Ia Duwe, ke Sohte Men Kehlailda?
Pwehki Tompen Sises Krais, ma kitail pilada en koluhla oh wekidiong mohngiongitail ni unsek ong Sounkomouro, E pahn ketin kamwahuwihkitaila ni palingehn.
Ahnsou me nait pwutak keiou en tikitiko mih nan misin mwurin sounpwungkei, ni ih oh iengehu wie kankaneke ara onop, e kehnda me e ekis moang medek. Epehm ehusoahng, oh e tepte sohla kak kamwakid peh pali soakoahiek, mwuri lowehu ketketla. Pali soakoahiek en mesehu tepda mwotoudi. E sohla kak lokaia mwahu. E ese me mehkot sapwung. Ahpw e sehse me e alehdier soumwahu en mwoatoar wasa siluh nan ah mwalielo. Ih eri masakada ni elep ih ah solahr kak mwokid. Ia uwen mwadang en aramas emen ah kin alehdi soumwahu en mwoatoar. Iengehu udahn saruaruhkihda. Mwurin eh call ehr 911 e ahpw kihieng kapai. Paiamwahu, minit te limau me ambulance o dohkihsang ira.
Mwurin nait pwutako eh karuwaruhla ni imwen wini, tohkte ko ahpw mwadangete kihieng winiieu me pahn kak kauhdi soumwahu o.1 Ahpw, ma nait pwutako sohte ahniki mwoatoar, e kak wiahda kahpwal duwehtewinio pil kak kahrehda nta en kohla nan ah mwahlielo. Nait pwutako anahne pilada. E apw pilada en alle winio. Pwehn kak mwahula e anahne kapwaiada alialle winio oh koadoahk kan erein sounpwungkei, nait pwutako apw pwurala oh kanekehla ah doadoahk en misin, mwurin ah alehier winio.
Samatail Nanleng me diren manaman oh mwahngih mehkoaros. E ketin mwangih medek en paliwar kan me kin sang ni soumwahu, likeilapalahr, sapwungalahkan de seri ipwidi sohte pwung. E mwahngih luwet en pepehm kan soangen loaleid, pwunod pahtou de soumwahu en nan mwahliel. E ketin mwangih emenemen me kin lohdi pahn en ekei sapwung oh me lelohngehr nan wiakau. E mwangih atail iren kaluwet kan oh atail wiewiah kan.
Nan mour wet kitail pahn ale songosong pwehn kilang ma kitail pahn pilada me pwung sang me suwed. Ong irail kan me kin kapwaiada Sapwellime kosoned kan, pahn ahniki peren oh popohl soutuk.2 Samatail Nanleng ketkihongehr Sapwellime Iehros Sises Krais manaman koaros oh eripit koaros pwehn sowesehkin kitail nan atail nanantieng en kak duwehla Ih. Sohte kahpwal en paliwar oh palingehn me Krais sohte kak kamwahuwiala.3
Nan irail en ansou me Sounkomouro ketket nin sampah, pwuhk sarawi kasalehda manaman kopwuriamwei kan me Sises Krais wia pwehn kamwahuwialaala me soumwahu kan.
Nan Rongamwahu en Sohn e kasalehda soai en ohl emen me luhluwetki erein sounpar 38.
“Ni Sises eh ketin mahsaniada ohlo oh mwangiada me e wonohnkihier wasau ansou reirei, E ahpw ketin mahsanih, Ia duwe, ke sohte men kehlailda?”
Ohl luweto ahpw sapengki me sohte me kin men sewese.
“Sises ahpw mahsanihong, uhda ale kiomw kan oh kohkohwei.
“Ni ansouohte ohlo kehlailda, ale kihehko oh kohkohla.”4
Na song medewe ia uwen werein ohl menet eh kelkelehpwki soumwahu ahpw sohte me men sewesehki erein sounpar 38 ahpw mwahula ansou me Sounkomouro lel re. E “mwahula ansouohte.”
Pil ni soangen mwohmwohte, lih emen me soumwahu en warmwowi sounparehr eisek riau, me kesehkilahr mehkoaros me e ahneki ni koadoahkpen eh soumwahwo rehn sounwini kan, … waido mwuri doahke pwungipen sapwellime likowo, ni ahnsowohte eh soumwahwo pa madada. …
“Sises ahpw mahsanih, Mie me doahkei ie: pwe I kehndahr manaman ehu eh kohsang rehi.
