Ahniki Kaping
Ni atail pahn sohpai kahpwal kan nin duwen kupwuren Kauno, kitail pahn kak ahniki kaping.
Nan pahr 1981, ei pahpau, kempoakepah riemen, oh ngehi kohla mwemweit Alaska. Se pahn peidi pohn nahna ilele ieu oh alu irongin pohnwasa kaselel. Eri pwehn sewesei kiht kamarahrahda aht mehn wisik kan, se kihieng aht kopwe kan nan kakon, kidimkihla foam, pirehieng sahl mweimwei, oh kesehieila ni wenihmw tok en kisin sompihr-o wasa se kokohla ie.
Mwurin aht lella wasao, se rapahki aht kakon ko oh lok, se sohte kak diar ehu kakon ko Kedekedeo se apw diarada ehu. Me mih loale iei, sdohp kahs ieu, kappa ieu, kirahka kei, oh mehn doaloa Hamburger kei—ahpw sohte hamburger. Sohte nait mehn lokaiaiong aramas me doh kan oh sohte me pahn pwuredo ale kiht lao mwurin wihk ehu.
I esehla soahng kesempwal riau: Keiou, ke deh koskieila konomw mwenge kan nan wenihmw tok-o. Keriau, ekeipak kitail anahne sohpeiong soahng kan me apwal.
Pak tohto, ihme kitail kin tepin nda nan ansoun apwal iei, “Dahme ngehiki?” Idihdek pwehda, sohte pahn kasohrehla kahpwalo. Kauno kupwurki kitail en powehdi kahpwal kan oh pil kaweidki “me kitail pahn esehla sang ni kahpwal pwukat, oh e pahn wia kamwahupatail.”1
Ekeipak Kauno me kin ketkihieng kitail mehkot me apwal, oh ekei pak pein atail pilipil me kin wiahda. Nihpai lelohngehr soahng pwukat koaros. Mwurin Lihai eh mahsanihiengehr nah pwutak kan en kohla wahdo pleit kan sang rehn Leipen, e nda, “Oh met, kilang riomw kan pahn kin kaulim, ndinda me dene apwal ehu me I padahkihiong ira en wia. Ahpw kilang kaidehn ngehi me padahkihiong ira ahpw iei poahngok sang rehn Kauno.”2 Ekeipak rien Nihpai kan kin doadoahngki ara mehn pilipil pwehn irehdi ah: “Ira kin kemei ie, pwe ira kin inenen mwehl, oh ira kin salihiehdi, pwe ira kin men kemeiehla.”3
Joseph Smith lelohng kahpwal laud nan Libery jail. Nan irair en pwunod laud Joseph mahsanih, “Maing Koht, ia komwi?”4 Ele ekei nanpwungatail kehnehr dahme Joseph kehn.
Koaros lelehngehr kahpwal kei: mehlahn peneinei, mweipeseng, seri kan me solahr men momourki rongamwahu, soumwahu, souitar en pwoson, sohla doadoahk, de pil soahng apwal teikan.
Ei mour inenen wekla ni ansou me I rong kaweid sang Elder Neal A. Maxwell en Pwihn Ehk riemeno, ni eh sousoumwahu en leukemia. E kosoia, “I wiewia madamadau laud oh mahsen kesempwal pwukat kodohng nan ei madmadau: “I ketkihieng uhk soumwahu en leukemia, pwe ni ansou me ke pahn padahngki lokolok aramas pahn kamehleleiuhk pwehki ahmw kehnehr.” E doulahte kosoia mwomwen dahme wiawi-o sewese en “wehwehki kapai mehlel en mour soutuk. … Wehwe wet me pid mour soutuk en kak seweseikitail powehdi kahpwal kan koaros.”5
Pwe kitail en kak powehdi kahpwal kan en seiloak en mour wet sang ni wehwehn mour soutuk, I pahn kihda kaweid riau, Keieu, kitail anahne kilang kahpwal, sang ni atail pahn mahkong aramasoh, keriau, mweidohng Samatail Nanleng atail mour unsek.
