Wiahla Mehn Kahlemengih Mwahu ehu en Souleng en Imwin Rahn Akan
I kihwei ahi limpoak oh kapahi pohmwail, me kumwail en kamadipwki mahsen en Kauno oh doadoahngki Sapwellime padahk kan nan amwail mour.
Kapokonlap wet wia mehkot kamarain oh kesempwal. Kitail kasikasik oh pereniki ahnsou kokohdo. Kitail kin pwahtietki en wiamwahusang oh en mwahula. Padahk kaselel kan me kapwulwei sang wasahn kapahrek wet sang Kaun Lapalap akan oh Kaun teikan oh pil koul uhdahn kamarain mehlel! I koangoangehkin kumwail en onopki padahngkan, tepda nan wihk et.1 Re kin kasalehda kupwuren Kauno ong Sapwellime aramas akan en rahnwet.
Prokirahm kapw me poahsonki nan imwatail kan, me Mwomwohdiso pahn utungada ni ar pahn doadoahkpene, kak sapwadada manaman en peneinei kan, ni ehu ehu peneinei kan ar pahn nantieng wekidala imwarail kan ong wasahn pwoson. I inoukiong kumwail me ni amwail pahn doadoahk pwehn wiahda nan imwamwail kan en wiahla wasahn kaskuhlih rongamwahu, ekis ekis amwail rahn en Sapad kan pahn kaparanih kumwail. Noumwail seri kan pahn pereniki esehla oh mourki Sapwellimen Sounkomouro padahk kan, oh kasongosong en imwintihtio nan amwail mour oh nan imwomwail pahn wie tikitikala. Wekidekla kan nan amwail peneinei pahn inenen laud oh pahn kakehlakeikumwailda.
Nan kapokon lap wet kitail kakehlakahda atail ineng en wia uwen atail kak en wauneki Kauno Sises Krais ahnsou koaros me kitail pahn kosoia Sapwellime Mwomwohdiso. I inoukieng kumwail, atail pahn kin poadidiong doadoahngki ahd me pwung en Sapwellimen Sounkomouro Mwomwohdiso oh towe kan, eh pahn kalaudehla pwoson oh manaman ni pali ngehn ong towe kan en Sapwellime Momwohdiso.
Met I pahn kosoia tehnpas sarawi kan. Se wewehki me atail ahnsou kan nan tehnpas sarawi me kesempwal ong komourpetail oh kesepwildahng mour soutik oh pwehki mwo ong atail peneinei kan.
Mwurin atail alehdi pein atail tiahk sarawi kan nan tehnpas sarawi oh wiahda inou sarawi kan ong Koht, emenemen kitail anahne en kin doudoulahte nan kakehlaka pali ngehn oh kaskuhl me kin kak wiawihte nan tehnpas en Kauno. Oh atail peneinei en mahs ako anahnei kitail en welian irail.
Medewe kalahngan lap oh pwuhng pahrek en Koht me, mwohn kepikpikda en sampah wet, kaunopda ahl en kapahi kan en tehnpas sarawi ong irail ako me melahr mwohn arail ese duwen rongamwahu. Tiahk sarawi pwukat kin wihwiawi sangete mahs. Ahi wewehki duwen met inenen sairie oh e wia pil ehu kadehdepen ah mehlel.2
Riei ohl oh lih ako, mwekid en atail imwintihtio wie lalaudpeseng mwadang pelpelian kitail, wie dondod oh soahngsoange.3 Anahnepen atail pahn kalapw pwarala nan tehnpas sarawi kan inenen kesempwal. I peki rehmwail en kapakapki duwen koasoandi en amwail ahnsou. Doadoahngki amwail ahnsou ong ahnsou kokohdo oh amwail peneinei. Ma ke karanih tehnpas sarawi, I koangoangehkin kumwail en koasoanehdi amwail ahnsou en kin pwarala rehn Kauno—nan Sapwellime tehnpas sarawi—eri kapwaiada ni unsek oh ni popohl rahn akan en tehnpas sarawi me kumwail koasoanehdi. I inoukiong kumwail me Kauno pahn ketkihda manaman kapwuriamwei duwen me E ketin mwahngih dahme kumwail anahne ma kumwail pahn meirongkihla amwail ahnsou pwehn papah oh kaudok nan Sapwellime tehnpas sarawi kan.
Ahnsou wet kitail kasarawialahr tehnpas sarawi meh 159. Apwahpwalih mwahu tehnpas sarawi kan inenen kesempwal ong kitail. Mwurin ahnsou, tehnpas sarawi kan kin anahne ekis kamwahuiala. Pwehki met, ahnsou wet mieier koasoandi pwehn kamwomw mwahuiala wasa kan me anahnepe nan Tehnpas Sarawi en Salt Lake oh tehnpas sarawi teikan me kawada nan mwein paionihr. Oaratiki en doadoahk pwukat pahn sansalda mwuhr.
Rahnwet, se kapingki en pakairki koasoandi kan en koukoudahn pil ekei tehnpas sarawi. Tehnpas sarawi pwukat pahn koukouda nan wasa pwukat, iei: Mendoza, Argentina; Salvador, Brazil; Yuba City, California; Phnom Penh, Cambodia; Praia, Cape Verde; Yigo, Guam; Puebla, Mexico; Auckland, New Zealand; Lagos, Nigeria; Davao, Philippines; San Juan, Puerto Rico; and Washington County, Utah.
Koukouda oh apwahpwalih tehnpas sarawi kan mwein sohte pahn wekid amwail mour, apw kalapw pwarala nan tehnpas sarawi me pahn. A ong kumwail me wereilahr solahr kin pwarala nan tehnpas sarawi, I koangoange kumwail en pwurala ahnsou mwadang. Oh I lukei kumwail en kaudok nan tehnpas sarawi oh kapakap pwe ke en kak kehnda sapwellime limpoak poatoapoat, me emenemen kumwail pahn pein ale amwail kadehde me E ketin dodoulahte kakaun doadoahk poatoapoat oh sarawi wet.4
Riei ohl oh lih ako, I kalahngankiong kumwail ong amwail pwoson oh doadoahk kan en utuht. I kihwei ahi limpoak oh kapahi pohmwail. kKumwail en kamadipwki mahsen en Kauno oh doadoahngki Sapwellime padahk kan nan amwail mour. I inoukiong kumwail me kaudiahl kin wiewiawihte nan Mwomwohdiso oh pahn doudoulahte lao “Sapwellimen Koht koasoandi kan pahn pweida, oh Siohwa Lapalapo pahn mahsanih, doadoahk wet pweidahr.”5
I kapaiehkin kumwail lalaudlahn pwoson Ih oh Sapwellime doadoahk sarawi, kumwail en ahneki pwoson oh kanengemahieng pein amwail kahpwal akan de songosong kan en amwail mour. I kapaiehkin kumwail en wiahla mehn kahlemengih mwahu ehu en Souleng en Imwin Rahn Akan. I kapahiehkin kumwail mepwukat oh wia ahi kadehde me Koht ieias! Sises me Krais! Sapwellime Mwomwohdiso met. Kitail iei Sapwellime aramas akan, ni mwaren Sises Krais, ahmen.