Lih akan kin iang sawas nan Kapokonpenehn Peneinei en Israel
I wia pekipek en soukohp ong kumwail, lih en mwomwohdiso wet, en kamwahuiala ahnsou kohkohdo sang ni amwail pahn sewese kapokonpenehn Israel me kasarepesengehr.
I kapingki ahi kak mih rehmwail, riei lih kesempwal kan. Mwein ehu irair me I ahpwtehn lelohng pahn kak ekis kawehwehiong kumwail mwomwen ahi pepehm ong kumwail oh amwail koahiek me kohieng kumwailehr sang nanleng.
Rahn teio ansou me I wie padpadahk South America, uhdahn I perenikihda ahi oaralapo, oh ahnsou kis, I ahpw nda, “Nin duwen ahi wia nohnohn seri 10, I kak ndahiong kumwail met …” ngehi eri doula pwe I en kanekehla ahi padahko.
I sehse me I nda lepin lokaia nohno. Nei soun kawehwehu, mwein medewe me I sapwungalahte nda nohno, ih kapwungala nohno ong pahpa, eri tohn sarawio sehse me I ndahki pein ngehi nohno men. Ahpw ei pwoudo rong, ih eri perenikihda ahi sapwungalahu.
Ansouo, nan ahi mohngiong uhdahn men wiahda mehkot laud nan sampah—duwehte dahme nohno kan kin men wia ansou koaros—I kasalehda sang nan ahi mohngiong. Nan pahr akan koaros, ansou me peidek kin kohiengie me kin idek dahme kahrehda I pilada en wia toahktehn wini men, ahnsou koaros I kin sapengki pasapeng teieu: “Pwe I sohte kak pilada en wia nohno men.”
Menlau wehwehki me ansou koaros me I kin nda nohno, e sohte dokdokehte irail lih akan me neitik oh me pwokada seri nan mour wet. E dokdoke Sapwelimen Samatail oh Inatail Nanleng serepein laudehr koaros. Lih koaros wia nohno pwehki ar ahnekilahr ieias en Koht.
Eri pwongpwohnget, nin duwen ahi wia pahpahn seri 10—serepein duwemen oh pwutak emen—oh nin duwen ei wia Presiden en Mwomwohdiso wet, I kapakapki me kumwail pahn kehn duwen ahi limpoak ong kumwail—duwen ihs kumwail oh soahngen doadoahk mwahu koaros me kumwail kin wia. Sohte emen kak wia dahme lih pwung men kak wia. Sohte me kak wiahda pilehu kamwahupen nohno men.
Ohl koaros kak oh kin kalapw ehukipene limpoak en Sahm nanleng oh Sounkomouro ong meteikan. Ahpw mwomwen lih akan kin kasalehda limpoak me kapwuriamwei—e wia kisakis sang Kauno. Kumwail lih akan kin kak ese dahme aramas emen kin anahne—oh ansou me irail kin anahne. Kumwail kin kak sewese, kansenamwahuih, padahkih, oh kakehlakahda aramas emen nan ansou me e keieu anahne sawas.
Lih akan kin kasawih mehkot weksang ohl kin kasawih mehkot, oh ia uwen, seuhdahn anahne amwail kaweid! Amwail lamalam kin kaweid kumwail ong en kin medewe meteikan mahs, oh kin medewe dahme soangen mwokid sohte lipilipil kan pahn wiahng mehteikan.
Nin duwen dahme presiden Eyring kosoia, me pwehki atail nohno kesempwal Ihp—Sang ni ah wehwehki mwahu pilahn en Sahm Nanleng—E tapiada dahme kitail kin kahdaniki “Pwupwilahu.” Ah pilipil loalokong oh eimah oh en Adam ah utuht me kapwaiada Sapwellimen Koht pilahn en komour. Ira kahrehda atail kak kohdo sampah, alehda paliwar, oh kasalehda me kitail kak utung Sises Krail met, duwehte atail utung nan mour mwohn mour wet.
Riei lih ako, kumwail kolokol kapai tohrohr en palingehn oh kadek lamalam. Soutik wet, I koangoahngehkin kumwail, sang ni koapworopwor nan ei mohngiong, en kapakapiki kumwail en esehla ia kapai tohrohr kan en palingehn—en koadoahkehda, doadoahngki, oh kalaudehla kapai pwukat, laudsang me kumwail wiahier. Kumwail pahn wekidala sampah ma kumwail pahn wia met.
Nin duwen kumwail lih kei, kumwail kin kamarainih mehteikan oh kin wia mehn kahlemengih mwahu. I pahn kaweidkin kumwail ekis duwen pakair kesempwal riau me wiawi nan atail kapokon lap nekiero. Kumwail, riei lih ako, kesempwal ong iren pakair pwukat.
Keieu, Sewese meteikan. Karasaras me keieu mwahu ong sewese meteikan kohsang atail Sounkomour, Sises Krais. Uhdahno, palilaud en ahnsou, sangeet ni tapio, lih akan me, kin karanih karasaras mwahu wet sang ohl. Ansou me kumwail kin sawas ni mehlel, kumwail kin idawehn amwail pepehm kan oh sewese emen aramas tohrohr en kehn limpoak en Sounkomouro. Pepehm en sawas mehlel mihier rehn lih pwung kan. I ese lih ekei me kin kapakapiki rahn koaros, “Ihs me Komw men ien sewese rahnwet?”