Mahngkihieng irail kan me kahrehda atail apwal kan “oh mweidehng Koht atail mour unsek”6 pahn apwal. E uhdahn pahn kamedek ma atail kahpwal kan pahn kohsang emen tohn atail peneinei, de kempoakepahtail, de pil pein kitail.
Ni ei wia pisop pwulopwul men, I esela duwen mahk sang ahi steik presiden, Bruce M. Cook, me kosoia soai pwoatet. E kosoia:
“Nan pahr 1970, ngehi oh ekei iengehi tapiada kisin pisnes kis. Mendahte aht sohte uhwengada kosonned, kisin pilipil sapwung, oh kisin kahpwal kei, me kahrehda eh sohte pweida.
“Ekei irail wiahda kisin doaropwehn repenpwung pwehn pwurehng alehdi dahme re luhs kan. Arail sounsawaso wia emen tohn aht bishopric. E inenen apwal en utung ohl emen me raparapahki en kawehla ei mour. Eri I pil kailongkihda oh wiahki ih ei imwintihti. Mwurin sounpar limahu, se luhs sang mehkoaros me se ahniki, iangahkieng imwat ihmw.
“Nan pahr 2002, ei pwoud oh ngehi esehda me tohn sdeik presindensi me I wia soun sawas ehng, pahn welialidahr. Ni aht mwesellahng wasahu, ei pwoud idek rehi ihs me I pahn pilada en wia nei soun sawas ma ngehi me pahn wiahla sdeik presiden. I stohtemen kosoia, ahpw e men esehte. Eri ahd ieu kohdo nan moangehie. Ih eri nda eden ohl me kahrehda aht mihla nan apwal pahr 20 samwalahro. Ni ansou me e koaskoasoi Ngehno kadehdeki me ihme konehng wiahla emen soun sawas. I pahn kak mahkehng ohlo?
“Ni ansou me Elder David E. Sorensen malipe ie en wiahla sdeik presiden, e kihieng ie awa ehu en medewehda ihs me pahn wia soun sawas. I sengseng, oh nda me Kauno ketkihiengiehier kaudiahlo. Ansou me I nda eden ohl me I kailongki oh wiahki ahi imwintihti, ahi kailok pwon sohrala. Ni ansouo, I kak kehn meleilei oh nsenamwahu me kohsang Tomwpen Krais.”
Ahi sdeik presideno “mahkehng” ohlo duwehte dahme Nihpai wia.7 I ese me Presiden Cook oh nah sounsawaso wia sounkaweid en priesthood loalopwoat riemen mepoakpene. Oh I men duweira.
Pahr kei mwowe, ansou me aht lelohng kahpwalet kohla Alaska, I esehla me kapwokohnki meteikan atail kahpwal –soun kitenge soumpihro me koskihieihla kenaht mwenge ahnsoun rotorotdi--sohte pahn kamwahuwihla kahpwalo. Mendahte, aht pwangadahr, sohte mwonge, soumwahu, meir nan pwehl, oh kappa ieu me kak repeikihtla ni ahnsoun kisinieng laud, I esehla me ohng Koht mehkoaros mengei.”8
Kumwail mepwulopwul kan, Kauno kupwurki kumwail en wia soahng kan me apwal. Emen kisin serepein me sounpar 14 iang siai en bpasked. E kin men iang pasked nan high school duwehte rie serepein laudo. Ih eri esehda me ah pahpa nohno pahn kohla kaunda misineri kan nan Guatemala.
Ni arail lel mwo, e diarada me ekei ah klahs ko re pahn kin lokaiahn Spanish, lokaia ieu me e sohte ese. Sohte en serepein mwadong wasao. E mih nan posoke 14 en ihmwo me sohte mehkot keper kak wiawihong. Oh pil ehu, e sohte kak kohla liki ma sohte me pahn iangih pwehn sinsile.
Ah pahpa nohno kin rong eh kin wie sengiseng nihpwong koaros erein sounpwung kei. Met inenen kansensuwedihirahla. Ira eri pwungkihda e ira pahn kadarlahng ih rehn ah nohno kahlap ong ah high school o.