“Liho pehmadahr me e dierekdahr, e … ahpw keilahng mpen Sises oh patohwanehng mwohn aramas ko … mwomwen eh mwahula ni ansouohte me e doahke.”5
Ni ansou me E kalkalohk seli, Krais padahngki me E ahniki manaman koaros en paliwar. Kitail sohte kak pein koasoanehdi iahd me Krais pahn kamwahuih kitail la. Kamwahulah kan kin wiawi nin duwen me E kupwurki. Nan pwuhk sarawi kan ekei kin lokolok ki sounpar kei, ekei lep laud en arail mour. Kaluwet en paliwar kak kamwahuwialala oh kalaudehla atail likih Koht. Ahpw ni ansou me kitail pahn kin mweidehng Krais, E pahn kakehlailihada pali ngenitail kan pwe kitail en kak powehdi atail kahpwal kan.
Kitail ese me soangen soumwahu de pil souitar kan pahn kamwahula rahn en Iasadahu. Met wia kisakis ehuong koaros pwehki Tomwpen Sises Krais.6
Kaidehnte paliwaratail me Sises Krais kak kamwahuwiala. E kak kakehlailiada pali ngenitail kan. Nan pwuhk sarawi kan kitail esehla mwomwen Krais ah kakehlailiada pali ngenen me luwet kan.7 Ni atail pahn medemedewe soahng pwukat, atail koapwoaroapwoar oh pwoson en Sounkomouro manaman en kapaiada atail mour pahn laudla. Sises Krais kak wekidala atail mohngiong kan, doareikitail sang nan irair en angkehlail kan, oh kakehlail ih kitail nan ansoun nsensuwed oh pahtou kan, kihieng kitail meleilei en powehdi kapwahl en nan atail mour kan.
Krais pil kak kamwakelei kitail sang nan dihp. Kitail kin dipada ni ansou me kitail kin kasapwungehla Sapwellimen Koht kosoned kan.8 Ansou me kitail kin wiahda dihp, pali ngenitail kin saminla. Sohte mehkot samin kak pedolong nan wein Koht.9 “Pwehn alehda mahkpen dihp, pali ngenitail anahne en mwakelekel.”10
Koht Sahm ketin mwahngih me kitail pahn lohdiong pahn dihp, ahpw E kaunopadahr ahl en doare kitailla. Elder Lynn G. Robbins padahngki: “Koluhla kaidehn Sapwellimen Koht plahn ma ohngete ma kitail sapwungala. Koluhla wia Sapwellime kosondi,11 ni Eh ketin mwahngier me kitail pahn wiahda dihp. Ansou me kitail kin wiahda dihp, mie atail saledek en pilada me mwahu sang me suwed. Kitail kin pilada me pwung ansou me kitail kin koluhkihla dipatail kan. Pwehki Sises Krais oh Sapwellime tomwo, kitail kak alle mahkpen dihp oh pwuralahng mwohn sihlangin Koht Sahm, ma kitail pahn koluhla. Kakehlepen pali ngenitail sohte pahn sangete rehn Sounkomouro—ahpw e pahn sang manaman en Sounkomouro oh pil me wiahda dihpo. Ong irail akan me sohte men koluhla, re soikala manaman en kamwahula sang Krais. Ong irail, e duwehte, me sohte tomw wiawi.12
Ni ei koasoiengehr aramas akan me kin songsongen koluhla, I pwuriamweiki ahi diarada me aramas me kin mihmi nan dihp kin apwal en wiahda pilipil me pwung. Ngehn Sarawi sohla kin ieiang irail, oh re kin kalapw apwalki pilada pilipil me pahn kakerenihrail ong Koht. Re kin wie pwunpwunodki erein sounpwungkei de pil pahr tohto, namnamenengki de masak wahn diparail kan. Re kalapw medewe me re sohte kak wekla de pil ale mahk. I kin kalapw rong arail kin nda me ma kempoakepahrail kan pahn esehda re pahn sohla poakpoakeirail oh kohkohlahsang irail. Pwehki ar kin ahnki soangen madmadau pwukat, re kin nennenlahte, oh kin kapwandehla arail ansoun koluhla. Re kin medewe me re sohte pahn koluhla pwe re de kamedekiala irail akan me re poakohng. Re lemehda ma re pahn lokolokte nan mour kokohdo mwahusang arail pahn koluhla. Riei ko, e sohte mwahu en kaskasau atail ansoun koluhla. Sehdan kin kalapw isankihla atail kin masak pwehn kerempwaikitailsang atail pahn mwekid mwadangieng atail pwoson Sises Krais.