Mwohn pakair en kalaudlahn oh sarawihlahn mwomwen atail pahn apwalih mehteikan, ekei wiewiahn ohl akan iei re kin songete pwarek ihmw kan me re pwukoahki pwe ren kak kilelehdi me e “nekehr” oh pwe ren kak doula oh wia pwukoah teikan.
Ahpw kumwail lih akan ansou me kumwail kin kehn me riamwail lih me kumwail kin pwarek kan anahne sawas, kumwail kin mwadangete sewese oh kin doula sewese sounpwongo pwon. Eri, mwomwen amwail kin wia met me padahkihong kiht en kamwahuiala mwomwen atail kin pwarek mehteikan ong en uhdahn sewese.
Keriau, nan Kapokon Lap me nekiehro, se pil pwurehng koasoanehdi mwomwen irail pwihn en Prihstud en Melchizedek kan. Ansou me se kapakapiki mwomwen aht pahn sewese ohl en nan mwomwohdiso wet kan en kamwahuiala arail pwukoah kan, se kilang mwahu sang karasaras en Pwihn en Lih akan.
Nan Pwihn en Lih akan, lih akan koaros, ni sounpahr koaros oh dih koaros kin tuhpene. Nan ehu ehu dih en mour wet kin mie soangsoangen kahpwal kei, ahpw, ansou koaros kumwail, rahn sarawi koaros en wihk koaros, kumwail kin tuhpene, kalaudehla oh padpadahngkipene rongamwahu wet, oh wekidala soahng tohto nan sampah.
Met, sang ni amwail karasaras, ohl koaros me kolokol prihsdud en Melkisedek wialahr towe en pwihn en elder kan. Ohl pwukat koaros sang sounpar 18 lel 98 de laudsang, oh arail wehwe nan prihsdud oh mwomwohdiso wekpeseng. Ohl pwukat kak miniminpene duwehte ohl pirien kei, ale kaskuhlpene, oh kamwawhwiala wiepen ar kin kapaiada meteikan.
Kumwail tamtaman me nan sounpwong en Suhno, Ngehi oh Sister Nelson padahk ong me pwulopwul kan en mwomwohdiso wet. Se lukehiong irail en patehng Sapwellimen Kauno pwihn pwulopwul kan oh sewese kapwurepene mehn Israel nan sampah oh nanleng. Kapokonpene wet me keieu apwal, me keieu katapan, oh me keieu doadoahk laud pohn sampah rahnwet!1
Doadoahk wet uhdahn anahne lih akan, pwehki lipwen arail doadoahk kin sansal mwuhr. Eri Soutik wet, I wia pekipek en soukohp ong kumwail, lih en mwomwohdiso wet, en kamwahuiala ahnsou kohkohdo sang ni amwail pahn sewese kapokonpenehn Israel me kasarepesengehr.
Ia wasa me kumwail kak tepda ie?
I kihwei luhk pahieu:
Keieu, I lukei kumwail en iang kapwaiada pekipek en dehr doadoahngki mehn kaweid en nan wehwehkan, de internet oh soahng koaros me rasehng mepwukat me kin kihong kumwail madamada sapwung oh samin erein rahn 10. Kapakapiki pwe ken kak ese mwekid dah me ke men wekidala erein omw pahn wia met. Wekidek me ke pahn kilang sang kaisihsol en rahn eisek wet pahn kopwuriamwei ong uhk. Dahme ke kilangada erein ansou me ke sohte doadoahngki internet en sampah me kin wie kalkaluwete palingenomw? Mie wekidekla ieu met ong ia wasa ke men doadoahngkihong ahmw ansou oh angih? Mie wekideklahn soahng kei me ke kin kesempwaliki wia—menda ma ekiste? I peki kumwail en kilelehdi oh kapwaiada pepehm kan koaros me kohieng kumwail.
Keriau, I luke kumwail en wadek Pwuken Mormon sang met lel imwin pahr wet. Menda uwen apwal ong kumwail pwehki soahng koaros me kumwail songosong en koasoanehdi nan amwail mour, ma kumwail pahn alehda luhk wet sang nan amwail mohngiong unsek, Kauno pahn kaunopada ahl ehu ong kumwail pwe en kak pweida. Oh sang ni amwail pahn kin onop, I inoukihdi me nanleng pahn ritdahng kumwail. Kauno pahn kapaikinkumwailda kaweid laud oh kaudiahl.
Ni amwail pahn kin wadawad, I koangoangehkin kumwail en kilelehdi ire koaros me kosoia, de me pid duwen, Sounkomouro. Eri, kahpw koasoanehdi en kosoia duwen Krais, kapinga Krais, oh padahngki duwen Krais ong amwail peneinei oh kempoakepamwail kan.2 Kumwail oh irail koaros pahn karaniala Sounkomouro sang ni mwekid wet. Oh wekidekla, pil iangahki soahng kopwuriamwei kei pahn tepda wiawi.