Ni ansou me ei pwoudo kolahng ndahng aht koasoandio, e kilangada me e wie kapakap oh nah Pwuken Mormon-o pakpeseng pohn ah pehto. Ngehno mahsanihong ahi pwoudo, “E pahn mawhu” ih eri pwuralahsang nan perehu.
Se sohte pwurehng rongada ah sengiseng. Sang sawas en Kauno, e nannanti erein soupahr siluh o.
Ni imwin aht misino, I idek rehn nait serepeino ma e pahn iang kohla misin. Ah e nda, “Soh, Ip, I nekehr.”
E sohte wiahda mehkot rehi. Ahpw mwurin sounpwung weneu, Ngehno kapiriehda ni pwong ehu oh nda: “I malipeiehr noumw serepeino en kohla wia doadoak en misineri.”
I sapengki “Maing semei, lapalahn meirong me e wiaier.” Ah Ngehno mwadangete kapwungehngie oh I apw wehwehkihda me Kauno me ketin kupwurki en wia papahn misineri.
Ngehi eri wahda nei serepeino oh kohla mwongehn souwas. Ngehi eri idek re, “Ganzi, ke ese dahme kita kohkihdo me?”
E nda, “Ehng Ip. Ke ese me I anahne kohla papahn misin. I sohte men, ahpw I pahn kohla.”
Pwehki ah mweidehng Sahm Nanleng eh mour, e papah Ih sang ni eh mohngiong, kehl, oh madamadau unsek. E padahkihieng eh pahpahu mwomwen wia soahng kei me apwal.
Nan en Presiden Russell M. Nelson padahk ohng me pwulopwul kan, e peki rehrail soang apwal kei ren wia. Presiden Nelson nda: “Ei pekpek kelimahu m me I pahn peki rehmwail iei kumwail en weksang meteikan. … Kauno kupwurki mwomwomail, ngilomwail, amwail wiwia kan oh mwomwen amwail likou en pahrekiong tounpadahk mehlel en Sises Krais.”9 Met kak wia mehkot apwal, ahpw I ese me kuwmail kak wia—ni peren.
Tamtaman me “aramas mie , pwe re en kak ahniki peren.”10 Soahngen apwal koaros me Liahi lelohng, e pil diarte peren. Tamtaman ansou me Alma “nsensuwedkihla”11 dahme mehn Ammonihah kin wia? Tohnlengo masahnihieng, “Meid pahi kowe, Alma, komwi en perenda … pwe komw kin kapwaiada kosonned en Koht.”12 Alma esehla me kitail kak ahniki peren ansou koaros ma kitail pahn kapwaiada kosonned kan. Tamataman me erein mahwen oh apwal me Moroni lelohng, “sohte ehu ansou me kaperen duwehte ansouwo ohng mehn Nihpai kan.”13 Kitail kak oh anahne rapahki peren nan ansoun apwal kan.
Sounkomouro lelohng kahpwal kei: “Aramas kan pahn mwamwahliki; irail ahpw keme, oh e kenengmahiong; oh re wokih, oh e kenengamahiong. Ei, Irail kendipih, ahpw e kenengamahiong, pwehki sapwellime limpoak ohng seri kan en sampah wet.”14
Pwehki limpoak wet, Sises Krais ketin pwoula. Pwehki met, E ketin mahsanihieng emenemen kitail, “Kumwail pahn lelohng kahpwal pohn sampah wet, ahpw kumwail koapworopwor, pwe I powedier sampah.”15 Pwehki Krais, kitail pil kak powehdi sampah.
Ni atail pahn sohpaiih kahpwal kan nin duwen me Kauno kupwurki, kitail pahn perenda. Ansou mwahu wet me I ahniki pwehn kiheng sampah wet ahi kadehde, I kadehdehki me Sounkomouro ieias oh kawkaweid Sapwellime mwomwohdiso. Ni mwaren Sises Krais, ahmen.