahn peikiong ei padahk kan, kumwail pahn wiahla nei tohnpadahk mehlel;
“Oh kumwail pahn esehla me mehlelo, oh me mehlelo pahn kasaledekeikumwaila” (John 8:31–32).
Preseden Joseph F. Smith mahsanih, “Kekeirda me pahn keieu laud me aramas emen pahn kak wiahda ni sampah wet iei irail en kaiahnehkin irail padahk me keieu pwungo, ni keneinei, ni unsek, me karasaras de wiewia en kepikipik en sampah men pahn sohte kak en kahrehieng irail en peikasalkihla loaloakong me irail ahnikier.”4
Nan sampah rahnwet, koasoi tohto me pid duwen me mehlelo lelehr ni uwen karuaru me koaros koasoakosoia likamwete e wia ire ehu ong aramas emen en kaukauwehwe. Joseph Smith ni ah wia kisin pwutak pwulopwul diarada me lapalahn sawehwe oh kahpwal me e ahniki nan ah mour me e apwal ong ih en kak esehda ihs me pwung oh ihs me sapwung (Joseph Smith—History 1:8). E wiwawi ni ahnsou me akamai en mahsen akan oh madamadau kan me e rapahki kaweid en me mehlelo (Joseph Smith—History 1:10).
Nan kapokon lap en Epreil, Preseden Nelson padahngki, “Ma kitail pahn ahniki koapwoaroapwoar en rapahki dahme keieu kesempwal nan madamadau tohto kan oh loaloakoang en aramas me kin uhwong me mehlelo, kitail anahne en esehla mahs alehda kaudiahl.”5 Kitail anahne kin kehliki Ngehn en me Mehlelo, me “sampah sohte kak ale, pwehki e sohte kin kilang ih, de pil esehla ih” (John 14:17).
Ni sampah ah mwekmwekid mwadang kohkihwei padahk sapwung kan kitail en tamataman mahsen akan en Seikop me Ngehno kin koasoiki me pwung e sohte kin likamw. E kin koasoiki duwen mehkan ni mwohmwohte, oh ni mehkan me irail pahn uhdahn wiahla, oh mepwukat koaros malipilip ong kitail ni sansal ong ni komourlahn ngenetail kan (Jacob 4:13).
Ni atail pahn uhdihsang medemedewehte pwunod en sampah oh kasawih atail mour, met wia ahnsou mwahu en tehkada dahme kitail anahne wekidala de kapwungala. Kitail kak alehdi koapwoaroapwoar laud sang ni atail pahn esehla me atail Sounkarasaras Sises Krais kahluwaikitailehr. Mwohn Eh pwoula oh Iasada, ni ahnsou me E wie doadoahk pwehn sewese irail kan me kin mihmiseli Limwah en wewehki Sapwellime pwukoah sarawi, E katamankin irail “pwe kumwail en ahniki popohl ni amwail miniminiong ie. Sampah pahn kalokei kumwail: ahpw kumwail koapwoaroapwoar, pwehki I kalewehdier sampah” (John 16:33). Pwehki Ih, I kadehdehki ni mwaren Sises Krais, ahmen.