Ni mensengo ehu pakair wiawi me pid koasoandi kapw en Rahn Sarawi oh kaskuhl en nan ihmw kan, pahn utuht en Mwomwohdiso wet. Kumwail, riei lih ako, kumwail uhdahn kesempwal ong pweidahn wiepen mwekid en padahk en rongamwahu kapw oh pahrek wet. Menlau padahkihong irail akan me kumwail poakohng dahme kumwail esiesehla sang pwuhk sarawi kan. Padahkihong irail ia mwomwen arail pahn sohpeilahng Sounkomouro oh Sapwellime manaman en kakehlahda oh kamwakel ahnsou me re kin wiahda dihp. Oh padahkihong irail mwomwen arail pahn doadoahngki Sapwellime manaman en kakehlairailda rahn koaros en arail mour.
Kesiluh, wiahda koasoandien kohla nan tehnpas sarawi ansou koaros. Elemwein ke pahn anahne ekis meirongkihla ahmw ansou nan ahmw mour. Ma ke pahn kalapw kohla nan tehnpas sarawi, Kauno pahn ahneki ansou mwahu en padahkihong uhk mwomwen ahmw pahn doadoahngki Sapwellime manaman en Prishdud me kumwail kapaikidahr nan Sapwellime tehnpas sarawi. Ong kumwail me dohsang tehnpas sarawi, I lukehiong kumwail en onopiki laud pwuhk sarawi kan oh padahk kan sang soukohp ieias kan. Rapahki pwe ken kalaudehla wen ahmw ese, wehwehki, oh pepehm kehlail ong tehnpas sarawi kan laudsang mahso.
Nan kapokon en me pwulopwul kan en sampah pwon nan sounpwong en Suhno, I padahngki duwen pwutak men me ah mour wekila ansou me ah pahpa nohno kihsang nah delepwohn me kin ped nan mese oh kihong ehu me kin wakpeseng. En pwutako nohnohu wia lih pwoson mehlel men. E kilang me nah pwutako luhluwetala nan ah pilipil kan oh kak elehiong ah sohte pahn wia ah misin. E kin kohla nan tehnpas sarawi oh kapakapki soangen ahl dah me e kak sewesehki nah pwutako. E ahpw kapwaiada kamwakid kan koaros me kohieng.
Liho nda, “I kehn Ngehno ah kaweidikinie I en kin tehk nein nei pwutako delepwohno ansou kei pwe I en kak kilang dahme mih loale. I sohte ese doadoahngki soangen delepwohno, ahpw ngehno kaweidikinie wasa koaros nan internet de social media me I sohte kin kolongala loale! I ese me Ngehno kin sewese nohno pahpa kan me kin rapahki kaweid pwe re en sinsile neirail serihkan. [Ni tapio] nei pwutako mwehl pahi. … ahpw mwurin rahnte siluh, e kalahngan ongie! E kak kehn wekpesengih.”
Wiewia oh mwekid en nah pwutako wekidekla mehlel. Eh kin kihda sawas laudla nimwarailo, e kalapw kouruhr, oh e tepda rong mwahu eh kin kohla sarawi. E kin pereniki eh ahnsoun doadoahk nan wasahn pepdais en nan tehnpas sarawi oh e kakaunopadahng eh pahn kohla wia doadoahk en misineri.
Kapahieu en luhk me I pahn kihong kumwail, serepein kan me lelehr sounpar en towehda oh iang patehng Pwihn en Sawas Lih akan. I koangoangehkin kumwail en onopiki lepin kaweid me pid kahrepen Pwihn en Sawas en Lih me ahpwte wiawihda. E uhdahn wia mehn kaweid mwahu. E kak kaweidihiuhk en wiahda pein ahmw iren kaweid ong amwail mour. I pil peki rehmwail en kilang kalohk duwen Pwihn en Sawas en Lih me wiawihda kereniong sounpar 20 samwalahro.3 Mie ehu kilel en pakair wet me kin langalang nan ohpis en Presidensi Keieu. I kin audaudkihda peren ansou koaros me I kin wadek. E kawehwehda ihs kumwail oh ihs me Kauno kupwuriki kumwail en wia ansou wet ni amwail pahn wia amwail pwukoah nan kapokonpenehn mehn Israel kan.
Riei lih ako, se anahnei kumwail! Se “anahne amwail kehl, amwail weliakapw mehlel, amwail loalopwoat mehlel, amwail koahiek en kaweid, amwail marain, oh ngilamwail kan.”4 I sohte kak kapokonepene Israel ma sohte kumwail.
I poakpoake oh kapingkihong kumwail, oh met kapaikinkumwailda me kumwail kak liksang sampah ni amwail pahn sawas nan doadoahk apwal oh kesempwal wet. Ma kitail koaros pahn sawaspene, kitail kak wiahda soahng koaros me Samatail me ketiket Nahnleng kupwuriki kitail en kaunopada mwohn ketdo keriau en Sapwellime Iehroso.
Sises Iei Krais. Iei Sapwellime Mwomwohdiso met. Met I kadehdehki ni mwaren Sises Krais, ahmen.