Ni ansou me aramas me kitail poakehng pahn kin esehda duwen mehlel en wie dihp kan, re kin nsensuwedla, oh kin men sewese me wiadahr dihpo en weliakapwla, oh pwurodohng rehn Koht. Mehlel, me kakehlepen palingehn kin wiawi ansou me me wiadahr dihpo pahn koluhla oh ale sawas sang rehn irail akan me poakohng oh kin sewese pwehn uhdisang wia dihp. Menlahu tamataman me Sises Krais pil kin kamwahuwiala irail akan me sohte kin wiahda dihp me kin rapahki sawas reh. Ar kamwahulau pil kin mwadang.13
Elder Boyd K. Packer patohwan: “Pali ngenitail kin ohla ma kitail kin wiahda sapwung de dihp. Ahpw me sohte duwehte paliwaratail kan, ni ansou me kitail pahn idawehn koasoandi en koluhla, sohte lipwen dihp pahn luhwe pwehki Tomwpen Sises Krais. Inou o iei: ‘Pwe kilang, irail akan me koluhkilahr diparail kan, re alehier mahk, oh Ngehi, Kauno, sohte pahn tamataman.’ [Tehk Doctrine and Covenants 58:42].”14
Ni ansou me kitail koluhla “sang nan atail mohngiong unsek,”15 “ni ansouohte pilahn en komouro pahn doadoahk” nan atail mour.16Sounkomouro pahn kakehlaikitailda.
Ienge misinerio oh toahkte ko me apwalih nait pwutak me lelohng soumwahu mwoator nan ah misin me mwadangete sewese. Nait pwutako pilada en ale wini me kak kamwahwihala soumwahu-o. Eri, soangen soumwahu me e pahn soumwahuki erein eh mour ahpw mwahula. Pil duwehte ma kitail pahn mwadang en koluhla oh doadoahngki Tomwpen Sises Krais, kitail pahn kak mwahula sang lipwen dihp.
Presiden Russell M. Nelson kihda luhk wet: “Ma kumwail pwupwsangehr nan ahlo, … I lukei kumwail … en menlau pwurodo. Sohte lipilipil soangen iren kapwunod dah, kahpwal dah, Sapwellimen Kauno mwomwohdiso awiawihiuk. Kowe oh dien mwuhr kan pahn ahniki kapai laud ma ke pahn pwurodohng nahn ahl en inou wet.”17
Pwehn kamwahuwiala palingenitail, kitail pahn anahne kapwaiada koasoandi kan me Sounkomouro padahngkier. Kitail dehr kapwandehla! Kitail anahne wia met! Mwekid met pwe luwet en palingehn en dehr kerempwahla komourpomw. Ni ahi wie koskosoi, ma ke pehm me ke anahne pekmahk rehn aramas emen, wia met. Ndahng irail dahme ke wiadahr. Pekmahk rehrail. Ma ke wiadahr dihp ieu me kahreiong uhk omw sohla warohng nan tehnpas sarawi, I lukei iuk ken tuhweng ahmw pisop ansou karuwaru. Ke dehr kasaula.
Riei ohl oh lih ako, Koht iei Samatail Nanleng. E ketkihiongehr manaman oh erepit koaros rehn Sapwellime Ieros, Sises Krais. Pwehki Ih, aramas koaros pahn kehlaildahsang kahpwal en paliwar kan. Pwehki Tompwen Sises Krais, ma kitail pahn koluhla oh kihiong mongiongatail unsek rehn Sounkomouro, E pahn kakelakahda pali ngenitail. Kamwahula wet kak wiawi ansou wet. Pilipilo iei atail. Ia duwe, kitail sohte men kehlailda?
I kadehdeki me Sises Krais pwain kitaildahr pwe kitail en kak kehlailda. Ahpw kitail anahne pilada en ale wini me e ketkidahro. Ale rahnwet. Dehr kasaula. Ni mwaren Sises Krais, amen.